الكوگولدى ىشىمدىككە قاتىستى دۇرىس كوزقاراس
الكوگولدى ىشىمدىككە قاتىستى دۇرىس كوزقاراس
الكوگولگە قاتىستى پروبلەماسى بارىن مويىنداي بىلگەندە، العاشقى ماقالادا اتى اتالعان ٴتونيدىڭ ٶمىرى مۇلدەم وزگەشە بولار ما ەدى. الايدا كوپ ىشسە دە، كوتەرە الاتىنداي كورىنگەندىكتەن، ول ٴبارى جاقسى دەپ ويلادى. نەگە ول وزىنە دۇرىس باعا بەرە المادى؟
بۇل كوپ ىشكەننىڭ اسەرى ەدى. توني مۇنى سەزدى مە، جوق پا، كوپ الكوگولدىڭ اسەرىنەن ونىڭ ميىنىڭ قىزمەتى بۇزىلعان بولاتىن. ال ٴتان جانە سانا-سەزىم مۇشەلەرى ميعا تاۋەلدى. كوپ ىشكەن سايىن، تونيدىڭ ميى ٶزىنىڭ قىزمەتىن دۇرىس اتقارا المايتىنداي دارەجەگە جەتىپ، ول ٶز جاعدايىن دۇرىس باعامداي المادى.
سونىمەن قاتار توني ٸشۋدى قويعىسى كەلمەدى. العاشىندا الەن دە ىشىمدىككە قاتىستى پروبلەماسى بار ەكەنىن مويىندامادى. ول بىلاي دەيدى: «ىشىمدىكتى تىعىپ ٸشىپ ٴجۇردىم جانە ٶزىمدى كوپ ىشكەندە تۇرعان ەشتەڭە جوق دەگەنگە سەندىرۋگە تىرىسىپ باقتىم. ىشىمدىكتەن باس تارتقىم كەلمەدى». توني مەن الەننىڭ ىشكىلىكتىڭ قۇرىعىنا ىلىنگەندەرى توڭىرەگىندەگىلەرگە اپ-ايقىن ەدى. ال وزدەرى مۇنى مويىنداعىسى كەلمەدى. ەكەۋىنە دە شۇعىل ارەكەت ەتۋ كەرەك بولاتىن. بىراق مۇندايدا قالاي ارەكەت ەتكەن دۇرىس؟
ارەكەت ەتىڭىز!
الكوگولدى ىشىمدىكتى شامادان تىس ٸشۋدى دوعارعان كوپ ادام يسانىڭ كەلەسى سوزدەرىنە ساي ارەكەت ەتكەن: «ەگەر «وڭ كوزىڭ» سەنى كۇناعا ازعىرسا، ول سەن ٷشىن «ويىپ الىپ، لاقتىرىپ تاستالعان» سياقتى جوق بولسىن! بۇكىل دەنەڭنىڭ توزاققا تاستالعانىنان گورى ٴبىر مۇشەسىنەن ايىرىلعانىڭ ارتىعىراق بولار ەدى» (ماتاي 5:29).
ارينە، يسا بۇل جەردە ادام ٶزىن-ٶزى زاقىمداۋ كەرەك دەمەگەن. ول قۇدايدىڭ ىقىلاسىنان ايىراتىن نارسەلەردەن ارىلۋدىڭ ماڭىزدىلىعىن بەينەلى سوزدەرمەن كورسەتكەن. راس، ىشكىلىكتەن ارىلۋ ٷشىن كوپ كۇش جۇمساۋىمىز قاجەت ٵرى تاندىك جانە ەموسيونالدىق جاعىنان ازاپ شەگۋىمىز مۇمكىن. دەسە دە، وسىلاي ەتكەنىمىز ىشكىلىككە سالىنۋعا الىپ كەلەتىن وي قالپىنان جانە جاعدايلاردان ساقتايدى. سوندىقتان ەگەر بىرەۋ الكوگولدى ىشىمدىكتەردى شامادان تىس ٸشىپ جۇرگەنىڭىزدى ايتسا، ونىڭ مولشەرىن ازايتىڭىز a. ال بۇل قولىڭىزدان كەلمەسە، مۇلدەم اۋزىڭىزعا الماڭىز. ٶمىرىڭىزدى ويران ەتكەنشە، اۋىر بولسا دا، وسىلاي ەتكەنىڭىز دۇرىس.
ماسكۇنەم بولماعانمەن، تىم كوپ ىشەسىز بە؟ ولاي بولسا، كەلەسى قادامداردى جاساعانىڭىز دۇرىس.
كومەك كوزى
1. شىن جۇرەكتەن ۇنەمى قۇدايعا دۇعا ەتىڭىز. ەحوبا قۇدايعا ۇنامدى بولعىسى كەلەتىندەر ٷشىن كيەلى جازبالاردا مىناداي كەڭەس جازىلعان: «ەش نارسەنى ۋايىمداماي، بارلىق جاعدايدا وتىنىشتەرىڭدى قۇدايعا سيىنىپ، تىلەكپەن، شۇكىرشىلىكپەن بىلدىرىڭدەر! سوندا قۇدايدىڭ ادام اقىلىنان اسقان تىنىشتىعى سەندەردىڭ جۇرەكتەرىڭ مەن وي-سانالارىڭدى ٴماسىح يسادا ساقتايدى» (فىلىپىلىكتەرگە 4:6، 7). وسىنداي جان تىنىشتىعىنا كەنەلۋ ٷشىن نە جايلى دۇعا ەتۋ كەرەك؟
ىشىمدىككە قاتىستى پروبلەماڭىز بار ەكەنىن جانە وعان ٶزىڭىز كىنالى ەكەنىڭىزدى مويىنداڭىز. بۇل ماسەلەنى شەشۋ ٷشىن نە ىستەمەك ويىڭىز بار ەكەنىن قۇدايعا ايتساڭىز، ونىڭ باتاسىنا كەنەلەسىز. وسىلايشا جانىڭىز جاي تابادى ٵرى جاعدايدى ۋشىقتىرىپ المايسىز. «كۇنالارىن جاسىرعان جان وركەندەمەيدى، ولارىن مويىنداپ، باس تارتقان راقىم كورەدى» (ناقىل سوزدەر 28:13). سونداي-اق يسا پايعامبار: «ازعىرىلۋىمىزعا جول بەرمەي، جاماندىقتان ٴبىزدى ساقتاي گور»،— دەپ قۇدايعا جالبارىنۋ كەرەكتىگىن ايتقان (ماتاي 6:13). ال قالاي دۇعالارىمىزعا ساي ارەكەت ەتۋگە بولادى جانە قۇداي بىزگە قالاي جاۋاپ بەرەدى؟
2. قۇداي سوزىنەن كۇش الىڭىز. «قۇدايدىڭ ٴسوزى ٴتىرى، اسەرى دە كۇشتى... ىشكى دۇنيەمىزدەگى وي-نيەتىمىزدى اشكەرەلەپ، باعالايدى» (ەۆرەيلەرگە 4:12). كيەلى كىتاپتى كۇندەلىكتى وقىپ، ونىڭ ۇستىنەن وي جۇگىرتكەندەرى بۇرىن ىشكىلىككە سالىنعان كوپ ادامعا جامان ادەتىنەن ارىلۋعا كومەكتەسكەن. قۇدايدى قاستەرلەگەن زابۋر جىرشىسى بىلاي دەگەن: «مىناداي ادام شىنىمەن باقىتتى: ول قۇدايسىزدار كەڭەسىنە بارمايدى... قايتا، ول جاراتقاننىڭ تالىمىنە قۋانادى، كۇنى-ٴتۇنى سول تۋرالى ويلانادى... نە ىستەسە دە، ول تابىسقا جەتەدى» (زابۋر 1:1—3).
ەحوبا كۋاگەرلەرىمەن كيەلى كىتاپتى زەرتتەگەننىڭ ارقاسىندا جامان ادەتىنەن ارىلعان الەن بىلاي دەيدى: «كيەلى كىتاپ پەن ونداعى پرينسيپتەردىڭ كومەگىمەن ٸشۋدى قويماعاندا، قازىر ٴتىرى بولماس تا ەدىم».
3. ۇستامدىلىققا ۇيرەنىڭىز. كيەلى كىتاپتا ماسىحشىلەر قاۋىمىنداعى بۇرىن ىشكىش بولعان ادامداردىڭ قۇدايدىڭ رۋحى ارقىلى اقتالعانى ايتىلعان (قورىنتتىقتارعا 1-حات 6:9—11). بىرىنشىدەن، قۇداي رۋحى ولارعا ۇستامدىلىق تانىتىپ، شەكتەن تىس توي-دۋمانعا، ماسكۇنەمدىككە سالىنباۋعا كومەكتەستى. «اراق-شاراپ ٸشىپ، ماس بولماڭدار، بۇل جۇگەنسىزدىككە اپارادى! قايتا، كيەلى رۋحقا كەنەلە بەرىڭدەر!» (ەفەستىكتەرگە 5:18؛ عالاتتىقتارعا 5:21—23). يسا پايعامبار: «قۇدايدان سۇراڭدار، سوندا ول سەندەرگە بەرەدى... كوكتەگى اكەنىڭ وزىنەن سۇراعاندارعا كيەلى رۋحىن سيلايتىنى ەشبىر ٴشۇباسىز!»— دەگەن (لۇقا 11:9، 13).
ەحوبا قۇدايعا لايىقتى تۇردە عيبادات ەتكىسى كەلەتىندەر كيەلى كىتاپتى وقۋ جانە زەرتتەۋ، سونداي-اق ٴجيى ٵرى شىن جۇرەكتەن دۇعا ەتۋ ارقىلى ۇستامدىلىققا ۇيرەنە الادى. ەشقاشان ەڭسەلەرىڭىز تۇسپەسىن، قايتا، قۇداي سوزىندەگى كەلەسى ۋادەدەن كۇش الىڭىزدار: «قۇداي رۋحىنا قىزمەت ەتۋشى وسى رۋحقا ٴتان ماڭگىلىك ٶمىردى ورادى. جاقسىلىق جاساۋدان تالمايىق! سەبەبى بۇدان شارشاپ، باس تارتپاساق، ٴتيىستى ۋاقىتتا ونىڭ يگىلىكتى ٶنىمىن قۇدايدان قابىلدايتىن بولامىز» (عالاتتىقتارعا 6:8، 9).
4. جورا-جولداستى دۇرىس تاڭداڭىز. «دانامەن جولداس بولعان دانا بولار، نادانمەن جولداس بولعان بۇزىلار» (ناقىل سوزدەر 13:20). جولداستارىڭىزعا ىشىمدىكتى شاماڭىزعا قاراي ٸشۋدى شەشكەنىڭىزدى ايتىڭىز. قۇداي ٴسوزى «ماسكۇنەمدىك، ىردۋ-دىردۋ ويىن-ساۋىقتار، ماس جىن-ويناقتاردى» قويعاندا، بۇرىنعى جولداستارىڭىزدىڭ ەندى وزدەرىنە ‹قوسىلماعاندىقتارىڭىزعا تاڭعالىپ، نالىپ، سىزدەردى جاماندايتىنىن› ەسكەرتەدى (پەتىردىڭ 1-حاتى 4:3، 4). ىشىمدىكتى شەگىن ٴبىلىپ ىشەم دەگەن شەشىمىڭىزدى قولدامايتىن ادامدارمەن ارالاسۋدى دوعارعانىڭىز ٴجون.
5. ناقتى شەك قويىڭىز. «بۇل كۇناكار دۇنيەنىڭ ٶمىر ٴسۇرۋ سالتىن ۇلگى ەتپەڭدەر، قايتا، وي-تىلەكتەرىڭ قۇدايدىڭ جاڭارتۋىمەن تۇبەگەيلى وزگەرسىن! وسىلاي سەندەر ونىڭ ەركىن — نەنىڭ يگىلىكتى، ۇنامدى جانە كەمەلدى ەكەنىن اجىراتا بىلەتىن بولاسىڭدار» (ريمدىكتەرگە 12:2). ارالاساتىن ورتاڭىزدىڭ نەمەسە «وسى دۇنيەنىڭ» ىقپالىنا بەرىلمەڭىز. قايتا، كيەلى كىتاپ پرينسيپتەرىنىڭ ٶز شەگىڭىزدى انىقتاۋعا كومەكتەسۋىنە مۇمكىندىك بەرىڭىز، سوندا ٶمىر سالتىڭىز قۇدايعا ۇنامدى بولادى. بىراق ٶز شەگىڭىزدى قالاي انىقتاي الاسىز؟
ەگەر جاعدايعا دۇرىس باعا بەرۋ قابىلەتىڭىزدىڭ السىرەگەنىن بايقاساڭىز، شاماڭىزدان ارتىق ٸشىپ قويعانىڭىز. سول سەبەپتى، وسىنداي جاعدايعا دەيىن ىشۋدەن اۋلاق بولىڭىز. اقتالۋعا دەگەن بەيىمدىلىكتىڭ ىشىمدىككە قاتىستى شىنشىل بولۋىڭىزعا كەدەرگى جاساۋىنا جول بەرمەڭىز. وزىڭىزگە ناقتى شەك قويىپ، بايسالدىلىق تانىتىڭىز. بۇل ٴسىزدى ماس بولىپ قالۋدان نە ىشكىلىككە سالىنۋدان ساقتايدى.
6. «جوق» دەۋدى ۇيرەنىڭىز. «سەندەردىڭ «ٴيا» دەگەندەرىڭ شىنىمەن «ٴيا»، «جوق» دەگەندەرىڭ شىنىمەن «جوق» بولسىن!» (ماتاي 5:37). بىرەۋ تازا نيەتپەن «ال، ال» دەپ تىم قيناپ جاتسا، ىلتيپاتپەن «جوق» دەپ ايتۋدى ۇيرەنىڭىز. «سويلەسكەندە ۇدايى نيەتتەرىڭ يگى، سوزدەرىڭ ٴدامدى بولسىن، ٴارقايسىسىنا قالاي جاۋاپ بەرۋ كەرەك ەكەنىن بىلىڭدەر» (قولوستىقتارعا 4:6).
7. وزگەلەردەن كومەك ىزدەڭىز. ىشكىلىكتەن ارىلۋ شەشىمىڭىزدى قولداپ، رۋحاني نىعايتاتىن دوستارىڭىزدىڭ كومەگىنە جۇگىنىڭىز. «بىرەۋگە قاراعاندا ەكەۋدىڭ ارتىق ەكەندىگى انىق؛ ويتكەنى كەلەتىن جاقسى تابىس تا سولاردىڭ ەكەۋىنە ورتاق: ەگەر بىرەۋى قۇلاپ قالسا، ەكىنشىسى ٶز جولداسىن ورنىنان تۇرعىزادى» (ەككلەسياست 4:9، 10؛ جاقىپ 5:14، 16). قۇراما شتاتتارداعى ماسكۇنەمدىكتەن ەمدەيتىن ٴبىر مەكەمەدە: «كەيدە ٸشۋدى ازايتۋ وڭاي بولماۋى مۇمكىن. سوندىقتان وتباسى مۇشەلەرى مەن دوستارىڭدىزدان كومەكتەسۋىن ٶتىنىڭىز»،— دەپ كەڭەس بەرىلەدى.
8. شەشىمىڭىزدەن تايماڭىز. «قۇدايدىڭ ايتقاندارىن قۇر ەستىپ قانا قويماي، ىسكە اسىرۋشى بولىڭدار! ايتپەسە وزدەرىڭدى-وزدەرىڭ الدايسىڭدار. ال كىم كەمەلدى تاعىلىمعا — كۇنانىڭ قۇرساۋىنان ازات ەتەتىن ىزگى حابارعا — ۇقىپتى دەن قويىپ، ونىسىن ۇدايى جالعاستىرا بەرسە، سول ۇمىتشاق تىڭداۋشى ەمەس، جۇزەگە اسىرۋشى بولىپ، ٸس-ارەكەتىندە جارىلقانباق» (جاقىپ 1:22، 25).
ىشكىلىكتەن ٴبىرجولا ارىلۋ
ىشىمدىكتى كوپ ىشەتىن ادامنىڭ ٴبارى بىردەي ماسكۇنەم بولا بەرمەيدى. بىراق كەيبىرەۋلەر تىم كوپ نەمەسە ٴجيى ىشەتىندىكتەن ىشكىلىككە تاۋەلدى بولىپ قالادى. ىشكىلىككە سالىنعان ادام الكوگولگە تاندىك جانە پسيحيكالىق جاعىنان تاۋەلدى بولىپ قالعاندىقتان، تەك ەرىك كۇشى مەن رۋحاني كومەكتىڭ ارقاسىندا ٸشۋدى قويا الماۋى مۇمكىن. الەن بىلاي دەيدى: «ىشكىلىكتى قويعاندا مەن قاتتى قينالدىم. سوندا، رۋحاني كومەككە قوسا ەمدەلۋىم دە كەرەك ەكەنىن ٴتۇسىندىم».
كوپتەگەن ماسكۇنەمدەر ٴدارى-دارمەكتىڭ كومەگىنسىز ىشكىلىكتەن ٴبىرجولا ارىلا المايدى b. كەيبىرەۋلەرگە ىشىمدىكتى قويۋ كەزىندەگى كۇيزەلىسكە توتەپ بەرۋ نەمەسە قاتتى قالاۋدى باسۋ ٷشىن ارنايى مەكەمەلەردە ەمدەلۋ قاجەت. يسا پايعامبار ايتقانداي: «دارىگەر دەنى ساۋعا ەمەس، اۋرۋ ادامعا قاجەت» (مارقا 2:17).
قۇداي باسشىلىعىن ۇستانۋدىڭ پايداسى
كيەلى كىتاپتاعى ىشىمدىككە بايلانىستى دانا كەڭەستەر شىنايى قۇدايدان كەلگەن. ول بىزگە بار جاقسىلىقتى تىلەيدى، سونداي-اق قازىر جانە ماڭگى باقىتتى بولعانىمىزدى قالايدى. ىشىمدىكتى قويعانىنا جيىرما ٴتورت جىل بولعان الەن بىلاي دەپ ەسىنە الادى: «مۇلدەم باسقا ادام بولۋىم مۇمكىن ەكەنىن، ەحوبا ماعان ٶمىرىمدى جاقسى جاققا وزگەرتۋىمە كومەكتەسكىسى كەلەتىنىن... (وسى جەردە وتكەن ٶمىرى ەسىنە ٴتۇسىپ، كوزدەرى جاسقا تولعان الەن ىركىلىپ قالدى) مەنىڭ جاعدايىمدى تۇسىنەتىنىن، قامىمدى ويلاپ، قاجەتتى كومەك بەرەتىنىن ٴبىلۋ قانداي كەرەمەت. بۇل سوزبەن ايتىپ جەتكىزگىسىز سەزىم»،— دەدى.
كوپ ٸشىپ جۇرسەڭىز نەمەسە ماسكۇنەمدىكتىڭ قۇرىعىنا ٴتۇسىپ قالعان بولساڭىز، ودان ارىلۋ مۇمكىن ەمەس نە قولىمنان كەلمەيدى دەگەن ويعا جول بەرمەڭىز. الەن جانە سول سياقتى جاعدايدا بولعان باسقا دا كوپتەگەن ادامدار شاماسىن ٴبىلىپ ٸشۋدى ۇيرەنگەن نە مۇلدەم قويعان. بۇنىسىنا ولار ەش وكىنبەيدى، ٴسىز دە وكىنبەيتىن بولاسىز!
ىشىمدىكتى شاماڭىزدى ٴبىلىپ ٸشۋدى نە ودان مۇلدەم باس تارتۋدى شەشسەڭىز دە قۇدايدىڭ سۇيىسپەنشىلىكپەن بەرگەن كەلەسى كەڭەسىنە قۇلاق اسىڭىز: «و، ەگەر وسيەتتەرىمە قۇلاق اسساڭدار عوي! سوندا سەندەردەگى اماندىق پەن تىنىشتىق سارقىلماس وزەن سەكىلدى، ادىلدىك تە تەڭىز تولقىندارىنداي شەكسىز بولار ەدى!» (يشايا 48:18).
[سىلتەمە]
a 8-بەتتەگى «ىشىمدىككە تاۋەلدىمىن بە؟» دەگەن قورشاۋدى قاراڭىز.
b بۇگىندە كوپتەگەن ەمدەۋ ورتالىقتارى، اۋرۋحانالار مەن ەمدەۋ باعدارلامالارى بار. «كۇزەت مۇناراسى» قانداي دا ٴبىر ەمدەۋ جولدارىن ۇسىنبايدى. اركىم ٶزى ەمدەۋ تاسىلدەرىن سارالاپ-سالماقتاپ، كيەلى كىتاپ پرينسيپتەرىنە قايشى كەلمەيتىنىن تاڭداۋى قاجەت.
[8-بەتتەگى سۋرەت/قورشاۋ]
ىشىمدىككە تاۋەلدىمىن بە؟
وزىڭىزدەن بىلاي دەپ سۇراڭىز:
•ىشىمدىكتى بۇرىنعىعا قاراعاندا كوبىرەك ٸشىپ ٴجۇرمىن بە؟
•بۇرىنعىعا قاراعاندا ٴجيى ٸشىپ ٴجۇرمىن بە؟
•كۇشتىرەك ىشىمدىكتەر ٸشىپ ٴجۇرمىن بە؟
•ىشىمدىكتى پروبلەمالارىمدى ۇمىتۋ نە سترەستى باسۋ ٷشىن ىشەمىن بە؟
•مەنىڭ ىشىمدىك ٸشىپ جۇرگەنىم دوسىمدى نە تۋىسىمدى مازالاپ جۇرگەن جوق پا؟
•ىشىمدىكتىڭ كەسىرىنەن ۇيدە، جۇمىستا نە ساپار شەككەندە پروبلەما تۋىنداعان جوق پا؟
•ٴبىر اپتا بويى ىشىمدىك ىشپەي جۇرە الامىن با؟
•وزگەلەر ىشىمدىك ىشپەي وتىرسا مەن ٶزىمدى ىڭعايسىز سەزىنەمىن بە؟
•ىشىمدىكتى قانشا ىشەتىنىمدى وزگەلەردەن جاسىرامىن با؟
ەگەر سۇراقتاردىڭ بىرىنە نە بىرنەشەۋىنە «ٴيا» دەپ جاۋاپ بەرسەڭىز، بۇل — قانداي دا ٴبىر قادام جاساۋىڭىز كەرەك دەگەن ٴسوز.
[9-بەتتەگى سۋرەت/قورشاۋ]
ىشىمدىككە قاتىستى دانا شەشىم قابىلدايىق
ىشىمدىك ىشپەس بۇرىن مىنا جايلى ويلانىپ كورىڭىز:
•ىشىمدىك ىشكەنىم اقىلدىلىققا جاتا ما، الدە ودان باس تارتۋىم كەرەك پە؟
ۇسىنىس: شاماسىن ٴبىلىپ ىشە المايتىن ادامنىڭ مۇلدەم ىشپەگەنى ٴجون.
•قانشا ىشۋگە بولادى؟
ۇسىنىس: ىشىمدىك ويلاۋ قابىلەتىڭىزگە اسەر ەتپەي تۇرعاندا، شاماڭىزدى انىقتاپ الىڭىز.
•قاي كەزدە ىشۋىمە بولادى؟
ۇسىنىس: مىناداي جاعدايلاردا ىشپەگەن دۇرىس: كولىك جۇرگىزگەندە نەمەسە مۇقياتتىلىقتى تالاپ ەتەتىن وزگە دە ىستەرمەن جانە ٴدىني ىستەرمەن اينالىسقاندا، سونداي-اق كەيبىر ٴدارى-دارمەكتەر قابىلداعاندا. ال ايەلدەر جۇكتى كەزىندە.
•قاي جەردە ىشۋىمە بولادى؟
ۇسىنىس: لايىقسىز جەردە نەمەسە جاسىرىن، سونداي-اق ىشكەندى جاقتىرمايتىن ادامداردىڭ كوز الدىندا ىشپەگەن دۇرىس.
•كىممەن ىشكەن دۇرىس؟
ۇسىنىس: ىشكىلىككە سالىنعان ادامدارمەن ەمەس، وزىڭىزگە جاقسى اسەر ەتەتىن دوستارمەن جانە تۋىستارمەن ىشكەنىڭىز دۇرىس.
[10-بەتتەگى سۋرەت/قورشاۋ]
قۇداي ٴسوزى ماسكۇنەمدىكتەن ارىلۋعا كومەكتەستى
تايلاندتا تۇراتىن سيۋپوت ماسكۇنەم بولعان ەدى. العاشىندا ول تەك كەشقۇرىم ىشەتىن. كەلە-كەلە تاڭەرتەڭ، سونان سوڭ كۇندىز دە ىشەتىندى شىعاردى. ٴجيى ول ماس بولۋ ٷشىن ىشەتىن. ٴبىر كۇنى سيۋپوت ەحوبا كۋاگەرلەرىمەن كيەلى كىتاپتى زەرتتەي باستادى. ەحوبا قۇدايدىڭ ماسكۇنەمدىكتى ايىپتايتىنىن بىلگەن ول ٸشۋدى قويدى. الايدا ۋاقىت وتە كەلە سيۋپوت وتباسى مۇشەلەرىنىڭ وكىنىشىنە قاراي، جامان ادەتىنە قايتا ورالدى.
دەگەنمەن سيۋپوت ەحوباعا دەگەن سۇيىسپەنشىلىگىن جوعالتپاعان ەدى جانە دۇرىس عيبادات ەتكىسى كەلەتىن. دوستارى دا وعان كومەكتەسۋىن دوعارعان جوق. ولار سيۋپوتتىڭ وتباسى مۇشەلەرىن ودان باس تارتپاۋعا، قايتا، ونىمەن كوبىرەك ۋاقىت وتكىزۋگە تالپىندىردى. قورىنتتىقتارعا 1-حات 6:10 داعى «ماسكۇنەمدەر... ٷشىن قۇداي پاتشالىعىندا ورىن جوق!» دەگەن سوزدەر سيۋپوتقا ٶز جاعدايىنا تۋرا قاراۋعا كومەكتەستى. ول ٶزىنىڭ جامان ادەتىنەن ارىلۋ ٷشىن بارىنشا كۇش سالۋى كەرەك ەكەنىن ٴتۇسىندى.
سيۋپوت ەندى ىشىمدىكتەن مۇلدەم قول ۇزۋگە بەل بۋدى. ٴسۇيتىپ، قۇدايدىڭ قۇدىرەتىنىڭ، كيەلى كىتاپتىڭ، وتباسى مەن ەحوبا كۋاگەرلەرىنىڭ كومەگىمەن ول ىشىمدىككە دەگەن قۇشتارلىعىن جەڭە الدى. كەيىن سيۋپوت ٶمىرىن قۇدايعا ارناعاندا ايەلى مەن ەكى بالاسىنىڭ قۋانىشتارى قوينىنا سيمادى. قازىر ول ٶزى ارقاشان قالاعانداي، قۇدايمەن تىعىز قارىم-قاتىناسقا يە جانە وزگەلەرگە رۋحاني كومەك كورسەتىپ ٴجۇر.