Мұсаның 3-жазбасы 14:1—57
14 Ехоба Мұсаға тіл қатып, тағы былай деді:
2 “Алапеспен ауырған адам таза деп жарияланатын күні орындалу керек заң мынадай: оны діни қызметкерге апару керек+.
3 Діни қызметкер қостың сыртына шығып, науқасты қарап шықсын. Егер ол алапесінен айыққан болса,
4 діни қызметкер оған екі адал құсты, қарағай бұтағын, ал қызыл түсті жіп пен сайсағыз өсімдігін әкелуді бұйырсын.
5 Сосын діни қызметкер құстың біреуін ағын су құйылған қыш ыдыстың үстінде бауыздатсын.
6 Ол тірі құсты және қарағай бұтағын, ал қызыл жіп пен сайсағызды алып, олардың бәрін ағын су үстінде бауыздалған құстың қанына батырып алсын.
7 Сөйтіп, оны алапестен тазарған адамға жеті рет бүркісін. Сосын адамды таза деп жариялап, тірі құсты далаға қоя берсін+.
8 Тазару рәсімінен өтіп жатқан адам киімін жуып, денесіндегі түкті түгел қырсын, сондай-ақ сумен үсті-басын жусын, сонда таза болады. Содан кейін ғана қосқа кіруіне болады, бірақ жеті күн бойы шатырының сыртында тұрсын.
9 Жетінші күні шашын, сақал-мұрты мен қасын қырып тастасын. Осының бәрін түгел қырып, киімін жусын, сондай-ақ сумен үсті-басын жусын, сонда таза болып саналады.
10 Сегізінші күні ол еш кемістігі жоқ екі жас қошқар, еш кемістігі жоқ бір жасқа дейінгі ұрғашы тоқты+, астық тартуы+ ретінде май қосылған сапалы ұннан ефаның оннан үш бөлігін* және бір лог* май алып келсін+.
11 Адамды таза деп жариялайтын діни қызметкер оны және оның әкелгендерін Ехобаның алдына, кездесу шатырының кіреберісіне, апарады.
12 Сөйтіп, діни қызметкер айып құрбандығы үшін шалынған жас қошқардың+ бірін және бір лог майды алып, тербеп әкелетін тарту ретінде Ехобаның алдында әрі-бері тербейді+.
13 Сосын жас қошқарды қасиетті орында, күнә үшін әкелінетін және түгел өртелетін құрбандық сойылатын жерде, сояды+. Күнә үшін әкелінетін құрбандық сияқты, айып құрбандығы да діни қызметкерге тиесілі+. Ол аса киелі+.
14 Бұдан соң діни қызметкер айып құрбандығының қанынан алып, тазару рәсімінен өтіп жатқан адамның оң құлағының сырғалығына, оң қолы мен оң аяғының бас бармағына жақсын.
15 Сосын бір лог майдың+ біразын өзінің сол алақанына құйып алсын да,
16 оң қолының саусағын сол майға батырып, Ехобаның алдында жеті рет бүркісін.
17 Сондай-ақ алақанындағы майдан тазару рәсімінен өтіп жатқан адамның оң құлағының сырғалығына, оң қолы мен оң аяғының бас бармағына жағылған айып құрбандығының қанының үстіне жақсын.
18 Алақанында қалған майды діни қызметкер оның басына жағып, Ехобаның алдында күнәсін өтейді+.
19 Діни қызметкер күнә үшін әкелінген құрбандықты+ шалып, тазару рәсімінен өтіп жатқан адамның күнәсін өтесін, содан кейін түгел өртелетін құрбандықты сойсын.
20 Сосын оны астық тартуымен+ бірге құрбандық ошағында өртеп, әлгі адамның күнәсін өтесін+, сонда ол таза болып саналады+.
21 Егер ол кедей болып, мұндай құрбандық беруге жағдайы келмесе, күнәсін өтеу үшін айып құрбандығына бір жас қошқар әкеліп, тербеп ұсынатын тарту ретінде ұсынсын. Мұнымен бірге астық тартуы ретінде май қосылған сапалы ұннан ефаның оннан бір бөлігін* және бір лог май әкелсін.
22 Сондай-ақ жағдайына қарай, екі кептер не екі жас көгершін алып келсін: біреуін күнә үшін құрбандыққа, екіншісін түгел өртелетін құрбандыққа+.
23 Сегізінші күні+ адам таза деп жариялануы үшін бұларды Ехобаның алдына, яғни кездесу шатырының кіреберісіне әкеліп, діни қызметкерге берсін+.
24 Діни қызметкер айып құрбандығына әкелінген жас қошқарды+ және бір лог майды алып, тербеп ұсынатын тарту ретінде Ехобаның алдында әрі-бері тербесін+.
25 Сосын қошқарды сойсын да, қанынан алып, тазару рәсімінен өтіп жатқан адамның оң құлағының сырғалығына, оң қолы мен оң аяғының бас бармағына жақсын+.
26 Бұдан соң діни қызметкер сол қолының алақанына май құйып+,
27 оған оң қолының саусағын батырсын да, Ехобаның алдында жеті рет бүркісін.
28 Содан кейін алақанындағы майдан тазару рәсімінен өтіп жатқан адамның оң құлағының сырғалығына, оң қолы мен оң аяғының бас бармағына жағылған айып құрбандығының қанының үстіне жақсын.
29 Ал қалған майды оның басына жағып, Ехобаның алдында күнәсін өтесін.
30 Діни қызметкер адамның жағдайына қарай әкелген кептерлерін не жас көгершіндерін алып+,
31 оның бірін күнә үшін құрбандыққа, екіншісін түгел өртелетін құрбандыққа шалу керек+. Ол бұларды астық тартуымен бірге ұсынсын. Осылай діни қызметкер тазару рәсімінен өтіп жатқан адамның күнәсін Ехобаның алдында өтесін+.
32 Бұл — алапеспен ауырған, бірақ таза деп жариялануына қажетті нәрселерді әкелуге жағдайы келмейтін адам үшін берілген заң”.
33 Ехоба сөзін жалғап, Мұсаға былай деді:
34 “Мен иеліктеріңе+ беріп отырған Қанахан жеріне+ келгеннен кейін, үйлеріңе алапестің жұғуына жол беремін+.
35 Сонда үйдің иесі діни қызметкерге келіп: “Үйімде алапеске ұқсаған дақ пайда болды”,— деп айтсын.
36 Діни қызметкер дақты көрмес бұрын, үйдегі дүние-мүліктің бәрін сыртқа шығаруды бұйырсын. Сонда олар таза емес деп жарияланбайды. Бұдан кейін діни қызметкер үйге кіріп көрсін.
37 Үй қабырғасындағы дақтарды тексергенде, олардың түсі сарғыш-жасыл не қызғылт болса және қабырғаға тереңдей түскен болып көрінсе,
38 онда діни қызметкер сыртқа шығып, үйді жеті күнге жауып тастасын+.
39 Жетінші күні ол келіп, үйді тағы қарап шықсын. Егер дақтар қабырғаға жайылған болса,
40 оның дағы бар тастарын алып, қаланың сыртындағы арам нәрселер тастайтын жерге шығаруды бұйырсын.
41 Сондай-ақ үйдің ішкі қабырғаларының сылағын түгел қырып, қоқысты қала сыртындағы арам нәрселер тастайтын жерге шығаруды тапсырсын.
42 Сөйтіп, алынған тастардың орнына басқа тастарды қалатып, үйді жаңа лай сылақпен сылатсын.
43 Егер үйдің тастары алынып, ескі сылағы қырылып, қайта сыланғаннан кейін де дақ пайда болса,
44 діни қызметкер келіп, оны тексерсін. Егер дақ үйдің ішкі қабырғаларына жайылған болса, онда бұл — жұқпалы алапес+. Ол үй таза емес.
45 Діни қызметкер үйді бұзып, оның тастарын, бөренелері мен бүкіл сылағын қала сыртындағы таза емес нәрселер тастайтын жерге шығаруды бұйырсын+.
46 Егер кімде-кім сол үйге жабық тұрған күндері кірсе+, кешке дейін таза емес болып саналады+.
47 Сондай-ақ кім ондай үйде жатса не тамақ жесе, киім-кешегін жусын.
48 Ал егер діни қызметкер келіп, үйді қарағанда, сылағы жаңартылғаннан кейін үйде дақ қайта пайда болмаса, оны таза деп жарияласын, өйткені дақ жоқ болып кетті.
49 Діни қызметкер үйге тазарту рәсімін жасау үшін екі құсты, қарағайдың бұтағын, ал қызыл жіпті және сайсағызды+ алсын.
50 Сөйтіп, құстың біреуін ағын су құйылған қыш ыдыстың үстінде бауыздасын.
51 Кейін қарағай бұтағын, сайсағызды, ал қызыл жіп пен тірі құсты алып, оларды ағын су үстінде бауыздалған құстың қанына батырып, үй жаққа қарай жеті рет бүркісін+.
52 Осылай ол құстың қанын, ағын суды, тірі құсты, қарағай бұтағын, сайсағыз бен ал қызыл жіпті қолданып, үйді арам нәрседен тазарту рәсімін жасасын.
53 Тірі құсты қала сыртына шығарып, далаға ұшырып жіберсін. Осылай ол үйді арам нәрседен арылтады* да, үй таза болып саналады.
54 Бұл заң алапес ауруының кез келген түріне, иекке және басқа шыққан жараға+,
55 киімде не үйде пайда болған алапеске+,
56 терідегі ісікке, бөртпеге және даққа+ қатысты.
57 Бұл заң бір нәрсенің қай кезде таза, қай кезде таза емес екенін анықтау үшін берілді+. Алапеске қатысты заң, міне, осындай+”.
Сілтемелер
^ Яғни 6,6 л. Ә14 қосымшасын қараңыз.
^ 1 лог 0,31 л-ге тең. Ә14 қосымшасын қараңыз.
^ Яғни 2,2 л. Ә14 қосымшасын қараңыз.
^ Сөзбе-сөз “күнәсін өтейді”.
