ATUAQQISSAAGASSAQ 26
Asanninneq ernumajunnaarnissamut iluaqutigisarparput
“Naalakkap najormanga siooragisassaqanngilanga.” – TUSS 118:6.
ERINARSUUT 105 ‘Guuti tassaavoq asanninneq’
QILANAARTUUT *
1. Annilaanganerit nalinginnaasut ilaat suuppat?
PISIMASUT uku eqqarsaatigikkit. Nestor nulianilu María pisariaqartitsiffiunerusumi kiffartorusupput. * Taamaaliorumallutilli aningaasartuutitik annikillisittariaqarpaat. Taamaattorli pilluarpallaannginnissartik ernumassutigaat. Biniami nunami Jehovap Nalunaajaasuisa akerlilersorneqarfigisaanni imermut morsutsitaavoq, malersugaalersinnaallunilu paasigamiuk annilaangalerpoq. Allamilli upperisaqalersimanini pillugu ilaquttani qanoq qisuariassanersut suli ernumassutigineruaa. Valériep siaruaatipallattartumik kræfteqalerami pilattaasartumik aalersortinnginnissamik Biibilimi ilinniartitsissummik ataqqinnittumik nassaarnissani sapernartippaa. Taamaattumik toqunissaminik annilaanngateqarmat paasinarpoq.
2. Sooq annilaangasarnerput aquttariaqarparput?
2 Taakkununnga assingusumik misigisaqarnikuuit? Taava kisimiinngilatit. Annilaangasarnitta aqunnissaa ilinnianngikkutsigu allaat Jehovamut attaveqarnitsinnut ajoqutaasumik aalajangiinerluttarnissarput ilimanarnerussaaq. Tamannarpiarlu Saatanip kissaatigaa. Aamma annilaangasarnerput atorluarlugu Jehovap inatsisaanik, ilaatigut nutaarsiassanik nuannersunik oqaluussinissamik peqqussummik, unioqqutitsiniarsaritittarpaatigut. (Saqq 12:17) Saatani ajortuullunilu naakkittaallunilu pissaaneqarpoq. Akiorsinnaavalli. Qanoq?
3. Suna qununnginnissamut iluaqutigissavarput?
3 Jehovap asagaatigut – tassa najoraatigut – qularinngikkutsigu Saatanip qunulersissinnaassanngilaatigut. (Tuss 118:6) Assersuutigalugu Tussiaat 118-imik allattoq erloqinartorsiungaarpoq. Qaffasissumik inissisimaffillit akerarpassuisa ilagaat (versit 9, 10). Ilaannikkut tatineqangaartarpoq (versi 13). Aamma Jehovamit sakkortuumik perorsaatissinneqarsimavoq (versi 18). Tussiaasiortorli ima erinarsornissamut kajumissisinneqarpoq: “Siooragisassaqanngilanga.” Suna pissutigalugu aarlerinngila? Jehovamit perorsaatissinneqaraluarluni nalunngilaa Ataatami qilammiusup asangaaraani. Tussiaasiortup qularinngilaa qanorluunniit ittunik nalaataqaraluaruni Guutiminit asannittumit ikiorneqassalluni. – Tuss 118:29.
4. Guutip asagaatigut qularinngikkutsigu annilaanganerit suut qaangersinnaavagut?
4 Jehovap asagaatigut qularinngittariaqarparput. Tamanna annilaanganerit nalinginnaasut pingasut qaangernissaannut, tassa (1) ilaquttatta pilersorsinnaajunnaarnissaasa ernumassutiginnginnissaanut, (2) inuit qunuginnginnissaannut aamma (3) toqup annilaanngatiginnginnissaanut, iluaqutigissavarput. Immikkoortumi siullermi qatanngutit eqqaaneqartut Guutimit asaneqarnertik qularinnginnamikku annilaangajunnaarput.
PILERSUISINNAAJUNNAARNISSAP ERNUMASSUTIGINERA
5. Suut pissutigalugit ilaqutariinni ittuusoq ernumangaalersinnaava? (Saqqaani assiliaq takuuk).
5 Kristumiup ilaqutariinni ittuusup ilaquttami pigisatigut pilersornissaannik akisussaaffini pimooruttarpaa. (Tim 1. 5:8) Ilaqutariinni ittuuguit imaassinnaavoq nappaalanersuaqarnerani suliffeerunnissat ernumassutigigit. Immaqa nerisassarsiniarnissamut ineqarnermulluunniit akiliutissanut akiitsunulluunniit akissaqarnerlutit ernumassutigaat. Immaqa aamma suliffeerukkuit suliffittaarsinnaanerlutit ernumassutigaat. Imaassinnaavoq aamma Nestoritut Maríatullu, eqqaaneqareersutut, aningaasarsiakinnerulernissat merserigit. Saatanip annilaanganerit taamaattut atorluartarpai.
6. Saatanip qanoq isumaqalersinniartarpaatigut?
6 Saatanip isumaqalersinniartarpaatigut Jehovap isumassunngikkaatigut ilaquttatsinnillu pilersuinitsinni ikiorusunngikkaatigut. Tamannalu pissutigalugu isumaqalersinnaavugut suliffipput annaajumanagu qanorluunniit, allaat Biibilimi najoqqutassianut akerliusunik, iliortariaqarluta.
7. Jiisusip qanoq neriorsorpaatigut?
7 Jiisusip, Ataatamik ilisarisimannilluarnerpaap, neriorsorpaatigut Guutitta ‘suli qinnuiginngikkitsinni pisariaqartitagut nalunngereertarai’. (Mat 6:8) Jiisusillu nalunngilaa Jehova pisariaqartitatsinnik matussusiinissamut piareersimasoq. Kristumiuugatta Guutip ilaqutariissortaanut ilaavugut. Qularinngissinnaavarput Jehovap ilaqutariinni ittuusutut Timuutiusimut allakkat siulliit 5:8-mi najoqqutassiaq nammineq maleruassagaa.
8. (a) Ilaquttatta pilersorsinnaajunnaarnissaasa ernumassutiginnginnissaanut suna iluaqutigissavarput? (Matiusi 6:31-33) (b) Assimi aappariit pajuttut qanoq ilaarsinnaavagut?
8 Qularinngikkutsigu Jehovap uagut ilaquttagullu asagaatigut upperilluinnarsinnaavarput pisariaqartitatsinnik amigaateqannginnissarput. (Matiusi 6:31-33 atuakkit). Jehovap pilersuisuugami tukkortoq asannittorlu pilersorusuppaatigut! Nunarsuaq pinngortikkamiuk inuuinnarnissamut pisariaqavissunik tuniinnanngilaatigut. Asannilluni nunarsuaq nuannaarutaangaartunik ulikkaarpaa. (Mos 1. 2:9) Pisariaqavissuinnarnik pissarsisaraluarluta eqqaamassavarput Jehovap pilersuinerinnaatigut naammattunik pigisaqarluta. (Mat 6:11) Eqqaamasariaqarparput pigisatigut pilliutigut Guutitta asannittup tunniussaanut tunniukkumaagaanullu sanilliullugit suunngitsut. Tamannarpiaq Nestorip Maríallu paasivaat. – Es 65:21, 22.
9. Nestor Maríalu qanoq ilinniarfigaagit?
9 Nestor Maríalu atugarissaarlutik Colombiami inuusimapput. Ima oqarput: “Inuunitsinnik pisariillisaanissarput kiffartornermilu iliuuseqarnerunissarput eqqarsaatigaarput, aningaasaatikinneruleruttali pilluannginnissarput ernumassutigaarput.” Ernumajunnaarnissamut suna iluaqutigaat? Jehovap asannittuliorsimanerpassuisa eqqarsaatiginera. Isumassortuarumaaraatik qularinnginnamikku suliffimminnit akissarsiarissaarfiusunit soraarput. Angerlarsimaffitsik tuneriarlugu nunap immikkoortuanut oqaluussisartunik pisariaqartitsiffiunerusumut nuupput. Aalajangernertik pillugu Nestor ima oqarpoq: “Matiusi 6:33-p ilumoornera misigaarput. Pigisatigut amigaateqanngisaannarpugut. Maanna pilluarnerulluta inuuvugut.”
INUNNUT QUNUNEQ
10. Sooq inunnut qunusarnerput paasinarpa?
10 Oqaluttuarisaanerup ingerlanerani inuit imminnut ajortumik piuarsimapput. (Oqal 8:9) Assersuutigalugu oqartussaassusertik atornerluttarpaat, pinerluttut nakuusertarput, meeqqat pimmasaarisartut atuaqatitik ajuallatsillugillu sioorasaartarpaat, allaallu ilaasa ilaquttatik peqqarniitsumik pisarpaat. Tupinnanngilaq inunnut qunusaratta! Saatanip tamanna qanoq atorluarniartarpaa?
11-12. Saatanip inunnut qununeq qanoq atortarpaa?
11 Saatanip inunnut qununeq atorlugu eqqunngitsuliortinniartarlutalu oqaluussiunnaartinniartarpaatigut. Naalakkersuisut Saatanimit sunnerneqarnermikkut sulinerput inerteqqutaalersittarlugulu malersortarpaatigut. (Luk 21:12; Saqq 2:10) Saatanip silarsuaata Jehovap Nalunaajaasui pillugit paasissutissat eqqunngitsut salluliuutillu siammartertarpai. Tamakkuninnga upperinnittut illaruaatigisarpaatigut, allaallu saassuttarpaatigut. (Mat 10:36) Saatanip saassusseriaasii tupaallaatigaagut? Naamerluinnaq. Kristumiut siulliit nalaanniilli taamatut saassussisarpoq. – ApS 5:27, 28, 40.
12 Naalakkersuisunit akerlilersorneqarnissap siooraginera Saatanip sakkutut kisiat atorneq ajorpaa. Ilaasa Nalunaajaasunngorunik ilaquttatik qanoq eqqarsassanersut nakuuserfigineqarnissamit siooraginerusarpaat. Ilaquttatik asaqigamikkit kissaatigaat Jehova ilisarisimalerlugulu asalissagaat. Guuti ilumoortoq kiffaalu pillugit ataqqinninngitsumik oqaluttut tusaanerat annernaringaarpaat. Ilaannikkulli ilaqutaasut akerlilersuisimagaluartut kingusinnerusukkut Nalunaajaasunngortarput. Taavami allamik upperisaqalersimanerput pissutigalugu ilaquttatta alarluinnarpatigut? Qanoq qisuariassaagut?
13. Ilaquttatsinnit alarneqarnermi Guutimit asaneqarnitsinnik qularinninnginnerput qanoq iluaqutigisinnaavarput? (Tussiaat 27:10)
13 Tussiaat 27:10-mi ilumoortoq nuannersoq tuppallersaatigisinnaavarput. (Atuaruk). Jehovap uagutsinnik asanningaarnera eqqaamagaangatsigu akerlilersorneqarnermi toqqissisimasutut misigisarpugut. Pinertusaarnerpullu pillugu akissarsisissagaatigut qularinngilarput. Jehovap timikkut, misigissutsikkut anersaakkullu pisariaqartitagut allanit tamanit isumassorluarnerungaarsinnaavai! Biniamip, eqqaaneqareersup, tamannarpiaq misigaa.
14. Biniam qanoq ilinniarfigaajuk?
14 Biniam malersorneqangaarsinnaanini nalunngikkaluarlugu Jehovamik Nalunaajaasunngorpoq. Biniamip Jehovamit asaneqarnerminik ilisimanninnini iluaqutigalugu inunnut qanoq qunujunnaartoq eqqarsaatigiuk. Ima oqarpoq: “Takorloorsimanngisannik malersorneqarpunga. Ilaquttannilli akerlilersorneqarnissara naalakkersuisunit malersorneqarnissamit merserineruara. Jehovamik Nalunaajaasunngorniarlunga aalajangernera ataatama Nalunaajaasuunngitsup pakatsissutigissagaa ilaquttannillu ataqqineqarunnaarnissara annilaanngatigaara.” Jehovalli asasaminik isumassuiuarnera Biniamip qularinngilaa. Ima nassuiaavoq: “Jehovap aningaasaqarnikkut ajornartorsiuteqartut, nikagineqartut inupilunnillu nakuuserfigineqartut pinertusaaqqullugit qanoq ikiorsimanerai eqqarsaatigisarpara. Nalunngilara Jehovap aalajaaffigigunni ikiussagaanga. Tigusaaqattaarninni allaallu naalliutsitaaninni misigaara Jehovap erloqigaluarluta aalajaannitsinni qanoq ikiortigisaraatigut.” Biniamip Jehova Ataatavittut innuttaalu ilaqutavittut isigilerpai.
TOQUP ANNILAANNGATIGINERA
15. Sooq toqup annilaanngatiginera pissusissamisoorpa?
15 Biibilimi allassimavoq toqu akeraasoq. (Kor 1. 15:25, 26) Pingaartumik perulunnermi asasattaluunniit perulunneranni toqup eqqarsaatiginera annilaangalissutigisinnaasarparput. Sooq toqu annilaanngatigaarput? Jehovap naassaanngitsumik inoorusussuseqartilluta pinngortimmatigut. (Oqal 3:11, q.a.i.) Toqulli annilaanngatiginera navianartorsiunnginnissamut iluaqutigisinnaavarput. Assersuutigalugu peqqinnartunik nerisarnissamut timersornissamullu, pisariaqartillugu nakorsiarnissamut nakorsartinnissamullu aamma pisariaqanngitsumik navianartorsiunnginnissamut kajumississutigisinnaavarput.
16. Saatanip toqumik annilaanngatiginninnerput pissusissamisoortoq qanoq atortarpaa?
16 Saatanip nalunngilaa inoorusuttugut. Oqarporli inoorusuinnarluta sunaluunniit – allaat Jehovamik ikinnguteqarnerput – pilliutigiumassagipput. (Job 2:4, 5) Ilumuunngilluinnarporli! Saatanilli ‘toqutsinissamut pissaaneqarami’ toqumik annilaanngatiginninnerput pissusissamisoortoq atorlugu Jehovamik tunussitinniartarpaatigut. (Hebr 2:14, 15) Ilaannikkut inuit Saatanimit sunnerneqartut Jehovap kiffai uppernerminnik tunusserusunngitsut toqumik sioorasaartarpaat. Ilaannikkulli Saatanip napparsimmavimmi inuunitsinnik navianartorsiortitsinitsinni eqqunngitsulioqqulluta tatisinnaasarpaatigut. Nakorsat ilaquttattaluunniit Nalunaajaasuunngitsut Guutip inatsisaani inerteqqutigineqartumik aalersorteqqulluta tatisinnaavaatigut. Imaassinnaavorluunniit Biibilimi najoqqutassianut akerliusumik katsorsartinnissamut akuersitinniarneqartugut.
17. Sooq toqu annilaanngatigisariaqanngilarput? (Romamiut 8:37-39)
17 Toqorusunngikkaluarluta nalunngilarput toqussagaluarutta Jehovap asajuassagaatigut. (Romamiut 8:37-39 atuakkit). Jehovap ikinngutini toqusut, inuusutut isigalugit, eqqaamajuarpai. (Luk 20:37, 38) Uummarteqqikkusungaarpai. (Es 26:19) ‘Naassaanngitsumik inooqqulluta’ utertitsissut akisooq akilerpaa. (Joh 3:16) Nalunnginnatsigu Jehovap asangaarlutalu isumassoraatigut napparsimanitsinni toqumilluunniit sioorasaarneqarnitsinni tununnagu tuppallersarneqarumalluta ilisimassutsimillu nukissanillu tunineqarumalluta Jehovamut saattarpugut. Valérie uinilu taamatorpiaq iliorput. – Tuss 41:4.
18. Valérie qanoq ilinniarfigaajuk?
18 Valérie 35-nik ukioqarluni qaqutigoortumik siaruaatipallattartumillu kræfteqarnerminik paasitinneqarpoq. Toqup annilaanngatiginnginnissaanut asanninneq qanoq iluaqutigigaa eqqarsaatigiuk. Ima oqaluttuarpoq: “Kræfterninnik paasitinneqaratta inuunerput allanngupiloorpoq. Inuuinnarumallunga annertuumik pilatsittariaqarpunga. Pilattaasartut arlallit oqaloqatigaakka, tamarmilli aak atornagu suliarerusunngilaannga. Annilaangagaluarlunga Guutip peqqussutaa pissutigalugu aalersortikkumanngilluinnarpunga! Inuunera tamaat Jehovap asannittuliorfigingaartarpaanga. Maanna asannittuliorfiginissaanut periarfissaqarpunga. Nuanniitsumik tusarlerneqarnerit tamaasa Jehovap tulluusimaartinnissaa Saatanillu ajugaatinnginnissaa aalajangiusimanerulertarpara. Naggataatigut aak atornagu iluatsittumik suliaritippunga. Suli peqqiillioraluartunga Jehovap pisariaqartitagut matussusertuaannarpai. Assersuutigalugu kræfterninnik paasitinneqanngitsiartugut ilagiittut ataatsimiinnitsinni allaaserisaq ‘Ulluni erloqinartorsiorfiusuni nikallujuittuarit’ sammivarput. * Allaaserisaq taanna tuppallersaatigingaarparput. Qasseriarluta atuarnerparput. Allaaserisat taama ittut anersaakkullu ittunik sammisaqartuarneq uigalu qamuuna eqqississutigalugulu oqimaaqatigiissaarinissamut aalajangiilluartarnissamullu iluaqutigaagut.”
ERNUMAJUNNAARNEQ
19. Qanittukkut qanoq pisoqassava?
19 Jehovap ikiuineratigut kristumiut nunani tamalaaniittut pissutsit unamminiarnartut qaangersimallugillu Diaavulu iluatsittumik akiorsimavaat. (Pet 1. 5:8, 9) Aamma illit taamaaliorsinnaavutit. Qanittukkut Jehovap Jiisusi naalakkersueqataalu ‘Diaavulup iliuusiinik unitsitseqqussavai’. (Joh 1. 3:8) Tamatuma kingorna nunarsuarmi Guutimut kiffartortut ‘aarleqqutissaqassanngillat’. (Es 54:14; Mika 4:4) Tamannali nalliutserlugu ernumasarnigut tamaviaarluta qaangerniartariaqarpagut.
20. Qanoq ernumasarunnaarsinnaavugut?
20 Jehovap kiffaminik asanninneranik illersuisarneranillu tatiginninnerput nakussatsittuartariaqarparput. Tamatumani Jehova itsaq kiffaminik qanoq illersuisartoq eqqarsaatigeqqissaartarlugulu eqqartortarutsigu iluaqutigissavarput. Aamma erloqinitsinni qanoq ikiorsimagaatigut eqqaamasariaqarparput. Jehovap ikiuineratigut ernumasarunnaarsinnaavugut! – Tuss 34:5.
ERINARSUUT 129 Pinertusaartuarta
^ Annilaanganeq misigissusiuvoq nalinginnaasoq ulorianartumut illersuutaasinnaasoq. Annilaangavallaarnerli ajoqutaasinnaavoq. Qanoq? Saatanip annilaanganerput atorluarsinnaavaa. Annilaanganeq taamaattoq aqukkumallugu tamaviaartariaqarpugut. Suut iluaqutigisinnaavagut? Jehovap najoraatigut asagaatigullu qularinngikkutsigu annilaanganerit suulluunniit qaangersinnaagigut allaaserisami matumani sammissavarput.
^ Atit ilaat allanngortitaapput.