ATUAQQISSAAGASSAQ 27
Jehova “neriuffiguuk”
“Naalagaq neriuffiguuk, nikallornatit tatitusaarit.” – TUSS 27:14.
ERINARSUUT 3 Jehova, neriuffigivatsigit nakuussutigalutillu
QILANAARTUUT *
1. (a) Jehovap sumik neriuutissippaatigut? (b) Jehovap ‘neriuffiginera’ qanoq paasisariaqarpa? (Takuuk “Nassuiaat”).
JEHOVAP asasini tamaasa nuannersumik neriuutissippai. Qanittukkut nappaatit, aliasunnerit toqulu atuukkunnaarsissavai. (Saqq 21:3, 4) Maniguuttut neriuffiginnitsini nunarsuarmik paratiisinngortitsineranni ikiussavai. (Tuss 37:9-11) Aamma tamatta maannamiit nuannernerusumik attaveqarfigilluarniassagatsinni ikiussavaatigut. Neriuut tamanna nuannerluinnarpoq! Guutilli neriorsuutaasa eqquunnissaat sooq upperisinnaavarput? Jehovap neriorsuutini eqquutsittuaannarmagit. Taamaattumik Jehovap ‘neriuffiginissaanut’ pissutissaqarluarpugut. * (Tuss 27:14) Guutitta siunertaminik naammassinninnissaata naammagittarluta nuannaarlutalu utaqqineratigut neriuffigisarparput. – Es 55:10, 11.
2. Jehova qanoq ilioreersimava?
2 Jehovap neriorsuutiminik eqqortitsiuaannarnini uppernarsareerpaa. Assersuutaalluartoq eqqarsaatigiuk. Saqqummersitani Jehova neriorsuivoq nalitsinni inuit inuiaqatigiinnit naggueqatigiinnillu tamaneersut qanorluunniillu oqaasillit minguitsumik guutisiornermi ataasioqatigiilersinniarlugit. Ullumikkut eqimattat taakku immikkuullarissut ‘inupparpassuartut’ ilisimaneqarput. (Saqq 7:9, 10) Angutit, arnat meeqqallu assigiinngitsunik naggueqaraluarlutik, oqaaseqaraluarlutik tunuliaqutaqaraluarlutillu nunani tamalaani eqqisseqatigiillutik ataasioqatigiillutillu ilaqutariittut ipput. (Tuss 133:1; Joh 10:16) Inupparpassuit aamma oqaluussisartuupput aallussilluartut. Nunarsuup nutaanngornissaanik neriuutimik tusaajumasunut tamanut oqaluttuarinissaanut piareersimajuaannarput. (Mat 28:19, 20; Saqq 14:6, 7; 22:17) Inupparpassuarnut ilaaguit suut tamarmik pitsaanerulernissaannik neriuutit qularnanngitsumik erlinnangaartutut isigaat.
3. Saatanip suna anguniagaraa?
3 Diaavulup neriuutaarunnissat kissaatigaa. Anguniagaraa isumaqalissasutit Jehovap soqutiginngikkaatit neriorsuutinilu eqqortinnavianngikkai. Saatanip neriuutaarutsippatigut sapilissallutalu immaqa allaat Jehova kiffartorfigiunnaassavarput. Diaavulup aamma Juubi neriuutaarutsinniarsaralugulu Jehovamut kiffartorunnaarsinniarsaraa.
4. Allaaserisami matumani suut sammissavagut? (Jobi 1:9-12)
4 Saatanip Juubi aalajaakkunnaarsinniarlugu periutsit atugai allaaserisami matumani misissussavagut. (Jobi 1:9-12 atuakkit). Aamma eqqartussavarput Juubi qanoq ilinniarfigisinnaallugulu sooq eqqaamasariaqaripput Guutip asallutalu neriorsuutini eqquutsissagai.
SAATANIP JUUBI NERIUUTAARUTSINNIARSARAA
5-6. Piffissap sivikitsup ingerlanerani Juubi sunik nalaataqarpa?
5 Juubi inuunerissaarpoq. Jehova ikinngutigilluarpaa. Ataasioqatigiittunik kinguaarpassuaqarpoq pigissaaqalunilu. (Job 1:1-5) Ullulli ataatsip ingerlanerani suut tamangajaasa annaavai. Siullermik, pigissaarunnaarpoq. (Job 1:13-17) Taava qitornani asasani tamaasa annaavai. Alianartut eqqarsaatigilaariakkit. Angajoqqaat qitornaminnik annaasaqaraangamik aliasungaartarput. Taamaattumik takorlooruk Juubi nulialu qitornatik qulit tamaasa ajunaarnerannik kalerrinneqaramik qanoq tupatsigalutillu aliasutsigalutillu isumatsaqqatigisimassasut. Tupinnanngilaq Juubi aliasulluni atisani alittoriarlugit aqullaaginnarmat! – Job 1:18-20.
6 Taava Saatanip Juubi peqqiilliulersillugulu nikassarpaa. (Job 2:6-8; 7:5) Juubi siornatigut nunaqqatiminit ataqqisaangaarpoq. Inuiaqataasa siunnersoqqullutik ornittarpaat. (Job 31:18) Maannali soqutiginngitsuusaarpaat. Qatanngutiminit, kammalaatigilluakkaminit allaallu kiffaminit ajattugaavoq! – Job 19:13, 14, 16.
7. (a) Juubip naalliunnerminut suna pissutaasoraa, sorusunngilali? (b) Immikkoortup assiliartaanut assingusumik kristumiu qanoq misilinneqarsinnaava?
7 Saatanip Juubi isumaqalersinniarpaa Jehovamit iluarisaajunnaarnini pissutigalugu naalliuuteqartoq. Assersuutigalugu Saatanip anorersuartitsinermigut illu Juubip qitornaasa qulit tamarmik nereqatigiillutik isersimaffigisaat uppitippaa. (Job 1:18, 19) Aamma qilammit inneq nakkartikkamiuk Juubip nersutaatai nungutiinnarnagit aamma nersutaatinik paarsisut nungutippai. (Job 1:16) Anorersuaq innerlu qilammit pimmata Juubi isummerpoq Jehovameersuusut. Taamaattumillu Juubi isumaqalerpoq arlaatigut Jehovamik narrutsatitsisimalluni. Taamaakkaluartorli Juubip Ataatani qilammiusoq perloqqujumanngilaa. Nalunngilaa ukiut ingerlanerini Jehovap ajunngitsorpassuarnik tunisarsimagaani. Taamaattumik eqqarsarpoq ajunngitsut akuerisarunigit aamma ajortut akuerisariaqarlugit. Jehova pillugu ima oqarpoq: “Aqqa unnersiutigineqarli.” (Job 1:20, 21; 2:10) Juubip aningaasaatini qitornanilu annaasimagaluarlugit peqqiilliuleraluarlunilu Jehova aalajaaffigiuarpaa. Saatanilli suli allatigut misilinniarpaa.
8. Saatanip periuseq alla suna atorpaa?
8 Saatanip periuseq alla Juubimut atorpaa, ikinngutaasuusaartut pingasut atorlugit naleqanngitsutut misigitinniarsaraa. Angutit taakku oqarput Juubi eqqunngitsulioqattaartarnini pillugu naalliuttoq. (Job 22:5-9) Allaat aamma qularunnaarsinniarsaraat ajortuliorsimanngikkaluarluniluunniit Guutimit iluarisaajumalluni iliuusii iluaqutaanngilluinnartut. (Job 4:18; 22:2, 3; 25:4) Tassa Juubi Guutimit asaneqanngitsutut isumassorneqarsinnaanngitsutullu misigitinniarsaraat, aamma isumaqalersinniarpaat Guutimut kiffartorneq iluaqutaanngitsoq. Taakkua oqaasii Juubip neriuutaarussutigisinnaagaluarpai.
9. Juubip sapiinnissamut nukittunissamullu suna iluaqutigaa?
9 Pisut takorluukkit. Juubi arsakuni issialluni anniartuarpoq. (Job 2:8) Ikinngutaasuusaartut inuttut ajortuunerarlugulu ajortumik tusaamaneqalersinniarpaat. Unnerluussutit ujarassuartut artornartigipput, qitornaminillu annaasaqarnera uummatikkut kapineqarnertut misiginarluni. Juubi aallaqqaammut oqaaseqanngilaq. (Job 2:13–3:1) Ikinngutaasuusaartut isumaqarunik Juubip oqaaseqannginnera Pinngortitsisiminut tunussimaneranut takussutissaasoq kukkorujussuarput. Juubi – immaqa ikinngutaasuusaartut toqqarlugit qiviariarlugit – oqarpoq: “Toqussara tikillugu aalajangiukkumavara isornaatsumik inuusimasunga.” (Job 27:5) Juubip naalliuuteqangaaraluarluni suna sapiittuarnissamut nukittujuarnissamullu iluaqutigaa? Allaat nakkaqqanerpaaffimmini Guutimi asannittup naalliukkunnaarsissagaani neriuutigiuarpaa. Nalunngilaa toqugaluarluni Jehovap makitissagaani. – Job 14:13-15, NW.
JUUBI QANOQ ILAARSINNAAVARPUT?
10. Juubi pillugu oqaluttuamit suna paasivarput?
10 Juubi pillugu oqaluttuamit paasivarput Saatanip pinngitsaalilluta Jehovamit qimagutitissinnaanatalu Jehovap pissutsit tamaasa eqqumaffigigai. Juubip misigisaa aamma pingaarutilinnik allanik paasinninnerunissamut iluaqutigisinnaavarput. Juubi ilaatigut sunik ilinniarfigisinnaanerlutigu eqqarsaatigiuk.
11. Jehova tatigiuarutsigu qanoq pisoqassava? (Jaaku 4:7)
11 Juubip uppernarsarpaa Jehova tatigiuarutsigu misilinneqarnerni suniluunniit pinertusaarsinnaallutalu Saatani iluatsittumik akiorsinnaagipput. Tamanna qanoq kinguneqassava? Biibilimi allassimavoq Diaavulu uagutsinnit qimaassasoq. – Jaaku 4:7 atuaruk.
12. Juubip toqusut makititaanissaannik neriuutini qanoq nakussatsissutigaa?
12 Toqusut makititaanissaannik neriuut upperilluinnartariaqarparput. Allaaserisap siuliani eqqaaneqartutut Saatanip aalajaakkunnaarsinniarluta toqumik annilaangaginninnerput atortarpaa. Juubimut tunngatillugu Saatani oqarpoq Juubi inuuinnarumalluni qanorluunniit iliorumassasoq, allaat aalajaakkunnaassasoq. Saatanili ilumuunngilaq. Juubi allaat toqusussaasorigaluarluni aalajaakkunnaanngilaq. Jehovap ajunngissusia tatigigamiuk pissutsinillu aaqqiiumaarnera neriuutigilluinnaramiuk pinertusaarpoq. Juubip upperaa Jehovap inuunermini pissutsinik aaqqiinngikkaluaruniluunniit siunissami toqusunit makitikkumaaraani. Juubip makititaanissamik neriuut upperilluinnarpaa. Uaguttaaq neriuut taanna upperilluinnarutsigu allaat toqumik sioorasaarneqaraluarluta aalajaassinnaavugut.
13. Saatanip periutsit Juubimut atugai qanoq ilinniarfigaagut?
13 Saatanip periutsit Juubimut atukkani aamma uagutsinnut atortarmagit eqqumaniartuartariaqarpugut. Saatanip unnerluussutaa maluginiaruk: ‘Inuup [Juubiinnaanngitsup] pigisani tamaasa akigeriaannaasarpai inuunini annaajumanagu.’ (Job 2:4, 5) Tassa Saatani oqarpoq Jehova Guuti iluamik asanngikkipput inuuinnarumallutalu tunussagipput. Aamma oqarpoq Guutip asanngikkaatigut iluarisaajumallutalu iliuutsigut maluginiarneq ajorai. Saatanip periusaa nalunnginnatsigu salluliuutai upperinavianngilagut.
14. Misilinneqarnerit sumik ersersitsisarpat? Assersuuteqarit.
14 Misilinneqarnerit nammineq pilluta paasisaqarnissamut iluaqutissatut isigisariaqarpagut. Juubip misilinneqarnermigut sanngiiffini suunersut qanorlu aaqqissinnaanerlugit paasivaa. Assersuutigalugu paasivaa maniguunnerulertariaqarluni. (Job 42:3) Uaguttaaq misilinneqarnitsinni nammineq pilluta paasisaqangaarsinnaavugut. Qatanngut angut Nikkulaammik atilik * peqqiilliungaaraluarluni parnaarussaasoq oqarpoq: “Parnaarussivik kristumiutut qamuuna qanoq ittuunitsinnik ersersitsisarami qinnguartaavittut ippoq.” Sanngiiffigut suunersut paasigutsigu aaqqinniarsinnaalissavagut.
15. Kina tusarnaartariaqarparput, aamma sooq?
15 Akeqqagut tusarnaarnagit Jehova tusarnaartariaqarparput. Jehovap oqaluummani Juubi tusarnaaqqissaarpoq. Guutip Juubi eqqarsalersinniaramiuk ima oqarfigimisaarpaa: ‘Pinngortitsinissamut pissaanera takuiuk? Nalaatatit tamaasa eqqumaffigaakka. Soorunami isumassorsinnaavakkit!’ Jehovap ajunngisaarfigimmani Juubi maniguulluni qujamasungaalerpoq. Ima oqarpoq: “Siornatigut allat pillutit oqaaserisaat tusallatsiaannarsimavakka, maannali nammineq isinnik takuakkit.” (Job 42:5) Juubi taama oqarami suli arsakuni issiagunarpoq, timaa ikinik ulikkaarpoq qitornanilu toqusimasut aliasuutigalugit. Jehovalli asanerarlugulu iluarinerarpaa. – Job 42:7, 8.
16. Misilinneqarnerni suna eqqaamasariaqarparput? (Esaja 49:15, 16)
16 Uaguttaaq allanit nikassarneqarsinnaasarlutalu naleqanngitsutut pineqarsinnaasarpugut. Inuttut peqatigiiffittulluunniit ajortumik tusaamaneqalersinniarneqartarpugut ‘assigiinngitsutigullu ajortumik salluliuutigineqartarluta’. (Mat 5:11) Juubi pillugu oqaluttuamit paasivarput Jehovap qularineq ajoraa misilinneqarnitsinni ilumoorfigissagitsinni. Jehovap asavaatigut, aamma neriuffiginnitsini qimanngisaannassavai. (Esaja 49:15, 16 atuakkit). Guutip akeraasa nikassaallutik salluliuutaat tusaaniartassanngilatit! Qatanngut Tyrkiamiu James ilaquttanilu misilinneqangaartoq ima oqarpoq: “Paasivarput Guutip innuttai pillugit salluliuutit tusarnaarnerat nikallussutaasartoq. Taamaattumik neriuuterput eqqarsaatiginiartuarlugulu Jehovamut kiffartornermi iliuuseqarniartuarpugut. Taamaalioratta nuannaartuarpugut.” Juubitut Jehova tusarnaassavat! Akeqqatta salluliuutaat neriuutitsinnut apeqqutaanngillat.
NERIUTTUARUIT PINERTUSAASSAATIT
17. Hebræerit kapitali 11-mi angutit arnallu aalajaatsut eqqaaneqartut qanoq ilinniarfigisinnaavigit?
17 Juubi Jehovap kiffaasa misilinneqarnerminni sapiittuartut nukittujuartullu amerlaqisut ilagiinnarpaat. Apustili Paulusi Hebræerinut allakkamini allappoq aalajaatsorpassuit taakkua ‘ilisimannittut amerlaqisut nuissatut avatangeraatigut’. (Hebr 12:1) Tamarmik misilinneqangaaraluarlutik Jehovamut aalajaattuarput. (Hebr 11:36-40) Asulersuaq pinertusaarlutillu tamaviaarpat? Naamerluinnaq! Inuunerminni Guutip neriorsuutaasa ilaat eqquuttut takunngisaannaraluarlugit Jehovamut neriuttuarput. Jehovamillu iluarisaanertik qularinnginnamikku neriorsuutit piviusunngornerat takujumaarlugu upperilluinnarpaat. (Hebr 11:4, 5) Maligassiuinerat Jehovamut neriuttuarnissatta aalajangiusimanerunissaanut iluaqutigisinnaavarput.
18. Sunissat aalajangiusimaviuk? (Hebræerit 11:6)
18 Inoqatigut ajorsigaluttuinnarput. (Tim 2. 3:13) Guutip innuttai Saatanip suli misilittuarpai. Qanortoq qanorluunniit misilinneqarnermi Jehova ‘Guuti uumassuseqartoq neriuffigalugu’ tamaviaarluta kiffartornissarput aalajangiusimajuartigu. (Tim 1. 4:10) Juubi Guutimit ajunngitsuliorfigineqarmat nalunngilarput “Jehova qamannga pisumik misigissuseqarlunilu nallittuisuusoq”. (Jaak 5:11) Qanortoq uaguttaaq Jehova ‘qamannga pisumik ujarlersiminik akissarsisitsiumaartoq’ qularinagu ilumoorfigiuarisigu. – Hebræerit 11:6 atuaruk.
ERINARSUUT 150 Guuti maanna ujarsiuk
^ Annikilliungaarnermi pinertusaartut eqqarsaatigigaangatsigit amerlanertigut Juubi eqqaasarparput. Angutip aalajaatsup taassuma misigisai qanoq ilinniarfigisinnaavagut? Paasivarput Saatanip pinngitsaalilluta Jehovamit qimagutitissinnaanngikkaatigut aamma Jehovap nalaatagut tamaasa eqqumaffigisarai. Jehovap Juubip misilinneqarnerinik unitsitsinermisut naalliuutigut tamaasa atuukkunnaarsissavai. Tamakku qularinngilluinnarlugit iliuutsitigut ersersikkutsigu Jehovamut neriuttut ilagissavaatigut.
^ NASSUIAAT: Hebræerisut oqaaseq “neriunnermik” nutserneqartoq qilanaarluni “utaqqinermik” isumaqarpoq. Aamma tatiginninnermik tutsuiginninnermilluunniit isumaqarsinnaavoq. – Tuss 25:2, 3; 62:6.
^ Atit ilaat allanngortitaapput.