Sooq naalliuutit taama amerlatigippat?
Sooq naalliuutit taama amerlatiginerat aamma sooq inuit taakkuninnga atuukkunnaarsitsisinnaannginnerat paasiumallugu ajornartorsiummut pissutiviusut suussusersisariaqarpavut. Pissutaasut assigiinngitsuullutillu paasiuminaassinnaagaluarlutut Biibili iluaqutigalugu suussusersisinnaavavut. Allaaserisami matumani naalliuutit taama amerlatigineranut pissutiviusut tallimat sammissavavut. Biibilimi qanoq allassimasoqarneranik nunarsuarmilu naalliuutinut pissutiviusunik paasinninnissannut Guutip oqaasianik qanoq atuisinnaaninnik eqqarsaatiginneqqissaaqqullutit kajumissaarpatsigit. — 2 Timotheusi 3:16.
NAALAKKERSUINERLUNNERUP KINGUNERI
Biibilimi ima allassimavoq: ‘Iluanngitsoq naalakkersuisunngoraangat inuit anersaaruluttarput.’ — Ussatit 29:2.
Oqaluttuarisaanermit erserpoq kisermaassillutik naalakkersuisorpassuit innuttaminnik naalliutitsingaarlutik sakkortuumik aqutsisimasut. Soorunami naalakkersuisut tamarmik taamaanngillat. Ilaat ajunnginnerpaamik siunertaqarlutik inoqatitik pillugit iliuuseqartarput. Pissaaneqaleraangamilli suliniutigisaat pissaaneqarniuttunit akornuserneqartarput. Imaluunniit namminneq iluaqutissaminnik, inuiannut ajoqutaasumik, pissaanerminnik atornerluisarput. USA-mi nunanut allanut tunngasunut naalakkersuisuusimasoq Henry Kissinger ima oqarsimavoq: “Oqaluttuarisaaneq suliniutinik iluatsinngitsunik neriorsuutinillu eqquutitinneqanngitsunik ulikkaarpoq.”
Biibilimi ima allassimavoq: “Ingerlasup alloriartarnini aqussinnaanngilai.” (Jeremia 10:23, NW) Inuit naammalluinnanngitsut ajornartorsiutiminnik tamanik aaqqiinissaminnut ilisimassuseqaratillu pisussanik ilisimasaqanngillat. Inuit alloriartarnerminnik aqutsisinnaanngikkunik taava qanoq ilillutik inuiaqatigiinnik aqutsisinnaassagamik? Paasisinnaalerpiuk sooq naalakkersuisut nunamiittut naalliuutinik tamanik atuukkunnaarsitsisinnaannginnerat? Inuit naalliunnerannut naalakkersuinerlunneq amerlanertigut pissutaasarpoq!
UPPERISARSIORNERUP EQQUNNGITSUP SUNNIUTEQARNERA
Jiisusi ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” — Johannesi 13:35.
Uppeqatigiinni assigiinngitsuni siuttut asanninneq ataasioqatigiinnerlu pillugit oqaluussisarput. Taamaakkaluartorli malinnitsitik isummiussereertarunnaassutigisassaannik asannissuseqalersissinnaasimanngilaat. Upperisarsiorneq amerlanertigut asanninnermik siuarsaanani avissaartuutsitsisarlunilu ilumoortuusaartunngortitsisarlunilu naggueqatigiinni inuiaqatigiinnilu saqitsaatsitsilertarpoq. Teologi Hans Küng atuakkiami Christianity and the World Religions-imi naggataatungaani ima allappoq: “Politikkikkut akersuunnerit ingasannerpaat ajornerpaallu
upperisarsiornermit sunnerneqarsimasarlutillu isumassarsisinneqarsimasarlutillu akuersaarnartunngortinneqarsimasarput.”Tamatuma saniatigut upperisarsiornikkut siuttorpassuit anguteqatinoortarneq arnaqatinoortarnerlu, katisimanani atoqateqartarneq allasiortarnerlu akuerisimavaat. Tamatuma kingunerisaanik nappaatinik tunillatsittoqartarpoq, naartuersittoqartarpoq, kissaatiginngisamik naartulertoqartarpoq, avittoqartarpoq ilaqutariinnilu avissaartuuttoqartarpoq, tamatumalu kingunerisaanik aliasungaartoqartarlunilu naalliuttoqangaartarpoq.
INUIT NAAMMALLUINNANNGISSUTAAT NAMMINISSARSIORNERALLU
“Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa.” — Jaaku 1:14, 15.
Naammalluinnanngissuseq kingornunnikuugatsigu tamatta kukkoqqajaasarlutalu ‘uinitta piumasaa malillugu’ iliorusunnerput akiortariaqarparput. (Efesosimiut 2:3) Kissaatipiluit piviusunngortissinnaaleraangatsigit akiuunnissarput sapernarnerulertarpoq. Kajungerisapilunnut nakkaannarnerput ajortorujussuarmik kinguneqarsinnaavoq.
Atuakkiortoq P. D. Mehta ima allappoq: “Kajungerisapiluvut, aliikkusersorusullutalu nuannaartikkusunnersuarput, piumatussuserput ataqqineqarumatunerpullu pissutigalugit naalliuuterpassuit atuupput.” Assigiinngitsunik — soorlu imigassamik, aanngaajaarniutinik, aningaasanoornermik atoqateqarnissamillu — kajungerisaqarnerit pinngitsuuisinnaannginnerillu inuppassuit ‘ataqqisaasut’ taakkualu ilaqutaasa, ikinngutaasa allallu atugarliuutigilersimavaat. Inuit naammalluinnanngitsuunerat eqqarsaatigalugu Biibilimi allassimaffik una ilumoornerartariaqarparput: “[Nalunngilarput] pinngortitat tamarmik suli peqatigiillutik anersaarulullutillu nimaartut.” — Romamiut 8:22.
ANERSAAPILUIT PISSAANERAT
Biibilimi ersersinneqarpoq Saatani ‘silarsuup matuma guuterigaa’ inngilillu ajortut pissaanillit, anersaapilunnik taaneqartartut, taassumunnga ililiussimasut. — 2 Korinthimiut 4:4; Saqqummersitat 12:9.
Anersaapiluit Saatanitut sapinngisartik tamaat inuit aqunniartarlugillu tammartinniartarpaat. Tamanna apustilip Paulusip allagaanit erseqqissarneqarpoq: “Akiugassavummi tassaanngillat aak uinillu, tassaallutilli naalakkersuisut, oqartussaasut, silarsuarmut naalagaasut taarsuarmi matumaniittut, anersaapiluit pissaanilissuit qilammiittut.” — Efesosimiut 6:12, NW.
Anersaapiluit inunnik akornusersuinissamik nuannarisaqaraluartut allamik pingaarnertut anguniagaqarput. Kissaatigaat inuit tamarmik Guutimik qutsinnerussaartumik, Jehovamik, tunussissasut. (Tussiaat 83:19) Inuit salloqittarniarlugit pissaaneqarfigilerniarlugillu ilaatigut ullorissat najoqqutaralugit siulittuisarneq, angakkuarneq, ilisiinneq siulittuisarnerlu atortarpaat. Taamaattumik Jehovap tamakkununnga ulorianartunut mianersoqqusarlutalu Saatanimik taassumalu inngilipiluinik akerlilersuisut tamaasa illersortarpai. — Jaaku 4:7.
“ULLUSSANI KINGULLERNI” INUUVUGUT
Ukiut 2000-it missiliorlugit matuma siorna Biibilimi una siulittuutigineqarpoq: ‘Ilisimassavat ullussani kingullerni nalliukkumaarmata ullut atugarliungaarfissat.’
Ullut atugarliungaarfiunerannut pissutaasoq allassimaffinni tulliuttuni erserpoq: “Taamanikkussamimi inuit tassaalerumaarput namminissarsiortut, aningaaserituut, usorsitsaartut, anneruniartut, ... asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut, killuussisut, puffajasut, makitaniartut, inuulluarniutit Guutimit pingaarnerutillugit.” Tassa “ullussani kingullerni” inuunerput ullumikkut nunarsuarmi naalliunnartorpassuaqarneranut ilaatigut pingaarnertut pissutaavoq. — 2 Timotheusi 3:1-4.
Pissutaasut sammeriikkavut eqqarsaatigalugit ersarippoq sooq inuit, pitsaanerpaamik siunertaqaraluarlutik, naalliuutit tamaasa atuukkunnaarsissinnaanngikkaat. Kimut ikiortissarsiorsinnaavugut? Pinngortitsiserput, Diaavulup taassumalu malittaasa suliaannik suujunnaarsitsinissaminik neriorsuisimasoq, tatigisariaqarparput. (1 Johannesi 3:8) Allaaserisami tulliuttumi Guuti qanoq ililluni naalliuutinut pissutaasunik tamanik atuukkunnaarsitsissanersoq sammineqassaaq.