តើយើងបានត្រៀមខ្លួនរៀបការហើយឬនៅ?
ជំពូកទី៣០
តើយើងបានត្រៀមខ្លួនរៀបការហើយឬនៅ?
ប្អូនគិតថា ប្អូនបានជួបមនុស្សដែលស័ក្តិសមនឹងខ្លួន។ ប្អូនបានមើលចិត្តគ្នាល្មមគ្រប់គ្រាន់ ហើយស្រឡាញ់គ្នាទៅវិញទៅមក។ ឥឡូវដល់ពេលដែលប្អូនចង់រៀបការជាមួយគ្នា។ ប៉ុន្តែ នៅពេលធ្វើការសម្រេចចិត្តដ៏សំខាន់មួយក្នុងជីវិត ប្អូនចាប់ផ្ដើមឆ្ងល់ថា . . .
តើយើងបានត្រៀមខ្លួនរៀបការហើយឬនៅ?
ទោះជាប្អូនស្រឡាញ់គ្នាក៏ដោយ នោះជារឿងធម្មតាទេដែលប្អូនឆ្ងល់ថា ក្រោយរៀបការហើយ តើជីវិតអាពាហ៍ពិពាហ៍របស់ប្អូននឹងទៅជាយ៉ាងណា? ពីព្រោះមនុស្សជាច្រើនដែលរៀបការហើយ មានភាពរកាំរកូសនឹងគ្នា ហើយអត្រានៃការលែងលះក៏កើនឡើងខ្ពស់ដែរ។ ដូច្នេះ មិនចម្លែកទេដែលប្អូនចង់គិតឲ្យបានហ្មត់ចត់មុនសម្រេចចិត្តរៀបការ។ តើប្អូនដឹងយ៉ាងដូចម្ដេចថាប្អូនបានត្រៀមខ្លួនរួចហើយ? ប្អូនប្រហែលជាស្រមៃថា ជីវិតគូរបស់ប្អូនពោរពេញដោយភាពផ្អែមល្ហែម ហើយអ្វីៗក៏ល្អ។ ប៉ុន្តែ សូមគិតអំពីការពិតនៃជីវិតអាពាហ៍ពិពាហ៍។ ជាឧទាហរណ៍៖
ការស្រមើស្រមៃទី១ «សំខាន់ឲ្យតែយើងស្រឡាញ់គ្នា»
ការពិត៖ ស្នេហាតែមួយមុខមិនអាចបង់ថ្លៃចំណាយ ឬដោះស្រាយបញ្ហាសេដ្ឋកិច្ចបានទេ។ តាមពិតក៏ត្រូវការលុយដែរ។ ប៉ុន្តែ យោងតាមការស្រាវជ្រាវមួយបង្ហាញថា លុយគឺជាមូលហេតុចម្បងដែលធ្វើឲ្យអាពាហ៍ពិពាហ៍ប្រេះឆា ហើយឈានទៅដល់ការលែងលះ។ ការមានទស្សនៈមិនត្រឹមត្រូវអំពីលុយអាចប៉ះពាល់ដល់ផ្លូវចិត្ត និងចំណងមិត្តភាពជាមួយព្រះ ហើយបន្តិចម្ដងៗអាចបំផ្លាញទំនាក់ទំនងរវាងប្ដីប្រពន្ធ។ (ធីម៉ូថេទី១ ៦:៩, ១០) តើមានមេរៀនអ្វី? កុំចាំរហូតដល់ក្រោយរៀបការ ទើបពិភាក្សាគ្នាអំពីរឿងលុយ!
គម្ពីរចែងថា៖ «ក្នុងចំណោមអ្នករាល់គ្នា បើចង់សង់ប៉មមួយ តើមានអ្នកណាដែលមិនអង្គុយគិតគូរជាមុនសិនឲ្យដឹងថា ខ្លួនមានប្រាក់គ្រប់គ្រាន់ដើម្បីសង់ឲ្យបានរួចរាល់?»។—លូកា ១៤:២៨
យោបល់៖ មុនរៀបការ សូមពិគ្រោះជាមួយគូអនាគតរបស់ប្អូនអំពីរឿងលុយកាក់។ (សុភាសិត ១៣:១០) ជាឧទាហរណ៍ ‹តើយើងនឹងរៀបចំគម្រោងចំណាយតាមរបៀបណា? តើយើងគួរមានគណនីធនាគាររួមគ្នា ឬផ្សេងគ្នា? តើអ្នកណាជាអ្នកទូទាត់ចំណូលនិងចំណាយ? a តើម្នាក់ៗអាចចាយលុយប៉ុន្មានដោយមិនចាំបាច់សួរគ្នា?›។ ឥឡូវនេះ ដល់ពេលដែលអ្នកទាំងពីរត្រូវពិចារណាសំណួរទាំងនេះជាមួយគ្នា!—អ្នកទូន្មាន ៤:៩, ១០
ការស្រមើស្រមៃទី២ «យើងនឹងក្លាយជាគូស្នេហ៍ដ៏ល្អឥតខ្ចោះ ព្រោះយើងយល់ស្របគ្នាគ្រប់រឿង ហើយមិនដែលឈ្លោះគ្នាទេ!»
ការពិត៖ បើប្អូនមិនដែលខ្វែងគំនិតគ្នា នោះប្រហែលជាមកពីប្អូនទាំងពីរព្យាយាមជៀសវាងនិយាយអំពីរឿងដែលអាចនាំឲ្យឈ្លោះគ្នា។ ប៉ុន្តែ ក្រោយពីរៀបការ ប្អូនប្រហែលជាជៀសមិនរួចទេ! ពីព្រោះគ្មានផ្លូវដែលមនុស្សមិនល្អឥតខ្ចោះពីរនាក់ អាចត្រូវគ្នាបានល្អឥតខ្ចោះនោះឡើយ។ ភាពរកាំរកូសមួយចំនួននឹងកើតឡើងជាមិនខាន។ (រ៉ូម ៣:២៣; យ៉ាកុប ៣:២) ដូច្នេះកុំមើលតែថា អ្នកទាំងពីរត្រូវគ្នាខ្លាំងប៉ុណ្ណា តែក៏ត្រូវគិតដែរថា នឹងមានអ្វីកើតឡើងពេលមានការខ្វែងគំនិតគ្នា។ ចំណងអាពាហ៍ពិពាហ៍រឹងមាំកើតចេញពីការដែលអ្នកទាំងពីរទទួលស្គាល់នូវភាពខុសគ្នា ហើយរួមគ្នាដោះស្រាយបញ្ហាទាំងនោះដោយសន្តិវិធី។
គម្ពីរចែងថា៖ «កុំទុកកំហឹងរហូតដល់ថ្ងៃលិចឡើយ»។—អេភេសូរ ៤:២៦
យោបល់៖ សូមគិតអំពីវិធីដែលប្អូនធ្លាប់ដោះស្រាយបញ្ហាណាមួយជាមួយឪពុកម្ដាយ និងបងប្អូនបង្កើតរបស់ប្អូន។ សូមធ្វើតារាងមួយដូចតារាងនៅទំព័រ៩៣ក្នុងសៀវភៅនេះ ឬទំព័រ២២១ក្នុងក្បាលទី២។ រួចមក សរសេរអំពីបញ្ហានោះ អំពីប្រតិកម្មរបស់ប្អូន និងវិធីដែលប្អូនអាចធ្វើឲ្យបានល្អជាង។ ជាឧទាហរណ៍ ពេលឈ្លោះគ្នាម្ដងៗ ប្អូនតែងស្ទុះចូលទៅក្នុងបន្ទប់ ហើយបិទទ្វារក្ឌាំង។ ដូច្នេះ សូមគិតអំពីវិធីដែលប្អូនអាចដោះស្រាយបញ្ហាឲ្យបានប្រសើរជាង។ បើប្អូនដឹងអំពីរបៀបដោះស្រាយជម្លោះនៅឥឡូវនេះ នោះប្អូននឹងដឹងថាត្រូវធ្វើយ៉ាងណាដើម្បីអាចមានសុភមង្គលក្នុងជីវិតអាពាហ៍ពិពាហ៍នៅថ្ងៃខាងមុខ។
ការស្រមើស្រមៃទី៣ «ក្រោយរៀបការ ខ្ញុំអាចបំពេញចំណង់ផ្លូវភេទពេលណាក៏បាន»
ការពិត៖ ការរៀបការមិនមែនមានន័យថា ប្អូនអាច‹រួមភេទតាមតែចំណង់›របស់ខ្លួននោះទេ។ សូមចាំថា គូរបស់ប្អូនក៏ជាមនុស្សមានអារម្មណ៍ដែរ ដូច្នេះប្អូនត្រូវគិតអំពីអារម្មណ៍របស់គាត់។ ពិតណាស់ ពេលខ្លះប្ដីឬប្រពន្ធមិនចង់រួមភេទទេ។ ហេតុនេះ អាពាហ៍ពិពាហ៍មិនតែងតែបំពេញចំណង់ផ្លូវភេទរបស់ប្អូនគ្រប់ពេលនោះឡើយ។ (កូរិនថូសទី១ ១០:២៤) មិនថាប្អូននៅលីវ ឬរៀបការទេ ការចេះទប់ចិត្តគឺសំខាន់ណាស់។—កាឡាទី ៥:២២, ២៣
គម្ពីរចែងថា៖ «អ្នករាល់គ្នាម្នាក់ៗត្រូវចេះគ្រប់គ្រងរូបកាយរបស់ខ្លួន ដោយសេចក្ដីបរិសុទ្ធនិងកិត្តិយស មិនមែន . . . រកបំពេញកាមតណ្ហាដោយមិនចេះឆ្អែតឆ្អន់»ឡើយ។—ថែស្សាឡូនិចទី១ ៤:៤, ៥
យោបល់៖ សូមគិតឡើងវិញអំពីទំនោរចិត្តនិងចំណង់ផ្លូវភេទរបស់ប្អូន ហើយសូមពិចារណាដែរថា តើអ្វីទាំងនោះអាចប៉ះពាល់យ៉ាងណាដល់អាពាហ៍ពិពាហ៍របស់ប្អូននៅថ្ងៃអនាគត? ជាឧទាហរណ៍ តើប្អូនមានទម្លាប់ស្ទាបអង្អែលអវយវៈភេទរបស់ខ្លួន ឬមើលរូបអាសអាភាសឬទេ? តើប្អូនតែងតែមើលមនុស្សភេទផ្ទុយដោយមានអារម្មណ៍ស្រើបស្រាលឬទេ? សូមសួរខ្លួនថា ‹បើមុនរៀបការខ្ញុំមិនអាចគ្រប់គ្រងតណ្ហារបស់ខ្លួនបាន តើក្រោយរៀបការខ្ញុំអាចគ្រប់គ្រងយ៉ាងដូចម្ដេចបាន?›។ (ម៉ាថាយ ៥:២៧, ២៨) មានចំណុចមួយទៀត តើប្អូនមានកេរ្តិ៍ឈ្មោះជាមនុស្សញ៉ែមិនរើសមុខ ឬខ្លួនមួយជិះទូកពីរទេ? បើមែន តើក្រោយរៀបការប្អូនអាចបំបាត់ចោលទំនោរចិត្តមិនល្អទាំងនោះយ៉ាងដូចម្ដេចបាន? ព្រោះក្រោយរៀបការ ប្អូនត្រូវស្មោះត្រង់ចំពោះគូរបស់ប្អូន។—សុភាសិត ៥:១៥-១៧
ការស្រមើស្រមៃទី៤ «អាពាហ៍ពិពាហ៍នឹងធ្វើឲ្យខ្ញុំមានសុភមង្គល»
ការពិត៖ បើពេលនៅលីវ ប្អូនមិនសប្បាយចិត្ត ក្រោយរៀបការប្អូនក៏នៅតែមិនសប្បាយចិត្តដដែល។ ហេតុអ្វី? ដោយសារសុភមង្គលអាស្រ័យទៅលើទស្សនៈរបស់យើង មិនមែនស្ថានភាពរបស់យើងទេ។ (សុភាសិត ១៥:១៥) មនុស្សដែលមានទស្សនៈអវិជ្ជមានចំពោះជីវិត ច្រើនតែផ្ដោតអារម្មណ៍ទៅលើអ្វីដែលពួកគេគ្មាន ជាជាងអ្វីដែលពួកគេមាន។ ដូច្នេះ ពេលប្អូននៅលីវ ប្អូនគួរព្យាយាមឲ្យមានទស្សនៈវិជ្ជមាន ពីព្រោះក្រោយរៀបការប្អូនអាចធ្វើឲ្យជីវិតអាពាហ៍ពិពាហ៍របស់ប្អូនស្រស់បំព្រង ដោយសារចិត្តគំនិតវិជ្ជមានរបស់ប្អូន។
គម្ពីរចែងថា៖ «បើសប្បាយនឹងអ្វីដែលភ្នែកមើលឃើញ នោះប្រសើរជាងដេញតាមអ្វីដែលចិត្តប្រាថ្នាចង់បាន»។—អ្នកទូន្មាន ៦:៩
យោបល់៖ ជួនកាលចិត្តគំនិតអវិជ្ជមាន កើតចេញពីអ្វីដែលខ្លួនសង្ឃឹមចង់បាន។ សូមសរសេរចំណុចពីរឬបីដែលប្អូនចង់បានពីជីវិតគូ។ រួចអាន ហើយសួរខ្លួនថា៖ ‹តើអ្វីដែលខ្ញុំសង្ឃឹមចង់បាន ផ្អែកទៅលើការស្រមើស្រមៃឬលើការពិត? តើខ្ញុំទទួលឥទ្ធិពលពីការមើលភាពយន្តមនោសញ្ចេតនា ឬរឿងប្រលោមលោកឬទេ? តើខ្ញុំរំពឹងតែទៅលើអ្វីដែលខ្ញុំនឹងទទួលក្រោយពីរៀបការដូចជា ខ្ញុំលែងឯកោ ខ្ញុំអាចបំពេញចំណង់ផ្លូវភេទរបស់ខ្លួន ហើយខ្ញុំនឹងលេចធ្លោជាងគេក្នុងចំណោមមិត្តភក្តិឬទេ?›។ បើដូច្នេះមែន ប្អូនត្រូវផ្លាស់ប្ដូរផ្នត់គំនិតពី«ខ្ញុំ» ទៅជា«យើង»វិញ។ ដើម្បីធ្វើដូច្នោះ សូមសរសេរចំណុចពីរឬបីដែលប្អូននិងគូអនាគតរបស់ប្អូន សង្ឃឹមចង់បានពីចំណងអាពាហ៍ពិពាហ៍។
បើប្អូនស្រមើស្រមៃថា ប្អូននឹងមានភាពផ្អែមល្ហែមដូចនោះក្រោយពីរៀបការហើយ នេះអាចធ្វើឲ្យប្អូនខកចិត្ត។ ដូច្នេះ សូមព្យាយាមបោះចោលការរំពឹងគិតបែបនោះ ហើយងាកមកគិតពីជីវិតពិតវិញ។ ក្រដាសលំហាត់នៅទំព័រ២១៦និង២១៧ អាចជួយប្អូននិងគូអនាគតរបស់ប្អូនឲ្យសម្រេចនូវអ្វីល្អបំផុតក្នុងជីវិត ដែលជាអាពាហ៍ពិពាហ៍ដ៏សប្បាយរីករាយ!—ការបំភ្លឺច្បាប់ ២៤:៥; សុភាសិត ៥:១៨
ការបែកគ្នាប្រៀបដូចជាការហែកបេះដូង។ តើធ្វើដូចម្ដេចដើម្បីយកឈ្នះការឈឺចាប់នេះ?
[កំណត់សម្គាល់]
a សុភាសិត ៣១:១០-២៨ រៀបរាប់ថា«ប្រពន្ធល្អ» គឺជាស្ត្រីដែលបំពេញភារកិច្ចច្រើននៅក្នុងផ្ទះ ហើយភារកិច្ចមួយគឺការជួយចាត់ចែងលុយកាក់ក្នុងគ្រួសារ (សូមមើលខ១៣, ១៤, ១៦, ១៨ និង២៤)។
បទគម្ពីរសំខាន់
«បុរសនឹងចាកចេញពីឪពុកម្ដាយខ្លួន ហើយនៅជាប់ជាមួយនឹងប្រពន្ធរបស់គាត់ រួចពួកគេទាំងពីរនាក់នឹងទៅជាសាច់ឈាមតែមួយ»។—ដើមកំណើត ២:២៤
យោបល់
សុំយោបល់ពីប្ដីប្រពន្ធដែលបានរៀបការយូរឆ្នាំហើយ។ រួចសួរពួកគាត់អំពីអ្វីដែលត្រូវធ្វើដើម្បីមានអាពាហ៍ពិពាហ៍ដ៏រីករាយ។—សុភាសិត ២៧:១៧
តើប្អូនដឹងទេ . . . ?
អាពាហ៍ពិពាហ៍ដ៏រីករាយ គឺប្ដីប្រពន្ធចាត់ទុកគ្នាជាមិត្តភក្តិ ជាដៃគូសន្ទនាល្អ និងរួមគ្នាដោះស្រាយបញ្ហា ហើយក៏យល់ថាពួកគាត់ត្រូវរស់នៅជាមួយគ្នាអស់មួយជីវិត។
គម្រោងអនុវត្ត!
ដើម្បីមានសុភមង្គលក្នុងជីវិតអាពាហ៍ពិពាហ៍នាពេលខាងមុខ ខ្ញុំចង់បណ្ដុះគុណសម្បត្តិនៅឥឡូវនេះគឺ ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● នៅប្រទេសមួយចំនួន អត្រានៃការលែងលះគឺខ្ពស់ណាស់។ តើប្អូនគិតថាអ្វីជាមូលហេតុ?
● បើរៀបការដើម្បីគេចចេញពីបញ្ហានៅក្នុងផ្ទះ តើនេះនាំឲ្យមានគ្រោះថ្នាក់អ្វីខ្លះ?
● ពេលប្អូនរៀបការ ហេតុអ្វីជាការសំខាន់ដែលប្អូនត្រូវធ្វើតាមគោលការណ៍គម្ពីរឲ្យដិតដល់?
[ឃ្លាអក្សរធំនៅទំព័រ២២០]
«ប្អូនអ៊ូឌ្រា ប្រាប់ថា៖ ‹អាពាហ៍ពិពាហ៍គឺជារឿងសំខាន់បំផុតមួយក្នុងជីវិត។ ដូច្នេះ អ្នកត្រូវដឹងអំពីជីវិតរៀបការ និងគូដែលអ្នកនឹងរៀបការជាមួយ›»
[ប្រអប់/រូបភាពនៅទំព័រ២១៦, ២១៧]
ក្រដាសលំហាត់
តើប្អូនត្រៀមខ្លួនរៀបការហើយឬនៅ?
សូមពិចារណាសំណួរក្នុងទំព័រទាំងពីរនេះ។ ប្អូនក៏អាចពិភាក្សាសំណួរទាំងនេះជាមួយគូអនាគតរបស់ប្អូនដែរ។ កុំភ្លេចអានបទគម្ពីរដែលបានត្រូវដកស្រង់។
អំពីលុយកាក់
□ តើប្អូនយល់យ៉ាងណាអំពីលុយ?—ហេប្រឺ ១៣:៥, ៦
□ តើប្អូនអាចបង្ហាញយ៉ាងណាថាប្អូនមានទំនួលខុសត្រូវក្នុងរឿងលុយកាក់?—ម៉ាថាយ ៦:១៩-២១
□ តើប្អូនជំពាក់លុយគេទេ? បើមាន តើប្អូនចាត់វិធានការណ៍អ្វីខ្លះដើម្បីសងគេវិញ?—សុភាសិត ២២:៧
□ តើពិធីរៀបការនឹងត្រូវចាយលុយអស់ប៉ុន្មាន? ហើយបើត្រូវខ្ចីលុយគេ តើប្អូនគិតថាបំណុលប៉ុន្មានអាចសងគេបាន?—លូកា ១៤:២៨
□ ក្រោយពីរៀបការហើយ តើប្អូនទាំងពីរត្រូវធ្វើការទេ? បើមែន តើប្អូននឹងរៀបចំយ៉ាងដូចម្ដេច ករណីបើប្អូនទាំងពីរធ្វើការម៉ោងខុសគ្នា ឬប្រើមធ្យោបាយធ្វើដំណើរផ្សេងពីគ្នា?—សុភាសិត ១៥:២២
□ ក្រោយពីរៀបការហើយ តើប្អូនទាំងពីរនឹងរស់នៅកន្លែងណា? តើថ្លៃជួលផ្ទះ ថ្លៃអាហារ សម្លៀកបំពាក់ និងការចំណាយផ្សេងទៀតអស់ប៉ុន្មាន? ហើយតើប្អូននឹងបង់ថ្លៃចំណាយទាំងនោះតាមរបៀបណា?—សុភាសិត ២៤:២៧
អំពីក្រុមគ្រួសារ
□ តើប្អូនចុះសម្រុងជាមួយឪពុកម្ដាយនិងបងប្អូនបង្កើតបានល្អប៉ុនណា?—ដំណើរចាកចេញ ២០:១២; រ៉ូម ១២:១៨
□ តើថ្មីៗនេះប្អូនដោះស្រាយជម្លោះនៅក្នុងផ្ទះដោយវិធីណា?—កូឡុស ៣:១៣
□ បើប្អូនជានារី តើប្អូនបង្ហាញ«ចិត្តស្ងៀមស្ងាត់និងស្លូតបូត»យ៉ាងដូចម្ដេច?—ពេត្រុសទី១ ៣:៤
□ តើប្អូនមានគម្រោងយកកូនទេ? (ចម្រៀងសរសើរព្រះ ១២៧:៣) បើគ្មានទេ តើប្អូននឹងប្រើវិធីអ្វីដើម្បីពន្យារកំណើត?
□ បើប្អូនជាបុរស តើប្អូននឹងធ្វើគម្រោងបែបណាដើម្បីដឹកនាំក្រុមគ្រួសារក្នុងការគោរពប្រណិប័តន៍ព្រះ?—ម៉ាថាយ ៥:៣
អំពីគុណសម្បត្តិ
□ តើប្អូនបានធ្វើអ្វីខ្លះដែលបង្ហាញថាប្អូនជាមនុស្សឧស្សាហ៍ព្យាយាម?—សុភាសិត ៦:៩-១១; ៣១:១៧, ១៩, ២១, ២២, ២៧
□ តើប្អូនចេះលះបង់ប្រយោជន៍ខ្លួនដោយរបៀបណា?—ភីលីព ២:៤
□ បើប្អូនជាបុរស តើប្អូនអាចបង្ហាញយ៉ាងដូចម្ដេចថាប្អូនប្រើសិទ្ធិអំណាចតាមគំរូរបស់គ្រិស្ត?—អេភេសូរ ៥:២៥, ២៨, ២៩
□ បើប្អូនជានារី តើប្អូនអាចបង្ហាញយ៉ាងដូចម្ដេចថាប្អូនចុះចូលក្រោមអំណាចដែលគម្ពីរបានចែង?—អេភេសូរ ៥:២២-២៤
[រូបភាពនៅទំព័រ២១៩]
ការប្រញាប់រៀបការ ប្រៀបដូចជាការលោតចុះ«ទឹក» ដោយមិនដឹងថាមានអ្វីនៅក្នុងទឹក
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
