Kala Kyasoneka Máluku 10:1-52
-
Ukaza ni kudisenga (1-12)
-
Jezú ubesowala o anandenge (13-16)
-
Kibhwidisu kya diyala wala mvwama (17-25)
-
Kuxisa ima mukonda dya Utuminu (26-31)
-
Jezú uzwela dingi yalungu ni kufwa kwê (32-34)
-
Tiyaku ni Nzwá abhinga kididi kya ungana (35-45)
-
Jezú, sata ya kukúla o mundu (45)
-
-
O kifofo Batimewu a musaka (46-52)
10 Jezú watundu bhenyobho, yu wayi mu jimbambe ja Judeya, ku sambwa dya Njolodá. Lwa mukwá, mundu wavulu wa mu bhongolokela. Mwene anga umateka kwalonga dingi, kála kyakexile mu bhanga.
2 Sayi Jifalizewu a mu zukama phala ku mu tendala, ya a mwibhwidisa se kya fwamene o diyala kusenga o muhatu wê.
3 Mwene wa atambwijila, wixi: “Ihi ya mi tumu Mozé?”
4 Ene ambe, exi: “Mozé watumu o diyala kubhana ku muhatu mukanda wakusenga ni ku mweha, n’ayè.”
5 Jezú wa atangela, wixi: “Mozé wa mi sonekena o kitumu kiki, mukonda dya kukola kwa mixima yenu.
6 Maji, tundé kudimatekenu, Nzambi wa abhange diyala ni muhatu.
7 Mukonda dya kiki, o diyala wanda xisa tat’â ni mam’â,
8 anga kiyadi kyâ akala xitu imoxi ngó. Mu kiki ene kakala dingi kiyadi, maji xitu imoxi ngó.
9 Mukonda dya kiki, yoso yôngeka Nzambi, kana muthu u iwanuna.”
10 Kyoso kyakexile dingi mu inzo, o maxibulu a mu ebhwidisa yalungu ni maka enyá.
11 Mwene wa atangela, wixi: “Diyala dyoso-dyoso usenga muhatu wê, anga ukazala ni muhatu wengi, uta phánda.
12 O muhatu we, se usenga munumi wê, anga ukazala ni diyala dyéngi, mwene uta phánda.
13 O athu anga a kala ku mu bhekela o twana twa ndenge, phala ku atula o maku, maji o maxibulu abazela o athu.
14 Jezú-phe kya kimono, mwene wa ki ibhila, yu wambela o maxibulu, wixi: “Ehenu o twana twa ndenge kwiza kokwami, kanenu kwa fidisa, mukonda o Utuminu wa Nzambi watokala kwa yó ala kala ene.
15 Ngi mi tangela o kidi kwila, woso ukamba kutambulula o Utuminu wa Nzambi kála mona ndenge, kanda bokona-mu.
16 Mwene anga utambula o twana bhu jihata jê, yu wamateka kwa besowala mu ku atula o maku mê kuthandu dyâ.
17 Kyoso Jezú kyakexile mu tunda, sayi diyala dya bhixila ni lusolo kwa mwene, anga u mu fukamena, yu wa mwibhwidisa: “Mesene Yambote, ihi i nga tokala o kubhanga phala ngi tambule o mwenyu wakalelaku?”
18 Jezú wa mwambela, wixi: “Mukonda dyahi wa mu ng’ixana Mesene Yambote? Ki bhwala muthu wambote, maji Nzambi ngó.
19 Eye wejiya o itumu yiyi: ‘Kana kujibha, kana kuta phánda, kana kunyana, kana kubhana umbangi wa makutu, kana kunganala mukwenu, xila tat’enu ni mam’enu.’
20 O diyala wa mwambela, wixi: “Mesene, o itumu yiyi ngene mu i kumbidila tundé mu undenge wami.”
21 Jezú wa mutale swí, wa mu kwatela henda, yu wa mwambela, wixi: “Kima kimoxi kya kukambe. Ndé wa kà sumbise o jimbote ji wala naju, o kitadi u kibhane ku jingadyama, ni ukale ni jimbote ku dyulu, anga wize ni ukale u mukayedi wami.”
22 Kyoso mwene kyevu o kitambwijilu, waluwala, yu wayi ni kikote ku muxima, mukonda wakexile ni jimbote javulu.
23 Kyedi swí ku athu a mu kondolokele, Jezú watangela o maxibulu mê, wixi: “Kwanda bhonza kyavulu phala o jimvwama kubokona mu Utuminu wa Nzambi!”
24 O maxibulu-phe adiwana ni izwelu ya Jezú. Mu kiki, Jezú wa atangela: “An’ami, kibhonza kyavulu phala o muthu kubokona mu Utuminu wa Nzambi!
25 Ki kibhonzo o kamelu kubhita bhu kadikungu ka nguya, maji kibhonza dingi phala o mvwama kubokona mu Utuminu wa Nzambi.”
26 Ene anga adiwana dingi kyavulu, ya a mwibhwidisa,* exi: “Nanyi utena o kubhuluka?”
27 Jezú wa atale swí, anga wa atangela, wixi: “Ku athu o ima yiyi ki itena kubhita, maji kwa Nzambi itena, mukonda phala Nzambi, ima yoso itena kubhita.”
28 Phetele-phe wa mu tangela, wixi: “Talesa! Twaxisa o ima yoso, étu twa kukayela.”
29 Jezú wambe: “Ngi mi ambela o kidi kwila, kana muthu waxisa dibhata, jiphange ja mala ni ja ahatu, twana ni mábhya mukonda dyami’eme ni dya njimbu yambote,
30 ukamba kutambula luhama kindala, mu thembu yiyi, mabhata, jiphange ja mala ni ja ahatu, ji mama, twana ni mábhya, ni izukutisu ni kutambula o mwenyu wakalelaku ku mundu* wa ubhe wa kezaku.
31 Maji avulu adyanga ene anda sukidila-ku, o a sukidila-ku, ene anda dyanga.”
32 Ene anga akala mu njila mu kubanda mu Jeluzaleme. Jezú wa atwamenena, ene anga adiwana, maji o athu akexile mwa kayela akexile ni wôma. Mwene anga wixana dingi ku mbandu o kwinyi ni kiyadi kya jipoxolo, yu wamateka kwa tangela o ima yeji bhita ni mwene:
33 “Ivwenu! Mu Jeluzaleme mu twa mu banda, o Mon’a muthu anda mubhakula ku akunji a makota ni ku jimesene ja kulonga o Kijila. Ene anga anda mubalakala o kufwa ni ku mubhakula bhu maku a athu akwa ifuxi,
34 ene anda mu sebhulula, ku mu phamena mathe, ku mu beta, ni ku mu jibha, maji mu kubhita izuwa itatu anda mu fukununa.”
35 Tiyaku ni Nzwá, o an’a Nzebedewu, a mu zukama ya a mwambela, exi: “Mesene, twamesena kwila u tubhanga o kima ki tu kubhinga.
36 Mwene wa ebhwidisa, wixi: “Mwa mesena ngi mi bhanga ihi?”
37 Ene atambwijila, exi: “Ki wanda kala mu Utuminu wé, twehele kuxikama umoxi ku mbandu yé ya kadilu, o mukwá ku mbandu yé ya kyasu.”
38 Jezú-phe wa atangela, wixi: “Enu ki mwejiya o kima ki mwa mu bhinga. O kwila mutena kunwa ku dikáwu di nga mu nwa? Mba ku mi batizala ni batizu ya mu ngi batizala nayu eme?”
39 Ene ambe, exi: “Tutena.” Mu kiki Jezú wa atangela, wixi: “Enu mwanda nwa mwene ku dikawu di nga mu nwa, ni ku mi batizala ni batizu ya mu ngi batizala nayu eme.
40 Maji o kusola o muthu phala kuxikama ku mbandu yami ya kadilu mba ya kyasu, ki ku ngi tokala eme. O ididi yiyi, yatokala kwa yó a a yudikila nayu.”
41 Kyoso o dikwinyi dya maxibulu kyevu o maka enya, athathamana ni Tiyaku ni Nzwá.
42 Maji Jezú-phe, wa a exana anga wa atangela, wixi: “Enu mwa kijiya kuma o jinguvulu* ja ngongo jene mu bhanga o athu kala abhika, ni kwila o atwameni mudyâ ene atumina.
43 Ki kyene kyatokala kubhita bhukaxi kenu, maji woso wamesena kukala kota bhukaxi kenu, akale o selevende yenu,
44 woso wamesena kukala ku pholo mudyenu, mwene watokala kukala o mubhika wenu.
45 Mukonda katé mwene ni Mon’a muthu keza phala ku mu sidivila, maji phala kusidivila ni kubhana o mwenyu wê kala sata ya kukúla o mundu.”
46 Ene anga abokona mu Jedikó. Maji kyoso mwene ni maxibulu mê ni kifuxi kyadikota kyakexile mutunda ku Jedikó, Batimewu (mon’a Timewu) kifofo wakexile mubhinga jimola, waxikamene bhu mbandu ya kikoka.
47 Mwene kyevu kwila Jezú dya Nazalé wakexile mubhita, wamateka kudikola, wixi: “Jezú, mon’a Davidi, ngi kwatele henda!”
48 Mukonda dya kiki, athu avulu amateka ku mu bazela, ni ku mu tumina n’a dixibhe. Maji mwene wakexile mu dikola dingi ni dízwi dya swina, wixi: “Mon’a Davidi, ngi kwatele henda!”
49 Jezú-phe wemana, yu wambe, wixi: “Mwixanyenu.” O athu exana o kifofo, anga a mwambela, exi: “Kana kukala ni wôma! Balumuka, mwene wa mu kwixana.”
50 Mwene watakula o kizwatu kyê ku mbandu, anga ubalumuka ni lusolo yu wayi kwa Jezú.
51 Jezú-phe wa mwibhwidisa, wixi: “Wamesena ngi kubhanga ihi?” O kifofo wa mu tambwijila: “Mesene,* ngi jikule o mesu.”
52 Jezú wa mwambela: “Ndé, o kixikanu kyé kya kubhangesa kudisanza.” Mu kithangana kyenyókyo, mesu mê ma jikuka, yu wamateka ku mu kayela mu kikoka.
Footnotes
^ Mba nange, “a dibhwidisa mudyâ.”
^ Mba, “ku hádya.” Tala o Dilombolwelu.
^ Mba, “yó edi kala a mu tumina.”
^ Mu Heba.: “Laboni.”
