Kala Kyasoneka Máluku 11:1-33
11 Kyakexile mu zukama mu mbanza ya Jeluzaleme, abhixila ku Mulundu wa Midiva bhwa zukama o jisanzala ja Betefaje ni Betanya. Mwene watumikisa kiyadi kya maxibulu mê,
2 yu wa atangela, wixi: “Ndenu mu sanzala i mwa mu mona, kyoso ki mwanda tula, mwanda sanga-mu jumendu yokute, kiluwa muthu u imondala. Mu ijituna mwize nayu bhabha.
3 Se bhukala muthu u mi ibhwidisa, wixi: ‘Ihi i mwa mu bhanga?’ Mu zwela, mwixi: ‘Ngana wa ibhindamena, maji mwene wanda itumikisé kindala.’”
4 Ene ayi asange o jumendu yokute bhu kanga, bhu mbandu a mwelu, anga a ijituna.
5 Maji amoxi akexile-bhu, ebhwidisa o maxibulu, exi: “Ihi i mwa mu bhanga? Mukonda dyahi mwa mu jituna o jumendu?”
6 O maxibulu azwela o ima ya atangela Jezú, anga a ehela kuya.
7 Abheka o jumendu kwa Jezú, ene ate o izwatu yâ, kuthandu dya jumendu, mwene anga uxikama-ku.
8 Athu avulu azale o izwatu yâ mu njila, maji a mukwá abatula isalale ya maye.
9 O athu a mu twamenene ni yó akexile mu mu kayela akexile mu dikola, exi: “Nzambi twa kudyondo, mu bhulule!* Atane-ku, yó wiza mu dijina dya Jihova!
10 A tane-ku o Utuminu wiza kwa tat’etu Davidi! Twa kudyondo mu bhulule, eye wene ku dyulu!”
11 Mwene anga ubokona mu Jeluzaleme, yu wayi mu tembulu, watale-mu yoso ya mu kondolokele, maji kuma dikumbi dya fwile kyá, watundu kumoxi ni kwinyi ni kiyadi kya jipoxolo, yu wayi mu sanzala ya Betanya.
12 Kizuwa kyakayela, kyoso kyakexile mu tunda mu Betanya, nzala ya mu kwata.
13 Kyakexile hanji kadikanga, wamono muxi wa mufiku, wayi mu tala se weji sanga-ku ibundu: Maji kya zukama, kasange-ku ibundu, máfwe ngó, mukonda ki yexile hanji o thembu ya jifiku.
14 Mwene wambela o muxi, wixi: “Ki bhukale dingi muthu udya ku ibundu yé.” O maxibulu akexile mu kwívwa.
15 Ene anga abhixila mu Jeluzaleme: Mwenyomo, mwene wabokona mu tembulu, wamateka kukaya yó akexile mu sumbisa ni yó akexile mu sumba mu tembulu, yu wa lundumuna o jimeza ja akwá kutolokala o kitadi, ni yalu ya athu akexile mu sumbisa o madyembe.*
16 Mwene kehela muthu kubhita mu tembulu ni kitutu kyoso-kyoso.
17 Wakexile mwalonga ni ku atangela, wixi: “Ka ki soneka mu Mikanda Ikôla kwila, ‘o inzo yami, anda ixana inzo ya kusamba phala o ifuxi yoso’? Maji enu mwa ibhange kididi kya kuswamena-mu miyi.”
18 O akunji a makota ni jimesene ja kulonga o Kijila kyevu o ima yiyi, amateka kusota ndunge phala ku mu jibha, mukonda akexile ni wôma wa mwene, kuma mundu woso wa diwanene ni ulongelu wê.
19 Mu ngoloxi, Jezú ni maxibulu mê atundu mu mbanza.
20 Mu kamene-mene, kyabhiti bhwa kexile o muxi wa mufiku, a mono kwila wa kukutile kyá katé ku jindanji.
21 Phetele wa dilembalala, yu wambela Jezú, wixi: “Mesene,* talesa! O muxi u wa lôka, wakukuta.”
22 Jezú wa atangela, wixi: “Kalenu ni kixikanu kwa Nzambi.
23 Ngi mi ambela o kidi kwila, woso utangela o mulundu yú, wixi: ‘Tunda bhabha uditakule ku musanza wa kalunga,’ anga kakale ni phata ya kima ku muxima, maji ukala ni kixikanu kwila o kima kyazwela kyanda dikumbidila, kyanda dikumbidila mwene.
24 Mukonda dya kiki, ngi mi tangela kwila, ima yoso i mu bhinga mu musambu, kalenu ni kixikanu kwila mwa itambula kyá, anga mwanda itambula mwene.
25 Kyoso ki mwimana mu kusamba, lolokenu woso wa mi kala ni kikuma, phala o Tat’enu wene ku dyulu, a mi loloke we o ikuma yenu.”
26 ——
27 Ene anga abhixila dingi mu Jeluzaleme. Kyoso Jezú kyakexile mu kwenda mu tembulu, o akunji a makota ni jimesene ja kulonga o Kijila ni adyakime a mundu eza kwa mwene,
28 ya a mwibhwidisa, exi: “Ungana wahi uwala nawu phala kubhanga o ima yiyi? O ungana yú nanyi wa kubhana-wu?”
29 Jezú wa atangela: “Nganda mi ibhula we kima kimoxi. Ngi tambwijilyenu, ni ngi mi tangela se ungana wahi ungala nawu phala kubhanga o ima yiyi.
30 O ungana wa Nzwá wa kubatizala, watundile kwa Nzambi,* inga ku athu? Ngi tambwijilyenu.”
31 Ene anga amateka kuxinganeka mudyâ, exi: “Se twamba, ‘watundile kwa Nzambi,’ mwene wanda zwela, wixi: ‘Mukonda dyahi-phe ki mwa mu xikina?’
32 Se tuzwela: ‘Ku athu’?” Ene akexile ni wôma wa mundu mukonda axikinine kwila Nzwá wexile polofeta.
33 Kyenyiki, ene atambwijila Jezú, exi: “Ki twa k’ijiya.” Jezú-phe wa atangela, wixi: “Eme wami ki nganda mi tangela se ungana wahi u ngala nawu phala kubhanga o ima yiyi.”
