O kuila eie ua mono o jifoto ku dimatekenu dia kadivulu kaka, ji londekesa o Jimbangi ja Jihova a zuata kiambote kioso kiaia mu iônge ia ilunga iâ? Mukonda diahi tu tonginina kiambote o izuatu ietu?

Phala ku ximanesa Nzambi ietu. Mu kidi Nzambi ka tale ngó o izuatu ietu, maji u tala dingi ima iéngi. (1 Samuuele 16:7) Kioso ki tu diongeka, o vondadi ietu o ku ximanesa Nzambi ni jiphange jetu mu nzumbi. Se tuia ku inzo ia kufundisa, tueji zuata kiambote mukonda dia ujitu uala nau o mufundixi. Kiene kimoxi, kioso ki tuia mu iônge ietu, tu londekesa kuila tua mu ximana o “Mufundixi u fundisa ioso mu ngongo,” Jihova Nzambi, ni kididi bhu tua mu bheza muéne.—Dimatekenu 18:25.

Phala kulondekesa o itumu i tuendesa ku muenhu. O Bibidia i suínisa o Jikidistá kukala ni ‘uzuatelu ua fuama’ u bhana ‘kiximanu kua Nzambi.’ (1 Timote 2:9, 10) ‘Kuzuata ni kilunji,’ kulombolola kueha izuatu ilondekesa se tu a nanhi, mu ku bhekela tendasá, mba ilondekesa o mukutu. Kukala ué ni ‘kilunji kia muxima,’ ki tu kuatekesa kusola izuatu ki i tokala mba ia iibha. O itumu íii, i bhana hanji ufolo ua kusola ihi ia tokala o ku zuata o muthu. Sé kuzuela kima, o uzuatelu uetu uambote u tena ‘ku fuamesa o ulongelu ua Mubhuludi uetu,’ ni kubhana ‘kijingu kua Nzambi.’ (Tito 2:10; 1 Phetele 2:12) Kuzuata kiambote phala kuia mu iônge, u tu fuinhisa ki kale etu, ni a mukua eza mu bheza Jihova kumoxi n’etu.

Se kuala luua ni izuatu ia fuama phala kuíza mu iônge ietu mu Kididi kia Kubheza, né kiki divua kiambote phala kuia-mu. O izuatu ietu, ki i bhingi kitadi kiavulu, ia bhingi ngó ku i zelesa.

• Kiebhi kia beta-kota ku ukexilu uetu ua kuzuata, kioso ki tu bheza Nzambi?

• Itumu iebhi iendesa o ukexilu uetu ua kuzuata ni kiebhi ki tu u langa?