KUENE ibanzelu iavulu ia lungu ni muenhu ni kufua. Amoxi amba kuila kioso muthu kia fua, o muenhu ki u fu, o muthu u kala ni muenhu mu kididi kiengi. A kamukuá a xikina kuila mu kufua, ene a a vuala dingi n’a kale ni muenhu uengi. Sai hanji iá, amba kuila o kufua o disukilu dia ima ioso.

Eie nange uala ue ni ibanzelu ié ku thandu dia maka enhá, mukonda dia ukexilu ua ku sase nau mba mukonda dia ifua ia ixi ié. Kuma kuene itambuijilu iavulu ia lungu ni ihi i bhita ni muthu kioso kia fua, o kuila sai muthu u tena ku tu bhana kitambuijilu kia kidi kia kibhuidisu kiki kia bhonzo?

Mu mivu iavulu, o atuameni a jingeleja ene mu longa kuila muthu kia fua, o nzumbi ié ki i fu. O akaiedi a jingeleja ja makota—Jikidistá, Hindus, Jijudé, Jimusulumanu ni akaiedi a mukuá—a xikina kuila o nzumbi ki i fu, amba kuila o mukutu uene ngó u fua, o nzumbi kana, i kala ku muenhu mu kididi kiengi. Maji o Jibudista a xikina kuila mukonda dia ku a vuala mu veji javulu, o muthu, ku pholo dia kuenda u sanga o kuzediua kua kidi, a kuixana Nirvana.

Mukonda dia ulongelu iu, athu avulu mu ngongo, a xikina kuila o kufua ku jikula o njila phala o muthu kuia ku mundu uengi. Athu avulu, amba kuila o muthu ua tokala kufua phala kukala ni muenhu uengi, mu kiki a xikina kuila o kufua, vondadi ia Nzambi. Maji ihi i longa o Bibidia ia lungu ni maka enhá? Tua ku dióndo tanga o mbandu ia kaiela-ku. Ua-nda diuana mu kuijiia o kitambuijilu.