Nzambi ua kanena Mbalahamu kuila, o “mbutu” mu kikanenu, ieji tunda ku muiji ua Mbalahamu. Ku mbutu íii, kuene kueji zediuila “ifuxi ioso” mu ngongo. (Dimatekenu 22:18) O mulaula ua Mbalahamu, Jakobo, uai mu tunga mu Ijitu, muene mua dibandekesa o muiji ni ku kala o kifuxi kia Izalaiele.

Maji mu Ijitu, o sobha ua iibha, Falaó ua bhikisa akua Izalaiele katé Nzambi kia tumu o polofeta Mozé ku katula o mundu ua Izalaiele ku Ijitu mu ku jikula o Kalunga ka Kusuka mu madiuanu. Kia zaúka, Nzambi ua bhana itumu ku akua Izalaiele, ni Dikuinhi dia Ijila, phala ku a endesa ni ku a langa. O ijila ienioió ia lungile ué ni jisata a tokalele o ku bhana phala ku a loloka o ituxi. Bhu kaxi ka Nzambi, Mozé ua tangele akua Izalaiele kuila, eji ku a tumikisa polofeta iéngi. O polofeta iú ueji kala o “mbutu” ia kanene Nzambi.

Mu ku bhita hama jitanu ja mivu, Nzambi ua kanena Sobha Davidi kuila o muthu ueji kuíza, o “mbutu” ia kanene mu jaludim ia Edene, ueji kala ku usobha ku hádia ni hádia. O muthu iú, Mexiia, o Mubhuludi ua solo Nzambi phala ku bhulula o athu ni ku bheka dingi o Palaízu mu ixi.

Bhu kaxi ka Davidi ni polofeta ja mukuá, Nzambi ua bhana dingi milongi ia lungu ni Mexiia. Ene ambe kuila, muéne ueji kala muthu ua lenduka, uambote ni kuila ku utuminu uê ki kua-nda kala-ku njinda, kuiibha ni ita. Athu oso a-nda tunga ni ku tululuka mudiâ ni iama. O mauhaxi, o hadi, ni kufuá​—​ki iexile ia vondadi ia Nzambi—ia-nda bhita, ni kuila o athu afú kiá a-nda vutuka dingi ku muenhu.

Bhu kaxi ka polofeta Mikeia, Nzambi ua kanena kuila o Mexiia eji mu vuala mu mbanza ia Beleme, o bhu kaxi ka polofeta Daniiele Nzambi ua kanena kuila o Mexiia eji ku mu jibha. Maji Nzambi ueji fukununa Mexiia mu’alunga ni ku mu unda kala Sobha ia diulu. Daniiele ua soneka ué kuila, o Utuminu ua Mexiia ueji bhingana o mautuminu moso a ixi. O kuila o Mexiia uéza muéne kala kia ki kanene?

—O milongi íii ia tundu mu divulu dia Dimatekenu kibatulu 22 ndu 50, Makatukilu, Matendelelu, 2 Samuuele, Jisálamu, Izaia, Daniiele, Mikeia ni Zakadiia 9:9.