1. Чь дькарә али мә бькә, ԝәки әм жь лекʹолинкьрьна пʹехәмбәртийед Кʹьтеба Пироз ләзәте бьстиньн?

 ГӘЛО тӧ дәрһәԛа лекʹолинкьрьна пʹехәмбәртийед Кʹьтеба Пироз чь дьфькьри? Бьраки щаһьл бь наве Бен дьбежә: «Мьн хԝәш те пʹехәмбәртийед Кʹьтеба Пироз лекʹолин кьм». Тә жи хԝәш те ве йәке бьки? Йан бона тә чәтьн ә пʹехәмбәртийед Хԝәде фәʹм бьки? Дьбәкә һʹәԝаса тә тʹӧнә пʹехәмбәртийа лекʹолин ки. Ле диса жи, гава тӧ фәʹм бьки ԝәки Йаһоԝа әԝ пʹехәмбәрти чьрʹа дайә ньвисаре, дьбәкә тӧ ньһерʹандьна хԝә бьгӧһези.

² Ве готареда, әме бьвиньн кӧ чьрʹа әм гәрәке пʹехәмбәртийед Кʹьтеба Пироз дьһа баш фәʹм бькьн, у әм чаԝа дькарьн ԝана лекʹолин бькьн. Паше, әме дӧ пʹехәмбәртийед жь кʹьтеба Данийел лекʹолин бькьн у пебьһʹәсьн кӧ фәʹмкьрьна ԝан бона мә чьрʹа керһати йә.

3. Сәва кӧ әм пʹехәмбәртийед Кʹьтеба Пироз фәʹм кьн, әм гәрәке чь бькьн?

³ Бона фәʹмкьрьна пʹехәмбәртийед Кʹьтеба Пироз мәрʹа аликʹари лазьм ә. Дина хԝә бьдьнә ве мәсәле: Тӧ дьчи щики нәнас, ле һәваләки тә, йе кӧ ԝи щийи рʹьнд нас дькә, тʹәви тә те. Әԝ сәд сәләфи занә кӧ һун кʹидәре нә у әв рʹе бәрбь чь дьбә. Бе шьк, тӧ гәләк ша йи кӧ һәвале тә кʹеләка тә йә! Мина ви һәвали, Йаһоԝа жи дьхԝазә али мә бькә. Әԝ рʹьнд занә кӧ сьбе-дӧспа ԝе чь бьԛәԝьмә. Ләма жи бона фәʹмкьрьна пʹехәмбәртийед Кʹьтеба Пироз, гәрәке әм бь мьлукти жь Йаһоԝа аликʹарийе бьхԝазьн (Данийел 2:28; 2 Пәтрус 1:19, 20).

4. Йаһоԝа чьрʹа пʹехәмбәрти данә ньвисаре? (Йерәмийа 29:11) (Бьньһерʹә ӧса жи шькьл.)

⁴ Мина һʹәму де-бавед ԛәнщ, Йаһоԝа жи дьхԝазә ԝәки  ахьрийа зарʹед ԝи баш бә (Бьхунә Йерәмийа 29:11). Йаһоԝа пешда дькарә бежә, кӧ ахьрийеда чь ԝе бьԛәԝьмә, у гьлийед ԝи бь тʹәмами тенә сери. Сәва кӧ әм бьзаньбьн ԝәки кʹижан тьштед фәрз ԝе бьԛәԝьмьн, Хԝәде пʹехәмбәртийед хԝә Кʹьтеба Пирозда дайә ньвисаре (Ишайа 46:10). Пʹехәмбәртийед Кʹьтеба Пироз пʹешкʹешед гәләк ԛимәт ьн жь Баве мәйи әʹзмана. Ле тӧ ча дькари баԝәр би, кӧ пʹехәмбәртийед Кʹьтеба Пироз дәрһәԛа ахьрийе, әʹсәйи ԝе бенә сери?

5. Щаһьл дькарьн жь сәрһатийа Макс чь һин бьн?

⁵ Мәкʹтәбеда, щаһьлед мә рʹасти гәләк мәрьва тен, йед кӧ ԛәдьре Кʹьтеба Пироз кем йан жи ԛә нагьрьн. Готьн у кьрьнед ԝан дькарьн шьке бькьнә һʹьш у дьле щаһьлед мә. Бьраки бь наве Макс, дьбежә: «Гава әз дьчумә мәкʹтәбе, әз дӧдьли дьбум кӧ де-баве мьн религийа рʹаст мьн һин дькьн. У мьн жь хԝә дьпьрси, гәло Кʹьтеба Пироз бь рʹасти жь Хԝәде йә». Де-баве ԝи чаԝа али ԝи кьрьн? Әԝ дьбежә: «Рʹаст ә де-баве мьн хәмгин дьбун, ле әԝана һерс нәдькʹәтьн». Де-баве Макс щабед пьрсед ԝи жь Кʹьтеба Пироз дьдан. Макс жи алийе хԝәда тьштәк кьр. Әԝ дьбежә: «Мьн пʹехәмбәртийед Кʹьтеба Пироз лекʹолин дькьр у тьштед кӧ педьһʹәсийам, кәсед дьнрʹа дьгот». Гәло ахьри чь бу? Макс Дьбежә: «Паши ве йәке, әз баԝәр бум кӧ Кʹьтеба Пироз жь бина бәр Хԝәде һатийә ньвисаре!»

6. Һәрге тӧ дӧдьли дьби, тӧ гәрәке чь бьки у чьма?

⁶ Мина Макс, һәрге һьндава Кʹьтеба Пироз шьк дькʹәвә һʹьш у дьле тә жи, бәрхԝә нәкʹәвә. Ле гәләк фәрз ә ԝәки тӧ зу тьштәки бьки. Шьк мина жәнге йә. Һәрге ԝәʹдәда жәнге тʹәмьз нәкьн, әԝ дькарә тьштед ԛимәт хьраб кә. Сәва кӧ баԝәрийа тә «жәнг» нәгьрә, жь хԝә бьпьрсә: «Гәло әз пʹехәмбәртийед Кʹьтеба Пироз дәрһәԛа ахьрийе баԝәр дькьм?» Һәрге тӧ дӧдьли дьби, гәрәке тӧ пʹехәмбәртийед Кʹьтеба Пироз, йед кӧ ида һатьнә сери, лекʹолин ки. Гәло тӧ ча дькари ве йәке бьки?

7. Әм чьда дькарьн чʹәʹв бьдьнә Данийел пʹехәмбәр? (Данийел 12:10) (Бьньһерʹә ӧса жи шькьл.)

⁷ Данийел лекʹолинкьрьна пʹехәмбәртийада мәсәләкә баш һиштийә. Әԝи пʹехәмбәртийед Хԝәде бь нета рʹаст лекʹолин дькьр, чьмки әԝи дьхԝәст рʹастийе бьзаньбә. Ӧса жи, Данийел йәки мьлук бу. Әԝи заньбу кӧ гава әԝ Йаһоԝарʹа амьн бьминә, Йаһоԝа ԝе али ԝи бькә, ԝәки әԝ пʹехәмбәртийед Ԝи фәʹм бькә (Данийел 2:27, 28; бьхунә Данийел 12:10). Данийел хԝә дьспартә аликʹарийа Йаһоԝа у ӧса избат дькьр, кӧ әԝ йәки мьлук ә (Данийел 2:18). Әԝи бь хирәт лекʹолина дькьр. Әԝи ӧса жи Ньвисаред Пироз, йед кӧ щәм ԝи һәбун, кʹур лекʹолин дькьр (Йерәмийа 25:11, 12; Данийел 9:2). Гәло тӧ ча дькари чʹәʹв бьди Данийел пʹехәмбәр?

8. Һьнә кәс чьрʹа баԝәр накьн, ԝәки пʹехәмбәртийед Кʹьтеба Пироз ԝе бенә сери, ле әм гәрәке чь бькьн?

⁸ Бь нета рʹаст лекʹолина бькә. Гәло  нета лекʹолина тә әԝ ә, кӧ тӧ рʹастийе фәʹм бьки? Һәрге әре, Йаһоԝа ԝе али тә бькә (Йуһʹәнна 4:23, 24; 14:16, 17). Ле һьнә кәс пʹехәмбәртийед Хԝәде бь нетәкә дьн лекʹолин дькьн. Әԝана дьхԝазьн избат кьн, ԝәки Кʹьтеба Пироз жь бина бәр Хԝәде нинә. Әԝана дьфькьрьн, кӧ һәрге Кʹьтеба Пироз нә жь Хԝәде йә, әԝана хԝәха дькарьн сафи кьн чь рʹаст ә у чь на. Ле әм гәрәке бь нета рʹаст лекʹолина бькьн. Хенщи ве йәке, бона фәʹмкьрьна пʹехәмбәртийед Кʹьтеба Пироз, мәрʹа һʹӧнӧрәки фәрз лазьм ә.

9. Бона фәʹмкьрьна пʹехәмбәртийед Кʹьтеба Пироз, кʹижан һʹӧнӧр мәрʹа лазьм ә? Шьровәкә.

⁹ Мьлук бә. Йаһоԝа соз дьдә, кӧ әԝе али мәрьвед мьлук бькә (Аԛуб 4:6). Ләма жи сәва кӧ әм пʹехәмбәртийед Кʹьтеба Пироз фәʹм кьн, әм гәрәке Хԝәдерʹа дӧа кьн у жь ԝи аликʹарийе бьхԝазьн. Хенщи ве йәке, гәрәке әм бь мьлукти ԛәбул кьн, ԝәки әм һʹәԝще аликʹарийа хӧламе амьн ьн. Йаһоԝа әԝ кʹьфш кьрийә, кӧ хԝарьна рʹӧһʹани ԝәʹдәда бьдә мә (Луԛа 12:42). Йаһоԝа Хԝәдейе тʹәрбәтийе йә, ләма жи, әԝ тʹәне бь сайа канике али мә дькә, ԝәки әм рʹастийед жь Хәбәра ԝи фәʹм бькьн (1 Корьнтʹи 14:33; Әфәси 4:4-6).

10. Тӧ жь сәрһатийа Әстәре чь һин буйи?

¹⁰ Кʹур лекʹолина бькә. Серида ван пʹехәмбәртийа лекʹолин кә, кʹижан кӧ тӧ дьхԝази пебьһʹәси. Хушка мә Әстәр һәма ӧса жи кьр. Әԝе дьхԝәст дәрһәԛа пʹехәмбәртийа һатьна Мәсиһ пебьһʹәсә. Әԝ дьбежә: «Гава әз 15 сали бум, мьн лекʹолин кьр һәла фьлан готьн бь рʹасти пешийа һатьна Мәсиһ һатьбун ньвисаре, йан на. Тьштед кӧ әԝе дәрһәԛа кʹьтебед гӧломәтккьри, йед Бәʹра Мьри хԝәнд, баԝәрийа ԝе ԛәԝи бу. Әԝ дьбежә: «Һьнә жь ван кʹьтеба, пешийа һатьна Мәсиһ һатьбун ньвисаре, ләма әз баԝәр бум кӧ готьнед ԝан бь рʹасти жи жь Хԝәде нә. Сәва кӧ мьн әԝ тьшт фәʹм бькьра, лазьм бу кӧ мьн әԝ чәнд щара бьхԝәнда». Ле хирәта хушка мә бадиһәԝа нибу. Чахе әԝе чәнд пʹехәмбәртийед Кʹьтеба Пироз кʹур лекʹолин кьр, әԝ дьбежә: «Мьн бь зәлали дит, кӧ готьнед Кʹьтеба Пироз рʹаст ьн!»

11. Чьрʹа лазьм ә кӧ әм баԝәр бьн, ԝәки пʹехәмбәртийед Кʹьтеба Пироз рʹаст ьн?

¹¹ Гава әм дьвиньн, кӧ һьнә пʹехәмбәртийед жь Хәбәра Хԝәде чаԝа һатьнә сери, әм һе зедә баԝәрийа хԝә Йаһоԝа у рʹебәрийа ԝи тиньн. Ӧса жи иро, чьԛас дәрдед мә һәбьн жи, пʹехәмбәртийед Кʹьтеба Пироз али мә дькьн, ԝәки әм бь дьле рʹьһʹәт сәр ахьрийе бьньһерʹьн. Әме ньһа дина хԝә бьдьнә дӧ пʹехәмбәртийа, кʹижан кӧ Данийел пʹехәмбәр ньвиси бу, йед кӧ иро тенә сери. Фәʹмкьрьна ԝана дькарә али мә бькә, ԝәки әм бь билани сафикьрьна бькьн.

12. Ньгед жь һʹәсьн у һʹәрʹийа сор чь те һʹәсабе? (Данийел 2:41-43)

¹² Бьхунә Данийел 2:41-43. Нәбукәднәсәр Пʹадша хәԝна хԝәда һʹәйкәләк дит,  ньгед кʹижани һьм жь һʹәсьн, һьм жи жь һʹәрʹийа сор бун. Гава әм готьнед кʹьтеба Данийел у Әʹйантида бәрамбәри һәв дькьн, әм фәʹм дькьн, ԝәки ньгед һʹәйкәл Империйа Англо-Америкайе йә. Иро әԝ Империйа лапә ԛәԝи йә. Данийел дәрһәԛа Империйа Һʹәмдьнйайе дьбежә, кӧ ԝе пʹарәкә «пʹадшатийе һездар [ԛәԝи] бә, йе дьн жи, ИМ» сьст бә. Гәло чьрʹа? Чьмки щьмәʹта кӧ бь симболик те һʹәсабе һʹәрʹийа сорә нәрм, сәр ԛәԝата ве Империйа Һʹәмдьнйайе һʹӧкӧм дькә у ле сьст дькә. b

13. Әм жь гьлийед Данийел пʹехәмбәр, кʹижан рʹастийед фәрз пеһʹәсийан?

¹³ Жь шьровәкьрьна Данийел пʹехәмбәр дәрһәԛа һʹәйкәл у илаһи дәрһәԛа ньгед ԝи, әм чәнд рʹастийед фәрз педьһʹәсьн. Йа пешьн, Империйа Һʹәмдьнйайе, демәк Англо-Америка, ԛәԝата хԝә һьнә дәрәщада нишан кьрийә. Мәсәлә, Шәрʹе Һʹәмдьнйайеда йа I у II, әԝе роләкә сәрәкә листийә. Ле паше ԛәԝата ве сьст бу, чьмки бьнәлийед ԝе дәстпекьрьн һьм мьԛабьли һәв у һьм жи мьԛабьли дәԝләте шәрʹ кьн. Йа дӧда, пешийа кӧ Пʹадшатийа Хԝәде һʹәму сәрԝертийед мәрьва кʹӧта кә, әв Империйа ԝе һе һʹӧкӧм бькә. Дьбәкә дәԝләтед дьн бьхԝазьн Империйа Һʹәмдьнйайе, демәк Англо-Америкайе алт бькьн, ле әԝе нькарьбьн дәԝса ԝе бьгьрьн. Әм ве йәке заньн, чьмки «кәвьре» кӧ те һʹәсабе Пʹадшатийа Хԝәде, ԝе ньгед һʹәйкәл һурдәхԝәши кә, йе кӧ те һʹәсабе Англо-Америка (Данийел 2:34, 35, 44, 45).

14. Тьштед кӧ Хԝәде дәрһәԛа һʹәсьн у һʹәрʹийа сор пʹехәмбәрти кьрьбу, ча али мә дькьн кӧ әм сафикьрьнед рʹаст бькьн?

¹⁴ Гәло тӧ баԝәр дьки, кӧ пʹехәмбәртийед Хԝәде дәрһәԛа ньгед жь һʹәсьн у һʹәрʹийа сор, рʹаст ьн? Һәрге әре, әв йәк ԝе сәр щурʹе жийина тә һʹӧкӧм кә. Тӧйе ве дьнйайеда пәй һәбуке нәкʹәви, чьмки тӧ зани ԝәки әв дьнйа хьраб, ԝе зутьрәке бе кʹӧтакьрьне (Луԛа 12:16-21; 1 Йуһʹәнна 2:15-17). Фәʹмкьрьна ван пʹехәмбәртийед Хԝәде ԝе али тә бькьн, кӧ тӧ шьхӧле бәлакьрьна мьзгинийе у һинкьрьне, ԛимәт ки (Мәтта 6:33; 28:18-20). Паши лекʹолинкьрьна ве пʹехәмбәртийа Хԝәде, жь хԝә бьпьрсә: «Гәло сафикьрьнед мьн нишан дькьн ԝәки әз баԝәр дькьм, кӧ Пʹадшатийа Хԝәде ԝе дәмәкә незикда һʹәму сәрԝертийед мәрьва кʹӧта кә?»

15. Иро пʹадше бакӧре у пʹадше башуре кʹе тенә һʹәсабе? (Данийел 11:40)

¹⁵ Бьхунә Данийел 11:40. Кʹьтеба Данийел сәре 11 бәʹса дӧ пʹадшед политикийә ԛәԝи дькә, йед кӧ һәвдӧрʹа кʹәтьбунә дәʹԝе. Гава әм ве йәке у гьлийед дьн жь Кʹьтеба Пироз бәрамбәри һәв дькьн, әм дькарьн тедәрхьн кӧ пʹадше бакӧре, әв һәйә Русйа у пьштгьред ԝи, ле пʹадше башуре те һʹәсабе Англо-Америка, демәк Империйа Һʹәмдьнйайе. c

16. Кәсед кӧ бьн сәрԝертийа пʹадше бакӧреда дьжин, рʹасти кʹижан чәтьнайа тен?

¹⁶ Хьзмәткʹаред Хԝәде, йед кӧ бьн һʹӧкӧме пʹадше бакӧреда дьжин, жь ԝи пʹадшайи рʹасти пәйкʹәтьна тен. Һьнә Шәʹдед Йаһоԝа, жь бо баԝәрийа хԝә һатьнә зерандьне у кʹәтьнә кәле. Ле әв йәк баԝәрийа ԝан нә кӧ сьст кьрийә, ле дьһа ԛәԝи кьрийә. Гәло чьрʹа? Чьмки хушк-бьред мә заньн, ԝәки Данийел пʹехәмбәр пешда готьбу кӧ хьзмәткʹаред Хԝәде ԝе  рʹасти пәйкʹәтьна бен d (Данийел 11:41). Занәбуна ве йәке гӧмане дьдә мә у али мә дькә Йаһоԝарʹа амьн бьминьн.

17. Хьзмәткʹаред Хԝәде, йед кӧ бьн сәрԝертийа пʹадше башуреда дьжин, рʹасти кʹижан чәтьнайа һатьнә?

¹⁷ Бәре, пʹадше башуре жи һʹьщуми сәр хьзмәткʹаред Йаһоԝа дькьр. Мәсәлә, ԝәʹде Шәрʹе Һʹәмдьнйайе йа I у II, гәләк бьра һатьнә гьртьне у гәләк зарʹед Шәʹдед Йаһоԝа жь мәкʹтәбе һатьнә дәрхьстьне, чьмки ԝана тʹәвнәбуйине хԝәй дькьр. Ван салед пашьнда, амьнийа хьзмәткʹаред Йаһоԝа, йед кӧ бьн сәрԝертийа ви пʹадшида дьжин, бь щурʹед дьн һатьнә щерʹьбандьне. Мәсәлә, ԝәʹде бьжартьна сәрԝера, дьбәкә Мәсиһик бе щерʹьбандьне, кӧ политикәк, йан жи партикә политики бьжберә. Дьбәкә әԝана дәнге хԝә нәдьн жи, ле дьԛәԝьмә әԝана һʹьш у дьле хԝәда пьштгьрийа кәсәки бькьн. Сәва кӧ әм бь тʹәмами тʹәвнәбуйине хԝәй кьн, әм гәрәке рʹьнд дина хԝә бьдьнә һьм кьред хԝә, һьм  жи һәст у фькьред хԝә! (Йуһʹәнна 15:18, 19; 18:36)

18. Дьжмьнатийа ортʹа һәр дӧ пʹадша, чаԝа сәр мә һʹӧкӧм дькә? (Бьньһерʹә ӧса жи шькьл.)

¹⁸ Гава кәсед кӧ баԝәрийа хԝә пʹехәмбәртийед Кʹьтеба Пироз найньн, дьвиньн кӧ шәрʹе ортʹа пʹадше башуре у пʹадше бакӧреда бәрдәԝам дьбә, зьраве ԝан дьԛәтә (Данийел 11:40). Бал һәр дӧ пʹадша, гәләк бомбед атоми һәнә. Әԝана дькарьн жийина сәр рʹуйе әʹрде бь тʹәмами кʹӧта кьн. Ле әм заньн кӧ Йаһоԝа ԝе изьне нәдә, ԝәки әв йәк бьԛәԝьмә (Ишайа 45:18). Ләма жи, дьжмьнатийа ортʹа пʹадше бакӧре у пʹадше башурда мә натьрсинә, ле баԝәрийа мә ԛәԝи дькә. Әв йәк избат дькә, ԝәки хьлазийа ве дьне незик ә.

19. Дәрһәԛа пʹехәмбәртийед Кʹьтеба Пироз әм гәрәке чь бир нәкьн?

¹⁹ Әм ньзаньн кӧ һьнә пʹехәмбәртийед Кʹьтеба Пироз ԝе чаԝа бенә сери. Данийел пʹехәмбәр жи мәʹна һәр тьште кӧ хԝәха ньвисибу, фәʹм нәдькьр (Данийел 12:8, 9). Рʹаст ә әм бь тʹәмами ньзаньн кӧ пʹехәмбәртийед Хԝәде ԝе чаԝа бенә сери, ле әв йәк найе һʹәсабе, ԝәки ԝе нәйенә сери. Әм дькарьн баԝәр бьн, ԝәки мина бәре, Йаһоԝа ԝе һәр тьшти чь кӧ әм гәрәке бьзаньбьн, мәрʹа әшкәрә бькә (Амос 3:7).

20. Дәмәкә незикда кʹижан пʹехәмбәртийед Кʹьтеба Пироз ԝе бенә сери, у әм гәрәке бәрдәԝам кьн чь бькьн?

²⁰ Ԝе бе әʹламкьрьне, кӧ «дьне сәԛьрʹи у бехофи йә» (1 Тʹесалоники 5:3). Һьнге сәрԝеред политики ԝе һʹьщуми сәр религийа ԛәлп бькьн у ле кʹӧта кьн (Әʹйанти 17:16, 17). Паши ве йәке, әԝана ԝе һʹьщуми сәр хьзмәткʹаред Хԝәде бькьн (Һәзәԛел 38:18, 19). Пәйрʹа ԝе шәрʹе Һармәгәдоне дәстпебә (Әʹйанти 16:14, 16). Әм дькарьн баԝәр бьн, кӧ ԝәхтәкә незикда, әв тьшт ԝе бьԛәԝьмьн. Ле һʹәта кӧ әԝ ԝәʹдә бе, әм һәртʹьм дьхԝазьн рʹазибуна хԝә Баве хԝәйи әʹзманарʹа нишан кьн бь ве йәке, кӧ дина хԝә бьдьнә пʹехәмбәртийед Кʹьтеба Пироз у али кәсед дьн бькьн, ԝәки әԝана жи чʹәʹв бьдьнә мә.