Әз сала 1935-да бажаре Дарластонеда һатьмә буйине. Жь бо дуйе рʹәш, йа кӧ жь гәләк кʹархана дәрдькʹәт, һәрема мә ча «Ԝәлатәки Рʹәш» һатә навкьрьне. Гава әз ԝәкә 4 сали бум, Шәʹдед Йаһоԝа тʹәви де-баве мьн һинбуна Кʹьтеба Пироз дәстпекьрьн. Мьн рʹасти ԛәбул кьр, у сала 1952-да, гава әз 16 сали бум, әз һатьмә ньхӧмандьне.

Ве сале, әз кʹарханәкеда һин дьбум кӧ һащәт у пʹаред әʹрәба чедькьрьн, у әԝ хәбат мьн гәләк хԝәш дьһат. У мьн дьхԝәст бьбума секретаре компанйайе.

Рʹожәке, бәрпьрсийаре рʹеԝи мьнрʹа гот, ԝәки әз щьвата Ԝилнһоледа, демәк щьвата хԝәда һинбуна кʹьтебе дәрбаз кьм. Ле бона ве йәке, мьн гәрәке сафикьрьнәкә фәрз бькьра: Ԝи чахи әз дьчумә дӧ щьвата. Нава һʹәфтийеда, әз дьчум щьвата Бромсгрове, йа кӧ незики хәбата мьн бу у ԝәкә 32 км дури мала мьн бу. Хьлазийа һʹәфтийе, гава әз мала де-баве хԝәда дьмам, әз дьчумә щьвата Ԝилнһоле.

Мьн дьхԝәст пьштгьрийа тʹәшкиләта Йаһоԝа бькьм, ләма жи мьн әве щабдарийе, кӧ бәрпьрсийаре рʹеԝи мьнрʹа гот, ԛәбул кьр. Ле бона ве йәке, лазьм бу әз хәбата хԝә бьһельм. Бь сайа рʹебәрийа Йаһоԝа, мьн жийинәкә хԝәш дәстпекьр, у әз тʹӧ щар пʹошман нәбум.

Щьвата Бромсгрове, мьн хушкәкә бь наве Анн нас кьр, йа кӧ һьм бәдәԝ һьм жи рʹӧһʹанида ԛәԝи бу. Сала 1957-да, әм зәԝьщин. Әм тʹәвайи пешәнгед һәртʹьм у пешәнгед мәхсус бун, мә ӧса жи тʹәвайи шьхӧле бәрпьрсийартийеда у Бәйтʹәледа хьзмәт кьрийә. Бь сайа Анн, жийина мьн гәләк бәхтәԝар бу.

Сала 1966-да, әм чунә Мәкʹтәба Гиләде. Паши мәкʹтәбе әм һатьнә шандьне Малавйайе, ԝәлатәки кӧ жь бо дьлгәрми у меванһʹьзийа щьмәʹте ча «дьле гәрм» йе Африкайе дьһатә навкьрьне. Ԝи чахи, мә ньзаньбу кӧ ԝедәре чь ԝе бе сәре мә.

Әм мәһа Сьбате, сала 1967-да гьһиштьнә Малавйайе. Мәһа пешьн, мә тʹәмамийа ԝәхта хԝә сәр һинбуна зьман хәрщ кьр. Паши ве йәке, мә дәстпекьр шьхӧле нәһийе. Әʹрәба мә Щип һәбу, у һьнә кәс дьфькьрин кӧ әв әʹрәбә дькарә һәрʹә һәр дәра, һʹәта чʹәмарʹа жи дәрбаз бә. Ле бь рʹасти ӧса нибу. Мә тʹәне дькарьбу ава ньмьзрʹа дәрбаз бьн. Әм щарна малед пе һʹәрʹи чекьрида дьман, у ԝәʹде дәмсала баранда лазьм бу кӧ бьн банийе маледа брезент рʹахьн. Бәле, хьзмәта мә серида һьнәки чәтьн бу, ле мә диса жи әв һʹьз дькьр!

Мәһа Нисанеда, әз пеһʹәсийам кӧ проблемәкә мәзьн пешда һат. Радйойеда, мьн гӧһ да готарәкә президенте, наве ԝи Һастингс Банда бу. Әԝи гот кӧ Шәʹдед Йаһоԝа хәрще дәԝләте надьн у дәԝләтеда проблема пешда тиньн. Әв йәк һәмьки дәрәԝ бу. Әм гьшк заньбун кӧ проблем бь рʹасти әв бу, ԝәки әм алийе политикеда тʹәвнәбуйине хԝәй дькьн. Проблема һәри мәзьн әв бу, кӧ мә хԝәрʹа картед әндәме партийа политики нәдькʹьрʹин.

Мәһа Илонеда, мә рʹожнәʹмеда хԝәнд кӧ президент Шәʹдед Йаһоԝа сущдар дькә, ԝәки әԝана һʹәму щийа дьбьнә сәбәба тʹәвльһәвбуне. Сәр щьвинәкә политики әԝи гот кӧ дәԝләта ԝи ԝе зу тьштәки бькә, ԝәки Шәʹдед Йаһоԝа бенә ԛәдәхәкьрьне. Сала 1967-да, 20 Щотмәһе, әв ԛанун кʹәтә ԛәԝате. Ԝәхтәкә кьн паши ве йәке, полис у мәрьвед дәԝләте кӧ бона емигранта щабдар бун,  һатьн ԝәки филиала мә дадьн у мисйонера жь ԝәлат дәрхьн.

Паши кӧ әм се рʹож кәледа мабун, мә шандьнә сәр гьрава Мәԝритусе, йа кӧ бьн контрола Британйайеда бу. Ле дәԝләта Мәԝритусе изьн нәда, кӧ әм ча мисйонер ԝедәре бьминьн. Ләма, тʹәшкиләте әм шандьн Родезйайе (ньһа Зимбабԝә те навкьрьне). Гава әм гьһиштьнә ԝедәре, мәрьвәки дәԝләте кӧ бона емигранта щабдар бу, изьн нәда ԝәки әм бькʹәвьн ԝәлет у сәрт готә мә: «Һун пешийе жь Малавйайе у паше жь Мәԝритусе һатьн дәрхьстьне. Ньһа жи һун һатьнә вьра, чьмки һун дьфькьрьн кӧ дьле ԝә чь дьхԝазә, һун дькарьн ве йәке бькьн». Анн гьрийа. Әм дьфькьрин кӧ әм тʹӧ кәсирʹа нәлазьм ьн. Ԝе дәме, мьн дьхԝәст вәгәрʹийа мала хԝә, Инглистане. Ахьрийеда, ԝана изьн данә мә, ԝәки әм шәв филиаледа бьминьн, ле ԝана дьхԝәст кӧ әм рʹожа дьн һәрʹьн офиса сәрәкә йа емигранта. Әм гәләк ԝәстийайи бун, ле мә һәр тьшт да дәсте Йаһоԝа. Рʹожа дьн, нивро, мәрʹа изьн дан, кӧ әм ча турист Зимбабԝәда бьминьн. Әзе тʹӧ щар бир нәкьм кӧ ԝе рʹоже, әз чьԛас ша бум. Әз избат бум кӧ Йаһоԝа рʹебәрийа мә дькә.

Филиала Зимбабԝәда, әз Идара Хьзмәтийеда һатьмә кʹьфшкьрьне, кʹижан кӧ бона шьхӧлед Малави у Мозамбике щабдар бу. Ԝан салада, хушк-бьред Малавйайе рʹасти зерандьна гьран дьһатьн. Пʹарәкә шьхӧле мьн әв бу, ԝәки әʹламәтийед кӧ бәрпьрсийаред мьһале йед Малавйайе дьшандьн, ԝәлгәрʹиньм. Щарәке, гава әз һʹәта ниве шәве дьхәбьтим, ԝәки ԝәлгәрʹандьна әʹламәтике хьлаз кьм, әз сәва пәйкʹәтьна хушк-бьра, гьрийам. * Ле әз амьни, баԝәри у сәбьра ԝанрʹа фьрнаԛ дьбум (2 Корьнтʹи 6:4, 5).

Чь дәсте мә дьһат мә дькьр, ԝәки бона хушк-бьред кӧ һе Малавйайеда бун у бона йед кӧ сәва зерандьне рʹәвийабун Мозамбике, хԝарьна рʹӧһʹани һазьр кьн. Кʹома ԝәлгәрʹа йа зьмане Чичеԝайи, дәрбази фермәкә мәзьн бу, кӧ йа бьраки жь Зимбабԝәйе бу. Бь сайа офис у ханийед кӧ әв бьре дәствәкьри бона ԝәлгәрʹа ава кьрьбу, ԝана дькарьбу шьхӧле ԝәлгәрʹандьне бәрдәԝам кьра.

Һәр сал мә гази бәрпьрсийаред мьһале йед жь Малавйайе дькьр, ԝәки әԝана бенә сәр щьвата мәзьн Зимбабԝәйеда, сәр зьмане Чичеԝайи. Ԝедәре, ԝана готаред бона щьвата мәзьн дьстандьн. Гава әԝана вәдьгәрʹийан Малавйайе, ԝана чь жь дәсте ԝан дьһат дькьр, ԝәки ван готара бьдьн дәсте бьра. Щарәке, гава әԝана һатьнә Зимбабԝәйе, мә Мәкʹтәба Хьзмәтийе бона бәрпьрсийаред мьһале дәрбаз кьр, сәва кӧ ԝана ԛәԝи кьн.

Мәһа Сьбате, сала 1975-да, әз чум бал хушк-бьред кӧ жь Малавйайе рʹәвийабун кампед Мозамбике. Кампада, ԝана бь амьни ль гора рʹебәрийа тʹәшкиләте һәр тьшт дькьр. Мәсәлә, ԝана дәстпекьрьбу кʹомед рʹуспийа саз кьн. Рʹуспийед тʹәзә шьхӧлед рʹӧһʹани саз дькьрьн, мәсәлә готар, шеԝьркьрьна рʹеза рʹоже у журнала «Бьрща Ԛәрәԝьлийе» дәрбаз дькьрьн у ӧса жи щьватед мәзьн. Чаԝа ԝәʹде щьвата мәзьн, кампада жи идара паԛьжкьрьне, бәлакьрьна хԝарьне у идара бехофийе һәбун. Бь сайа кʹәрәма Йаһоԝа, әԝ бьред амьн гәләк шьхӧлед мәзьн дьанинә сери, у мьн жь ԝана гәләк һелан дьстанд.

Ԝәкә сала 1979-да, филиала Замбйайе ида бона Малавйайе щабдар бу. Диса жи, мьн у гәләк кәсед дьн, мә бона һʹале хушк-бьред жь Малавйайе хәм дькьр, у мә бона хушк у бьред ԝедәре дӧа дькьр. Мьн ча әндәмәки Комитейа Филиала Зимбабԝәйе хьзмәт дькьр, у әз тʹәви бьред щабдар жь Малавйайе, Африкайа Башур у Замбйайе, чәнд щара тʹәви ԝәкʹиле Кʹома Рʹебәрийе тʹоп дьбун. Һәр щар, мә пьрсәкә ӧса дьда: «Гәло диса тьштәки дьн һәйә, кӧ әм дькарьн бона хушк-бьред Малавйайе бькьн?»

Ԝәʹдә шунда һʹале Малавйайе дьһа сьвьк бу. Хушк-бьред кӧ жь ԝәлат рʹәвийабун, һеди-һеди вәгәрʹийанә Малавйайе, у һʹале  кәсед кӧ ԝедәре мабун, ида баш дьбу. Ԝәлатед дәр-дор, йед кӧ шьхӧлед Шәʹдед Йаһоԝа ԛәдәхә кьрьбун, ида изьн дьдан ԝәки әм шьхӧле хԝә аза биньн сери. Сала 1991-да, дәԝләта Мозамбике жи изьн да Шәʹдед Йаһоԝа. Әм бәрхԝә дькʹәтьн кӧ Шәʹдед Йаһоԝа йед Малавйайе ԝе кʹәнге аза бьн.

Ахьрийа-ахьрийе, һʹале политики Малавйайеда һатә гӧһастьне, у ԛәдәхәкьрьна шьхӧлед Шәʹдед Йаһоԝа һатә һьлдане. Рʹожәке, мисйонерәк жь мьн пьрси: «Гәло тӧйе вәгәрʹи Малавйайе?» Ԝе дәме, әз 59 сали бум, ләма мьн гот: «На, әз ида кал бумә». Ле ԝе рʹоже Кʹома Рʹебәрийе мәрʹа нәʹмә шанд у тʹәглиф кьр ԝәки әм вәгәрʹьн ԝедәре.

Мә хьзмәтийа Зимбабԝәйеда гәләк һʹьз дькьр, ләма әв йәк бона мә сафикьрьнәкә чәтьн бу. Әм ида һини жийина Зимбабԝәйеда бьбун, у ԝедәре һәвалед мә һәбун. Кʹома Рʹебәрийе бь дьловани мәрʹа гот кӧ һәрге әм нахԝазьн, әм мәщбур ниньн һәрʹьн. Ләма жи мә дькарьбу сафи кьра кӧ Зимбабԝәйеда бьминьн. Ле әз дәрһәԛа Бьраһим у Сарайе дьфькьрим, йед кӧ әʹмьре хԝәйи мәзьнда гӧһ данә Йаһоԝа у мала хԝәйә рʹьһʹәт һиштьн чун (Дәстпебун 12:1-5).

Ахьрийеда, мә сафи кьр ԝәки ль гора рʹебәрийа тʹәшкиләта Йаһоԝа бькьн. Сала 1995-да, 1 Сьбате, 28 сал паши кӧ әм щара пешьн гьһиштьбун ԝедәре, әм диса ве тʹәрихе вәгәрʹийан Малавйайе. Ԝедәре Комитейа Филиале һатә сазкьрьне, у әз у дӧ бьред дьн, әм ча әндәмед Комитейа Филиале һатьнә кʹьфшкьрьне. Мә дәрберʹа дәстпекьр шьхӧлед Шәʹдед Йаһоԝа тʹәзәда организә кьн.

Бь сайа кʹәрәма Йаһоԝа, шьхӧле мә зу пешда дьчу. Сала 1993-да, һәжмара мьзгинвана ԝәкә 30 000 бу, ле сала 1998-да, зедәтьри 42 000 мьзгинван һәбун. * Шьхӧле мә гәләк зедә дьбу, ләма жи Кʹома Рʹебәрийе изьн да, ԝәки Бәйтʹәләкә тʹәзә бе авакьрьне. Мә бажаре Лилонгԝеда 12 һектар әʹрд кʹьрʹи, у әз ча әндәмәки комитейа авакьрьне һатьмә кʹьфшкьрьне.

Мәһа Гӧлане, сала 2001-да, бьре Гай Пирс, йе кӧ әндәме Кʹома Рʹебәрийе бу,  готара бона тʹәсмилкьрьна авайед тʹәзә хԝәнд. Зедәтьри 2 000 хушк-бьред жь ве һәреме һатьн сәр ве готаре. Ниве зәʹф жь ԝан зедәтьри 40 сал пешда һатьбун ньхӧмандьне. Әв хушк-бьред һежа, гәләк сала нава зерандьнед гьранда Йаһоԝарʹа амьн мабун. Рʹаст ә әԝана кʹәсиб бун, ле алийе рʹӧһʹанида гәләк дәԝләмәнд бун. Ԝе рʹоже, гава әԝана чʹәʹв Бәйтʹәла тʹәзә кʹәтьн, әԝана гәләк ша бун. Гава әԝана Бәйтʹәледа дьгәрʹийан, ԝана әзбәри пе ԛәйде Африкайе кʹьламед бона пәсьне Йаһоԝа дьстьра. Бона мьн, әԝ рʹож бь рʹасти жи рʹожәкә мәхсус бу. Мьн бь чʹәʹве хԝә дит ԝәки Йаһоԝа кәсед кӧ нава тәнгасийада амьн дьминьн бь мәрʹдани кʹәрәм дькә.

Паши хьлазкьрьна авакьрьна Бәйтʹәле, гәләк Одед Щьвате жи һатьнә авакьрьне, у әз чәнд щара чум кӧ готара тʹәсмилкьрьна одәкә тʹәзә бьхуньм. Одед Малавйайеда бь методәкә ләзкьри, йа бона авакьрьна одед ԝәлатед нәдәԝләтида, дьһатьнә авакьрьне. Бәре, һьнә щьват авайед пе дар чекьрида тʹоп дьбун. Банед ван авайа жь гиһа бун, у хушк-бьра сәр кʹӧрсийед дьреж, йед кӧ жь һʹәрʹи дьһатьн чекьрьне, рʹудьньштьн. Паше хушк-бьра ида бь дьл у щан агур чедькьрьн у одед хԝәшьк ава дькьрьн. Ле ԝана диса жи дьхԝәст кӧ ван одада кʹӧрсийед дьреж һәбьн, чьмки ча те готьне, сәр кʹӧрсийед дьреж һәртʹьм бона мәрьвәки щи те дитьне!

Ӧса жи, дьле мьн гәләк ша бу кӧ Йаһоԝа чаԝа али мәрьва кьрийә, ԝәки әԝана жь алийе рʹӧһʹанива пешда һәрʹьн. Малавйайеда гәләк бьред щаһьл һазьр бун, ԝәки шьхӧлед тʹәшкиләтеда бьхәбьтьн, у бь сайа һинкьрьна тʹәшкиләте, әԝана зу һини ван шьхӧла дьбун. Ԝәʹдә шунда, ԝана Бәйтʹәледа у щьватада, дьһа зедә щабдари дьстандьн. Ӧса жи, гәләк бәрпьрсийаред мьһалейә тʹәзә һатьнә кʹьфшкьрьне, ԝәки щьвата һелан бькьн. Гәләк жь ԝан зәԝьщи бун, у ԝана дина хԝә нәдьда сәр әʹрф-әʹдәта у сәр гьлийед мәрьвед хԝәйи незик, кʹижан кӧ ԝана һелан дькьрьн зарʹа биньн. Ԝана дьхԝәст ԝәхт у ԛәԝата хԝә бь тʹәмами бона Йаһоԝа хәрщ кьн.

Паши кӧ мьн 52 сал Африкайеда хьзмәт кьрьбу, сьһʹәт-ԛәԝата мьн сьст бу. Кʹома Рʹебәрийе хԝәстьна Комитейа Филиале ԛәбул кьр, ԝәки мә бьшиньн Британйайе. Әм хәмгин бун кӧ гәрәке әм кʹьфшкьрьна хԝәйә хԝәш бьһельн, ле әм ида әʹмьрда мәзьн бун у әм шекьрдар ьн кӧ хушк-бьред жь Бәйтʹәла Британйайе мә бунә хԝәйи.

Әз тʹӧ щар пʹошман нәбум кӧ мьн изьн дайә, ԝәки Йаһоԝа рʹийа мьн рʹаст бькә. Һәрге мьн хԝә бьспарта аԛьле хԝә, әзе бькʹәтама рʹекә дьн. Әз гәләк ша мә кӧ Йаһоԝа рʹебәрийа мьн кьрийә (Мәтʹәлок 3:5, 6). Гава әз хорт бум, мьн хԝәш дьһат компанйакә мәзьнда бьхәбьтьм. Ле тʹәшкиләта Йаһоԝа шьхӧләки дьһа баш да мьн. Бона мьн, хьзмәта Йаһоԝа хԝәштьр тьштәк тʹӧнә!