ЙЕШУ щабдарийа мәзьн станд. Әԝи гәрәке щьмәʹта Исраел бьвьра Әʹрде Создайи, ле әԝ шьхӧл нәһеса бу. Йаһоԝа ԝи ԛәԝи кьр у дьл да ԝи бь ԝан гьлийа: «Мерхас у ԛәԝи бә». Ӧса жи Хԝәде готә Йешу, кӧ һәрге әԝ Ԛануна ԝи һәр рʹож бьхунә у бинә сери, әԝе пешда һәрʹә у бь билани тьшта бькә (Йешу 1:7, 8, ДТʹ).

Әм зәманед хьрабда дьжин, у әм жи рʹасти чәтьнайа тен (2 Тимтʹ. 3:1). Әм мина Йешу дькарьн әве ширәта кӧ Йаһоԝа дабу ԝи, ԛәбул кьн. Әм дькарьн Кʹьтеба Пироз һәр гав бьхуньн, у принсипед Йаһоԝа бьдьнә хәбате ԝәки сафикьрьнед билан бькьн.

Ле гәләк жь мә дьбәкә ԛайил бьн, ԝәки нәһеса йә леколина бькьн. Ле леколинкьрьна Кʹьтеба Пирозә шәхси гәләк фәрз ә. Дина хԝә бьдьнә чаргоша бь наве «Әԝан Ширәта Биньн Сери», у әԝ йәк ԝе али ԝә бькә леколинкьрьна хԝә һе керһати у һʹәԝас бькьн.

Зәбурбеж дьстьра: «Мьн бькә ԝе шьвәрʹийа әʹмьред Хԝә, кӧ ԝанда дәман у һʹәйран ьм әз бь хԝә» (Зәб. 119:35). Һун дькарьн жь леколинкьрьна Хәбәра Хԝәде шабуне бьстиньн. Һуне гәләк хьзнед рʹӧһʹани бьвиньн, гава бәрдәԝам кьн Кʹьтеба Пироз леколин бькьн.

Рʹаст ә мәрʹа мина Йешу нәлазьм ә рʹебәрийа щьмәʹте бькьн, ле чәтьнайед мә жи һәнә. Ләма жи әм гәрәке чʹәʹв бьдьнә ԝи кӧ Хәбәра Хԝәде леколин бькьн у чь теда ньвисар ә биньн сери. Һәрге әм ӧса бькьн, әме жи пешдачуйи бьн у тьшта бь билани бькьн.