1. Кʹижан хԝәстьна тʹәбийәти һәйә бал һʹәму мәрьва?

ԜӘЙЕ ча хԝә тʹәхмин кьра һәгәр мәрьве кӧ һун нас дькьн у ԛәдьре ԝи дьгьрьн, наве ԝә бир кьра, йан һәла һе жи һун ԛә нәһатана бира ԝи? Әԝ йәк ԝе дьле ԝә нәһата, ӧса нинә? Ле чьрʹа? Чьмки бал мә һәр кәси һәйә хԝәстьнәкә тʹәбийәти, әм дьхԝазьн ԝәки мә ԛәбул кьн. Хенщи ве йәке, әм дьхԝазьн ԝәки мәрьв ӧса жи бьзаньбьн әм мәрьвнә чь щурʹәйи нә у кьред мә бьшекьриньн (Жьмар 11:16; Иб. 31:6).

2, 3. Чаԝа хԝәстьна мә кӧ мәрьв мә ԛимәт кьн, дькарә алийе нәрʹастда һәрʹә? (Бьньһерʹә шькле әʹԝльн.)

² Ле һәрге әм фәсал нибьн, әԝ хԝәстьна мә ԝәки мәрьв мә ԛимәт кьн, дькарә алийе нәрʹастда һәрʹә, чьмки әм гӧнәкʹар ьн. Әм дькарьн бьхԝазьн ԝәки мәрьв мә бьльнд кьн у мәрʹа фьрнаԛ бьн. Дьнйа Шәйтʹан мәрьва һелан дькә ԝәки пәй навдарийе у һӧрмәте кʹәвьн. Чахе мәрьв дькʹәвьнә бәр байе ве йәке, әԝана бир дькьн кӧ кʹе бь рʹастийе һежайи һӧрмәте у һʹәбандьне йә, демәк Баве мәйи әʹзмана, Йаһоԝа Хԝәде (Әʹйан. 4:11).

 ³ Ԝәʹде Исада һьнә сәрԝеред рʹелигийа, нәрʹаст дьньһерʹин сәр һӧрмәт у ԛәбулкьрьне. Иса готә шагьртед хԝә: «Һʹәвза хԝә жь ԝан ԛанунзана бькьн, йед кӧ һʹьз дькьн бь чӧхед дьреж бьгәрʹьн, базарада сьлаве бьдьнә ԝан, кʹьништада кʹӧрсийед пешьн бьгьрьн у шайийада жи һәрәма жорьн рʹунен». Паши ԝан гьлийа әԝи гот: «Диԝана ԝане һе гьран бә» (Луԛа 20:46, 47). Ле Иса пʹайе жьнәбикә бәләнгаз да, йа кӧ гәләк һьндьк пʹәрә ԛӧрбан кьр у дьбәкә кәсәки дина хԝә нәда ԝе (Луԛа 21:1-4). Бәле, Иса сәр навдарийе у ԛәбулкьрьне щурʹәки майин дьньһерʹи. Әԝ готар ԝе али мә бькә, ԝәки рʹаст бьньһерʹьн сәр ве йәке, демәк ӧса чаԝа кӧ Йаһоԝа Хԝәде хԝәш те.

4. Алийе кʹеда һун дьхԝазьн бенә наскьрьне у ԛимәткьрьне, у чьрʹа?

⁴ Ле алийе кʹеда һежа йә ԝәки әм бенә наскьрьне у ԛимәткьрьне? Иро мәрьв дьхԝазьн наве хԝә бьльнд кьн, мәсәлә бь хԝәндьна бьльнд, хәбатәкә баш, у навдәнгийа ве дьнйайеда. Ле Паԝлос шьровәкьр ԝәки һежа йә алийе кʹеда әм бенә наскьрьне у ԛимәткьрьне. Әԝи гот: «Ньһа кӧ ԝә Хԝәде нас кьрийә, ле бәле Хԝәде жи һун нас кьрьнә, һун чаԝа диса вәдьгәрʹьнә сәр ԝан сьхьред ве дьнейә беԛәԝатә нә тʹӧ тьшт у диса дьхԝазьн хӧламтийе ԝанрʹа бькьн?» (Галт. 4:9). Рʹасти жи ԛәдьрәки чьԛас мәзьн ә кӧ әм дькарьн алийе Хԝәдеда бенә наскьрьне, демәк алийе Сәрԝере Һәри Бьльнд! Әԝ бь дьл дьхԝазә әм һәләԛәтийа хԝә тʹәви ԝи незик кьн. Йаһоԝа мә нас дькә, мә һʹьз дькә, у дьхԝазә әм бьбьнә достед ԝи. Әԝи әм ӧса әʹфьрандьнә, кӧ әм бькарьбьн тʹәви ԝи достийе бькьн (Ԝаиз 12:13, 14). *

5. Әм чь гәрәке бькьн сәва алийе Хԝәдеда бенә наскьрьне?

⁵ Хԝәде Муса ԝи щурʹәйи кʹәрәм кьр. Чахе әԝи жь Йаһоԝа һиви кьр, ԝәки изьн бьдә ԝи сәва әԝ бь тʹәмами фәʹм кә рʹейед Ԝи, Йаһоԝа ӧса щаба ԝи да: «Әзе ве йәке жи бькьм кӧ тә гот, чьмки тә ль бәр чʹәʹве мьн кʹәрәм дит у әз тә пе наве тә нас дькьм» (Дәркʹ. 33:12-17). Чахе Йаһоԝа мә нас дькә, әм жи дькарьн гәләк кʹәрәма бьстиньн. Ле әм чь гәрәке бькьн ԝәки алийе Йаһоԝада бенә наскьрьне? Әм гәрәке ԝи һʹьз кьн у әʹмьре хԝә тʹәсмили ԝи бькьн. (Бьхунә 1 Корьнтʹи 8:3.)

6, 7. Чь дькарә бьбә мәʹни кӧ әм достийа хԝә тʹәви Йаһоԝа ӧнда кьн?

⁶ Ле әм гәрәке фәсал бьн ԝәки һәләԛәтийа хԝә тʹәви Баве хԝәйи әʹзмана ӧнда нәкьн. Әм мина Мәсиһийед Галати, кʹижанарʹа кӧ Паԝлос ньвиси, гәрәке хԝәй кьн хԝә жь «сьхьред ве дьнейә беԛәԝатә нә тʹӧ тьшт», у ӧса жи жь навдари у ԛәбулкьрьна ве дьнйайе (Галт. 4:9). Әԝ Мәсиһийед ԛьрʹна йәке, ида алийе Хԝәдеда наскьри бун у Хԝәде ԝана ԛәбул дькьр. Ле йәкә Паԝлос гот ԝәки әԝ хушк-бьра «диса вәдьгәрʹьн» пәй тьштед пʹучʹ. Щурʹәки майин бежьн, әв бу готьна Паԝлос: «Һун ӧса пешда чунә, чьрʹа һун пашда вәдьгәрʹьн у пәй тьштед бекер у пʹучʹ дькʹәвьн?»

⁷ Ле гәло дькарә тʹәви мә жи ӧса бьԛәԝьмә? Бәле, һәрге әм фәсал нибьн. Чахе мә Йаһоԝа нас кьр, мә жи мина Паԝлос пьшта хԝә да навдари у ԛәбулкьрьна ве дьнйайе. (Бьхунә  Филипи 3:7, 8.) Дьԛәԝьмә мә дькарьбу хԝәндьна бьльнд бьстанда, йан навдәнг буна, йан жи гәләк пʹәрә ԛазанщ кьра, ле мә тʹәрка ԝан тьшта да. Йан жи дьбәкә әм алийе музикеда рʹьнд һостә нә, у әм дькарьбун навдар у дәԝләти буна. Ле мә нәхԝәст ве дьнйайеда наве хԝә бьльнд кьн, ләма мә тʹәрка ԝан һʹәму тьшта да (Ибрн. 11:24-27). Бьдьнә һʹәсабе хԝә кӧ ԝе чьԛас нәаԛьлайи бә, һәрге әм ньһа бьфькьрьн кӧ мә бадиһәԝа әԝ тьшт жь дәсте хԝә бәрда! Фькьред ӧса дькарьн мә һелан кьн ԝәки диса пәй тьштед ӧса кʹәвьн, кʹижан мә һʹәсаб кьрьбу ԝәки пʹучʹ ьн у нә тʹӧ тьшт ьн. *

8. Чь ԝе али мә бькә ԝәки ԛәбулкьрьна Йаһоԝа бьгәрʹьн, нә кӧ йа ве дьнйайе?

⁸ Ча әм дькарьн нәкʹәвьнә һʹәйра ве йәке ԝәки әԝ дьнйа мә ԛәбул кә, ле дәԝсе ԛәбулкьрьна Йаһоԝа бьгәрʹьн? Әм гәрәке бир нәкьн дӧ тьштед фәрз. Йа пешьн, Йаһоԝа тʹьме нас дькә у ԛимәт дькә ԝана, йед кӧ бь амьни жерʹа хьзмәт дькьн. (Бьхунә Ибрани 6:10; 11:6). Бәле, әԝ гәләк ԛимәт дькә һәр хьзмәткʹарәки хԝә, у әԝ сәр «нәһәԛийе» нинә ԝәки хәм нәкә бона мәрьвед кӧ жерʹа амьн ьн. Йаһоԝа тʹьме «йед пʹара хԝә нас дькә» (2 Тимтʹ. 2:19). Чʹәʹве ԝи «сәр рʹийа рʹаста йә» у әԝ занә чаԝа ԝана жь щерʹьбандьна хьлаз кә (Зәб. 1:6; 2 Пәт. 2:9).

9. Мәсәла биньн кӧ Йаһоԝа чаԝа ԛәбулкьрьна хԝә щьмәʹта хԝәрʹа дьдә кʹьфше.

⁹ Щара Йаһоԝа щьмәʹта хԝәрʹа ԛәбулкьрьна хԝә бь щурʹәки мәхсус дьдә кʹьфше (2 Дир. 20:20, 29). Мәсәлә, биньн бира хԝә, Йаһоԝа ча бәр Бәʹра Сор щьмәʹта хԝә хьлаз кьр чахе ордийа Фьрәԝьнә ԛәԝи пәй ԝан кʹәт (Дәркʹ. 14:21-30; Зәб. 106:9-11). Әԝ ԛәԝьмандьн ӧса сәр щьмәʹте һʹӧкӧм бу, ԝәки һәла һе паши 40 сала жи ԝана дәрһәԛа ве ԛәԝьмандьне хәбәр дьдан (Йешу 2:9-11). Зутьрәке Гог жь Магоге ԝе пәй мә кʹәвә, ле әм гәләк ԛәԝи дьбьн гава дьфькьрьн дәрһәԛа һʹьзкьрьн у ԛәԝата Йаһоԝа (Һәзԛл. 38:8-12). Гава әԝ ԝәʹдә бе, әме гәләк ша бьн, чьмки мә ԛәбулкьрьна Хԝәде дьгәрʹийа, нә кӧ йа ве дьнйайе!

10. Әм дәрһәԛа Йаһоԝа чь гәрәке бир нәкьн?

¹⁰ Әм ӧса жи гәрәке бира хԝәда хԝәй кьн тьштәки фәрз: Йаһоԝа дькарә ԛәбулкьрьна хԝә мәрʹа ӧса бьдә кʹьфше, кӧ тʹӧ щар әм нә жи һивийе бун. Мәрьвед кӧ сәва ве йәке ԛәнщийе дькьн ԝәки йед дьн бьвиньн, ԝе жь Йаһоԝа хәлате нәстиньн. Ле чьрʹа? Чьмки әԝана бь тʹәмами һәԛе хԝә дьстиньн, чахе мәрьв пʹайе ԝан дьдьн. (Бьхунә Мәтта 6:1-5.) Ле Иса гот кӧ Баве ԝи «дьзива . . . дьбинә» ԝана, йед кӧ бона кьред хԝәйә ԛәнщ, һӧрмәт у пʹайи нәстандьнә. Әԝ кьред ԝан дьвинә у ԝе һәр йәкирʹа һәԛе ԝи бьдә. Ле щара Йаһоԝа мә бь щурʹәки мәхсус хәлат дькә, кӧ әм нә жи һивийе бун. Ԝәрә әм чәнд мәсәла шеԝьр кьн.

11. Йаһоԝа ча Мәрйәмерʹа ԛәбулкьрьна хԝә да кʹьфше?

¹¹ Йаһоԝа ԛизькәкә мьлук Мәрйәм бьжарт, сәва әԝ бьбә дийа Кӧрʹе ԝи, демәк Иса. Мәрйәм шәһәре бьчʹукда Ньсрәтеда дьжит, кʹижан кӧ дури Оршәлиме у пʹарьстгәһа ԝийә мәзьн бу. (Бьхунә Луԛа 1:26-33.) Ле  чьрʹа Мәрйәм һатә бьжартьне бона ԝи ԛәдьрәки мәзьн? Мьлйакʹәте Хԝәде, Щьбрайил, жерʹа гот ԝәки әԝ ԛизька «кʹәрәм ле буйийе» йә. Пе гьлийед Мәрйәме, кӧ тʹәви мәрьва хԝә Елизабете хәбәр дьда, те кʹьфше кӧ әԝ йәкә рʹӧһʹани бу у Хԝәде гәләк һʹьз дькьр (Луԛа 1:46-55). Бәле, Йаһоԝа дина хԝә дьда Мәрйәме, у бона амьнийа ԝе ле кʹәрәм кьр кӧ ԛәдьрәки ӧса жерʹа да, кʹижан кӧ әԝе нә жи дькарьбу бьда бәр чʹәʹве хԝә.

12, 13. Иса чь щурʹәйи һӧрмәт станд чахе тʹәзә һатә буйине, у ӧса жи чахе әԝ 40 рʹожи бу ԝи бьрьн пʹарьстгәһе?

¹² Йаһоԝа һӧрмәт нәда мәрьвед навдәнг, мәсәлә сәрԝеред Оршәлиме йан Бәйтләһʹме, кӧ дәрһәԛа буйина Иса ԝанрʹа әʹлам кьра. Мьлйакʹәт шьванед мьлукрʹа әʹйан бун, йед кӧ жь Бәйтләһʹм дәр чоле бун бәр кәре пез бун (Луԛа 2:8-14). Әԝ шьван паше чун у зарʹа тʹәзәбуйи дитьн, демәк Иса (Луԛа 2:15-17). Мәрйәм у Усьв рʹасти жи ԝе чьԛас ша буна, кӧ Иса ԝи щурʹәйи һатә һӧрмәткьрьне! Дина хԝә бьдьне кӧ Шәйтʹан чьԛас щӧдә дьбә жь Йаһоԝа. Чахе Шәйтʹан стәйрнас шандьн бал Иса у де-баве ԝи, тʹәмамийа Оршәлиме тʹәвиһәв бу чахе дәрһәԛа зарʹе пеһʹәсийан (Мәт. 2:3). Бона ве әʹламәтийе, гәләк зарʹ бемәʹни һатьнә кӧштьне (Мәт. 2:16).

¹³ Чьл рʹож паши буйина Иса, Мәрйәме гәрәке Йаһоԝарʹа ԛӧрбан бьанийа пʹарьстгәһа Оршәлимеда. Жь Бәйтләһʹме әԝ рʹе ԝәкә 9 километра бу (Луԛа 2:22-24). Чахе Мәрйәм тʹәви Усьв рʹеда бу, дьфькьри кӧ дьԛәԝьмә кʹаһин ԝе бәр һʹәмушка дәрһәԛа Иса бежә у кӧ ахьрийеда Иса ԝе чь бькә. Бь рʹасти Иса пʹарьстгәһеда һатә һӧрмәткьрьне, ле нә ӧса ча дьбәкә Мәрйәме дьда бәр чʹәʹве хԝә. Йаһоԝа бь Шьмһʹуне «рʹаст, хԝәдехоф», у ӧса жи бь Һанайа пʹехәмбәр кӧ 84 сали бу у жьнәби бу, әʹйан кьр кӧ әԝ зарʹ ԝе бьбә Мәсиһе создайи (Луԛа 2:25-38).

14. Йаһоԝа чь кʹәрәм дайә Мәрйәме?

¹⁴ Ле дәрһәԛа Мәрйәме әм чь дькарьн бежьн? Гәло Йаһоԝа диса жерʹа да кʹьфше ԛәбулкьрьна хԝә сәва ве йәке, кӧ әԝе Кӧрʹе ԝи бь амьни хԝәй дькьр у мәзьн дькьр? Бәле. Хԝәде кьред ԝе у гьлийед ԝе Хәбәра Хԝәда дайә ньвисаре. Дьбәкә Мәрйәме нькарьбу тʹәви Иса рʹеԝити бькьра ԝәʹде хьзмәтийа ԝи кӧ се сал нива кʹьшанд. Дьԛәԝьмә әԝ һьнге жьнәби бу у Ньсрәтеда ма. Рʹаст ә әԝе нькарьбу тʹәви ԝи һәрʹә, ле әԝ ԝәʹде мьрьна Иса ԝедәре бу (Йуһʹн. 19:26). Паше, Мәрйәм тʹәви шагьртед дьн Оршәлимеда бу, гава рʹӧһʹе пироз һатә сәр ԝан (Кʹар. Шанд. 1:13, 14). Әԝе жи дьбәкә рʹӧһʹе пироз станд, чахе ԝедәре бу. Һәрге әԝ йәк ӧса бу, әԝ те һʹәсабе ԝәки әԝе диса жи ԛәдьрәки мәзьн станд, демәк ԝе тʹәви Иса һʹәта-һʹәтайе сәр әʹзмана бә. Рʹасти жи Хԝәде бона хьзмәтийа ԝейә амьн чьԛас ԝе кʹәрәм кьр!

15. Йаһоԝа ча ԛәбулкьрьна хԝә һьндава Кӧрʹе хԝә да кʹьфше, чахе әԝ сәр әʹрде бу?

¹⁵ Иса нәдьхԝәст ԝәки сәрԝеред рʹелигийа йан жи политик ԝи ԛәбул кьн у һӧрмәте бьдьнә ԝи. Ле әԝ чьԛас дьлша бу гава хԝәха Йаһоԝа се щара жь әʹзмана ԛәбулкьрьна хԝә жерʹа да кʹьфше. Һәма паши ньхӧмандьна Иса, Йаһоԝа гот: «Әв ә Кӧрʹе мьни дәлал, кӧ әз жь ԝи рʹази мә» (Мәт. 3:17). Ча те кʹьфше, тʹәне Йуһʹәннайе Ньхӧмдар әԝан гьлийа бьһист. Паше, ԝәкә саләк пешийа мьрьна Иса, се шандийа дәнге  Йаһоԝа бьһистьн чахе әԝи гот: «Әв ә Кӧрʹе мьни дәлал, кӧ әз же рʹази мә. Гӧһдарийа ԝи бькьн!» (Мәт. 17:5). Чәнд рʹож пешийа мьрьна Иса жи, Йаһоԝа тʹәви Кӧрʹе хԝә жь әʹзмана хәбәр да (Йуһʹн. 12:28).

16, 17. Йаһоԝа ча Иса кʹәрәм кьр кӧ әԝ нә жи һивийе бу?

¹⁶ Рʹаст ә Иса заньбу кӧ ԝе бь мьрьна шәрми бьмьрә, чаԝа бӧхданбеж, ле әԝи дӧа кьр ԝәки ԛьрара Йаһоԝа бе сери, нә кӧ йа ԝи (Мәт. 26:39, 42). Әԝи стуна щәфе һьлда, «шәрм бәр тьштәки һʹәсаб нәкьр», у тʹӧ щар һӧрмәт у ԛәбулкьрьна жь ве дьнйайе нәдьхԝәст, ле йа жь Баве хԝә (Ибрн. 12:2). Чаԝа Йаһоԝа жерʹа ԛәбулкьрьна хԝә да кʹьфше?

¹⁷ Чахе Иса сәр әʹрде бу, әԝи гот кӧ дьхԝазә вәгәрʹинә әԝ рʹумәта кӧ бәре сәр әʹзмана бал ԝи һәбу, чахе тʹәви Баве хԝә бу (Йуһʹн. 17:5). Ле тʹӧ щики найе готьне ԝәки Иса жь ве зедәтьр дьхԝәст. Әԝ тʹӧ щар нә жи дьфькьри ԝәки сәр әʹзмана бьбә йәки һе мәзьн. Ле Йаһоԝа чь кьр? Әԝи Иса ӧса хәлат кьр кӧ ԝи «бьльнд кьр», у жерʹа кʹәрәмәкә ӧса да, кӧ пешийа ԝи тʹӧ кәс нәсьтандьбу. Әԝ һәйә жийина нәмьри * (Фили. 2:9; 1 Тимтʹ. 6:16). Рʹасти жи бона амьнийа хԝә Иса чьԛас һатә кʹәрәмкьрьне у һӧрмәткьрьне!

18. Чь ԝе али мә бькә ԛәбулкьрьна ве дьнйайе нәгәрʹьн?

¹⁸ Чь ԝе али мә бькә ԝәки әм ԛәбулкьрьна ве дьнйайе нәгәрʹьн? Әм гәрәке бир нәкьн кӧ Йаһоԝа тʹьме дьшекьринә, ԛәбул дькә у кʹәрәм дькә хьзмәткʹаред хԝәйи амьн у гәләк щар әԝ кʹәрәмед ӧса дьдә ԝан, кӧ әԝана нә жи һивийе нә. Рʹасти жи кʹе занә кʹижан кʹәрәм һивийа мә нә? Ле иро, чахе әм тәнгасийа у щерʹьбандьнада сәбьр дькьн, ԝәрә тʹӧ щар бир нәкьн, ԝәки әԝ дьнйа ԝе һӧрмәта хԝәва кʹӧта бә (1 Йуһʹн. 2:17). Баве мәйи Әʹзмана Йаһоԝа сәр нәһәԛийе нинә, ԝәки кьред мә у әԝ һʹьзкьрьна кӧ әм бона наве ԝи дьдьнә кʹьфше, бир бькә (Ибрн. 6:10). Бәле, Йаһоԝа ԝе мә кʹәрәм кә, у дьԛәԝьмә ӧса кӧ әм ньһа нә жи дькарьн бьдьнә бәр чʹәʹве хԝә!