Пьрсед Хԝәндәвана

Паԝлос 2 Корьнтʹи 6:14-да дәрһәԛа кʹе дьбежә «нәбаԝәр»?

2 Корьнтʹи 6:14-да әм дьхуньн: «Тʹәви нәбаԝәра нәкʹәвьнә бьне нирәки». Һәрге дина хԝә бьдьнә контексте, һьнге зәлал дьбә ԝәки Паԝлос хәбәр дьдә дәрһәԛа ԝан мәрийа, йед кӧ әндәмед щьвата Мәсиһийа ниньн. Әве йәке ӧса жи рʹезед Кʹьтеба Пирозә дьн избат дькьн, кʹидәре кӧ Паԝлос хәбәред «нәбаԝәр» у «йед нәбаԝәр» дьдә хәбате.

Мәсәлә, Паԝлос әԝ Мәсиһи сущдар дькьрьн, йед кӧ дьчунә диԝане у «ль бәр нәбаԝәра» дькʹәтьнә дәʹԝ-дозе (1 Корьнтʹи 6:6). Вьра йед нәбаԝәр сәр һʹакьма те готьне, йед кӧ диԝана Корьнтʹида ԛӧльх дькьрьн. Нәʹма хԝәйә дӧдада, Паԝлос дьбежә, ԝәки Мире-щьна «шәвәрʹәша кора анийә сәр фәʹме нәбаԝәра». Чʹәʹвед ԝан ча бежи бь хелийе һатийә дадане у әԝана мьзгинийа хере навиньн. Әԝана тьштәки накьн, ԝәки вәгәрʹьн щәм Йаһоԝа, дәрһәԛа чь жи Паԝлос пешда шьровәкьрьбу: «Гава йәк ль Хӧдан вәгәрʹә, һьнге ‹әԝ хели те һьлдане›» (2 Корьнтʹи 3:16; 4:4).

Һьнә мәрьвед «нәбаԝәр», ԛануне дьтʹәрʹьбиньн у пʹутпʹарьст ьн (2 Корьнтʹи 6:15, 16). Ле диса жи жь ԝана нә һʹәмушк мьԛабьли хьзмәткʹаред Йаһоԝа дәртен. Һьнә жь ԝан дьхԝазьн һе зедә пебьһʹәсьн дәрһәԛа рʹастийе. Һәвалзәԝаще гәләка жи Мәсиһи нә у әԝана ша нә кӧ тʹәви ԝан зәԝащеда ньн (1 Корьнтʹи 7:12-14; 10:27; 14:22-25; 1 Пәтрус 3:1, 2). Ле Паԝлос чәнд щара хәбәра «нәбаԝәр» дьдә хәбате сәр ԝан мәрийа, йед кӧ ча ида һатьбу готьне, әндәме щьвата Мәсиһийа ниньн, нава кʹижанеда тʹәне әԝ мәрьв ьн, йед кӧ «баԝәри бь Хӧдан анин» (Кʹаред Шандийа 2:41; 5:14; 8:12, 13).

Принсипа жь 2 Корьнтʹи 6:14 һʹәму дәрәщада рʹебәрийа ԛимәт дьдә бона Мәсиһийа. Әв ширәт рʹебәрийа баш ә илаһи бона ԝан Мәсиһийа, йед кӧ хԝәрʹа һәвалзәԝащ дьгәрʹьн (Мәтта 19:4-6). Һәмьки Мәсиһийед кӧ хԝә тʹәсмили Хԝәде кьрьнә у һатьнә ньхӧмандьне, хԝәрʹа нава нәбаԝәрмәндада һәвалзәԝащ нагәрʹьн, чьмки ԛимәт, нет у баԝәрийа Мәсиһийа жь йед нәбаԝәра щӧдә дьбьн.

Ле чь әм дькарьн бежьн дәрһәԛа ԝан, йед кӧ Кʹьтеба Пироз һин дьбьн у тенә сәр щьватед Мәсиһийа? Чь дькарьн бежьн дәрһәԛа хьзмәткʹаред нәньхӧманди? Гәло әԝана тенә һʹәсабе мәрьвнә нәбаԝәр? На. Әԝед кӧ рʹастийа мьзгинийе ԛәбул кьрьнә у бәрбь ньхӧмандьне дьчьн, найенә һʹәсабе мәрьвнә нәбаԝәр (Рʹомайи 10:10; 2 Корьнтʹи 4:13). Корʹнелйо һе пешийа ньхӧмандьна хԝә һатә навкьрьне ча йәки «хԝәйиман у хԝәдехоф» (Кʹаред Шандийа 10:2).

Гәло ԝе бь билани бә һәрге Мәсиһийе ньхӧманди дәстпекә тʹәви хьзмәткʹаре нәньхӧманди бь нета һәвстандьне һәләԛәтийа романтик чекә, демәк һʹәсаб кә ԝәки ширәта Паԝлосә жь 2 Корьнтʹи 6:14, бона ве дәрәще нинә? На, әв йәк нә бь билани йә. Чьма? Чьмки дәрһәԛа жьнәбикә кӧ Мәсиһи бу, Паԝлос ӧса ньвиси: «Әԝ аза йә, тʹәви кʹе бьхԝазә дькарә мер кә, тʹәне баԝәрмәнде Хӧдан бә» (1 Корьнтʹи 7:39). Ль гора ван гьлийе Паԝлос, Мәсиһийед ньхӧманди гәрәке тʹәне нава «баԝәрмәнде Хӧдан», һәвалзәԝащ хԝәрʹа бьгәрʹьн.

Чь те һʹәсабе хәбәра «баԝәрмәнде Хӧдан» у хәбәра кӧ ԝева гьредайи йә, демәк «Мәсиһда»? Рʹомайи 16:8-10-да у Колоси 4:7-да Паԝлос хәбәр дьдә дәрһәԛа мәрьвед кӧ «баԝәрмәнде Хӧдан» бун у «Мәсиһда» бун. Ԝан рʹезада Паԝлос сәр ԝан мәрьва дьбежә «һәвал-хәбат», «дәлал», «амьн у һәвал-хӧламәки йәктийа Хӧданда».

Чь чах кәсәк дьбә «хӧламәки . . . Хӧданда»? Һьнге чахе әԝ дәстпедькә ԝе йәке бькә, чь кӧ жь хӧлам те дәʹԝакьрьне у хԝә инкʹар дькә. Иса гот, кӧ һәрге кәсәк дьхԝазә бьбә пәйчуйе ԝи, әԝ гәрәке хԝә инкʹар кә, стуна щәфайе һьлдә у пәй ԝи һәрʹә (Мәтта 16:24). Мәрьв һьнге дәстпедькә пәй Иса һәрʹә у ԛьрара Хԝәде бинә сери, чахе әʹмьре хԝә тʹәсмили Хԝәде дькә. Паши ньхӧмандьне әԝ дьбә хьзмәткʹаре Хԝәде, кʹижан кӧ ԛәбулкьрьна Йаһоԝа Хԝәде дьстинә. * Ләма жи «баԝәрмәнде Хӧдан» бьстиньн, те һʹәсабе тʹәне тʹәви ԝи кәси бькʹәвьнә зәԝаще, кʹижан кӧ әшкәрә баԝәрийа хԝә дайә кʹьфше у һатийә ньхӧмандьне ча «хӧламе Хԝәде у Хӧдан Иса Мәсиһ» (Аԛуб 1:1).

Гәләк баш ә чахе кәсе кӧ тʹәви Шәʹдед Йаһоԝа Кʹьтеба Пироз һин дьбә, рʹӧһʹанида пешда дьчә. Ле диса жи әԝи һе әʹмьре хԝә тʹәсмили Йаһоԝа нәкьрийә, рʹӧһʹе хԝәԛӧрбанкьрьне нәдайә кʹьфше у һе хьзмәткʹаре Хԝәде нинә. Әв һе гӧһастьна дькә. Пешийа кӧ дәрһәԛа зәԝаще бьфькьрә, әв гәрәке гӧһастьнед мәзьн бькә, әʹмьре хԝә тʹәсмили Хԝәде бькә у бе ньхӧмандьне.

Гәло ԝе бь билани бә дәстпекьн тʹәви мәрьве кӧ ча те кʹьфше рʹӧһʹанида пешда дьчә, һәләԛәтийа романтик пешда биньн бь ве нете кӧ, чахе әԝ бе ньхӧмандьне, һәв бьстиньн? На. Нета хԝәндәкʹаре Кʹьтеба Пироз һьндава ньхӧмандьне дькарә нәрʹаст бә һәрге әԝ бьзаньбә, кӧ Мәсиһе ньхӧманди дьхԝазә ԝе бьстинә, ле тʹәне ԝи чахи гава әԝ бе ньхӧмандьне.

Гәләк дәрәщада мәрьв ԝәʹдәлу ча хьзмәткʹаре нәньхӧманди хьзмәт дькә у паше те ньхӧмандьне. Ԝе дәрәщеда жи бь билани йә һьлдьн һʹәсаб ширәта кӧ тʹәне тʹәви баԝәрмәнде Хӧдан бькʹәвьнә зәԝаще. Ле чь әм дькарьн бежьн дәрһәԛа ԝи кәси йе кӧ малбәта Мәсиһитида һатийә мәзьнкьрьне у ида гьһиштийә ԝан салед әʹмьр кӧ дькарә бькʹәвә зәԝаще, щьватеда гәләк хирәт ә у хьзмәт дькә ча мьзгинване нәньхӧманди? Баш, ле чьма әԝ хԝә жь ньхӧмандьне паш дьхә у әʹмьре хԝә тʹәсмили Йаһоԝа накә? Дьбәкә дьле ԝида шьк һәйә? Рʹаст ә әԝ нәбаԝәрмәнд нинә ле диса жи әԝ һе «баԝәрмәнде Хӧдан» жи нинә.

Ширәта Паԝлос дәрһәԛа зәԝаще бона кʹара мә йә (Ишайа 48:17). Чахе һәрдӧ дәргистийа жи әʹмьре хԝә тʹәсмили Йаһоԝа кьрьнә, һьнге һʹиме зәԝаща ԝан ԛәԝи йә. Ньһерʹандьн у нетед ԝан мина һәв ьн. Ӧса әԝана ԝе йәктийеда бьн у зәԝаща ԝан ԝе бәхтәԝар бә. Хенщи ԝе йәке, Мәсиһийе кӧ тʹәви баԝәрмәнде Хӧдан дькʹәвә зәԝаще, амьнийа хԝә һьндава Йаһоԝа дьдә кʹьфше. Әԝ ԝе кʹәрәмед һәр-һәйи бьстинә, чьмки Кʹьтеба Пирозда ӧса те готьне: «Тӧ [Йаһоԝа] амьнарʹа амьн и» (Зәбур 18:25).

[Спартьн]

[Шькьл]

«Тӧ [Йаһоԝа] амьнарʹа амьн и»