Пе Сафикьрьнед Хԝә Хԝәде Рʹумәт кә
Пе Сафикьрьнед Хԝә Хԝәде Рʹумәт кә
«Йе аԛьл дина хԝә дьдә гавед хԝә» (МӘТʹЛК. 14:15).
1, 2. (а) Әм дәрһәԛа чь гәрәке бьфькьрьн, гава сафикьрьна дькьн? (б) Әме кʹижан пьрса шеԝьр кьн?
ӘМ ҺӘР рʹож щурʹә-щурʹә сафикьрьна дькьн. Һьнәк жь ԝан һаԛас фәрз ниньн, ле һьнәк дькарьн сәр әʹмьре мә гәләк һʹӧкӧм бьн. Фьрԛи тʹӧнә әм сафикьрьнед бьчʹук бькьн йан йед мәзьн, нета мәйә сәрәкә гәрәке әԝ бә, кӧ Хԝәде рʹумәт кьн (Бьхунә 1 Корьнтʹи 10:31).
2 Ԝәрʹа һеса йә сафикьрьна бькьн, йан на? Һәрге әм дьхԝазьн рʹӧһʹанида щерʹьбанди бьн, әм гәрәке һин бьн, кӧ ԛәнщи у хьрабийе жь һәв дәрхьн, ԝәки бькарьбьн хԝәха сафикьрьна бькьн (Рʹом. 12:1, 2; Ибрн. 5:14). Диса чь һьнә мәʹни һәнә, кӧ һин бьн сафикьрьнед баш бькьн? Чьма щарна чәтьн ә тьштәки сафи кьн? У әм кʹижан гава дькарьн бавежьн, кӧ баԝәр бьн, ԝәки сафикьрьнед мә Хԝәде рʹумәт дькьн?
Чьма Гәрәке Сафикьрьна Бькьн?
3. Чь гәрәке һʹӧкӧм нәбә сәр сафикьрьнед мә?
3 Һәрге әм нормед Кʹьтеба Пирозда дӧдьли бьн, һәвалед мәйи мәкʹтәбе йан хәбате, ԝе әве йәке тедәрхьн. Һьнге әԝана ԝе бьфькьрьн, ԝәки әме һеса бәр байе ԝан кʹәвьн. Дьԛәԝьмә әԝана бьхԝазьбьн, кӧ әм дәрәԝи у дьзийеда тʹәви ԝан бьбьнә йәк, демәк «дәсте пʹьрʹанийева» һәрʹьн, йан жи кьред ԝанә хьраб вәшерьн (Дәркʹ. 23:2). Әԝе кӧ занә сафикьрьнед ча Хԝәде рʹумәт дькьн, ԝе жь мәрьва нәтьрсә у нәкʹәвә бәр байе ԝан. Һьм жи әԝе тьштәки ӧса нәкә, чь кӧ мьԛабьли исафа ԝи йә, кʹижан кӧ сәр һʹиме Кʹьтеба Пироз һинкьри йә (Рʹом. 13:5).
4. Мәрьв чьрʹа дьбәкә бьхԝазьн дәԝса мә сафикьрьна бькьн?
4 Нә һʹәму мәрьвед кӧ дьхԝазьн дәԝса мә сафикьрьна бькьн, хьрабийа мә дьхԝазьн. Һәвалед мә бона кʹара мә, дькарьн зоре мә бькьн, кӧ әм ширәтед ԝан ԛәбул кьн. Һәрге жи әм тʹәви мәрьвед хԝә нажин, әԝана диса жи дьбәкә дәрһәԛа һʹалхԝәшийа мә хәмгин бьн у бьхԝазьн бькʹәвьнә нав шьхӧлед мә у дәԝса мә сафикьрьна бькьн. Мәсәлә, әм һьлдьн һʹәсаб пьрса ԛәнщкьрьнева гьредайи. Кʹьтеба Пироз хәбьтандьна хунейә нәрʹаст, ԛәдәхә дькә (Кʹар. Шанд. 15:28, 29). Ле пьрсед дьнда, кӧ сьһʹәт-ԛәԝатева гьредайи нә, принсипед сәрт тʹӧнә нә. Ләма жи һәр кәс жь мә гәрәке хԝәха сафи кә, кӧ кʹижан метода ԛәбул кә у кʹижане на. * Нәфәред мә дькарьн бь щурʹе хԝә сәр ԝан тьшта бьньһерʹьн, ле йәкә Мәсиһийе ньхӧманди гәрәке «хӧрща хԝә һьлгьрә», демәк хԝәха сафикьрьна бькә (Галт. 6:4, 5). Йа сәрәкә бона мә әԝ ә, кӧ исафа мә бәр Хԝәде тʹәмьз бә, нә кӧ бәр мәрьва (1 Тимтʹ. 1:5).
5. Чь әм дькарьн бькьн ԝәки баԝәрийа мә ԛәԝи бьминә?
5 Һәрге әм тʹӧ тьшти сафи нәкьн, әԝ йәк дькарә әʹмьре мә жи бькә бьн ԛәзийе. Аԛубе шанди ньвиси, ԝәки «мәрьве кӧ сәр дӧ ньга дькӧлә, һʹәму гавед хԝәда нә сәр йа хԝә йә» (Аԛуб 1:8). Мәрьве кӧ дькʹәвә бәр байе мәрьвед дьн, нькарә хԝәха сафикьрьне бькә. Әԝ дьбә мина ԝе ԛәйьке, йа кӧ жь бо пʹелед бәʹре ԝьрда-ԝеда дьчә-те. Кәсе ӧса һеса дькарә баԝәрийа хԝә жи ӧнда кә у паше ԝе йәкеда мәрьва нәһәԛ кә! (1 Тимʹт. 1:19) Чь әм дькарьн бькьн, ԝәки нәкʹәвьнә ԝи һʹали? Әм гәрәке «баԝәрийеда шьдийайи һʹимгьрти бьн» (Бьхунә Колоси 2:6, 7). Сәва кӧ баԝәрийа мә ӧса ԛәԝи бә, әм гәрәке сафикьрьнед ӧса бькьн, кʹижан кӧ ԝе сәр һʹиме Кʹьтеба Пироз бьн у баԝәрийа мә әʹйан кьн (2 Тимтʹ. 3:14-17). Ле чь дькарә рʹийа мә бьгьрә кӧ сафикьрьнед рʹаст бькьн?
Чьрʹа Щарна Чәтьн Дьбә Сафикьрьне Бькьн
6. Тьрс дькарә ча сәр мә һʹӧкӧм бә?
6 Щарна тьрс рʹийа мә дьгьрә кӧ сафикьрьне бькьн. Дьԛәԝьмә әм дьтьрсьн ԝәки сафикьрьна нәрʹаст бькьн, йан жи ԝәки мәрьв ԝе жь бо сафикьрьна мә сәр мә бькʹәньн. Тʹәбийәти йә ԝәки әм бона тьштед ӧса бәрхԝә дькʹәвьн. Тʹӧ кәс нахԝазә сафикьрьнәкә ӧса бькә, кʹижан кӧ ахьрийа хьраб пәй хԝә бинә у әԝ жь бо ԝе сафикьрьне шәрми бә. Ле һʹьзкьрьна һьндава Хԝәде у Хәбәра ԝи дькарә али мә бькә кӧ тьрса ԝи щурʹәйи жь дьле хԝә дәрхьн. Гәло ча әԝ йәк дькарә бьбә? Һʹьзкьрьн һьндава Хԝәде ԝе мә һелан кә, ԝәки тʹьме пешийа кӧ тьштәки сафи кьн, Хәбәра ԝида у әʹдәбйәтед сәр һʹиме Кʹьтеба Пирозда, ширәта бьгәрʹьн. Әв йәк ԝе мә жь гәләк шашийа хԝәйи кә. Чьрʹа әм дькарьн ӧса бежьн? Ширәтед Кʹьтеба Пироз дькарьн «фьрасәте бьдьнә дьлсаха, занәбуне у аԛьл бьдьнә щаһьла» (Мәтʹлк. 1:4).
7. Мәсәла Даԝьд Пʹадша чь мә һин дькә?
7 Гәло сафикьрьнед мә ԝе тʹьме рʹаст бьн? На. Әм гьшк жи шашийа дькьн (Рʹом. 3:23). Мәсәлә, Даԝьд Пʹадша мәрьвәки билан у Хԝәдерʹа амьн бу, ле щарна әԝи жи сафикьрьнед нәрʹаст дькьр, жь бо чь жи паше әԝ у мәрьвед дьн дьчәрчьрин (2 Сам. 12:9-12). Ле йәкә Даԝьд нәдьһишт, ԝәки шашийед ԝи рʹийа ԝи бьгьрьн кӧ сафикьрьнед ӧса бькә, кʹижан Хԝәде хԝәш тен (1 Пʹадш. 15:4, 5). Һәрге мә бәре шаши кьрьнә, әме нәтьрсьн диса жи сафикьрьна бькьн, һәрге мина Даԝьд бира хԝәда хԝәйи дькьн, ԝәки Йаһоԝа дьлшәԝат у рʹәʹм ә, әԝ шашийед мә дьбахшинә. Йаһоԝа бәрдәԝам дькә кʹомәке бьдә ԝан, йед кӧ ԝи һʹьз дькьн у гӧрʹа ԝида дьминьн (Зәб. 51:1-4, 7-10).
8. Жь гьлийе Паԝлос дәрһәԛа зәԝаще әм чь педьһʹәсьн?
8 Әм дькарьн бона сафикьрьнед хԝә зәʹф хәмгин нәбьн. Гәло ча? Һәрге фәʹм бькьн, ԝәки бона дәрәщәке нә кӧ тʹәне сафикьрьнәк, ле гәләк щурʹә сафикьрьн дькарьн рʹаст бьн. Ԝәрә дина хԝә бьдьнә гьлийе Паԝлос дәрһәԛа зәԝаще. Жь бина бәр Хԝәде әԝи ньвиси: «Ле һәгәр йәк фәʹм дькә, ԝәки һьндава дәргистийа [азәпбуна, ДТʹ] хԝәда рʹастийе накә, тәме ԝи жи хьраб буйә кӧ гәрәке бьзәԝьщә, бьра ӧса бькә чаԝа дьхԝазә, гӧнә накә, бьра һәвдӧ бьстиньн. Ле әԝе кӧ гьрани сәр ԝи тʹӧнә, ле ль тәме хԝә дькарә у дьле хԝәда ԛьрар кьрийә кӧ дәргистийа [азәпбуна, ДТʹ] хԝә ӧса хԝәй кә чаԝа бәре, әԝ тьштәки ԛәнщ дькә» (1 Корн. 7:36-38). Паԝлос ширәт да, ԝәки йа лапә баш әв ә, кӧ мәрьв азәп бьминә, ле сафикьрьна рʹаст нә тʹәне әԝ ә.
9. Гәло әм гәрәке бькʹәвьнә һʹәйра ԝе йәке, кӧ мәрьв ԝе чь бежьн дәрһәԛа сафикьрьнед мә? Шьровәкьн.
9 Гәло әм гәрәке бькʹәвьнә һʹәйра ве йәке, кӧ мәрьв ԝе чь бежьн дәрһәԛа сафикьрьнед мә? Һьнә дәрәщада фәрз ә ньһерʹандьна мәрьва һьлдьн һʹәсаб. Дина хԝә бьдьне кӧ Паԝлос чь гот дәрһәԛа ԝе хԝарьне, йа кӧ дьԛәԝьмә пʹутарʹа һатьбу ԛӧрбанкьрьне. Әԝи дьгот, ԝәки әԝ сафикьрьна кӧ ԝе хԝарьне бьхԝьн дькарә нәрʹаст нибә, ле әԝ дькарә хьраб һʹӧкӧм бә сәр мәрьвед бь исафа сьст. Дәрәщед ӧсада Паԝлос сафи кьр кӧ ча хԝә бьдә кʹьфше? Әԝи ньвиси: «Һәгәр хԝарьн дьбә кәвьре ль бәр пʹийе бьре мьн, гәрәке иди тʹӧ щар әз гошт нәхԝьм, ԝәки бьре хԝә пʹьшк нәкьм» (1 Корн. 8:4-13). Фәрз ә, ԝәки әм жи бьфькьрьн кӧ сафикьрьнед мә ԝе ча сәр исафа мәрьва һʹӧкӧм бьн. Ле бәри әʹԝльн әм гәрәке бьфькьрьн, ԝәки сафикьрьнед мә ԝе ча һʹӧкӧм бьн сәр достийа мә тʹәви Йаһоԝа (Бьхунә Рʹомайи 14:1-4). Принсипед Кʹьтеба Пироз ча али мә дькьн кӧ сафикьрьнед ӧса бькьн, кʹижан кӧ ԝе Хԝәдерʹа рʹумәте биньн?
Шәш Гавед кӧ Бәрбь Сафикьрьнед Рʹаст Дьбьн
10, 11. (а) Малбәтеда ча әм дькарьн бьдьнә кʹьфше, ԝәки хԝәсәрихԝә ниньн? (б) Рʹуспи чь гәрәке бир нәкьн, чахе тьштәки щьватеда сафи дькьн?
10 Хԝәсәрихԝә нибьн. Пешийа кӧ тьштәки сафи кьн, пьрсе бьдьнә хԝә: Гәло әԝа борщдарийа мьн ә кӧ ԝе дәрәщеда сафикьрьне бькьм? Пʹадша Сьлеман ньвиси: «Гава кʹӧбари те, беһӧрмәти жи те, ле сәрԝахти тʹәви шкәстийа йә» (Мәтʹлк. 11:2).
11 Де-бав дькарьн изьне бьдьнә зарʹа кӧ һьнә сафикьрьна бькьн, ле зарʹ гәрәке нәфькьрьн, ԝәки әԝана һʹәму дәрәщада дькарьн сафикьрьна бькьн (Колс. 3:20). Рʹаст ә, малбәтеда һьнә щабдарийед де у кʹӧлфәта һәнә, ле әԝана гәрәке ԛәбул кьн, ԝәки бьн сәрԝертийа мере хԝәда ньн (Мәтʹлк. 1:8; 31:10-18; Әфәс. 5:23). Ӧса жи мер гәрәке фәʹм бькьн, ԝәки сәрԝертийа ԝан синоркьри йә у әԝана бьн сәрԝертийа Исада ньн (1 Корн. 11:3). Щьватеда рʹуспи рʹебәрийе дьдьн, ле гәрәке әԝана баԝәр бьн, ԝәки жь ԝе йәке чь кӧ Кʹьтеба Пирозда ньвисар ә «дәрнәйен» (1 Корн. 4:6). Әԝана ӧса жи пәй ԝан рʹебәрийа дьчьн, кʹижан кӧ жь «хӧламе амьн» дьстиньн (Мәт. 24:45-47). Әм дькарьн хԝә у мәрьвед майин жь гәләк хәмгини у проблема аза кьн, һәрге мьлук бьн у ԝан сафикьрьна бькьн, кʹижан кӧ изьна мә һәйә.
12. (а) Чьрʹа лазьм ә кӧ әм леколина бькьн? (б) Шьровәкьн ԝәки мәрьв ча дькарә леколина бькә.
12 Леколине бькьн. Сьлеман ньвиси: «Тʹьвдира мәрьве хирәт әʹсә кʹаре тинә, ле һәр кәсе ләз кʹәти әʹсә зьраре тинә» (Мәтʹлк. 21:5). Һәрге ԝәрʹа мәщал вәбуйә кӧ бькʹәвьнә хәбате у һун дьфькьрьн ԛәбул кьн йан на, фәрз ә ԝәки ләз нәкʹәвьн. Сәр һʹиме емосийа сафикьрьна нәкьн. Пешийе, һәр тьштед ԝе пьрсева гьредайи леколин кьн, ширәта жь ԝан кәса һиви кьн, йед кӧ ԝе пьрседа щерʹьбанди нә у бьфькьрьн, ԝәки кʹижан принсипед Кʹьтеба Пироз һун гәрәке һьлдьн һʹәсаб (Мәтʹлк. 20:18). Сәва кӧ леколинкьрьна ԝә тʹәрбәти бә, хԝәрʹа бьньвисьн, кӧ һуне чь кʹаре бьстиньн у ԝе чь щабдарийед ԝә һәбьн. Пешийа кӧ сафикьрьне бькьн, хәрща бьдьнә «бәр һʹәсеб» (Луԛа 14:28). Хенщи ԝе йәке бьфькьрьн, ԝәки әԝ сафикьрьн ча дькарә һʹӧкӧм бә нә кӧ тʹәне сәр һәбуна ԝә, ле ӧса жи сәр рʹӧһʹанийа ԝә. Рʹаст ә, бона леколина ӧса ԝәʹдә лазьм ә, ле әв йәк ԝе али ԝә бькә кӧ сафикьрьнәкә ләзә-бәз нәкьн у сәре хԝә нәкьнә хәтайе.
13. (а) Гьлийе жь Аԛуб 1:5 чьда мә дьдьнә баԝәркьрьне? (б) Дӧа ча дькарә али мә бькә кӧ биланийе бьстиньн?
13 Бона биланийе дӧа бькьн. Сафикьрьнед мә ԝе һьнге Хԝәдерʹа рʹумәте биньн, һәрге әм жь ԝи һиви кьн, ԝәки сафикьрьнада али мә бькә. Аԛубе шагьрт ньвиси: «Һәгәр сәрԝахтийа йәки жь ԝә тʹера ԝи накә, бьра һиви жь Хԝәде бькә у ԝе жь ԝирʹа бе дайине. Әԝ бь мәрʹдани дьдә һʹәмуйа у тʹӧ кәси беԛәдьр накә» (Аԛуб 1:5). Шәрм нинә һәрге әм ԛәбул кьн, ԝәки сафикьрьнада әм һʹәԝще биланийа Хԝәде нә (Мәтʹлк. 3:5, 6). Һәрге әм итʹбарийа хԝә тʹәне һʹьш-аԛьле хԝә биньн, әм һеса дькарьн шаш бьн. Чахе әм дӧа дькьн, ԝәки Хԝәде биланийе бьдә мә у принсипед жь Хәбәра ԝи леколин дькьн, әм изьне дьдьн ԝәки рʹӧһʹе пироз али мә бькә, кӧ тедәрхьн һәла бь рʹасти әм чьрʹа дьхԝазьн бь ԝи щурʹәйи бькьн (Ибрн. 4:12; бьхунә Аԛуб 1:22-25).
14. Чьма әм гәрәке сафикьрьнада хԝә паш нәхьн?
14 Сафикьрьне паш нәхьн. Һʹәта кӧ леколине дәрбаз нәки у бона биланийе дӧа нәки, ләз нәкʹәвә сафикьрьне бьки. Мәрьве билан ԝәʹдә вәдьԛәтинә у «дина хԝә дьдә гавед хԝә» (Мәтʹлк. 14:15). Алики дьнва жи хԝә жь сафикьрьна паш нәхә. Мәрьве кӧ хԝә паш дьхә, дькарә тʹьме мәʹнийа бьгьрә, сәва кӧ хԝә һәԛ дәрхә (Мәтʹлк. 22:13). Ле диса жи әԝ бь ве йәке сафикьрьне дькә. Демәк, сафи дькә кӧ изьне бьдә кәсед дьн, ԝәки сәрԝертийа әʹмьре ԝи бькьн.
15, 16. Чь лазьм ә бькьн, ԝәки сафикьрьнед хԝә биньн сери?
15 Сафикьрьна хԝә биньн сери. Әԝ щәфайе кӧ мә дит сәва сафикьрьна баш бькьн, ԝе тʹәмам бадиһәԝа бә һәрге әм дәрберʹа гава нәвежьн, сәва кӧ ль гора сафикьрьна хԝә бькьн. Сьлеман ньвиси: «Һәр чь бь дәсте тә бькʹәвә, тӧ бь һʹәму һеза хԝә ԝе бькә» (Ԝаиз 9:10). Әм гәрәке һәр тьшти бькьн сәва кӧ бьгьһижьнә нета хԝә. Мәсәлә, мьзгинван дьбәкә сафи кә, ԝәки бьбә пешәнг. Гәло әԝе бькарьбә ԝе сафикьрьна хԝә бинә сери? Һәмьки әре, һәрге әԝ изьне нәдә, ԝәки хәбат у ԝәʹдәдәрбазкьрьн ԝәʹдә у ԛәԝате же бьстиньн, кʹижан кӧ бона хьзмәтийе лазьм ьн.
16 Тʹьме һеса нинә кӧ сафикьрьнед баш биньн сери. Гәло чьрʹа? Мәʹни әԝ ә кӧ «тʹәмамийа дьнйайе бьн һʹӧкӧме Йе Хьрабда йә» (1 Йуһʹн. 5:19). Кʹьтеба Пирозда ньвисар ә, ԝәки әм гәрәке шәрʹ бькьн у «шәрʹе мә . . . мьԛабьли миред ве дьнйа тәʹри йә у мьԛабьли ордийед рʹӧһʹанийә хьрабә ль дийаре әʹзмана нә» (Әфәс. 6:12). Һьм Паԝлосе шанди, һьм жи Щьһудайе шагьрт дьдьнә кʹьфше, ԝәки йед кӧ сафи кьрьнә Хԝәде рʹумәт кьн, гәрәке шәрʹе рʹӧһʹани бькьн (1 Тимтʹ. 6:12; Щьһуд. 3).
17. Йаһоԝа дьхԝазә, ԝәки әм һьндава сафикьрьнед хԝәда чь бькьн?
17 Сафикьрьна хԝә бьньһерʹьн у һәрге лазьм ә гӧһастьна бькьн. Һʹәму сафикьрьн ԝе ӧса нәйенә сери, чаԝа кӧ әм һивийе бьн. Щарна жи әм рʹасти «ԝәхт» у ԛәԝьмандьнед ӧса тен, бона кʹижана әм һазьр нибун (Ԝаиз 9:11). Ле Йаһоԝа дьхԝазә, ԝәки әм рʹасти чь чәтьнайа жи бен, ль гора һьнә сафикьрьнед хԝә бьжин. Мәсәлә, һәрге кәсәки хԝә тʹәсмили Йаһоԝа кьрийә, йан жи кʹәтийә зәԝаще, әԝ сафикьрьн гәрәке нәйенә гӧһастьне. Хԝәде дьхԝазә, ԝәки әм ль гора ԝан сафикьрьна бьжин (Бьхунә Зәбур 15:1, 2, 4). Ле һʹәчʹи зәʹф жь сафикьрьнед мә һаԛас фәрз ниньн. Мәрьве билан щар-щара сафикьрьнед хԝә дьньһерʹә. Әԝе изьне нәдә, ԝәки ԛӧрʹәбун у сәрһʹьшки рʹе ԝи бьгьрьн кӧ әԝ сафикьрьна хԝә һьнәки йан жи бь тʹәмами бьгӧһезә (Мәтʹлк. 16:18). Ле бона ԝи фәрз әԝ ә, ԝәки бь жийина хԝә рʹумәте бьдә Йаһоԝа.
Мәрьва Һин кьн ԝәки Сафикьрьнед Рʹаст Бькьн
18. Де-бав ча дькарьн зарʹа һин кьн, кӧ сафикьрьнед рʹаст бькьн?
18 Де-бав дькарьн али зарʹед хԝә бькьн, ԝәки әԝана һин бьн сафикьрьнед ӧса бькьн, кӧ рʹумәте Йаһоԝарʹа биньн. Мәсәла де-бава дәрсдаре лапи баш ә (Луԛа 6:40). Һьнә дәрәщада де-бав дькарьн зарʹарʹа шьровәкьн, ԝәки ԝана фьлан тьшт ча сафи кьрийә. Әԝана дьбәкә изьне бьдьнә зарʹа, ԝәки һьнә пьрса хԝәха сафи кьн. Чахе сафикьрьна зарʹа ахьрийа баш бинә, әԝана дькарьн пʹайе ԝан бьдьн. Ле чь бькьн һәрге зарʹ сафикьрьнәкә нәрʹаст дькә? Реаксийа де-бавайә пешьн ӧса нә, кӧ зарʹед хԝә жь ахьрийа хьраб хԝәй кьн. Ле әв йәк тʹьме зарʹарʹа кʹаре найнә. Мәсәлә, де-бав изьне дьдьн зарʹе, ԝәки кʹахаза изьна ажотьне бьстинә. Паше зарʹ ԛанунәкә ажотьне дьтʹәрʹьбинә у жь бо ԝе йәке щьрме дьдьнә сәр ԝи. Рʹаст ә, де-бав дькарьн әԝе щьрме бьдьн, ле һәрге зарʹ мәщбур бә кӧ хԝәха бьхәбьтә у щьрме бьдә, әԝе һин бә кӧ бона кьред хԝә щабдарийе һьлдә сәр хԝә (Рʹом. 13:4).
19. Әм гәрәке хԝәндәкʹаред хԝә чь һин кьн у ча әм дькарьн ԝе йәке бькьн?
19 Иса тʹәми да пәйчуйед хԝә, ԝәки мәрьва һин кьн (Мәт. 28:20). Тьштәки фәрз, чь кӧ әм дькарьн бона хԝәндәкʹаред Кʹьтеба Пироз бькьн, әԝ ә кӧ ԝана һин кьн ԝәки сафикьрьнед рʹаст бькьн. Сәва кӧ әԝ һинкьрьн керһати бә, нәлазьм ә ԝанрʹа бежьн кӧ әԝана чь гәрәке бькьн. Дьһа баш ә ԝана һин кьн, ԝәки әԝана сәр принсипед Кʹьтеба Пироз бьфькьрьн, сәва кӧ бькарьбьн хԝәха тедәрхьн, һәла кʹижан сафикьрьн рʹаст ә. Ахьрийа ахьрийе «жь мә һәр кәсе бона хԝә щабе ль бәр Хԝәде бьдә» (Рʹом. 14:12). Ләма жи бона мә һәр кәси фәрз ә сафикьрьнед ӧса бькьн, кӧ рʹумәте бьдьнә Йаһоԝа.
[Спартьн]
^ Сәва кӧ әве пьрсе дьһа кʹур леколин кьн, бьньһерʹьн готар «Ньһерʹандьна Мьн сәр Фьраксийед Хуне у сәр Ԝан Методед Ԛәнщкьрьне, кӧ Хуна Мьн бе Хәбьтандьне, Чь Щурʹәйи йә?» жь «Ԛӧльхкьрьна Мәйә Пʹадшатийе» йа мәһа Мьждаре, сала 2006, рʹупʹелед 3-6.
Ԝәйе Ча Щаба Хԝә Бьда?
• Чьрʹа әм гәрәке һин бьн сафикьрьна бькьн?
• Тьрс ча дькарә сәр мә һʹӧкӧм бә у ча әм дькарьн тьрсе жь дьле хԝә дәрхьн?
• Кʹижан ьн шәш гав, кӧ әм дькарьн бавежьн, ԝәки избат бьн кӧ сафикьрьнед мә рʹумәте дьдьнә Хԝәде?
[Пьрсед бона Һинбуне]
[Чаргошә/Шькьл]
Гавед кӧ Бәрбь Сафикьрьнед Рʹаст Дьбьн
1 Хԝәсәрихԝә нибьн
2 Леколине бькьн
3 Бона биланийе дӧа бькьн
4 Сафикьрьне паш нәхьн
5 Сафикьрьна хԝә биньн сери
6 Сафикьрьна хԝә бьньһерʹьн у һәрге лазьм ә гӧһастьна бькьн
[Шькьл]
Мәрьве кӧ нькарә хԝәха сафикьрьне бькә, мина ԝе ԛәйьке йә, йа кӧ жь бо пʹелед бәʹре ԝьрда-ԝеда дьчә-те