Кʹьтеба Пироз Жийина Мәрьва Дьгӧһезә

ЧЬ МӘРЬВӘКИ һелан кьр ԝәки вәгәрʹә ве религийайе, кʹижанеда де-баве ԝи әԝ мәзьн дькьрьн? Ча хортәки хԝәрʹа бавәки ӧса дит, һʹьзрәта кʹижани бу? Бьхуньн сәрһатийа ԝан мәрьва у щаба ԝан пьрса пебьһʹәсьн.

«Мьн Фәʹм кьр кӧ Гәрәке Вәгәрʹьм бал Йаһоԝа». ӘʹЛИ ХӘЛИЛ

САЛА БУЙИНЕ: 1976

ԜӘЛАТ: КИПРУС

БӘРЕ: КӦРʹЕ НӘГӦҺДАР

ЖИЙИНА МЬНӘ БӘРЕ: Әз Кипруседа һатьмә буйине, ле Австралйайеда мәзьн бумә. Де-баве мьн Шәʹдед Йаһоԝа нә у һәр тьшт кьрьнә, ԝәки нав мьнда һʹьзкьрьне һьндава Йаһоԝа у Хәбәра ԝи, пешда биньн. Ле чахе әз мәзьн бум, әз бумә йәки бәрзәԛ у мьԛабьли ԝан бум. Әз дьзикава шәв жь мал дьрʹәвийам у рʹасти һәвалед хԝә дьһатьм. Мә әʹрәбә дьдьзин у бь гәләк кьред дьн сәре хԝә дькьрьнә хәтайе.

Пешийе мьн әԝ тьшт дьзива дькьр, чьмки нәдьхԝәст дьле де-баве хԝә бешиньм. Ле һеди-һеди мьн шәрма хԝә ӧнда кьр. Мьн һәвалти дькьр тʹәви мәрьвед кӧ гәләк жь мьн мәстьр бун у Йаһоԝа һʹьз нәдькьрьн. Әԝана хьраб сәр мьн һʹӧкӧм дьбун. Ахьрийе, мьн готә де-баве хԝә, ԝәки әз нахԝазьм тʹӧ тьштида тʹәви баԝәрийа ԝан бьм. Әԝана бь сәбьр һәр тьшт дькьрьн, ԝәки али мьн бькьн, ле мьн аликʹарийа ԝан тʹәхсир дькьр. Мьн дьле ԝан бьриндар дькьр.

Чахе әз жь мал чум, мьн дәстпекьр наркотикайе бьдьмә хәбате у һәла һе гәләк марихуана жи дьчанд у дьфьрот. Мьн бь жийинәкә бенамуси дьжит у гәләк ԝәʹдә клубед шәведа дәрбаз дькьр. Һьм жи әз бумә йәки бәрзәԛ у һерс. Һәрге кәсәки тьштәки ӧса бьгота йан бькьра, чь кӧ мьн хԝәш нәдьһат, әз гәләк һерс дькʹәтьм у дьбәзийамә ԝан. Демәк мьн һәр тьшт пашопе дькьр, нә кӧ ӧса чаԝа де-баве мьн әз һин кьрьбум.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Әз тʹәви наркоманәки бумә һәвале незик. Әԝи бьчʹуктайеда баве хԝә ӧнда кьрьбу. Мә гәләк щар тʹәмамийа шәве хәбәр дьда. Щарәке әԝи дьле хԝә мьнрʹа вәкьр у гот, кӧ әԝ ча бира баве хԝә дькә. Мьн жь бьчʹуктайе дәрһәԛа сахкьрьна мьрийа заньбу, ләма жи мьн дәстпекьр ԝирʹа гьли кьм, кӧ Иса мьри сах дькьрьн у соз дьдә кӧ ахьрийеда ԝе диса мьрийа вәгәрʹинә жийине (Йуһʹәнна 5:28, 29). Мьн ԝирʹа дьгот: «Бьдә бәр чʹәʹве хԝә, те баве хԝә бьвини. Әм гьшк жи дькарьн һʹәта-һʹәтайе Щьнәтеда сәр әʹрде бьжин». Әве фькьре гәләк дьле һәвале мьн гьрт.

Щарна һәвале мьн дәрһәԛа рʹожед ахьрийе у Сейәканә хәбәрдан вәдькьр. Мьн Кʹьтеба Пироз йа ԝи һьлдьда у рʹезед дәрһәԛа Йаһоԝа Хԝәде, Иса у рʹожед ахьрийе ԝирʹа дьхԝәнд (Йуһʹәнна 14:28; 2 Тимотʹейо 3:1-5). Чьԛас һе зедә мьн һәвале хԝәрʹа дәрһәԛа Йаһоԝа гьли дькьр, һаԛас һе зедә мьн дәстпедькьр бона Ԝи бьфькьрьм.

Һеди-һеди тʹохьмед рʹастийа Кʹьтеба Пироз, йед кӧ ԝәхтәки де-баве мьн кьрьбун дьле мьн, дәстпекьрьн чʹил бьдьн у шин бьн. Мәсәлә, щарна ԝан клубада, кʹидәре кӧ мьн тʹәви һәвалед хԝә наркотика дьда хәбате, ньшкева мьн дәстпедькьр дәрһәԛа Йаһоԝа бьфькьрьм. Гәләк жь һәвалед мьн дьготьн, кӧ Хԝәде һʹьз дькьн, ле рʹабун-рʹуньштьна ԝан пашопе әʹйан дькьр. Мьн нәдьхԝәст мина ԝан бьм, ләма жи мьн сафи кьр вәгәрʹьм щәм Йаһоԝа.

Һәмьки, кӧ тьштәки бьзаньби башԛә йә, ле ль гора ве йәке бьки, башԛә йә. Һьнә гӧһастьн мьнрʹа һеса бу бькьм. Мәсәлә, чәтьн нибу тʹәрка наркотикайе бьдьм. Мьн ӧса жи тʹәрка һәвалед хԝәйә бәре да у тʹәви рʹуспики һинбуна Кʹьтеба Пироз дәстпекьр.

Ле гӧһастьнед дьн мьнрʹа гәләк чәтьн бун. Илаһи мьнрʹа чәтьн бу һерс нәкʹәвьм у хԝә бьгьрьм. Щарна щәм мьн дьһатә стандьн, ле щарна жи мьн нькарьбу хԝә зәфт кьра. Жь бо ԝе йәке мьн хԝә хьраб тʹәхмин дькьр у мьнрʹа ӧса дьһатә кʹьфше, кӧ тʹӧ тьшт щәм мьн ԝе нәйе стандьн. Әз дьлтәнг дьбум у незики ԝи рʹуспи дьбум, йе кӧ тʹәви мьн һинбуна Кʹьтеба Пироз дәрбаз дькьр. Әԝ тʹьме һьндава мьнда бь сәбьр у ԛәнщ бу, у бь ве йәке әз ԛәԝи дьбум. Щарәке әԝи готарәкә жь «Бьрща Ԛәрәԝьлийе» да мьн, кӧ бьхуньм. * Әв готар дәрһәԛа ве йәке бу, кӧ чьԛас фәрз ә ԛьдум нәкʹәвьн у ԛәԝи бьн. Мә тʹәвайи шеԝьр кьр, кӧ әз чь дькарьм бькьм гава һерс дькʹәвьм. Ширәтед жь ве готаре у ӧса жи дӧакьрьна жь дьл, али мьн кьрьн кӧ һеди-һеди хԝә бьгьрьм у һерс нәкʹәвьм. Мәһа Нисане, сала 2000-да әз ча Шәʹде Йаһоԝа һатьмә ньхӧмандьне. Шабуна ньге де-баве мьн әʹрд нәдьгьрт.

ЧЬ КʹАР МЬН СТАНД: Мьн әʹдьлайа дьл у исафа тʹәмьз ԛазанщ кьр, чьмки әз бәдәна хԝә бь наркотикайе у бенамусийе һʹәрам накьм. Фьрԛи тʹӧнә әз чь дькьм, мәсәлә дьхәбьтьм, дьчьмә щьвате йан һеса дьбьм, әз шабунәкә мәзьн дьстиньм у бь позитив сәр әʹмьр дьньһерʹьм.

Әз гәләк жь Йаһоԝа рʹази мә бона де-баве хԝә, йед кӧ тʹӧ щар пьшта хԝә нәданә мьн. Әз ӧса жи дьфькьрьм сәр гьлийе Иса, кʹижан кӧ Йуһʹәнна 6:44-да ньвисар ьн: «Тʹӧ кәс нькарә бе щәм мьн, һʹәта Баве кӧ әз шандьмә, ԝи бәрбь мьн нәкʹьшинә». Әз гәләк ша дьбьм, гава дьфькьрьм кӧ мьн карьбу вәгәрʹьм щәм Йаһоԝа, чьмки әԝи әз бәрбь хԝә кʹьшандьмә.

«Әз Һʹьзрәта Бав Бум». МАРКО АНТОНИО АЛВАРЕС СОТО

САЛА БУЙИНЕ: 1977

ԜӘЛАТ: ЧИЛИСТАН

БӘРЕ: ӘНДӘМЕ КʹОМА ДЕД-МЕТАЛ РОК

ЖИЙИНА МЬНӘ БӘРЕ: Әз бажаре Пунта-Аренасда һатьмә буйине, бәр дәве Тәнгава Мащәллане, Америкайа Башуреда алийе башуре. Де-баве мьн жь һәв ԛәтийан чахе әз пенщ сали бум, ләма жи дийа мьн әз тʹәне мәзьн дькьрьм. Мьн хԝә тʹәне тʹәхмин дькьр. Әз гәләк һʹәԝще баве хԝә бум.

Дийа мьн тʹәви Шәʹдед Йаһоԝа Кʹьтеба Пироз һин дьбу у әз тʹәви хԝә дьбьрмә щьвата. Ле щьват ԛә мьн хԝәш нәдьһатьн, ләма жи гәләк щар рʹева мьн дькьрә ԛарʹә-ԛарʹ у нәʹси дькьр кӧ нәчьм. Чахе әз 13 сали бум, мьн тʹәрка щьвата да.

Ԝи чахи әз музикайева мьжул бум у мьн фәʹм кьр, ԝәки ве йәкеда әз дькарьм бьбьмә һостә. Чахе әз 15 сали бум, һатьмә тʹәглифкьрьне кӧ сәр щәжьна, барада у щийед дьнда, мьԛамед хеви-метал лехьм. Мьн тʹәви сазбәндед һостә ԝәʹдә дәрбаз дькьр, жь бо чь жи һʹәԝаса мьн һьндава музика класикида дьһа пешда һат. Мьн сафи кьр һәрʹьм занингәһа мьһала хԝә, кӧ музикайе һин бьм. Бист салийа хԝәда әз дәрбази Сантийаго бум, демәк пʹайтʹәхта Чилистане, сәва кӧ һинбуна хԝәда дьһа пешда һәрʹьм. Ԝедәре мьн ӧса жи бәрдәԝам дькьр мьԛамед хеви-метал у дед-метал лехьм.

Нава тʹәмамийа ԝи ԝәʹдәйида мьн тʹәхмин дькьр кӧ һәр тьшт пʹучʹ у вала йә у әз дьлтәнг дьбум. Сәва кӧ ԝи һәсти нав хԝәда бьтәмьриньм, мьн дәстпекьр тʹәви әндәмед кʹома хԝә, кʹижана мьн ча малбәта хԝә һʹәсаб дькьр, наркотикайе бьдьмә хәбате. Әз йәки шәрʹуд бум у әв йәк сәр мьн дьһатә кʹьфше. Мьн тʹәне кʹьнщед рʹәш ль хԝә дькьр, рʹуйе хԝә бәрʹдабу у пʹорʹе мьн жи һʹәта наве дьреж бу.

Гәләк щар әз жь бо хәйсәте хԝәйи гьран дькʹәтьмә нава шәрʹ-дәʹԝа, у жь бо ве йәке проблемед мьн тʹәви полиса чедьбун. Щарәке гава әз вәхԝари бум, мьн һʹьщуми сәр ԝан мәрийа кьр, йед кӧ наркотика дьфьротьн, чьмки ԝана әз у һәвалед мьн әʹщьз дькьрьн. Ԝана әз ӧса ԛайим кʹӧтам, кӧ чәна мьн шкәст.

Ле дьһа зәʹф мәрьвед кӧ мьнрʹа незик бун, әз ешандьм. Щарәке әз пеһʹәсийам, ԝәки дәргистийа мьн бь сала тʹәви һәваләки мьни незик дьгәрʹә, у һʹәму һәвалед мьн жи әв йәк заньбун, ле жь мьн вәдьшартьн. Әве йәке әз шкенандьм.

Әз пашда вәгәрʹийамә Пунта Аренайе, кʹидәре мьн дәстпекьр ча дәрсдаре сазбәндийе у сазбәнд бьхәбьтьм. Мьн бәрдәԝам дькьр тʹәви кʹома хеви-метал у дед-метал мьԛама лехьм. Әз рʹасти кәчʹькәкә хас, Сусане һатьм у мә дәстпекьр тʹәвайи бьжин. Ԝәʹдә шунда Сусане дит, кӧ ньһерʹандьна мьн сәр Сейәканә жь ньһерʹандьна дийа ԝе щӧдә дьбә. Әԝе готә мьн: «Ле кʹижан ә рʹасти?» Мьн гот кӧ әз заньм, ԝәки Сейәканә нәрʹаст ә, ле әз нькарьм бь Кʹьтеба Пироз избат кьм. Мьн жерʹа гот, ԝәки Шәʹдед Йаһоԝа дькарьн әве йәке бькьн. Паше мьн тьштәки ӧса кьр, чь кӧ гәләк сала нәкьрьбу. Мьн Хԝәдерʹа дӧа кьр у аликʹари жь ԝи хԝәст.

Чәнд рʹож шунда мьн мерәк дит, кʹижан кӧ мьнрʹа нас һатә кʹьфше, ләма жи мьн жь ԝи пьрси, һәла әԝ Шәʹде Йаһоԝа йә, йан на. Һатә кʹьфше кӧ әԝ жь рʹәнг-рʹуйе мьн тьрсийа, ле диса жи бь ԛәдьр мьнрʹа шьровәкьр, кӧ щьват кʹидәре у чь чах дәрбаз дьбьн. Мьн фәʹм кьр, ԝәки әв щаба дӧайе мьн бу, кӧ әм рʹасти һәв һатьн. Әз һатьмә Ода Щьвате у пашийеда рʹуньштьм, сәва кӧ дина тʹӧ кәси нәкʹьшиньм сәр хԝә. Ле гәләка әз нас кьрьм у незики мьн дьбун. Әԝана бь дьлгәрмийе мьн сьлав дькьрьн у әз һʹәмез дькьрьм. Мьн рʹьһʹәтийа дьл тʹәхмин кьр. Те бежи әз пашда вәгәрʹийабум мал. Гава мьн әԝ бьра дит, йе кӧ бәре һинбуна Кʹьтеба Пироз тʹәви мьн дәрбаз дькьр, мьн жь ԝи һиви кьр ԝәки диса мьн һин кә.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Щарәке мьн Мәтʹәлок 27:11 хԝәнд, кʹидәре кӧ ньвисар ә: «Кӧрʹе мьн, сәрԝахт бә у дьле мьн ша кә». Гәләк дьле мьн гьрт әве фькьре, ԝәки мәрьве гӧнәкʹар дькарә дьле Әʹфьрандаре гәрдуне ша кә. Мьн фәʹм кьр ԝәки Йаһоԝа һәма әԝ Бав ә, кʹижан кӧ әз тʹәмамийа жийина хԝәда гәләк һʹьзрәт бум!

Мьн дьхԝәст дьле Баве хԝәйи әʹзмана ша кьм у ԛьрара ԝи биньм сери. Ле йазьх әз гәләк сал диле ичʹке у наркотикайе бум. Мьн фәʹм кьр, кӧ һинкьрьна Иса, кʹижан кӧ Мәтта 6:24-да ньвисар ә, чь те һʹәсабе. Ԝедәре те готьне: «Тʹӧ кәс нькарә дӧ ахарʹа хӧламтийе бькә». Әз сәр хԝә дьхәбьтим, кӧ жийина хԝәда гӧһастьна бькьм у ве йәкеда гәләк али мьн кьр принсипа жь 1 Корьнтʹи 15:33: «Һәвалтийа хьраб мәрьве хԝәйипʹәргал хьраб дькә». Мьн фәʹм кьр, ԝәки әзе нькарьбьм тʹәрка хәйсәтед хԝә бьдьм, һәрге диса жи тʹәви һәвалед хԝәйә бәре бьм. Ширәта жь Кʹьтеба Пироз зәлал бу: Мьн гәрәке хԝә жь ԝан һʹәму тьшта дур бьгьрта, кʹижан кӧ бона мьн кәвьре лькʹӧмандьне бун (Мәтта 5:30).

Йа лапә чәтьн бона мьн әԝ бу, кӧ тʹәрка хеви-метал бьдьм, чьмки мьн музика гәләк һʹьз дькьр. Ле ахьрийа-ахьрийе, мьн бь аликʹарийа һәвалед щьвате карьбу тʹәрка ве йәке бьдьм. Мьн ида зәʹф ичʹкә вәнәдьхԝар у наркотика нәдьда хәбате, пʹорʹе хԝә бьрʹи, рʹуйе хԝә һьлда у ида кʹьнщед рʹәнгед дьн жи ль хԝә дькьр. Чахе мьн готә Сусане кӧ дьхԝазьм пʹорʹе хԝә бьбьрʹьм, әԝ гәләк әʹщебмайи ма у мьнрʹа гот: «Әзе жи тʹәви тә бем Ода Щьвате у бьньһерʹьм һәла ԝедәре чь дьԛәԝьмә!» Чь кӧ әԝе ԝедәре дит, гәләк ԝе хԝәш һат у зутьрәке әԝе жи дәстпекьр Кʹьтеба Пироз һин бә. Ԝәʹдә шунда әм кʹәтьнә зәԝаще. Сала 2008-да әм һатьнә ньхӧмандьне у бунә Шәʹдед Йаһоԝа. Әм гәләк бәхтәԝар ьн, кӧ ньһа тʹәви дийа мьн Йаһоԝарʹа хьзмәт дькьн.

ЧЬ КʹАР МЬН СТАНД: Ньһа әз ида пәй бәхтәԝарийа ԝәʹдәлу накʹәвьм у жь һәвалед ԛәлп дур кʹәтьмә, чьмки мьн бәхтәԝарийа рʹаст у һәвалед амьн дитийә. Әз диса жи музикайе һʹьз дькьм, ле ида ве йәкеда бь билани хԝә дьдьмә кʹьфше. Әз бь мәсәла хԝә али нәфәред хԝә у мәрьвед дьн дькьм, илаһи щаһьла, кӧ жь рʹийа рʹастийе дәрнәкʹәвьн. Әз дьхԝазьм әԝана фәʹм бькьн, ԝәки чь кӧ әва дьнйа дьхԝазә бьдә мә, тʹәне рʹува бәдәԝ ә, ле бь рʹасти «гәмар» ә (Филипи 3:8).

Щьватеда, кʹидәре кӧ әʹдьлайи у һʹьзкьрьн ә, мьн һәвалед рʹаст хԝәрʹа дитийә. У йа һәрә фәрз әԝ ә, кӧ чахе мьн дәстпекьр дьһа незики Йаһоԝа бьм, мьн Бавәки ӧса хԝәрʹа дит, һʹьзрәта кʹижани бум.

[Спартьн]

[Спартьн]

«Мьн карьбу вәгәрʹьм щәм Йаһоԝа, чьмки әԝи әз бәрбь хԝә кʹьшандьмә»