Әз Лос Анщелеседа мәзьн бумә (Штата Калифорнйа, Дәԝләтед Йәкбуйи), тʹахед ӧсада кʹидәре кӧ ԛачахти у хәбьтандьна наркотикайе бәлабуйи бун. Малбәтеда әм шәш зарʹ бун, әз йе дӧда бум.

Дийа мьн әм мәзьн дькьрьн ча әндәмед дера евангелиста. Ле щаһьлтийеда мьн дәстпекьр бь дӧ щурʹә әʹмьра бьжим. Рʹожа Ләʹде мьн дереда кʹьлам дьстьран, ле рʹожед дьн мьн тʹәви һәвалед хԝә ԝәʹдә дәрбаз дькьр, мә наркотика дьда хәбате у бенамуси дькьр.

Әз йәки гәләк һерс бум у мьн нькарьбу һерса хԝә контрол кьра. Әз һазьр бум һʹәму тьшти ча чʹәк бьдьмә хәбате, сәва кӧ сәркʹәвьм. Һинкьрьнед дере али мьн нәдькьрьн. Мьн гәләк щар дьгот: «Рʹаст ә, һʹәйфһьлдан дәсте Хԝәдеда йә, ле әз чʹәке ԝи мә!» Салед 1960-да, гава әз мәкʹтәбеда салед пашьн һин дьбум, әз кʹәтьмә бәр байе кʹома политики бь наве «Пантеред Рʹәш». Әв кʹома политики бь зорбәтийе бона мафе мәрьвед чʹәрмәрʹәш шәрʹ дькьр. Әз кʹәтьмә нава кʹома политикийә студента, кӧ мафе бьнәлийа дьпараст. Чәнд щара мә мәш дәрбаз дькьр, у жь бо ԝе йәке ԝәʹдәлу мәкʹтәб дадьдан.

Ле ԝан мәша һерса мьн нәдьтәмьрандьн, ләма жи мьн дәстпекьр ԛачахтийе бькьм. Мәсәлә, щарәке мьн тʹәви һәвалед хԝә филма дәрһәԛа дилед Африки дьньһерʹи, кӧ бәре Дәԝләтед Йәкбуйида ԝана ча дьчәрчьрандьн. Әм жь бо ве нәһәԛийе ӧса һерс кʹәтьн, кӧ һәма Ода синәмеда мә һʹьщуми сәр мәрьвед чʹәрмәсьпи кьр. Паше әм чунә тʹаха мәрьвед чʹәрмәсьпи у әԝана кʹӧтан.

Әз у бьред мьн һе 20 сали жи нибун, кӧ әм ида ча ԛачахед зӧлм нас бун. Гәләк чәтьнайед мә тʹәви полиса һәбун. Йәк жь бьред мьни бьчʹук кʹомәкә ԛачахайә навдарда бу, у мьн гәләк ԝәʹдә тʹәви ԝан дәрбаз дькьр. Әʹмьре мьн чьԛас дьчу һе хьраб дьбу.

Де-баве һәваләки мьн Шәʹдед Йаһоԝа бун. Щарәке әԝана әз тʹәглифи сәр щьвате кьрьм у мьн сафи кьр һәрʹьм. Ԝедәре мьн дәрберʹа дина хԝә дайе кӧ Шәʹдед Йаһоԝа гәләк щӧдә дьбьн. Щәм һәр кәси Кʹьтеба Пироз һәбу у һʹәмушка ԝәʹде щьвате әв вәдькьрьн. Һәла һе зарʹ жи бь дәрса дәрдькʹәтьн! Әз зәндәгьрти мам чахе пеһʹәсийам ԝәки наве Хԝәде һәйә, демәк Йаһоԝа, у мьн дит, ԝәки әԝи нави бь азайи һьлдьдьн (Зәбур 83:18). Щьватеда мәрьвед жь щурʹә-щурʹә мьләта һәбун, ле әʹйан бу кӧ әԝана жь бо ԝе йәке фьрԛийе накьнә ортʹа һәв.

Серида мьн нәдьхԝәст тʹәви Шәʹдед Йаһоԝа Кʹьтеба Пироз һин бьм, ле щьватед ԝан мьн хԝәш дьһатьн. Щарәке чахе әз щьватеда бум, һәвалед мьн чунә сәр консерте. Ԝедәре ԝана хортәк ԛайим кʹӧта бун жь бо ԝе йәке кӧ әԝи нәхԝәстьбу кӧртьке хԝәйи чʹәрми бьдә ԝан, у әԝ хорт мьр. Рʹожа дьн әԝана дәрһәԛа ве йәке хәбәр дьдан у хԝә ԛӧрʹә дькьрьн. Ԝана һәла һе диԝанеда жи дәрһәԛа ве кӧштьне һʹәнәк дькьрьн. Жь ԝана һʹәчʹи зәʹф кьрьнә кәле сәр тʹәмамийа әʹмьре ԝан. Әз бь гьлийа нькарьм шьровәкьм, кӧ әз чьԛас ша бум, ԝәки ԝе рʹоже әз тʹәви ԝан нибум. Һьнге мьн сафи кьр жийина хԝә бьгӧһезьм у мьн дәстпекьр Кʹьтеба Пироз һин бьм.

Әз рʹасти гәләк нәфрʹәтийе һатьбум, ләма жи әз зәндәгьрти мам чахе мьн дит, кӧ Шәʹдед Йаһоԝа һьндава һәвда чь щурʹәйи нә. Мәсәлә, чахе Шәʹдәки Йаһоԝа кӧ чʹәрмәсьпи бу, чу ԝәлатәки дьн, әԝи зарʹед хԝә бал малбәтәкә чʹәрмәрʹәш һишт, ԝәки мьԛати ԝан бьн. Ӧса жи малбәта чʹәрмәсьпи мала хԝәда гәдәки чʹәрмәрʹәш ԛәбул кьр, чьмки щи-сьтʹара ԝи тʹӧнә бу. Мьн дит, ԝәки Шәʹдед Йаһоԝа әв гьлийе Иса тиньн сери, кʹижан кӧ Йуһʹәнна 13:35-да ньвисар ьн: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн». Әз избат бум ԝәки, рʹаст ә әԝана жь щурʹә-щурʹә мьләта нә, ле ча малбәтәк ьн.

Чахе әз Кʹьтеба Пироз һин дьбум, мьн фәʹм кьр, кӧ әз гәрәке фькьред хԝә бьгӧһезьм у нәфрʹәтийе жь дьле хԝә дәрхьм. Мьн гәрәке ньһерʹандьна хԝә бьгӧһаста, ԝәки нә кӧ тʹәне зӧлми нәкьра у әʹдьлайи хԝәй кьра, ле ӧса жи сәр жийина ԝи щурʹәйи ча сәр әʹмьрәки лапи баш бьньһерʹийа (Рʹомайи 12:2). Һеди-һеди әз дьһатьмә гӧһастьне. Мәһа Чьләйе, сала 1974-да әз һатьмә ньхӧмандьне у бумә Шәʹде Йаһоԝа.

Һәла һе паши ньхӧмандьне жи әз гәрәке сәр хԝә бьхәбьтийама, сәва кӧ зу һерс нәкʹәтама. Мәсәлә, щарәке ԝәʹде хьзмәтийа мал бь мал әз пәй дьзәки рʹәвим, кʹижани кӧ жь әʹрәба мьн радио дьзи. Гава әз ида незики ԝи дьбум, әԝи радио авит у рʹәви. Чахе мьн дәрһәԛа ве ԛәԝьмандьне хушк-бьрарʹа гьли кьр, рʹуспики пьрс да мьн: «Стефан, ле һәрге тә әԝ бьгьрта, тәйе чь бькьра?» Әве пьрсе әз һелан кьрьм кӧ кʹур бьфькьрьм у һе зедә сәр хԝә бьхәбьтьм, ԝәки әʹдьлайиһʹьз бьм.

Мәһа Щотмәһе, сала 1974-да мьн дәстпекьр ча пешәнге һәртʹьм хьзмәт кьм у һәр мәһ мьн 100 сьһʹәт рʹастийа Кʹьтеба Пироз мәрьв һин дькьрьн. Ԝәʹдә шунда ԛәдьрәки мәзьн мьнрʹа һатә дайине кӧ филиала сәрәкәда йа Шәʹдед Йаһоԝа, Бруклинеда (Нийу Йорк), хьзмәт кьм. Сала 1978-да әз вәгәрʹийам Лос Анщелесе, сәва кӧ мьԛати дийа хԝә бьм, чьмки әԝ нәхԝәш бу. Дӧ сал шунда мьн Аранда хԝәйә дәлал жьнти станд. Арандайе али мьн дькьр мьԛати дийа хԝә бьм һʹәта мьрьна ԝе. Ԝәхт шунда әз у Аранда һатьнә тʹәглифкьрьне кӧ мәкʹтәба Гиләдеда һин бьн. Паше әм Панамайеда һатьнә кʹьфшкьрьне ча мисйонер, кʹидәре кӧ әм һʹәта ньһа хьзмәт дькьн.

Паши ньхӧмандьне әз рʹасти гәләк дәрәщед чәтьн дьһатьм, кʹидәре кӧ әз дькарьбум зу һерс кʹәтама у шәрʹ кьра. Әз һин бум хԝә дур бьгьрьм жь ԝан мәрийа, йед кӧ һерса мьн рʹадькьрьн, у ӧса жи һин бум дәрәщед гьран һеса сафи кьм. Гәләк мәрьв, ӧса жи жьна мьн, пʹайе мьн дьдьн кӧ әз ча дькарьм сәри жь дәрәщед ви щурʹәйи дәрхьм. Әз хԝәха жи әʹщебмайи дьминьм! Ле әз заньм, ԝәки әз нә кӧ бь ԛәԝата хԝә һатьмә гӧһастьне, ле бь сайа ԛәԝата Хәбәра Хԝәде (Ибрани 4:12).

Кʹьтеба Пироз али мьн кьр, кӧ нета жийине бьвиньм у әʹдьлайиһʹьз бьм. Әз ида мәрийа накʹӧтьм, ле дәԝсе аликʹарийа рʹӧһʹани дьдьмә ԝан. Мьн һәла һе жи тʹәви дьжмьне хԝәйи мәкʹтәбе һинбуна Кʹьтеба Пироз дәрбаз дькьр! Паши ньхӧмандьна ԝи, мә чәндәке маләкеда дьжит. Һʹәта рʹожа иро әм һәвалед незик ьн. Мьн тʹәви жьна хԝә али 80 мәрьва зедәтьр кьрийә кӧ Кʹьтеба Пироз һин бьн у бьбьнә Шәʹдед Йаһоԝа.

Әз гәләк жь Йаһоԝа рʹази мә, кӧ әԝи али мьн кьр нета жийине бьвиньм, һәвалед рʹаст ԛазанщ кьм у бәхтәԝар бьм.