Iyo ng’omundu oyuhikene, Yesu mwathabana ebindu bingyi ebikaletha amaghaniryo n’emilyambo ng’abandi bandu. Nomwabine, mwakwira abandu b’obulighe. Abya inianayitheghekire eribawathikya, erikolha bindu kwilhaba ngoku kyabya kikayithaghisibwa. Omo kwenene erikwira abandi b’obulighe mukyaleka iniawathikya abandi.

Abandu b’emyaka yosi​—abalere n’abakulhu—​mubayowa ibangana hikira Yesu kundi isyaliyilhangira ng’awithe bingyi by’erikolha kutse ng’alengire abandi. Erilhangira ngoku abatsomene, abandu mubayowa buholho eribya aho ali.

Mughulhu wosi, Yesu iniakasaba Thatha wiwe, iyuwene n’omughulhu ali n’abaramya b’okwenene. Iniakasaba mughulhu mungyi, butsira okwa saha y’erirya nyisa. Mwasaba busana n’erisima Thatha wiwe, erimupipa, n’erisaba obusondoli bwiwe athali akolha erithwamu eririthohire.

N’okwa bundi buthuku omughulhu ni w’erighasirwa omwa buthuku bw’erilhuhuka n’obw’eriyitsemesya, Yesu paka iniakayihayo busana n’abandi. Isyawithe omuthima wa ningye mukulhu ingye ndabe. Omw’ekyo, mwathuhiriraho eky’erileberyako ekya thwangakwama.

Yesu mwathasubulira okw’ikangirirya lisa okwa kiyithawa ky’eribya abakaghanyira​—mwakangania omubere w’erighanyira akakolongana n’abigha biwe n’abandi.

Kyabya ikyabirilhaghulhwa indi Abayuda bangyi sibanga lighire Masiya kandi ngoku esyonzighu siwe syangamwithire. Neryo kyangalhobere Yesu erithendi kolera abandu n’omuthima wiwe wosi. Omwakanya k’ekyo, n’omuhwa munene mwakulha-kulhania eriramya ly’okwenene. Mwahiriraho abigha biwe abosi eky’erileberyako eky’eribya n’omuhwa nibya n’omughulhu abandu bakaghana eribahulikirira kutse bakabendereraya.

Yesu aby’alengire kutsibu abandu abathahikene omwa nzira nyingyi, ng’omwa menge n’obuyitheghererya. Ahathe erithika-thika, erihikana liwe mulyaleka iniabya n’amaaka kinyamubiri n’omwa bulengekania kwilhaba owundi mundu wosi-wosi. Nomwabine, omw’iyikehya mwakolera abandi.

Mughulhu wosi Yesu iniakaghumisirizaya abakwenda biwe n’abandi bakalemwa erigherererya eky’erileberyako kiwe kutse erighendera okwa by’akabugha. Omw’ighumisirizya iniakasubirira omwa masomo agho bakayithagha ibo erithoka eriyithunda hakuhi na Yehova.