•  Eby’Eritsuka Nabyo 2

•  Eby’Obughuli Omwa Kinywe kya Nyamuhanga 3-5

  •  Omukania 3

  •  Erisekulya Ndeke Amasako 4

  •  Erisoma e Biblia 5

•  Minya Ndeke Erikolha Omubiiri w’Erithulira 6-14

  •  Eritsukisya Omukania 7

  •  Kwamirira 8

  •  Eriyira Abigha 9

  •  Erisoborera Ebya Wikirirye 10

  •  Omukania 11

  •  Ebirimo 12

  •  Emibere 13

  •  Erikolesya Esyovidiyo n’Ebitabu 14

•  Engebe Yethu ng’Abakrisitayo 15-16

  •  Erigha lye Biblia ery’Ekithunga 16

•  Eby’Erighunzerera Nabyo 17

•  Erisima n’Erihabulha 18

•  Endambi 19

•  Olhubungo lhw’Omulebererya w’Omuthimbo 20

•  Eyenga y’Olhuhindano 21

•  Eyenga Eyiri kw’Ekiro ky’Eryibuka 22

•  Omulebererya w’Omuhindano ow’Engebe n’Omubiiri Wethu 23

•  Omwimaniri w’Omuhindano ow’Engebe n’Omubiiri Wethu 24

•  Omuhabuli Omuwathikya 25

•  Esindi Kilasi 26

•  Esyovidiyo 27

1. Obusondoli obuli omwa kisakango kino obukendi wathikaya abosi abakabya n’ebitsweka okwa muhindano w’Engebe Yethu ng’Abakristayo n’Omubiiri Wethu. Bawithe ebitsweka batholere ibalhaba omwa busondoli obuhambene n’ekitsweka kyabu ngoku kikanganibwe omwa Katabu k’Omuhindano ak’Engebe n’Omubiiri Wethu kandi ngoku kiri omwa kisakango kino bathe bathegheka ebitsweka byabu. Abathuliri abosi batholere ibahebwa olhusunzo lhw’erilhabya okwa bitsweka by’abigha. N’abandi abane muhindana n’erisangira ndeke haghuma n’ekithunga bangana hebwa ebitsweka bamabya ibanemulighirana n’esyongangirirya sye Biblia kandi ibane mughendera n’okwa misingyi eyirimu. Omulebererya w’Omuhindano ow’Engebe n’Omubiiri Wethu atholere iniatsuka erikania n’owosi-wosi oyuthe muthuliri oyukayisunza eringira omwa sukuru y’ekiteokrasi okwa bikayithaghisibawa n’erimumanyisya ng’anamatholera. Eki kitholere ikyakolhwa oyuk’igha nayu e Biblia inianeho (kutse omubuthi wiwe amabya ini Mukristayo). Ebikayithaghisibawa n’ebighumerera n’eby’omundu oyukanza eribya omuthuliri oyuthabatizibirwe.—od-E esura 8 enu. 8.

2. Dakika nguma. Obuli yenga, enyuma w’olhwimbo n’omusabe owakakyungulha, omwimaniri w’Omuhindano ow’Engebe n’Omubiiri Wethu akendibya akahira omwa bahulikiriri mw’engumbu y’erilindirira ebiri okwa ndegheka. Omwimaniri atholere iniahira omuwatho okwa nzumwa ngulhu-ngulhu esyanga ghasira ekithunga.

  3. Omukania: Dakika ikumi. Omuthwe n’esyonzumwa ngulhu-ngulhu ibiri kutse isathu bine omwa Katabu k’Omuhindano ak’Engebe n’Omubiiri Wethu. Omukania oyu akahebawa omusyakulhu kutse omughombe omuwathikya oyutholere. Mwamabya imukatsuka ekitabu kihya-kihya omwa Busomi bwe Biblia, evidiyo eyikakikanayako yitholere iyakanganibwa. Embuyi yangana hambangania ebiri omwa vidiyo n’omuthwe. Aliwe, atholere inialhangira athi akakanaya okwa syonzumwa esyosi esiri omwa kitsweka kiwe. Kandi endambi yamamulighira, atholere iniakania n’okwa bisasani ebikolirwe erihira erisighika omwatsi owakakanibawako.

 4. Erisekulya Ndeke Amasako: Dakika ikumi. Kino ni kitsweka eky’ebibulyo n’eby’erisubirya okuthe ebinywe by’eritsuka nabyo kutse erighunzerera nabyo. Kitholere ikyalhabibwa n’omusyakulhu kutse omughombe omuwathikya oyutholere. Inianganalebya obuli nguma y’okwa syonzumwa ini ng’akendi hayo dakika singahi erikwamana n’ekiyithawa ky’ekithunga kyenyu. Aliwe atholere iniabulya ebibulyo ebyosi. Kandi iniangana thwamu amasako awosi aw’ebibulyo bibiri eby’erimbere-mbere ng’anasomawe kutse eyihi. Abakasubiraya sibatholere bakalhabya okwa syosekendi 30.

 5. Erisoma e Biblia: Dakika ini kutse nyike kwaho. Ekitsweka kino kitholere ikyalhabibwa n’omwigha w’obulhume. Omwigha atholere iniakwama kya soma emilhondo eyikanganibwe isyathatsuka n’ebindi binywe kutse erighunzerera n’ebindi binywe. Omwimaniri w’omuhindano atholere inialhangira athi abigha bakasoma ndeke, omwa mibere eyikayitheghereribawa, erihira okwa binywe kw’omuwatho, erihindulikania omulenge, erisoma ibane mwimana ahatholere, n’erisoma omwa mibere eya buli kiro. Kundi obundi busomi bwe Biblia bukanabya bukuhi n’obundi ibwabya buuli, Omulebererya w’Omuhindano ow’Engebe n’Omubiiri Wethu atholere iniatsuka erilebya emibere y’emisomere ey’obuli mwigha akaghaba ebitsweka.

6. Dakika ikumi n’ithanu. Ekitsweka ky’omuhindano kino kikolirwe eriha abosi b’akaghisa ak’eribya ibangana yibegheresya omubiiri w’erithulira n’eryuwania emibere yabu y’erikanirania n’amaaka w’erithulira n’erikangirirya. Kyamayithaghisibwa, abasyakulhu banganahebwa ebitsweka by’abigha. Obuli mwigha atholere iniakolha ekitsweka kiwe erikwamana n’erisomo eriri omwa brokyuwa Erikangirirya kutse Anza Abandu eriri omwa syobbraketi hakuhi n’ekitsweka omwa Katabu k’Omuhindano owa Engebe n’Omubiiri Wethu. Okwa bundi buthuku, ekitsweka kikendi kanganibwa ng’eky’erikanirania. Ekitsweka ng’ekyo kitholere ikyalhabibwa n’omusyakulhu kutse omughombe omuwathikya oyutholere.—Lebaya  enungu 15 eyihambire ngoku ebitsweka by’erikanirania byanga.

 7. Eritsukisya Omukania: Ekitsweka eky’abigha eki kyangana hebwa omwigha w’obulhume kutse w’obukali. Omuhulikiriri atholere iniabya w’olhubutho ng’olhwiwe kutse ow’omw’eka yiwe. Omwigha n’omuhulikiriri bangan’ikalha kutse ibabya iban’imene.—Eriminya mwatsi mungyi owahambire okwa birimo n’emibere y’erikilhabiryamo, lebaya  enungu 12 na  13.

 8. Kwamirira: Ekitsweka eky’omwigha eki kyangana hebwa omwigha w’obulhume kutse w’obukali. Omuhulikiriri atholere iniabya w’olhubutho ng’olhwiwe. (km-E 5/97 olhup. 2) Omwigha n’omuhulikiriri bangan’ikalha kutse ibabya iban’imene. Omwigha atholere iniakangania ebya thwanga bugha thukakwamirira erikanirania ly’ahanyuma.—Eriminya mwatsi mungyi owahambire okwa birimo n’emibere y’erikilhabiryamo, lebaya  enungu 12 na  13.

 9. Eriyira Abigha: Ekitsweka eky’omwigha eki kyangana hebwa omwigha w’obulhume kutse w’obukali. Omuhulikiriri atholere iniabya w’olhubutho ng’olhwiwe. (km-E 5 /97 olhup. 2) Omwigha n’omuhulikiriri bangan’ikalha kutse ibabya iban’imene. Ekitsweka eki kitholere ikyakangania ngoku erigha eri rilhue iryabiritsuka neryo line mulholha embere. Sikiriyithaghisaya eribugha ebinywe ebikakanganaya ng’awamatsuka kutse ng’awamaghunzerera kw’ihaho omwigha amabya iniakakolha okwa lighuma ly’okwa masomo aya. Sikiriyithaghisaya erisoma omwatsi owosi owakangirirwe omwa mulenge muuli, nomwakine indi eki kyangana kolhwa.

 10. Erisoborera Ebya Wikirirye: Kyamakanganibwa indi ni mukania, ekitsweka ky’omwigha eki kitholere ikyahebwa omwigha w’obulhume. Kyamakanganibwa indi ni ky’erilhangirirako, ikyangana hebwa omwigha w’obulhume kutse w’obukali. Omuhulikiriri atholere iniabya w’olhubutho ng’olhwiwe kutse ow’omw’eka yiwe. Omwigha atholere omwa menge iniaha eky’erisubirya ekikayitheghereribawa omw’ikolesya omwatsi owakangirirwe. In’ithwamu ly’omwigha ng’anahule ahalhuire omwatsi akalhabya kitsweka kiwe.

 11. Omukania: Ekitsweka eky’omwigha eki kitholere ikyalhabibwa n’omwigha w’obulhume kandi ikyalhabibwa ng’omukania. Omukania amabya iniaseghemere okwa nzumwa eyiri omwa Enyongezyo A ey’ebrokyuwa Anza Abandu, omwigha atholere iniakangania amasako ng’anga kolesibwa omwa mubiiri w’erithulira. Ng’eky’erileberyako, angana soborera omulhondo ng’anga kolesibwa mughulhu wahi, ng’akamanyisayaki, kandi ngoku anga kolesyagho akakania n’omundu. Omukania amabya iniaseghemere okwa nzumwa erilhua omw’ighuma ly’okw’amasomo awali omwa brokyuwa Anza Abandu, omwigha atholere iniahira omuwatho enzumwa eyo nga yanga kolesibwa yithi omw’ithulira. Iniangana kania okwa ky’erileberyako ekiri omwa nzumwa 1 ery’erisomo kutse iniakania okwa okw’isako lyosi-lyosi eriri omw’isomo eryo, lyamabya iryangana wathikya.

   12. Ebirimo: Omwatsi owali omwa nungu eno n’eyikakwamako ahambire okwa bitsweka “Eritsukisya Omukania” na “Kwamirira”. Mbwino ikinalyakanganibawa, omwigha atholere iniabya n’ekilhubirirwa eky’eribwira omundu okwa kwenene nyolho-nyolho ye Biblia ey’omundu oyo anga tsemera n’erihira h’omusingyi owanga leka iniathasyakania nayu omwa buthuku bw’embere. Omwigha atholere iniasombolha omwatsi w’erikaniako owali okwa buthuku kandi owanga kolha ewabu. Iniangana thwamu ng’aghabe ekitabu kutse erikania okwa vidiyo ebiri omwa Ebya Thukakolesaya Thukakangirirya. Omwakanya k’erikolesya n’eby’eritsuka nabyo ebya babirihambira omwa muthwe, abigha abatholere ibayibegheresya emibere y’erikania, ng’ow’erikangania eritsomana n’ow’erikania omwa mibere eya buli kiro.

   13. Emibere: Omwigha atholere iniakolesya emibere eya kanganibwe erikwamana n’emibere eyabu. Ng’ky’erileberyako:

1.  (1) Nyumba Okwa Nyumba: Enzira y’erithulira eyi mwamuli erithulira nyumba okwa nyumba—mbulha busu okwa busu, erikolesya esimu, kutse erihandika esyobaruha—n’erikwamirira erikanirania ly’ahanyuma n’omundu oyo wabanawa omw’ithulira ly’okwa nyumba kwa nyumba.

2.  (2) Erithulira Kitsumbukirania: Enzira y’erithulira eyi mwamuli erihindulha erikanirania erya buli kiro mw’akaghisa k’erithulira. Mwanganabya imwamuli erikania oko mwatsi mulebe we Biblia n’abathuk’eghaya aho thukakolera, okwa sukuru, aho wikere, iwune omwa lhughendo, kutse omwa wundi mwanya wosi-wosi iwune okwa emibiri yawu.

3.  (3) Erithulira Ahali Abandu Bangyi: Enzira y’erithulira eyi mwamuli erikolesya ehiggali hy’ebitabu, erithulira abandu omwa myanya ey’esuburu, erithulira okwa nzira, kutse erithulira eyo abandu bakayibunga-bungiraya, ahakimana esyomatoka, kutse ehosi-hosi aho abandu banga banika.

 14. Erikolesya Esyovidiyo n’Ebitabu: Erikwamana n’emibere eyiriho, omwigha anganathwamu erikangania evidiyo kutse erighaba ekitabu. Ekitsweka ky’omwigha mwamabya imuli evidiyo kutse omwigha amathwamu erikolesya evidiyo, ibya ng’oyukamukanganaye evidiyo n’erikania kuyo aliwe isiwabughayayo.

15. Enyuma w’olhwimbo olhukakyungulha ekitsweka eki, ekitsweka ekikakwamako eky’esyodakika 15 kikendibya kikabya mw’ekitsweka kighuma kutse bibiri ebikolirwe eriwathikya abahulikiriri erighendera okwa Kinywe kya Nyamuhanga. Mbwino ikinalyakanganibawa, ebitsweka ebi byangana hebwa abasyakulhu kutse abaghombe abawathikya abatholere, erihako ekitsweka eky’ebiyithawa by’ekithunga, ekitholere ikyalhabibwa n’omusyakulhu. Kyamakanganibwa indi ekitsweka ni ky’erikanirania, embuyi yangana bulya ebibulyo omwa kitsweka kyosi eryongera okwa bihebirwe. Atholere iniatsuka n’ebinywe bikuhi nuku abane obuthuku obukaghunza erithoka erikania okwa syonzumwa ngulhu-ngulhu esyosi n’abathuliri erithoka erisangira mukyo. Mwamabya imuli eribulibwa, ekikendi yithaghisya oyukabulibawa eryasa embere okwa rututi omwakanya k’erisighalha omwa bahulikiri, kyamathokekana.

  16. Erigha lye Biblia ery’Ekithunga: Dakika makumi asathu kutse nyike kwaho. Ekitsweka eki kitholere ikyalhabibwa n’omusyakulhu oyutholere. (Ebithunga ebiri mw’abasyakulhu bake bangana kolesya abaghombe abawathikya abatholere kyamayithaghisibwa.) Akathunga k’abasyakulhu katholere ikalebya oyutholere erisondolha Erigha lye Biblia ery’Ekithunga nga ni wahi. Abakalighirawa batholere ibabya ibangana thoka erisondolha omwa mibere eyitholere nuku sibalhabaye okwa ndambi, erihira omuwatho okwa Masako makulhu-makulhu, kandi ibawathikya obuli mundu erilhangira ng’anga kolesya athi esyonzumwa esiryakanibawako. Abakalighirawa ibakendi ghasirwa omw’ilebya obusondoli obukakanganaya ngoku ebitsweka eby’eribulya n’erisubirya byanga kolhwa. (w23.04 olhup. 24, akasanduko) Omwatsi w’erigha ow’eyenga amabirikanibwako ndeke, sikiri yithaghisaya eryongeramu ebindi busana n’erithanza erighunzayo endambi eyikanganibwe. Aha kyanga thokekana, imwangana kolesya abakasondolha n’abasomi muthina-muthina obuli yenga. Omwimaniri w’Omuhindano owa Engebe n’Omubiiri Wethu amabugha athi erigha likuhihibawe, neryo oyukasondolha iniakendi lebya ng’angakuhihya athi erigha eryo. Iniangana thwamu athi esindi nungu sisisomawe.

17. Dakika isathu kutse nyike kwaho. Omwimaniri w’Omuhindano owa Engebe n’Omubiiri akalhaba omwa bya mwam’igha n’eby’eyenga eyikasa. Kandi atholere iniakania omwa bikuhi okwa bikendi syakanibwako eyenga eyikasa, obundi ng’eriahulha ekibulyo ekikendi syasubwamu. Hamabya ihakine endambi, iniangana hulha abigha abakendi syalhabya ebitsweka eyenga eyikasa. Mbwino ikinalyakanganibawa, hamabya ekirango kyosi-kyosi kutse esyobaruha esitholere erisomwa, omwimaniri atholere iniasisoma omwa kitsweka kino. Ebya buli kiro, ng’esyondegheka sy’omubiiri w’eriyathulira n’esy’obuyonzo sibitholere bikarangirwa okwa rututi aliwe bitholere ibyahirwa okwa rubbahu lhw’ebirango. Kyamabya isikyanga thokekana erilhabya ebyosi ebi okwa syodakika esihebirwe esi, omwimaniri inianganabwira abawithe ebitsweka omwa kitsweka Engebe Yethu ng’Abakrisitayo erikuhihya ebitsweka byabu ngoku banga thoka. (Lebaya  enungu 16 na  19.) Omuhindano akendi ghunzerera n’olhwimbo n’omusabe.

18. Obuli mwigha akaghunza ekitsweka kiwe, omwimaniri w’Omuhindano owa Engebe n’Omubiiri atholere iniakolesya hakuhi dakika nguma erisima n’eriha obuhabuli obuseghemere okw’isomo erikakolhawako. Omwimaniri akakokya omwigha erisyalhabya ekitsweka kiwe, syendi sangwa ahulha erisomo erya mwigha akakolhako omwa mukania wiwe. Aliriryo, omwigha akendibya abirilhabya omukania wiwe n’erisimwa, omwimaniri akendi ahulhalyo n’erikania okwa syonzumwa ndebe esiryaleka iniakolha ndeke kutse erisoborera busana naki ni ky’omughaso omwigha erithasyakolha ndeke okwa nzumwa ndebe kandi ng’anga kikolha athi. Omwimaniri angana thasyakania n’okwa bindi ebilhue omwa ky’erilhangirirako amalhangira athi kikendi ghasira omw’igha kutse abahulikiriri. Omwimaniri angan’ongera erihabulha omwigha erikwamana n’ebiri omwa brokyuwa Anza Abandu, ebrokyuwa Erikangirirya, kutse ekitabu Ministry School omuhindano abirihwamu kutse okwa bundi buthuku omw’ikania okw’isomo ery’alyakolhako kutse okwa lindi risomo.—Eribana mwatsi mungyi owahambire okwa lhukwamirwa olhw’omwimaniri owa Omuhindano owa Engebe n’Omubiiri n’omuhabuli omuwathikya, lebaya  enungu 19,  24, na  25.

19. Isihabya ekitsweka ekikalhaba okwa ndambi eyikanganibwe, nibya n’ebyo mwimaniri w’Omuhindano owa Engebe n’Omubiiri Wethu akendi bugha. Nomwakine indi Akatabu k’Omuhindano ak’Engebe n’Omubiiri Wethu kakanganaya endambi y’obuli kitsweka, omwatsi amabirikanibwako ndeke, sikiri yithaghisaya eryongeramu ebindi busana n’erithanza erighunzayo endambi eyikanganibwe. Abakalhabaye ebitsweka bamalhabya okwa ndambi eyikanganibwe, omwimaniri w’omuhindano ow’engebe n’omubiiri wethu kutse omuhabuli omuwathikya atholere iniamuhabulha omwa mbitha. (Lebaya  enungu 24 na  25.) Omuhindano owosi, imwamune esyonyimbo, n’emisabe, atholere iniaghunza saha 1 n’esyodakika 45.

20. Ekithunga kyenyu kyamabya ikiwithe olhubungo lhw’omulebererya w’omuthimbo, endegheka yitholere iyaghenderwako ngoku binakanganibwe omwa Katabu k’Omuhindano ak’Engebe n’Omubiiri Wethu erihako bino: Omukania ow’esyodakika 30 ow’omulebererya w’omuthimbo akendi suba omwa mwanya w’Erigha lye Biblia ery’Ekithunga eriri omwa kitsweka Engebe Yethu ng’Abakrisitayo. Omukania oyu athe alhabibwa, omwimaniri owa Omuhindano ow’Engebe n’Omubiiri atholere inialhaba omwa bya mwam’igha n’eby’eyenga eyikasa, inialhabya n’ebirango ebikayithaghisibawa, n’erikokya omulebererya w’omuthimbo. Omukania akendibya abirihwamu, omulebererya w’omuthimbo iniaghunzerera n’olhwimbo olhw’abirisombolha. Iniangana kokya owundi mughalha wethu eriha omusabe w’erighunzerera. Sihatholere hakakolhwa esindi kilasi omwa kithunga mwamabya imuwithe olhubungo lhw’omulebererya w’omuthimbo. Egurupu iyangana thunga emihindano yayo nibya imune n’omwa lhubungo lhw’omulebererya w’omuthimbo. Aliwe, batholere ibabya haghuma n’ekithunga okwa mukania w’omulebererya w’omuthimbo.

21. Okwa yenga y’olhuhindano, sihalibya emihindano yosi-yosi. Ekithunga kitholere ik’ibukibwa ngoku omwatsi owatheghekirwe omwa mayenga ng’aya thutholere ithw’ighagho ahabwethu kutse ng’eka.

22. Eryibuka lyamahamba ekiro kyosi-kyosi omo kathi-kathi k’eyenga, obo isihendibya omuhindano ow’Engebe n’Omubiiri Wethu omwa yenga eyo.

23. Omusyakulhu oyukasombolhawa n’akathunga k’abasyakulhu yuwangakolha ng’omulebererya w’Omuhindano ow’Engebe n’Omubiiri Wethu. Atholere inialhangira athi omuhindano oyu akabya inianathondekenie ndeke n’erilhabibwa erikwamana n’obusondoli buno. Atholere iniakolongana ndeke n’omuhabuli omuwathikya. Akatabu k’Omuhindano ak’Engebe n’Omubiiri Wethu ak’okwezi okwa mukendiyamu kakanahika omwa kithunga, omulebererya w’omuhindano atholere iniaghaba ebitsweka ebyosi eby’omuhindano w’ahakathi-kathi k’eyenga eby’emyezi ibiri. Eki mwamuli n’ebitsweka ebithe by’abigha n’omwimaniri w’omuhindano w’ahakathi-kathi k’eyenga erilhua omwa balighirwe n’akathunga k’abasyakulhu haghuma n’ebitsweka by’abigha. (Lebaya  enungu 3-16 na  24.) Akaghaba ebitsweka by’abigha, atholere inialengekania okwa myaka y’omwigha, ebyasi, kandi ng’angana thoka erikania okwa mwatsi owakanibawako inianawithe obwiranda. Atholere iniakolesya amenge iwanayo akaghaba ebindi bitsweka by’omuhindano. Akapapura akali kw’ekitsweka katholere ikaghabwa ihakine hakiri yenga isathu. Efomu eya Our Christian Life and Ministry Meeting Assignment (S-89) yitholere iyakolesibwa busana n’ebitsweka by’abigha. Omulebererya w’Omuhindano ow’Engebe n’Omubiiri Wethu atholere inialhangira athi endegheka eyiriko abawithe ebitsweka eby’omuhindano owosi yikahanikawa okwa rubbahu lhw’ebirango. Akathunga k’abasyakulhu kangana sombolha owundi musyakulhu kutse omughombe omuwathikya erimuwathikya. Aliwe, abasyakulhu basa babatholere ibakolesibwa erighaba ebitsweka ebithe by’abigha.

24. Obuli yenga, omusyakulhu mughuma akendibya akabya mwimaniri w’Omuhindano ow’Engebe n’Omubiiri Wethu. (Ebithunga ebiri mwa basyakulhu bake byangana kolesya abaghombe abawathikya abatholere kyamayithaghisibwa.) Awithe olhukwamirwa olhw’erithegheka ebinywe eby’eritsuka nabyo n’eby’erighunzerera. Akendibya akakokya abosi abawithe ebitsweka, kandi n’erisighikira n’enamba y’abasyakulhu, anganalhabya n’okwa bindi bitsweka, kwilhabirirya ebitsweka ebiri mw’erikangania evidiyo lisa omuthendibya erikanirania. Eby’akabugha obuli kitsweka kikahwa bitholere ibyabya bikuhi. Akathunga k’abasyakulhu kakakendibya kakathwamu nga ni basyakulhu bahi abanga tholera erikolha ng’abimaniri. Abasyakulhu abatholere babakendibya bakabya bimaniri. Erisighikira n’ekithunga kyenyu, omulebererya w’Omuhindano ow’Engebe n’Omubiiri anganabya akabya mwimaniri kwilhaba abandi basyakulhu abatholere. Omusyakulhu amabya inianatholere erisondolha Erigha lye Biblia ery’Ekithunga, iniangana tholera eribya mwimaniri w’omuhindano. Aliriryo wukiminye ngoku, omusyakulhu oyukendibya akakolha ng’omwimaniri atholere iniasima kandi, kyamayithaghisya, n’erihabulha omo lhwanzo abalyakolha okwa bitsweka eby’abigha. Kandi omwimaniri atholere inialhangira athi omuhindano akahwera okwa ndambi. (Lebaya  enungu 17 na  19.) Omwimaniri amanza, kandi hamabya ihane omwanya owakaghunza, okwa rututi kwanganabya hizindalo hibiri nuku omwimaniri akahulha oyukayalhabaya ekindi kitsweka iniabya iniane ahali akandi kazindalo. Kuthya, omwimaniri angananza er’ikalha okwa rututi ahali emeza omwa kitsweka ky’abigha eky’erisoma e Biblia n’omwa kitsweka Minya Ndeke Erikolha Omubiiri w’Erithulira. Eki kyangana leka imwaghunzira okwa ndambi.

25. Kyamathokekana, omusyakulhu oyuwasi erilhabya ndeke emikania yutholere erihebwa olhukwamirwa olhu. Kyamayithaghisibwa, emihindano yikahwamu, atholere iniaha abasyakulhu n’abaghombe abawathikya b’erihabulha erikwamana n’ebitsweka ebya balyalhabaya, ng’ebitsweka ebiri omwa Muhindano ow’Engebe n’Omubiiri Wethu, omukania w’abandu abosi, erisondolha erigha ly’Akaleberyo kutse erikasoma kutse Erigha lye Biblia ery’Ekithunga. (Lebaya  enungu 19.) Omwa kithunga mwamabya abasyakulhu banene abasi ndeke erilhabya emikania n’erikangirirya, obuli mwaka owundi musyakulhu iniangana kolha ng’omuhabuli omuwathikya. Sikiriyithaghisaya omuhabuli omuwathikya erihabulha okwa buli kitsweka.

26. Erisighikira okwa mughanzo w’abigha abamuwithe, ebithunga ibyangana thunga esindi kilasi esy’erilhabiryamu ebitsweka by’abigha. Esyokilasi esi sitholere isyathunga omuhabuli oyutholere, kwilhabirirya omusyakulhu. Ahakikayithaghisibawa, omughombe omuwathikya oyutholere angana hebwa olhukwamirwa olhu. Akathunga k’abasyakulhu kakatholere erimusombolha. Omuhabuli oyu atholere iniaghendera okwa busondoli obuli omwa  enungu 18. Mwamabya n’eyindi kilasi, abigha batholere ibaghenda muyo ekitsweka ekya Erisekulya Ndeke Amasako ekiri omwa eby’Obughuli Omwa Kinywe kya Nyamuhanga kikahwamu. Batholere ibalhuayo ekitsweka eky’omwigha ky’erighunzerera kikahwamo.

27. Esyovidiyo esisombwerwe sikendibya sikakanganibwa okwa muhindano ono. Esyovidiyo esy’emihindano ey’omwakathi-kathi k’eyenga sikendibya sikabya omwa JW Library^® app kandi isyangana banika omw’ikolesya ebyuma muthina-muthina ng’esyotabbuleti kutse amasimu.

© 2023 Watch Tower Bible and Tract Society of Pennsylvania

S-38-LHK 11/23