Nabuthirawa e Santo Domingo, Dominican Republic, n’ingye mwana w’erighunzerera okwa baana bethu bbani. Ababuthi bethu ibasomire kandi babya banzire erikulya abaana babu omwa mibere eyuwene. Myaka ini inde nabuthwa ababuthi baghe mubabana abamisyonare ab’edini y’Abamomoni. Kundi abamisyonare abo babya bambere ndeke kandi ibayithondekenie mukyatsemesya ababuthi baghe, neryo mubathwamu eribayiyungako kandi efamile yethu muyabya nguma y’okwa syofamile esyabya sy’erimbere-mbere okwa kizinga eribya baghuma b’okwa Kanisa eya Church of Jesus Christ of Latter-day Saints, kutse Ekanisa y’Abamomoni.

Nabere nganemukulha, iningatsemera eribya haghuma thukayitsemesya okwa kanisa kandi ingasikirye amalengekania w’Abamomoni awahambire okwa ngebe y’amaka n’eby’esyongeso. Iningayisyethera eribya Mumomoni kandi ingawithe ekilhubirirwa ky’erisyabya mumisyonare.

Nabere ingahikya myaka 18, efamile yethu muyahumira e United States nuku nangayasomera okwa yunivasite eyuwene. Enyuma w’omwaka nga mughuma, mwali wobu mama na mwira wiwe Abema ba Yehova mubasyathulebya e Florida. Mubathukokya eriyahindana nabu okwa lhuhindano olhuseghemere okwa Biblia. Munatsema ingalhangira ngoku obuli mundu anemusukulha amasako n’erihandika esyonzumwa. Neryo munasaba ekalamu n’olhupapura, neryo namatsuka erikolha ikyan’ekyo.

Enyuma w’olhuhindano olho mwali wabu mama na mwira wiwe mubambwira bathi kundi nganzire erisyabya mumisyonare, bangana nyiwathikya erigha emyatsi mirebe omwa Biblia. Munayowa ikitholere kundi okwa buthuku obo nabya ingabiriyihwerya kutsibu omw’isoma Ekitabu ky’Abamomoni kwilhaba e Biblia.

Omw’ikanirania lyethu lye Biblia okwa simu, mughulhu wosi mwali wobu mama na mwira wiwe ibakabera erinyihira mw’omuhwa w’erilinganisya erikirirya lyaghe n’esyongangirirya sye Biblia. Mubanza ngayikakasiraye ekwenene.

Habya bindu bingyi ebihambire okwa nyikirirya yaghe ey’Ekimomoni ebyo nabya ingabiriligha, aliwe isingasi ndeke ebindu ebyo nga bikahambangana bithi ne Biblia. Mwali wobu mama mwanyithumira egazeti ye Awake! ey’Okwerikuminakughuma 8, 1995, eyahulhukibawa n’Abema ba Yehova eyabyamu emyatsi eyihambire okwa nyikirirya y’Ekimomoni. Munasweka ingaminya ngoku singabya ngasi esindi ngangirirya nyingyi sy’Abamomoni. Ekyo mukyaleka ingasekulya okwa Muthahulha w’Abamomoni erilebya kwenene ebiri omwa Awake! nga nina by’okwenene. Kwabya kwenene, kandi ebyo nabana ebyo mubyongera erikakasibwa ingahika omw’ibikiro ly’ebitabu ery’Abamomoni e Utah.

Mughulhu wosi ing’ikirirye nyithi Ekitabu ky’Abamomoni ne Biblia bikalighirana. Aliwe nabere ingayithendya okwa Biblia, munaminya ngoku hali erithendi lighirana linene ahakathi-kathi k’esyongangirirya sy’Abamomoni n’emyatsi eyiri omwa Biblia.

Eryongera okwa mbaghane omwa syongangirirya, ebya kasolholho k’ebihanda ebyabya bikakangiriribwa omwa Bamomoni mubyanyitabura. Ng’eky’erileberyako, Abamomoni ibakakangiriribawa bathi eririma lye Edeni lyabya omwa Jackson County, Missouri, U.S.A. Kandi abaminyereri b’ekanisa ibakabugha bathi Obwami bwa Nyamuhanga bukendi syathabalha erilhabira omwa gavumente eya United States.

Iningabulha ekihugho ekyo ngabuthirwemo n’ebindi bihugho nga binemwendi syaghasirwa omw’eki. Erigholho-gholho lighuma munakania oko mwatsi oyu n’omulhwana Omumomoni oyuwabya iniabirithendekwa eribya mumisyonare akanyitherera. Ahathe eribisirira munamubulya ng’anayitheghekire erilhwa n’abandi Bamomoni ekihugho kiwe kyamabya ky’erilhwa n’ekyabo. Munasweka akabugha athi ee! Munasekulya kutsibu okwa syongangirirya sy’enyikirirya yaghe kandi munakania n’abakulhu b’Ekanisa y’Abamomoni. Mubambwirwa bathi eby’erisubirya okwa bibulyo byaghe ni myatsi eyithekengeka eyikendi syasubiribwa kiro kighuma ekyakakalha kikaghenda kikakanya.

Ingabiriyiponera busana n’erisoborera lyabu, munayisekulirya ndeke n’erilebya esyonzumwa esikaleka inganza eribya mumisyonare w’Ekimomoni. Munaminya ngoku munanza eribya mumisyonare habw’erianza eriwathikya abandu. Eyindi nzumwa eyaleka inganza eribya mumisyonare yabya yithi nuku ngasikibawe. Aliwe bikahika oku Nyamuhanga, omo kwenene ngabya isingamwasi bungahi. Nomwakine indi kera munanasoma e Biblia mirundi mingyi, omo kwenene nabya isingali lhangirayo mwa y’obughuli. Isingasi ekighendererwa kya Nyamuhanga busana n’ekihugho n’abandu.

Omw’igha e Biblia haghuma n’Abema ba Yehova, munigha bindu bingyi, erina lya Nyamuhanga, abaholi nga bali omwa mibereki, n’olhukwamirwa lhwa Yesu omw’iberererya ekighendererwa kya Nyamuhanga. Erighunzerera munaminya ndeke ekitabu kibuyanga eki, n’eritsemera eribwira abandi ekwenene eyo anabya ing’igha. Nabya inganasi ngoku Nyamuhanga aneho, lero lino nabya inangana kania nayu omwa musabe ng’Omunywani waghe w’okwa ndungu. Nabatizibawa ng’Omwema wa Yehova biro 12 Okwomusanju 2004, n’enyuma w’amezi mukagha munatsuka erikolha mughulhu wosi omubiiri w’erithulira.

Munakolera okwa kyaghanda kikulhu eky’Abema ba Yehova e Brooklyn, New York habw’emyaka ithano. Munatsema kutsibu eribya inanganakolera ah’erihulhukirya esyo Biblia n’ebitabu ebiseghemere okwa Biblia ebikaghasira esyomiliyoni sy’abandu erithimba omwa kihugho kyosi, kandi ngalholha embere eritsemera eriwathikya abandu erigha oku Nyamuhanga.