Joel 2:1-32
2 Ukya mwe ukuk in okasak mwet uh
Fineol Zion, inging mutal lun God.
Kowos mwet Judah in rarrar!
Len lun LEUM GOD apkuranme.
2 Ac fah sie len lohsrlosr ac ohk,
Sie len nukla ke pukunyeng sroalsroal.
Un locust uh sikme oana un mwet mweun,
Oana lohsr matoltol lohsreya fineol uh.
Soenna sikyak kain ouiya inge meet,
Ac fah wangin pac tok.
3 Elos kangla ma kap fin acn uh oana in e uh pa esukla.
Meet liki elos tuku, acn uh oana Ima Eden,
Tukun elos som, acn uh mwesisla.
Wangin ma ku in kaingla lukelos.
4 Elos oana horse uh;
Elos kasrusr oana horse in mweun uh.*
5 Na ke elos srosro fin mangon eol uh,
Elos erarak oana kusen chariot;
Elos kisassas oana mah pao ke ac firir uh.
Elos takla oana un mwet mweun lulap ma akola nu ke mweun.
6 Ke elos sikla, mwet nukewa tuninfongla;
Mutun mwet nukewa fasrfasrla.
7 Elos anwuk oana mwet mweun;
Elos fanuk pot uh oana solse uh.
Elos nukewa fahsr suwohs nu meet
Ac tia kuhfla nu saya,
8 Ac tia pac asinuki nu sin sie sin sie.
Elos fahsryang na alukela kutena mwe kutong nu selos,
Ac wangin ma ku in tulokunulosi.
9 Elos yuyak nu in siti uh;
Elos fanukya pot uh;
Elos fanyak nu fin lohm uh
Ac utyak ke winto uh oana mwet pisrapasr uh.
10 Faclu usrusryak ke elos fahsr nu meet;
Ac yen engyeng uh rarrar.
Faht uh ac malem uh lohsrlosrani,
Ac itu uh tila saromrom.*
11 LEUM GOD El ac sapsap nu sin un mwet mweun lal oana pusren pulahl.
Un mwet mweun su aksol
Arulana pukanten ac fokoko.
Ac fuka lupan mwe aksangeng ke len lun LEUM GOD!
Su ac fah ku in painmoulla?*
Sie Pang Nu Ke Auliyak
12 LEUM GOD El fahk, “Nwe ouinge, kowos srakna ku in auliyak
Ke lalo, tung, ac mwemelil,
Ac foloko nu yuruk.
13 Lela inse musalla lowos in akkalemye asor lowos;
Seya nuknuk mukena srakna sufal.”
Foloko nu yurin LEUM GOD lowos.
El kulang ac sessesla ke pakoten.
El mongfisrasr ac El karinganang wuleang lal.
Pacl nukewa El akola in nunak munas ac tia sa in kai.
14 Sahp LEUM GOD lowos El ac aolla nunak lal,
Ac akinsewowoye kowos ke fokin ima puspis.
Na kowos fah ku in sifil kisakin wheat ac wain nu sel.
15 Ukya mwe ukuk Fineol Zion;
Sapkin in oasr sie tukeni lulap, ac mwet nukewa in lalo.
16 Eisani mwet nukewa nu sie;
Akoelosla nu ke sie tukeni mutal.
Usani mwet matu,
Oayapa tulik srisrik
Ac tulik fusr.
Finne mwet ma tufahna payuk an,
Elos in filiya lohm selos ac wi pac tuku.
17 Mwet tol su kulansupu LEUM GOD
Inmasrlon loang mutal ac acn in utyak lun Tempul,
Enenu in tung ac pre:
“O LEUM GOD, pakomuta mwet lom.
Nikmet fuhlela mutunfacl saya in pilesrekut ac aksruksrukye kut
Ke elos fahk, ‘Pia God lowos an?’ ”
God El Folokonak Wo Lun Fohk Uh
18 Na LEUM GOD El sifil akkalemye nunak lal nu ke acn uh,
Ac sifil pakomuta mwet lal.
19 El topuk pre lalos ac fahk,
“Inge nga fah sot nu suwos,
Wheat, wain ac oil in olive,
Ac kowos ac fah mut.
Mutanfahl saya ac fah tia sifil aksruksrukye kowos.
20 Nga fah kunauselik un mwet mweun matol se ma tuku epang me,
Ac fah lusla kutu selos nu yen mwesis.
U se ma fahsr meet ah, ac ukohkyak nu in Meoa Misa,
U se ma fahsr etok ah, ac ukohkyak nu in Meoa Mediterranean.
Mano misa lalos ac fohlelana acn uh.
Nga fah kunauselosla ke sripen ma nukewa ma elos oru nu suwos.
21 “Acn inima uh, nikmet sangeng,
A kowos in engan ac insewowo
Ke ma nukewa LEUM GOD El oru nu suwos.
22 Kosro inimae, nikmet sangeng.
Insroan mah uh srunak folfol;
Sak uh isus fahko,
Ac arulana pus fokin fig ac grape.
23 “Mwet Zion, kowos in insewowo,
Ac engankin ma LEUM GOD lowos El oru nu suwos.
El sot lupan af fal nu suwos ke pacl la.
El supweya af se meet ke pacl in taknelik,
Ac af se tok ke pacl in kosrani, oana meet ah.
24 Nien sisi kulun wheat fah sessesla ke wheat,
Luf sisken acn in orek wain fah kahkkakla ke wain ac oil in olive.
25 Nga fah folokonot ma lowos ma tuh musalla
Ke yac ma u in locust uh tuh kangla fokin ima lowos.
Nga pa tuh supwama u in locust matol ingan in lain kowos.
26 Inge ac fah pukanten ma kowos in kang ac kowos fah kihp.
Kowos fah kaksakin LEUM GOD lowos,
Su tuh oru ma usrnguk inmasrlowos.
Mwet luk ac fah tia sifilpa akmwekinyeyuk.
27 Na mwet Israel, kowos fah etu lah nga oasr inmasrlowos,
Ac lah nga, LEUM GOD, pa God lowos,
Ac wangin pac sie sayuk.
Mwet luk ac fah tiana sifilpa aksruksrukyeyuk.
Len Lun LEUM GOD
28 “Tukun ma inge, nga fah okoala ngunik nu fin mwet nukewa:
Wen nutuwos ac acn nutuwos fah sulkakin kas luk,
Mukul matu lowos fah mweme,
Ac mukul fusr lowos fah liye aruruma.*
29 In pacl sac nga fah okoala ngunik
Nu fin mwet kulansap pac, kewana mukul ac mutan.
30 “Nga fah oru ma sakirik yen engyeng uh ac fin faclu
In fahkak ke len sac.
Ac fah oasr srah sororla, ac firir lun e, ac pukunyeng in kulasr.
31 Faht uh ac fah lohsrla,
Ac malem ac fah srusrala oana srah
Meet liki len lulap ac aksangeng lun LEUM GOD ac tuku.*
32 Tusruktu elos nukewa su siyuk kasru sin LEUM GOD ac fah moliyukla.
Oana ke LEUM GOD El tuh fahk,
‘Kutu sin mwet su muta Fineol Zion ac in Jerusalem ac fah tia sun mwe ongoiya inge.
Elos su nga sulela fah painmoulla.’ ”*
Footnotes
^ 2:4–5; Fwack 9:7–9
^ Fwack 8:12
^ Fwack 6:17
^ 2:28–32; Orek 2:17–21
^ Mt 24:29; Mk 13:24–25; Lk 21:25; Fwack 6:12–13
^ Rom 10:13