Wetin Nechɔ De Tich Wi?
Wetin Nechɔ De Tich Wi?
“Aks di bist dɛn fɔ tich yu bɔt PAPA GƆD; aks dɛn bɔd sɛf we de flay, ɛn dɛnsɛf go tɛl yu; if yu tɔk to di plant dɛn we de gro na grɔn sɛf, dɛn go tich yu; ɛn di fish dɛn na wata sɛf go tɔk bɔt PAPA GƆD to yu.”—JOB 12:7, 8.
DƐN biɛn tɛm ya, sayɛnsman ɛn injinia dɛn dɔn alaw plant ɛn animal dɛn fɔ tich dɛn. Dɛn de stɔdi ɛn falamakata di we aw di difrɛn tin dɛn we Gɔd mek tan. Dɛn de kɔl dis bayomimɛtiks. Dɛn de du dis fɔ mek nyu tin dɛn ɛn fɔ impruv di we aw mashin dɛn we ɔlrɛdi de, de wok. As yu de lan frɔm dɛn ɛgzampul dɛn ya we wi de kam tɔk bɔt, aks yusɛf dis kwɛstyɔn, ‘Udat rili fit fɔ gɛt di prez fɔ dɛn dizayn dɛn ya?’
Lan Frɔm di Wel in Flipa Dɛn
Wetin di wan dɛn we de mek plen kin lan frɔm di ɔmbak wel? Dɛn kin lan bɔku bɔku tin dɛn. Machɔ ɔmbak wel kin we lɛk 30 tɔn, dat na lɛk we yu lod wan trɔk ɛn i gɛt stif bɔdi wit big flipa dɛn we tan lɛk wiŋ. Dis animal we lɔng lɛk 40 fit rili fast ɔnda wata. Fɔ ɛgzampul, we ɔmbak wel si wetin i want fɔ it, i kin tɔn tɔn as i de swim go ɔp ɔnda di tin we i want fɔ it we na krɔsteshan dɛn [animal dɛn we de na wata we gɛt shɛl] ɔ fish dɛn. As i de swim go ɔp, i de pul bɔku bɔku bɔbul dɛn. Dis bɔbul we kin mek lɛk nɛt smɔl lɛk fayv fit ɛn i kin gɛda di animal dɛn kam ɔp. Dɔn kwik kwik wan di wel kin it di animal dɛn we i dɔn gɛda fayn wan.
Wetin de sɔprayz masta sabi bukman dɛn mɔ na di we aw dis animal we gɛt stif bɔdi kin ebul fɔ tɔn tɔn insay tayt sakul. Dɛn kam fɔ no se na di wel in flipa dɛn de mek i ebul fɔ du dat. Di frɔnt pat pan in flipa dɛn nɔ smut lɛk plen in wiŋ bɔt i zigzag wit bɔmp-bɔmp dɛn we dɛn kɔl tyubakuls.
As di wel de muv insay di wata kwik kwik wan, dɛn tyubakul dɛn ya de mek am izi fɔ am fɔ go ɔp ɛn de mek di wata nɔ de ebul fɔ slo in muvmɛnt. Aw? Di buk we dɛn kɔl Natural History ɛksplen se na di tyubakul dɛn de mek wata de pas oba di flipa ɔganayz wan insay sakul, ivin we di wel de go ɔp ɛn tek shap kɔv. If di frɔnt pat pan di flipa bin smut, di wel nɔ go ebul fɔ go ɔp ɛn tɔn dɛn da kayn we de bikɔs di wata go miksɔp ɛn rɔf biɛn di flipa ɛn mek i nɔ ebul fɔ go ɔp.
Us fayn tin dɛn go yuz dis tin we dɛn dɔn faynd awt fɔ mek? We dɛn wach di ɔmbak wel in flipa dɛn fɔ mek plen in wiŋ, dat de mek di plen nɔ nid bɔku flap dɛn ɔ ɔda tin dɛn fɔ chenj di we aw briz de blo. Dɛn kayn wiŋ dɛn de go sef ɛn izi fɔ kia fɔ. Wan masta sabi bukman pan Bayomekaniks we nem Jɔn Lɔng biliv se i nɔ go te igen “wi go si ɔl di plen dɛn gɛt di bɔmp dɛn we de pan ɔmbak wel in flipa dɛn.”
Dɛn Falamakata Sigɔl in Wiŋ dɛn
Na bɔd in wiŋ dɛn, dɛn falamakata fɔ mek plen in wiŋ dɛn. Bɔt dis biɛn tɛm, injinia dɛn dɔn impruv di we aw dɛn de falamakata di we aw di bɔd dɛn wiŋ dɛn tan. Wan magazin we nem New Scientist ripɔt se, “Masta sabi bukman dɛn na di yunivasiti ɔf Flɔrida dɔn mek wan dron we ebul fɔ flay, dayv, ɛn klem kwik kwik wan lɛk di sigɔl.”
Sigɔl dɛn kin pul difrɛn stayl dɛn we dɛn de flay na di skay bay we dɛn de bɛn dɛn wiŋ dɛn na dɛn ɛlbo ɛn dɛn sholda. Di magazin se, “we dɛn falamakata dis izi we aw di sigɔl de bɛn in wiŋ dɛn fɔ mek dron, dɛn ebul fɔ mek di 24 inchis sampul dron di kayn we we go mek i yuz smɔl moto fɔ kɔntrol difrɛn difrɛn mɛtal rɔd dɛn we de muv in wiŋ dɛn.” Dɛn wiŋ dɛn ya we dɛn mek fayn wan de ɛp di dron fɔ flay ɛn dayv bitwin tɔl bildin dɛn. Di U.S. Air Force rili want fɔ mek dis kayn dron we de flay lɛk di sigɔl so dat dɛn go yuz am fɔ luk fɔ kɛmikal ɔ bayɔlɔjikal wɛpɔn dɛn na big siti dɛn.
Dɛn Falamakata Gɛko in Fut dɛn
Mɔtalman dɛn kin lan bak bɔku tin frɔm di animal dɛn we de na land. Wan smɔl kondo we nem gɛko ebul fɔ klem wɔl dɛn ɛn tɔn ɔp-say-dɔŋ pan silin dɛn. Ivin di tɛm we dɛn bin de rayt di Baybul, dɛn bin sabi dis animal fɔ dis kayn tin we i ebul fɔ du. (Prɔvabs 30:28) Wetin de mek gɛko de ebul fɔ go agens graviti?
Di gɛko ivin ebul fɔ fasin pan say we smut lɛk glas bikɔs i gɛt smɔl smɔl tin dɛn lɛk ia we kɔba in fut dɛn. Glu nɔ de kɔmɔt na in fut dɛn. Bifo dat, i de yuz smɔl tin we dɛn kɔl moleculer force. Di gɛko kin du dis bikɔs i gɛt smɔl smɔl ia dɛn pan in fut dɛn. Ɔl dɛn smɔl smɔl ia dɛn ya de alaw di gɛko fɔ fasin pan ɔlmost ɛnitin. Bay rayt, graviti nɔ de alaw dis fɔ apin ɛn na dat mek mɔtalman nɔ kin ebul fɔ klem wɔl bay we i de put in an flat pan am. Bɔt di smɔl smɔl tin dɛn we tan lɛk ia pan di gɛko in fut dɛn, de mek i gɛt mɔ spes usay i de put in fut dɛn pan di wɔl. Di mɔ we di smɔl smɔl tin dɛn we tan lɛk ia pan di gɛko in fut de bɔku, na di mɔ i de mek i fasin pan di wɔl fɔ lɛ i nɔ fɔdɔm.
Wetin dɛn go yuz dis tin we dɛn dɔn faynd awt fɔ du? Dɛn kin yuz sintɛtik matirial dɛn we dɛn falamakata gɛko in fut fɔ mek, fɔ yuz pan tin dɛn we dɛn de yuz Vɛlkro pan—dis na ɔda tin we dɛn falamakata frɔm nechɔ. Di magazin we dɛn kɔl The Economist tɔk wetin wan Masta sabi bukman bin tɔk se dɛn kin yuz matirial dɛn we dɛn mek frɔm “gɛko silotep” fɔ ɔspitul wok dɛn usay dɛn nɔ go ebul fɔ yuz plasta dɛn we gɛt kɛmikal.
Udat Fit fɔ Gɛt di Prez?
Di National Aeronautics and Space Administration de mek wan rɔbɔt we gɛt bɔku fut dɛn we de waka lɛk skɔpiɔn, ɛn injinia dɛn na Finland dɔn ɔlrɛdi mek traktɔ we gɛt siks fut dɛn, we de klem oba tin dɛn jɔs lɛk jayant insɛkt. Ɔda masta sabi bukman dɛn dɔn mek matirial we gɛt smɔl flap dɛn we de falamakata di we aw paynkon dɛn de opin ɛn lɔk. Wan kɔmni we de mek motoka de falamakata bɔksfish fɔ mek motoka we de muv izi wan. Ɔda masta sabi bukman dɛn de stɔdi di we aw abalɔn shɛl dɛn de mek lɛk shɔk-absɔba fɔ mek amɔ dɛn we layt ɛn strɔng.
Masta sabi bukman dɛn dɔn lan bɔku gud tin dɛn frɔm nechɔ, ɛn dɛn dɔn kip dɛn infɔmeshɔn dɛn de fɔ yuz dɛn leta. Di magazin we dɛn kɔl The Economist se, “sayɛnsman dɛn de yuz dɛn infɔmeshɔn dɛn ya we dɛn bin dɔn kip fɔ fɛn nachɔral we dɛn fɔ sɔlv prɔblɛm dɛn we dɛn de dizayn tin dɛn.” Dɛn de kɔl di nachɔral sistɛm dɛn we de insay dɛn infɔmeshɔn dɛn de “biological patents.” Dɛn de kɔl pɔsin ɔ kɔmni we de rɛjista ɛni nyu aydia ɔ mashin ligal wan petɛnt olda. We di magazin we dɛn kɔl The Economist de tɔk bɔt dis biological patents infɔmeshɔn i se: “We masta sabi bukman dɛn de kɔl di nachɔral dizayn dɛn we sayɛnsman dɛn de falamakata ‘biological patents,’ dɛn jɔs de mek am klia se na nechɔ na di petɛnt olda.”
Usay nechɔ pul ɔl dɛn fayn fayn aydia dɛn ya? Bɔku masta sabi bukman dɛn go tɔk se di dizayn dɛn we de na nechɔ na tray ɛn ɛrɔ dɛn we dɛn bin dɔn de du fɔ lɔng tɛm, bɔt ɔda masta sabi bukman dɛn go tɔk difrɛn tin. Insay 2005, Maykɛl Biɛ we na Microbiologist bin rayt insay The New York Times se: “Di kayn we aw tin dɛn dizayn na nechɔ de mek wi biliv gud gud wan se if sɔntin luk lɛk, i de waka ɔ i de mek sawnd lɛk dɔks, wi gɛt gud rizin fɔ biliv se da tin de na dɔks.” Wetin i bin de tray fɔ se? “Wi nɔ fɔ ovaluk dizayn jɔs bikɔs i klia.”
Injinia we de mek plen wiŋ we sef ɛn we de wok fayn fit fɔ gɛt prez fɔ di tin we i mek. Semweso, pɔsin we mek bandej we dɛn de yuz fɔ difrɛn tin dɛn ɔ pɔsin we mek matirial we kɔnfɔtebul fɔ wɛr as klos ɔ pɔsin we mek motoka we de wok fayn, fit fɔ gɛt prez fɔ wetin i du. Infakt, dɛn de si pɔsin as kriminal if i falamakata ɔda pɔsin in dizayn, bɔt i nɔ gri fɔ gi di prez to di pɔsin we gɛt di dizayn.
So yu tink se i mek sɛns fɔ lɛ masta sabi bukman dɛn falamakata tin dɛn na nechɔ fɔ sɔlv dɛn injinia prɔblɛm dɛn ɛn tɔk se dɛn tin dɛn de we dɛn kɔpi frɔm kɔmɔt frɔm ɛvolushɔn? If di tin we dɛn falamakata fɔ mek nid pɔsin we gɛt sɛns fɔ mek am, yu nɔ tink se di wan we mek di orijinal wan insɛf gɛt sɛns? Udat yu tink se rili fit fɔ gɛt mɔ prez, di wan we mek di orijinal dizayn ɔ di studɛnt we falamakata in dizayn?
Wetin Na di Kɔrɛkt Tin we Wi fɔ Biliv?
Afta we bɔku pipul dɛn dɔn tek tɛm stɔdi di dizayn dɛn we de pan nechɔ, dɛn dɔn tɔk wetin wan pan di man dɛn we rayt di Sam buk bin tɔk we i se: “PAPA GƆD [“Jiova,” NWT] yu de du bɔku tin! Bikɔs yu gɛt sɛns yu mek ɔltin, ɔl wetin de na [di] wɔl, na yu mek am.” (Sam 104:24) Pɔl we na wan pan di man dɛn we bin rayt di Baybul bin tɔk dis sem kayn tin. I bin se: “Frɔm we Gɔd mek di wɔl, mɔtalman dɔn de no Gɔd in kwaliti dɛn klia klia wan, pan ɔl we dɛn nɔ de si dɛn, lɛk in pawa we go de sote go ɛn tin dɛn we de sho se in na Gɔd.”—Romans 1:19, 20.
Bɔt bɔku pipul dɛn we rɛspɛkt di Baybul ɛn we biliv Gɔd kin agyu se sɔntɛm Gɔd bin yuz ɛvolushɔn fɔ mek di wɔndaful tin dɛn na di wɔl. Bɔt wetin di Baybul tich?
[Impɔtant pat na di atikul]
Usay di bɔku aydia dɛn we de na nechɔ kɔmɔt?
[Impɔtant pat na di atikul]
Udat na di petɛnt olda fɔ nechɔ?
[Bɔks]
Gɛko in fut nɔ de dɔti, ɛn i nɔ de lɛf mak, i kin stik pan ɛnitin pas Tɛflɔn. I de ebul fɔ stik in fut pan sɔntin izi wan ɛn pul am. Masta sabi bukman dɛn de tray fɔ kɔpi dat.
[Bɔks]
ANIMAL DƐN WE GƐT SƐNS AS DƐN DE TRAVUL
Bɔku animal dɛn de we “gɛt sɛns bad” as dɛn de travul na di wɔl. (Prɔvabs 30:24, 25) Lɛ wi tɔk bɔt tu ɛgzampul dɛn.
◼ Aw Anch dɛn Kin Sabi Dɛn Os? Aw anch dɛn we de waka waka fɔ fɛn it, kin sabi di rod fɔ go bak na dɛn os? Masta sabi bukman dɛn na Ingland dɔn faynd awt se apat frɔm we anch dɛn de lɛf sɛnt fɔ mak di rod, sɔm anch dɛn kin yuz jɔmɛtri fɔ bil rod dɛn we de mek dɛn ebul fɔ sabi dɛn os izi wan. Fɔ ɛgzampul, wan atikul we nem New Scientist se di Fɛro anch dɛn “kin mek rod dɛn we de kɔmɔt na dɛn os dɛn we de divayd.” Wetin rili fayn bɔt dis patan? We wan anch de go bak na in os, ɛn i rich na di say we di rod divayd, i de ebul fɔ no usay fɔ pas fɔ ebul fɔ rich na in os. Di atikul tɔk bak se “di we aw dɛn de mek di rod dɛn de mek am izi fɔ lɛ di anch dɛn no usay fɔ go mɔ we dɛn de waka na tu difrɛn rod dɛn, ɛn i de mek wan anch nɔ west bɔku ɛnaji bay we i go na di rɔng rod.”
◼ Bɔd dɛn Sabi Aw fɔ Travul Bɔku bɔd dɛn sabi aw fɔ travul kɔrɛkt wan fɔ go fa fa say ɛn pan ɔl kayn wɛda. Aw dɛn kin du dis? Masta sabi bukman dɛn dɔn faynd awt se di bɔd dɛn ebul fɔ sabi usay di magnɛtik fil dɛn de na di wɔl. Akɔdin to di atikul we nem Science, i tɔk se: “di wɔl in magnɛtik fil dɛn kin chenj frɔm ples to ples ɛn nɔto ɔltɛm i de sho usay na di nɔt.” Wetin kin mek bɔd dɛn we de travul nɔ go na di rɔng ples? I tan lɛk se ɛni ivintɛm we di san de sɛt, di bɔd dɛn de ajɔst di kɔmpas we de na dɛn bɔdi. Bikɔs di tɛm we di san de go dɔŋ kin chenj chenj insay di ia, masta sabi bukman dɛn tink se dɛn bɔd dɛn ya kin ebul fɔ no we dɛn chenj dɛn ya kin apin, ɛn akɔdin to di atikul we nem Science, “na dis de tɛl dɛn di tɛm insay di ia.”
Udat tich di anch dɛn aw fɔ sabi dɛn os-rod? Udat mek di bɔd dɛn gɛt sɔntin lɛk kɔmpas insay dɛn bɔdi we de tich dɛn di tɛm insay di ia ɛn gi dɛn bren we de mek dɛn ebul fɔ du di wok we dɛn instrumɛnt dɛn ya de du? Yu tink se na ɛvolushɔn we nɔ mek sɛns Ɔ pɔsin de we gɛt sɛns we mek dɛn?
[Layn We de Sho Usay di [Drɔin, Graf, Pikchɔ ɔ Chat] Kɔmɔt]
© E.J.H. Robinson 2004