WETIN PIPUL DƐN SE?

Sɔm pipul dɛn de si gambul as we fɔ ɛnjɔy dɛnsɛf we nɔ bad, as lɔng as dɛn du am ligal wan. Sɔm we dɛn fɔ ple gambul we ligal, na lɛk di loto we gɔvmɛnt kin spɔnsɔ fɔ gɛt mɔni fɔ program dɛn we de bɛnifit di pɔblik.

WETIN DI BAYBUL SE?

Di Baybul nɔ tɔk ɛni patikyula tin bɔt gambul. Bɔt i gi sɔm prinsipul dɛn we de gayd wi we de sho aw Gɔd de fil bɔt gambul.

Di men rizin we de mek pipul dɛn de ple gambul we na fɔ win ɔda pipul dɛn mɔni de agens di wɔnin we di Baybul gi we i se “una opin una yay ɛn tek tɛm mek una nɔ want ɔltin fɔ unasɛf.” (Lyuk 12:​15) Infakt, di men rizin we de mek pipul dɛn ple gambul na fɔ gɛt ɔltin fɔ dɛnsɛf. Ɔganayzeshɔn dɛn we de fɔ ple gambul kin advatayz se pipul dɛn go win bɔku mɔni, bɔt dɛn nɔ go tɔk se pipul dɛn go lɔs bikɔs dɛn no se pipul dɛn want fɔ jɛntri ɛn dat kin mek dɛn put bɔku mɔni we dɛn de ple gambul. Gambul nɔ de ɛp pipul dɛn fɔ avɔyd fɔ want ɔltin fɔ dɛnsɛf, bifo dat, i de mek dɛn want fɔ gɛt izi mɔni.

Pipul dɛn we de ple gambul jɔs bisin bɔt dɛnsɛf ɛn na wangren gol dɛn gɛt, dat na, fɔ win mɔni we ɔda plea dɛn de lɔs. Bɔt di Baybul ɛnkɔrej pɔsin fɔ “tray fɔ du tin we go bɛnifit ɔda pɔsin, nɔto wetin go bɛnifit am.” (1 Kɔrintians 10:​24) Ɛn wan pan di Tɛn Kɔmandmɛnt dɛn se: ‘Una nɔ fɔ milɛ ɛnitin we una kɔmpin gɛt.’ (Ɛksodɔs 20:​17) We pɔsin we de ple gambul mekɔp in maynd fɔ win, i de op se ɔda pipul dɛn go lɔs dɛn mɔni so dat in go mek prɔfit.

Di Baybul wɔn bi bak fɔ avɔyd fɔ de si lɔk as spɛshal sɔntin we gɛt fɔ du wit juju biznɛs we go mek pɔsin gɛt blɛsin. Na Izrɛl, sɔm pipul dɛn bin de we nɔ bin gɛt fet pan Gɔd ɛn dɛn bin bigin fɔ “prɛd tabul fɔ di gɔd we na Gud Lɔk.” Gɔd bin gladi bɔt di we aw dɛn abop pan di “gɔd we na Gud Lɔk?” Nɔ, i bin tɛl dɛn se: “Una du bad bad tin dɛn na mi yay, ɛn pik fɔ du tin dɛn we a nɔ go gladi fɔ.”​—Ayzaya 65:​11, NWT, 12.

Na tru se na sɔm pat dɛn na di wɔl, dɛn de yuz di mɔni we dɛn de gɛt fɔ ple gambul ligal wan fɔ pe fɔ buk lanin, fɔ mek di kɔntri, ɛn fɔ ɔda pɔblik program dɛn. Bɔt di yuz we dɛn de yuz da mɔni de nɔ chenj di we aw dɛn de gɛt am, dat na, dɛn nɔ de fred fɔ ɛnkɔrej pipul dɛn fɔ want ɔltin fɔ dɛnsɛf ɛn fɔ bisin bɔt dɛnsɛf ɛn fɔ sɔpɔt di aydia fɔ se pɔsin kin gɛt sɔntin fɔ natin.

‘Una nɔ fɔ milɛ ɛnitin we una kɔmpin gɛt.’​—Ɛksodɔs 20:17.

WETIN DI BAYBUL SE?

Di Baybul wɔn wi se: “Di wan dɛn we dɔn rili mekɔp dɛn maynd fɔ jɛntri, nɔ go ebul kɔntrol dɛnsɛf we sɔntin tɛmt dɛn ɛn dɛn go fɔdɔm insay trap, ɛn du bɔku tin dɛn we nɔ gud ɛn we nɔ mek wan sɛns, ɛn na dɛn tin ya de damej pɔsin bad ɛn mek i day.” (1 Timoti 6:​9) We pɔsin want ɔltin fɔ insɛf, na dat de mek i ple gambul. Fɔ lɛ pɔsin want ɔltin fɔ insɛf rili bad dat di Baybul list am wit ɔda bad bad tin dɛn we wi fɔ avɔyd.​—Ɛfishians 5:​3.

Bikɔs gambul de mek pɔsin want fɔ gɛt mɔni izi wan, na dat mek i de ɛnkɔrej pipul dɛn fɔ lɛk mɔni. Ɛn di Baybul se na dat de “kam wit ɔlkayn bad tin.” We pɔsin want mɔni, dat de mek i izi fɔ lɛ mɔni kɔntrol in layf ɛn dat de mek i wɔri pasmak ɛn ambɔg in fet pan Gɔd. Di Baybul tɔk bɔt di wan dɛn we lɛk mɔni se “dɛn dɔn gi dɛnsɛf pen ɔlsay na dɛn bɔdi.”—1 Timoti 6:​10.

We pɔsin want ɔltin fɔ insɛf, dat de mek i nɔ satisfay wit wetin i gɛt ɛn ivin di mɔni sɛf we i gɛt nɔ de du fɔ am ɛn dat de mek i nɔ gladi. Di Baybul se: “Pɔsin we lɛk silva nɔ de ɛva satisfay wit silva, ɛn pɔsin we lɛk jɛntri nɔ de satisfay wit di mɔni we i de gɛt.”—Ɛkliziastis 5:​10, NWT.

Bɔku bɔku pipul dɛn we dɔn bigin fɔ ple gambul dɔn si se i nɔ izi fɔ lɛ dɛn lɛf di abit fɔ ple gambul. Di prɔblɛm de ɔlsay. Akɔdin to wan ripɔt, insay Amɛrika nɔmɔ, bɔku bɔku pipul dɛn dɔn yus fɔ de ple gambul.

Wan parebul we de na di Baybul tɔk se: “Ɛni prɔpati ɔ jɛntri we yu gɛt bay kruk . . . nɔ de bɛtɛ yu tumara.” (Prɔvabs 20:​21) Di wan dɛn we de si se i nɔ izi fɔ lɛ dɛn lɛf fɔ ple gambul dɔn gɛt bɔku dɛt ɛn ivin lɔs ɔl dɛn mɔni. I dɔn mek dɛn lɔs dɛn wok, dɛn mared-os dɔn skata, ɛn dɛn dɔn ivin lɔs dɛn padi dɛn. If pɔsin alaw Baybul prinsipul dɛn fɔ gayd am, dat go ɛp am fɔ avɔyd di bad tin dɛn we de apin to di wan dɛn we de ple gambul ɛn i go gɛt gladi-at.

“Di wan dɛn we dɔn rili mekɔp dɛn maynd fɔ jɛntri, nɔ go ebul kɔntrol dɛnsɛf we sɔntin tɛmt dɛn ɛn dɛn go fɔdɔm insay trap, ɛn du bɔku tin dɛn we nɔ gud ɛn we nɔ mek wan sɛns, ɛn na dɛn tin ya de damej pɔsin bad ɛn mek i day.”​—1 Timoti 6:​9.