Yu Nid di Baybul fɔ Tɛl Yu Wetin fɔ Du pan Ɔltin?

WE YU bin smɔl, i go bi se yu mama ɛn papa bin de gi yu bɔku lɔ dɛn. As yu de big, yu kam fɔ ɔndastand se dɛn bin de gi yu dɛn lɔ dɛn de bikɔs dɛn lɛk yu. Ivin we yu dɔn big so, sɔntɛm yu stil de fala sɔm pan di prinsipul dɛn we yu mama ɛn papa bin tich yu pan ɔl we yu nɔ de ɔnda dɛn igen.

Wi Papa we de na ɛvin, we na Jiova, insɛf dɔn gi wi bɔku lɔ dɛn insay in Wɔd, di Baybul. Fɔ ɛgzampul, i se wi nɔ fɔ wɔship aydɔl, wi nɔ fɔ du mami ɛn dadi biznɛs di we aw i nɔ want, maredman ɔ mareduman nɔ fɔ du mami ɛn dadi biznɛs wit pɔsin we i nɔ mared to, ɛn wi nɔ fɔ tif. (Ɛksodɔs 20:​1-​17; Akt 15:​28, 29) As wi de “machɔ pan ɔltin” we i kam pan wi padi biznɛs wit Gɔd, wi de kam fɔ ɔndastand se Jiova want di bɛst fɔ wi ɛn i nɔ gi wi lɔ dɛn fɔ mek i tayt wi.​—Ɛfishians 4:​15; Ayzaya 48:​17, 18; 54:​13.

Bɔt bɔku tin dɛn de we kin apin we wi nɔ gɛt no dayrɛkt lɔ bɔt wetin fɔ du. So sɔm pipul dɛn kin fil se if dayrɛkt lɔ nɔ de na di Baybul, dɛn fri fɔ du ɛnitin we dɛn want. Dɛn kin se if Gɔd bin tink se dat na sɔntin we impɔtant, i fɔ dɔn gi wi dayrɛkt lɔ bɔt wetin fɔ du.

Di wan dɛn we kin tink dis we kin disayd fɔ du tin dɛn we nɔ mek sɛns ɛn leta, dɛn kin rigrɛt am bad bad wan. Dɛn nɔ kin si se nɔto lɔ nɔmɔ de insay di Baybul bɔt i gɛt tin dɛn bak we de sho di we aw Gɔd de tink. As wi de stɔdi di Baybul ɛn kam fɔ no di we aw Jiova de si tin, wi de gɛt kɔnshɛns we di Baybul tren ɛn dat de ɛp wi fɔ disayd fɔ du tin dɛn we gri wit di we aw I de tink. We wi du dat, wi de mek Jiova gladi ɛn wi de gɛt bɔku bɛnifit dɛn bikɔs wi disayd fɔ du di rayt tin.​—Ɛfishians 5:​1.

Fayn Ɛgzampul dɛn na di Baybul

We wi rid sɔm stori dɛn na di Baybul bɔt Gɔd in savant dɛn we bin de trade, wi de lan bɔt sɔm tin dɛn we bin apin we dɛn bin mɛmba di we aw Jiova de tink pan ɔl we dɛn nɔ bin gɛt dayrɛkt lɔ bɔt wetin fɔ du. Lɛ wi tɔk bɔt Josɛf in ɛgzampul. Di tɛm we Pɔtifa in wɛf bin de fos Josɛf fɔ du mami ɛn dadi biznɛs wit am, Gɔd nɔ bin dɔn gi ɛni lɔ we se i bad fɔ du mami ɛn dadi biznɛs wit pɔsin we yu nɔ mared to. Bɔt pan ɔl we dayrɛkt lɔ nɔ bin de bɔt wetin fɔ du, Josɛf bin no se mami ɛn dadi biznɛs wit pɔsin we yu nɔ mared to na sin agens in kɔnshɛns ɛn na “sin to PAPA GƆD.” (Jɛnɛsis 39:​9) So Josɛf bin no se fɔ du mami ɛn dadi biznɛs wit pɔsin we yu nɔ mared to nɔ gri wit di we aw Gɔd de tink ɛn wetin I want, akɔdin to wetin I bin tɔk na Idɛn.​—Jɛnɛsis 2:​24.

Lɛ wi tɔk bɔt wan ɔda ɛgzampul. Insay Akt 16:​3, wi lan se bifo Pɔl kɛr Timoti fɔ mek dɛn stat dɛn mishɔnari wok, Pɔl bin sakɔmsayz Timoti. Bɔt insay vas 4, wi rid se Pɔl ɛn Timoti bin travul afta dat fɔ go na difrɛn siti dɛn fɔ “tɛl di brɔda dɛn di tin dɛn we di apɔsul dɛn ɛn di ɛlda dɛn na Jerusɛlɛm dɔn disayd.” Wan pan di tin dɛn we dɛn tɛl dɛn na dat Kristian dɛn nɔ de ɔnda di lɔ igen we se dɛn fɔ sakɔmsayz! (Akt 15:​5, 6, 28, 29) Wetin mek Pɔl bin tink se i impɔtant fɔ mek i sakɔmsayz Timoti? Na “bikɔs ɔf di Ju dɛn we bin de na dɛn ples dɛn de; dɛn ɔl bin no se [Timoti] in papa na Grik.” Pɔl nɔ bin want fɔ du ɛnitin we go ambɔg ɔda pipul dɛn fet. Di tin we i bin bisin bɔt mɔ na fɔ mek Kristian dɛn kɔntinyu fɔ sho se dɛn de “du wetin rayt bifo Gɔd to ɔlman in kɔnshɛns.”​—2 Kɔrintians 4:​2; 1 Kɔrintians 9:​19-​23.

Na dis kayn we Pɔl ɛn Timoti bin de tink ɔltɛm. Rid skripchɔ dɛn lɛk Romans 14:​15, 20, 21 ɛn 1 Kɔrintians 8:​9-​13; 10:​23-​33, ɛn si aw Pɔl bin rili bisin bɔt ɔda pipul dɛn padi biznɛs wit Gɔd, mɔ we i kam to pipul dɛn we go fil bad fɔ sɔntin we nɔ rili rɔng. Ɛn Pɔl bin rayt bɔt Timoti se: “A nɔ gɛt ɛnibɔdi we tan lɛk am we go rili kia fɔ una. Ɔl di ɔda wan dɛn de du wetin dɛn want, dɛn nɔ de du wetin Jizɔs Krays want. Bɔt una no di fayn ɛgzampul we i dɔn sɛt, jɔs lɛk pikin wit in papa, i dɔn wok lɛk slev wit mi fɔ kɛr di gud nyuz go bifo.” (Filipians 2:​20-​22) Na fayn ɛgzampul dɛn tu Kristian man dɛn ya sɛt fɔ wi tide! Dɛn nɔ bin jɔs de tink bɔt wetin go bɛnifit dɛn ɔ wetin dɛn want we no dayrɛkt lɔ nɔ de bɔt wetin fɔ du sɔntin, dɛn bin de falamakata di we aw Jiova ɛn Jizɔs de sho lɔv bay we dɛn bin de tink bɔt aw di tin dɛn we dɛn de disayd fɔ du de afɛkt ɔda pipul dɛn padi biznɛs wit Gɔd.

Lɛ wi tɔk bɔt Jizɔs Krays we na wi men ɛgzampul. Di tɛm we i bin de tich ɔp wan mawntin, i bin ɛksplen klia wan se pɔsin we ɔndastand di rizin we mek Gɔd gi wi lɔ dɛn go obe dɛn lɔ dɛn de ilɛksɛf di lɔ nɔ tɛl wi dayrɛkt wan bɔt wetin fɔ du ɔ wetin nɔ fɔ du. (Matyu 5:​21, 22, 27, 28) Jizɔs, Pɔl, Timoti, ɔ Josɛf nɔ bin ɛva tink se if Gɔd nɔ gi wi dayrɛkt lɔ bɔt sɔntin, wi fri fɔ du ɛnitin we wi want. Dɛn man dɛn ya bin de fala di we aw Gɔd de tink ɛn dɛn bin de liv dɛn layf akɔdin to wetin Jizɔs bin tɔk bɔt di tu lɔ dɛn we impɔtant pas ɔl dat na fɔ lɛk Gɔd ɛn fɔ lɛk wi neba.​—Matyu 22:​36-​40.

Wetin Wi Go Se bɔt Kristian dɛn We De Tide?

I klia fɔ se wi nɔ fɔ si di Baybul as ligal dɔkyumɛnt we fɔ tɛl wi klia wan wetin fɔ du. Wi de mek Jiova rili gladi we wi disayd fɔ du tin dɛn we gri wit di we aw i de tink pan ɔl we no dayrɛkt lɔ nɔ de fɔ tɛl wi wetin fɔ du. Dat mi se wi nɔ de wet ɔltɛm fɔ mek Gɔd tɛl wi wetin fɔ du, bifo dat, wi de tray fɔ ‘ɔndastand wetin Jiova want.’ (Ɛfishians 5:​17; Romans 12:​2) Wetin mek dis de mek Jiova gladi? Na bikɔs i de sho se di tin we wi bisin bɔt mɔ na fɔ mek Jiova gladi nɔto bɔt di tin dɛn we wi want ɛn di tin dɛn we wi gɛt rayt fɔ du. I de sho bak se wi rili gladi fɔ in lɔv ɛn wi want fɔ falamakata am ɛn na da lɔv de, de mek wi du sɔntin. (Prɔvabs 23:​15; 27:​11) Apat frɔm dat, we wi du tin dɛn bikɔs ɔf wetin wi dɔn lan frɔm di Skripchɔ dɛn dat de mek wi gɛt tayt padi biznɛs wit Gɔd ɛn bɔku tɛm i de mek wi gɛt wɛlbɔdi.

Lɛ wi si aw wi go aplay dis prinsipul to dɛn we wi gɛt fɔ disayd fɔ wisɛf.

Tin dɛn we Wi De Pik fɔ Ɛnjɔy Wisɛf

Tink bɔt wan yɔŋman we want fɔ bay wan patikyula myuzik albɔm. I rili lɛk wetin i dɔn yɛri frɔm di albɔm, bɔt i de wɔri bikɔs ɔf wetin rayt biɛn di albɔm we sho se di wɔd dɛn we de pan di siŋ dɛn gɛt sɔntin fɔ du wit mami ɛn dadi biznɛs ɛn sɔm ɔda bad bad wɔd dɛn. Dɔn bak, i no se dis atist de siŋ bɔku pan in siŋ dɛn lɛk pɔsin we vɛks. As pɔsin we lɛk Jiova, dis yɔŋman go bisin bɔt di we aw Jiova de tink ɛn di we aw i de fil bɔt dis. Aw i go ɔndastand wetin Gɔd want we i kam pan dis kayn tin?

We apɔsul Pɔl bin rayt lɛta to di Kristian dɛn na Galeshia, i bin tɔk bɔt tin dɛn we di bɔdi want ɛn di kwaliti dɛn we Gɔd in spirit de mek pɔsin gɛt. Sɔntɛm yu no se di kwaliti dɛn we Gɔd in spirit de mek pɔsin gɛt na: lɔv, gladi-at, pis, peshɛnt, i de mek pɔsin du gud, gɛt gudat, fet, tek tɛm du tin, ɛn fɔ ebul kɔntrol insɛf. Bɔt wetin na sɔm tin dɛn we di bɔdi want? Pɔl bin rayt se: “Di tin dɛn we di bɔdi want nɔ at fɔ si, ɛn dɛn tin ya na mami ɛn dadi biznɛs di we aw Gɔd nɔ want, dɔti layf, tin dɛn we de sho se pɔsin nɔ gɛt wan shem ɛn rɛspɛkt, fɔ wɔship aydɔl, fɔ put an pan juju biznɛs, fɔ bi ɛnimi to pɔsin, fɔ mek plaba, fɔ jɛlɔs, fɔ vɛks pasmak, fɔ agyu, fɔ mek wanwɔd nɔ de, fɔ mek grup dɛn we de fala wetin mɔtalman de tich, fɔ milɛ, fɔ chak, wayl pati, ɛn tin dɛn lɛk dɛn wan ya. A de wɔn una bifo tɛm bɔt dɛn tin ya, di sem we aw a bin dɔn ɔlrɛdi wɔn una se, di wan dɛn we de du dɛn tin ya nɔ go gɛt Gɔd in Kiŋdɔm.”​—Galeshians 5:​19-​23.

Yu notis di las wɔd dɛn na di list; “tin dɛn lɛk dɛn wan ya.” Pɔl nɔ bin gi lɔng lɔng list bɔt difrɛn difrɛn tin dɛn we wi fɔ si as tin dɛn we di bɔdi want. I nɔ min se pɔsin fɔ tink se ‘Di Baybul alaw mi fɔ du ɛnitin we Pɔl nɔ tɔk bɔt as tin dɛn we di bɔdi want.’ Bɔt di wan dɛn we de rid go nid fɔ yuz dɛn maynd fɔ no tin dɛn we nɔ go de na di list bɔt we de pat ɔf “tin dɛn lɛk dɛn wan ya.” Di wan dɛn we kɔntinyu fɔ du di tin dɛn we nɔ de na di list bɔt we de pat ɔf “tin dɛn lɛk dɛn wan ya” ɛn we nɔ gri fɔ ripɛnt, nɔ go ɛnjɔy blɛsin dɛn ɔnda Gɔd in Kiŋdɔm.

So wi nid fɔ tray fɔ no wetin Jiova nɔ lɛk. Yu tink se dat na tin we at fɔ du? Fɔ ɛgzampul, if yu dɔktɔ advays yu fɔ it bɔku frut ɛn vɛjitebul dɛn bɔt fɔ avɔyd pay, ayskrim, ɛn tin dɛn lɛk dɛn wan ya, yu tink se i go at fɔ no us list kek fɔ de? Naw luk di kwaliti dɛn we Gɔd in spirit de mek pɔsin gɛt ɛn di tin dɛn we di bɔdi want. Us list yu tink se di myuzik albɔm we wi bin dɔn tɔk bɔt fɔ de? I nɔ fiba di kwaliti dɛn we Gɔd in spirit de mek pɔsin gɛt lɛk lɔv, fɔ du gud, fɔ kɔntrol yusɛf, ɔ di ɔda kwaliti dɛn we gɛt sɔntin fɔ du wit Gɔd in spirit. Pɔsin nɔ go nid dayrɛkt lɔ fɔ no se dis kayn myuzik nɔ gri wit di we aw Gɔd de tink. Dɛn sem prinsipul dɛn de go aplay to tin dɛn we wi de rid, fim dɛn, tɛlivishɔn program dɛn, kɔmpyuta gem dɛn, Wɛbsayt dɛn, ɛn ɔda tin dɛn.

Fayn we fɔ Drɛs

Di Baybul gɛt ɔda prinsipul dɛn bak we gɛt sɔntin fɔ du wit di we aw wi de drɛs ɛn di we aw wi de kia fɔ wisɛf. Dɛn prinsipul dɛn ya de gayd ɛni Kristian fɔ kɔntinyu fɔ drɛs fayn ɛn drɛs di kayn we we go mek ɔda pipul dɛn nɔ fil bad. We i kam bak to di we aw wi de drɛs ɛn di we aw wi de kia fɔ wisɛf, pɔsin we lɛk Jiova de si dis as chans fɔ du wetin go mek in Papa we de na ɛvin gladi, nɔto fɔ du wetin in want. As wi dɔn ɔlrɛdi si, jɔs bikɔs Jiova nɔ gi dayrɛkt lɔ bɔt aw fɔ du sɔm tin dɛn, dat nɔ min se i nɔ bisin bɔt wetin pipul dɛn de du. Pipul dɛn kin drɛs difrɛn we na difrɛn ples dɛn, ɛn ivin na di sem eria sɛf di we aw pipul dɛn de drɛs kin chenj chenj. Bɔt Gɔd dɔn gi in pipul dɛn simpul prinsipul dɛn we fɔ gayd in dɛn ɔltɛm ɛn ilɛk usay dɛn de.

Fɔ ɛgzampul, 1 Timoti 2:​9, 10 se: “Semweso, di uman dɛn fɔ mek dɛnsɛf fayn bay we dɛn drɛs di rayt we, bay we dɛn nɔ de du tin pasmak wan ɛn bay we dɛn du tin wit sɛns; nɔto bay di kayn ia stayl we dɛn de mek ɛn wit gold ɔ pal ɔ wit klos dɛn we dia pasmak, bɔt dɛn fɔ du am di we we uman dɛn we de tɔk se dɛn de wɔship Gɔd wit ɔl dɛn at fɔ du am, dat na, bay we dɛn de du gud tin dɛn.” So Kristian man ɛn uman dɛn fɔ tink bɔt uskayn we pipul dɛn na dɛn eria de ɛkspɛkt pipul dɛn we “se dɛn de wɔship Gɔd” fɔ drɛs. I impɔtant bak fɔ mek Kristian tink bɔt aw di we aw i de drɛs ɛn di we aw i de kia fɔ insɛf go mek ɔda pipul dɛn tink bɔt di mɛsej we i de tɔk bɔt. (2 Kɔrintians 6:​3) Kristian we de sɛt fayn ɛgzampul nɔ go bisin tumɔs bɔt wetin i want ɛn wetin i gɛt rayt fɔ du, bɔt di tin we i go bisin bɔt mɔ na fɔ mek i nɔ mek ɔda pipul dɛn fil bad ɔ du tin we go ambɔg dɛn fet.​—Matyu 18:​6; Filipians 1:​10.

We Kristian faynd awt se di we aw i de drɛs ɔ di we aw i de kia fɔ insɛf de ambɔg ɔda pipul dɛn, i fɔ falamakata apɔsul Pɔl bay we i bisin mɔ bɔt ɔda pipul dɛn padi biznɛs wit Gɔd pas di we aw i bisin bɔt wetin in want. Pɔl bin se: “Una falamakata mi, jɔs lɛk aw a de falamakata Krays.” (1 Kɔrintians 11:​1) Ɛn Pɔl bin rayt bɔt Jizɔs se: “Ivin di Krays nɔ bin de du wetin in want.” Di tin we Pɔl bin de tɛl ɔl Kristian dɛn rili klia, i bin se: “Wi we strɔng fɔ ɛp di wan dɛn we nɔ strɔng fɔ bia wit di tin dɛn we de mɔna dɛn, ɛn wi nɔ fɔ de du wetin wi want nɔmɔ. Lɛ wi ɔl du wetin gud to wi neba, so dat wi go ɛp am fɔ tinap tranga wan.”​—Romans 15:​1-3.

Du Tin dɛn fɔ Tren Yu Maynd

Aw wi go ebul fɔ tren wi maynd fɔ no aw wi go ebul fɔ du tin we go mek Jiova gladi ilɛksɛf i nɔ gi wi dayrɛkt lɔ bɔt sɔntin? If wi rid in Wɔd ɛvride, stɔdi am ɔltɛm, ɛn tink gud wan bɔt wetin wi de rid, wi go notis se di we aw wi de tink go impruv. Da kayn tin de nɔ go apin wantɛm wantɛm. Jɔs lɛk aw pikin nɔ de gro wantɛm wantɛm, na so di we aw wi de tink nɔ go impruv wantɛm wantɛm. Wi nɔ fɔ fil bad if wi notis se wi nɔ de impruv kwik kwik wan bifo dat, wi fɔ peshɛnt. Apat frɔm dat, jɔs bikɔs tɛm dɔn pas nɔ min se di we aw wi de tink dɔn impruv. As tɛm de go, wi go nid fɔ de stɔdi Gɔd in Wɔd ɔltɛm, ɛn aplay wetin wi de lan na wi layf ɛvride.​—Ibruz 5:​14.

Dɛn kin se Gɔd in lɔ dɛn de tɛst aw wi de obe am, bɔt in prinsipul dɛn de tɛst aw tayt wi padi biznɛs bi wit am ɛn di we aw wi want fɔ mek i gladi. As wi de go bifo pan Gɔd biznɛs, di tin we wi go bisin bɔt mɔ na fɔ falamakata Jiova ɛn in Pikin. Wi go rili want fɔ disayd fɔ du tin dɛn we gri wit di we aw Gɔd de tink bɔt tin dɛn we de insay di Skripchɔ dɛn. As wi de du tin dɛn we de mek wi Papa we de na ɛvin gladi, wi go faynd awt se wisɛf de gɛt mɔ gladi-at.

 [Pikchɔ]

Pipul dɛn kin drɛs difrɛn we na difrɛn ples dɛn, bɔt Baybul prinsipul dɛn fɔ gayd wetin wi de pik fɔ wɛr