1. Wetin mek fet impɔtant? (Luk di pikchɔ nia dis atikul in taytul.)

YU DƆN ɛva tink ɛn aks yusɛf dis kwɛstyɔn, ‘Mi na di kayn pɔsin we Jiova go want fɔ sev di tɛm we da big trɔbul go bigin ɛn briŋ mi insay di nyu wɔl?’ Bɔt fɔ lɛ wi go sev, wi nid fɔ du ɔda tin dɛn. Di apɔsul Pɔl bin tɛl wi bɔt wan tin we rili impɔtant we wi fɔ gɛt. I bin se: “If pɔsin nɔ gɛt fet i nɔ go ebul fɔ du wetin Gɔd want fayn fayn wan.” (Ibru 11:6) Sɔntɛm, wi go de tink se dis na izi tin, bɔt di tru tin na dat “fet nɔto sɔntin we ɔlman gɛt.” (2 Tɛsa. 3:2) Dɛn vas ya de ɛp wi fɔ ɔndastand se fɔ gɛt strɔng fet na sɔntin we rili impɔtant.

2, 3. (a) Aw Pita ɛp wi fɔ no se i rili impɔtant fɔ gɛt fet? (b) Us kwɛstyɔn dɛn wi de kam tɔk bɔt naw?

² Di apɔsul Pita ɛp wi fɔ no wetin mek fet rili impɔtant we i tɔk bɔt “fet we dɛn dɔn tɛst” we “go briŋ prez, glori ɛn ɔnɔ di tɛm we Jizɔs Krays go kam.” (Rid Pita In Fɔs Lɛta 1:7.) Bikɔs da big trɔbul dɔn de nia, wi nɔ go want fɔ mek shɔ se wi gɛt di kayn fet we go mek wi de wit di wan dɛn we dɛn fet go mek wi wɔndaful Kiŋ prez dɛn di tɛm we i go kam? Fɔ tru, wi want fɔ bi “di kayn pɔsin we gɛt fet we go mek wi sev wi layf.” (Ibru 10:39) Bikɔs wi dɔn plan fɔ du dis, wi go  beg Gɔd lɛk di man we se: “Ɛp mi usay a nid fɔ gɛt fet!” (Mak 9:24) Ɔ sɔntɛm wi go tɔk di sem tin we Jizɔs in apɔsul dɛn bin tɔk, we dɛn se: “Gi wi mɔ fet.”—Lyuk 17:5.

³ Bikɔs wi nid mɔ fet, i kin mek wi aks sɔm kwɛstyɔn dɛn. Aw wi kin ebul fɔ gɛt dis kwaliti? Aw wi go sho se wi gɛt fet? Wetin mek wi biliv se we wi pre to Gɔd fɔ mɔ fet, i go ansa wi?

4. Udat dɛn ɛgzampul go ɛp wi fɔ gɛt mɔ fet?

⁴ Ɛnti “ɔl di tin dɛn we dɛn bin dɔn rayt, dɛn bin rayt am fɔ sho wi wetin fɔ du,” dis min se wi kin lan bɔku lɛsin dɛn frɔm pipul dɛn na di Baybul we bin gɛt fet. (Rom 15:4) We wi rid bɔt pipul dɛn lɛk Ebraam, Sera, Ayzak, Jekɔb, Mozis, Reab, Gidyɔn, Berak, ɛn bɔku ɔda wan dɛn, wetin dɛn rayt bɔt dɛn go ɛp wi fɔ chɛk wi fet. (Ibru 11:32-35) Apat frɔm dat, we wi rid bɔt brɔda ɛn sista dɛn insay wi yon tɛm we dɔn sho se dɛn rili gɛt fet, dis kin ɛp wi fɔ tray tranga wan fɔ gɛt mɔ fet. *

5. Aw Ilayja sho se i rili gɛt fet pan Jiova? Wetin in ɛgzampul ɛp wi fɔ tink bɔt?

⁵ Wan ɛgzampul frɔm di Baybul na di prɔfɛt Ilayja. Tray fɔ imajin di tin dɛn we bin apin we sho se i bin rili abop pan Jiova. We Ilayja bin de tɛl Kiŋ Eab se Jiova go mek ren nɔ kam, i bin rili biliv dis, so i tɔk se: “As lɔng as Jiova . . . de alayf, . . . no dyu ɔ ren nɔ go kam pas a tɔk am!” (1 Kiŋ 17:1) Ilayja bin biliv se Jiova go kɔntinyu fɔ gi am wetin i nid ɛn i go gi ɔda pipul dɛn bak wetin dɛn nid te di ren kam bak. (1 Kiŋ 17:4, 5, 13, 14) Ilayja bin biliv se Jiova go gi layf bak to wan smɔl pikin we bin dɔn day. (1 Kiŋ 17:21) Na Mawnt Kamɛl, Ilayja nɔ bin gɛt wan dawt se Jiova go sɛn faya fɔ bɔn in sakrifays. (1 Kiŋ 18:24, 37) We Jiova in tɛm rich fɔ lɛ ren kam bak, ivin bifo Ilayja si ɛni sayn we de sho se ren go kam, i tɛl Eab se: “Go ɔp, it ɛn drink, bikɔs a yɛri sawnd lɛk we ebi ebi ren want kam.” (1 Kiŋ 18:41) Yu nɔ tink se Ilayja in ɛgzampul fɔ mek wi chɛk wisɛf if wi fet strɔng?

6. Wetin wi nid frɔm Jiova fɔ lɛ wi gɛt mɔ fet?

⁶ If i lɛf to wi nɔmɔ, wi nɔ go ebul fɔ gɛt fet. Fet na wan pan di kwaliti dɛn we Gɔd in oli spirit de gi. (Gal. 5:22) So, i go rili mek sɛns fɔ fala Jizɔs in advays we i se wi fɔ pre fɔ lɛ wi gɛt da spirit de bikɔs Jizɔs bin se di Papa go “gi oli spirit to di wan dɛn we de aks am.”—Lyuk 11:13.

7. Gi wan ɛgzampul fɔ sho aw wi go kɔntinyu fɔ gɛt mɔ fet.

⁷ We wi dɔn gɛt fet, wi fɔ mek sho se wi kɔntinyu fɔ du tin dɛn we go mek wi gɛt mɔ fet. Wi go kɔmpia wi fet to faya we gɛt wud. We di faya jɔs bigin fɔ kech, i kin blez ɛn wam bad bad wan. Bɔt, if wi jɔs lɛf di faya lɛk dat, i go de ɔt smɔl smɔl te i tɔn to wam chakol. Ɛn if wi stil nɔ du natin to di faya, i go tɔn to kol ashis. Bɔt if yu kɔntinyu fɔ put mɔ wud na di faya, di faya go kɔntinyu fɔ kech. Semweso, wi go kɔntinyu fɔ gɛt mɔ fet  if wi de rid Gɔd in Wɔd ɔltɛm. We wi de stɔdi di Baybul ɔltɛm, wi go rili lɛk di Baybul ɛn wi go lɛk Jiova we na in gi wi di Baybul, ɛn dat go ɛp wi fɔ gɛt mɔ fet.

8. Wetin go ɛp yu fɔ kɔntinyu fɔ gɛt mɔ fet?

⁸ Wetin bak yu go du fɔ lɛ yu kɔntinyu fɔ gɛt mɔ fet? Yu nɔ fɔ jɔs satisfay wit di tin dɛn we yu dɔn lan bifo yu baptayz. (Ibru 6:1, 2) Lan bɔt di tin dɛn we de na di Baybul we Gɔd bin dɔn tɔk se go apin we dɔn ɔlrɛdi apin bikɔs dat go gi yu gud rizin fɔ gɛt mɔ fet. Yu kin yuz Gɔd in Wɔd bak fɔ chɛk yusɛf fɔ si if yu de du di tin dɛn we di wan dɛn we gɛt strɔng fet de du.—Rid Jems 1:25; 2:24, 26.

9, 10. Aw dɛn tin ya go ɛp wi fɔ gɛt fet: (a) gud padi? (b) wi mitin dɛn? (c) fil savis?

⁹ Di apɔsul Pɔl bin tɛl in kɔmpin Kristian dɛn se “wi go ɛnkɔrej wisɛf, wit di fet we wi gɛt.” (Rom 1:12) As wi de spɛn tɛm wit di wan dɛn we wi ɔl de wɔship Jiova, wi kin ɛp wisɛf fɔ gɛt mɔ fet, mɔ we wi de wit di wan dɛn we dɔn ɔlrɛdi gɛt dis “fet we dɛn dɔn tɛst.” (Jems 1:3) Bad padi dɛn kin ambɔg di fet we wi gɛt, bɔt gud padi dɛn kin ɛp wi fɔ gɛt mɔ fet. (1 Kɔr. 15:33) Dis na wan rizin we mek di Baybul advays wi se “lɛ wi nɔ lɛf fɔ de mit togɛda,” bɔt lɛ wi kɔntinyu fɔ “ɛnkɔrej wisɛf.” (Rid Di Ibru Pipul Dɛn 10:24, 25.) Wan ɔda rizin na dat di tin dɛn we wi kin lan na mitin kin ɛp wi fɔ gɛt mɔ fet. Na dat mek Pɔl bin tɔk se: “Di tin dɛn we wi de yɛri, de mek wi gɛt fet.” (Rom 10:17) So i go fayn fɔ aks yusɛf dis kwɛstyɔn, A kin go na mitin ɔltɛm?

¹⁰ We wi de go fil savis, wi nɔ jɔs de ɛp ɔda pipul dɛn fɔ gɛt mɔ fet, bɔt wisɛf yon fet de gro. Jɔs lɛk di Kristian dɛn we bin de trade, na so wisɛf de lan fɔ put fet pan Jiova mɔ ɛn mɔ ɛn wi nɔ go fred fɔ tɔk bɔt am ɛnisay we wi de.—Akt 4:17-20; 13:46.

11. Wetin bin mek Kelɛb ɛn Jɔshwa gɛt strɔng fet? Aw wisɛf go bi lɛk dɛn?

¹¹ We wi no aw Jiova de ɛp wi na layf ɛn aw i de ansa wi prea dɛn, dis kin mek wi gɛt mɔ fet. Na so i bin bi fɔ Kelɛb ɛn Jɔshwa. Dɛn bin sho se dɛn gɛt fet pan Jiova we dɛn bin go fɔ go wach di land we Jiova bin dɔn prɔmis fɔ gi dɛn. Bɔt as dɛn de si aw Jiova de sho dɛn wetin fɔ du afta dat, dis bin mek dɛn gɛt mɔ fet. Na dat mek Jɔshwa bin tɛl di Izrɛlayt dɛn se: “Pan ɔl di gud tin dɛn we Jiova we na una Gɔd dɔn prɔmis una, nɔn pan dɛn nɔ fel.” I leta tɔk se: “Una fɔ fred Jiova ɛn una nɔ fɔ gɛt wan bɔt we una de sav am . . . Bɔt as fɔ mi ɛn ɔlman we de na mi os, wi go sav Jiova.” (Jɔsh. 23:14; 24:14, 15) As wi si di gud tin dɛn we Jiova de du fɔ wi, na so wisɛf go biliv am mɔ ɛn mɔ.—Sam 34:8.

12. Aw wi go sho se wi fet de wok gud gud wan?

¹² Aw wi go sho se wi fet de wok gud gud wan? Di disaypul Jems ansa dis kwɛstyɔn fɔ wi, we i se: “A go sho yu mi fet bay di wok dɛn we a de du.” (Jems 2:18) Di tin dɛn we wi de du go sho if wi rili gɛt fet. Lɛ wi si sɔm ɛgzampul dɛn.

13. Aw wi go sho se wi gɛt fet we wi de prich?

¹³ Di bɛst we we wi go sho se wi gɛt fet na we wi de prich di gud nyus. Wetin  mek wi se so? Na bikɔs we wi de prich, wi de sho se wi biliv se di wɔl nɔ de fa igen fɔ dɔn, ɛn di ɛnd “nɔ go let!” (Aba. 2:3) Wan we fɔ no if wi gɛt fet, na we wi de luk fɔ we dɛn we wi go ebul fɔ du mɔ na di prichin wok. Wi de du ɔl wetin wi ebul fɔ fɛn we dɛn fɔ du mɔ na di prichin wok? (2 Kɔr. 13:5) Fɔ tru, we wi de “ɛp pipul dɛn fɔ sev” na pawaful we dat fɔ sho se wi gɛt fet na wi at.—Rid Lɛta Fɔ Rom 10:10.

14, 15. (a) Aw wi go sho se wi gɛt fet ɛvride? (b) Gi wan ɛgzampul fɔ sho aw pɔsin in fet de wok gud gud wan.

¹⁴ Wi go sho bak se wi gɛt fet we wi de bia wit di prɔblɛm dɛn na layf. Ilɛksɛf wi sik, wi at pwɛl, wi po, ɔ ɔda prɔblɛm dɛn de mit wi, wi biliv se Jiova ɛn in Pikin go “ɛp wi di rayt tɛm.” (Ibru 4:16) Wi go sho se wi biliv bay we wi pre to Gɔd fɔ ɛp wi fɔ gɛt di tin dɛn we wi nid. Jizɔs se wi kin pre fɔ di tin dɛn we wi nid, lɛk di “bred we wi go nid fɔ it fɔ di de.” (Lyuk 11:3) Di stori dɛn we de na di Baybul ɛp wi fɔ biliv se Jiova go gi wi di tin dɛn we wi nid. Fɔ ɛgzampul, di tɛm we ren nɔ bin de kam na Izrɛl, Jiova bin gi Ilayja tin fɔ it ɛn wata fɔ drink. “Di revɛn dɛn bin de briŋ fɔ am bred ɛn bif na mɔnin ɛn bred ɛn bif ivintɛm, ɛn na di watasay i bin de drink wata.” (1 Kiŋ 17:3-6) Wi gɛt fet se Jiova go mek we fɔ lɛ wisɛf go gɛt di tin dɛn we wi nid.

¹⁵ Wi biliv se if wi du di tin dɛn we di Baybul de tɛl wi, i go ɛp wi fɔ gɛt tin fɔ it na wi tebul. Wan mared sista we nem Ribɛka, we de na Eshia, kam fɔ no se dis na tru, bikɔs i bin apin to in famili. Dɛn fala wetin Matyu 6:33 se ɛn wetin Prɔvabs 10:4 se. Dɛn put Gɔd in biznɛs fɔs na dɛn layf, ɛn dɛn tray fɔ wok tranga wan. Ribɛka tɔk se wan tɛm in man fil se di kayn wok we i de du ɛn di yagba we i de gɛt na in wokples go ambɔg dɛn padi biznɛs wit Jiova, so i lɛf di wok. Bɔt dɛn gɛt 4 pikin dɛn fɔ kia fɔ.  Ribɛka tɔk wetin apin, i se: “Wi bigin fɔ mek tin dɛn fɔ it ɛn sɛl dɛn. Na so wi dɔn de du ɔl dis tɛm fɔ gɛt di tin dɛn we wi nid, ɛn dis bin ɛp wi fɔ no se Jiova nɔ ɛva lɛf wi. Wi nɔ ɛva de wi nɔ gɛt tin fɔ it.” Yusɛf dɔn sho se di Baybul gɛt di bɛst advays fɔ pipul dɛn tide?

16. Wetin go apin if wi abop pan Gɔd?

¹⁶ Wi nɔ fɔ ɛva dawt se if wi fala Gɔd in advays dɛn, bɛtɛ nɔ go fala wi. We Pɔl bin de rayt, i tɔk wetin Abakɔk bin se. I se: “Di pɔsin we de du wetin rayt go liv bay di fet we i gɛt.” (Gal. 3:11; Aba. 2:4) So i rili impɔtant fɔ lɛ wi put fet pan di Wan we go rili ɛp wi. Pɔl mɛmba wi se Gɔd na “di wan we ebul, akɔdin to in pawa we de wok insay wi, de du mɔ pas ɔl di tin dɛn we wi aks am ɔ di tin dɛn we wi de tink.” (Ɛfi. 3:20) Jiova in savant dɛn de du ɔl wetin dɛn ebul fɔ du so dat dɛn go du wetin Gɔd want, bɔt dɛn no se nɔto ɔltin dɛn go ebul fɔ du, so dɛn abop pan Jiova fɔ blɛs ɛnitin we dɛn de du. Wi nɔ gladi we wi Gɔd de wit wi?

17. (a) Aw Jizɔs bin ansa di apɔsul dɛn we dɛn aks am fɔ gi dɛn mɔ fet? (b) Wetin mek wi fɔ biliv se we wi aks fɔ mɔ fet, Gɔd go ansa wi?

¹⁷ Frɔm ɔl wetin wi dɔn tɔk, wi go fil lɛk aw di apɔsul dɛn bin fil, we dɛn tɛl di Masta se: “Gi wi mɔ fet.” (Lyuk 17:5) Jizɔs bin ansa dɛn di de we na Pɛntikɔst insay di ia 33, we oli spirit bin kam pan dɛn ɛn dɛn bin kam fɔ ɔndastand gud gud wan bɔt di tin dɛn we Gɔd gɛt fɔ du. Dis bin mek dɛn gɛt mɔ fet. Ɛn dɛn bin du di prichin wok gud gud wan da tɛm de. (Kɔl. 1:23) We wi, wi fɔ biliv se Gɔd go ansa wi we wi pre fɔ mɔ fet? Di Baybul mek wi no se Gɔd go ansa wi “wans na dat i want.”—1 Jɔn 5:14.

18. Aw Jiova de blɛs di wan dɛn we de tray fɔ gɛt mɔ fet?

¹⁸ Wi dɔn si klia wan se, Jiova kin gladi fɔ di wan dɛn we biliv am wit ɔl dɛn at. Jiova go ansa wi we wi aks am fɔ mɔ fet, ɛn wi fet go strɔng mɔ ɛn mɔ, we go mek wi “fit fɔ gɛt Gɔd in Kiŋdɔm.”—2 Tɛsa. 1:3, 5.