1, 2. Wetin mek Jizɔs bin lɛk Mata? Wetin sho se Mata nɔ bin pafɛkt?

WE YU tink bɔt Mata in stori na di Baybul, wetin kin kam na yu maynd? Di Baybul sho se Mata ɛn Jizɔs na bin tayt padi ɛn di Baybul tɔk se Jizɔs bin lɛk am. Bɔt in nɔto di wangren uman we Jizɔs bin lɛk, i bin lɛk ɔda uman dɛn bak we bin de du wetin Gɔd want, lɛk in mama we nem Meri, ɛn Mata in sista we na Meri. (Jɔn 11:5; 19:25-27) Wetin mek Jizɔs bin lɛk Mata?

² Jizɔs nɔ bin jɔs lɛk Mata bikɔs i bin lɛk fɔ invayt pipul dɛn na in os ɔ bikɔs i bin de wok tranga wan, bɔt i bin lɛk am bikɔs i bin gɛt fet. Mata na uman we bin rili biliv di tin dɛn we Jizɔs bin de tich. Mata bin rili biliv se Jizɔs na di Mɛsaya we Gɔd bin dɔn prɔmis. (Jɔn 11:21-27) Bɔt Mata nɔ bin pafɛkt, jɔs lɛk aw wisɛf nɔ pafɛkt. Wan tɛm, we Jizɔs bin go fɛn dɛn na dɛn os, Mata bin tɛl Jizɔs wetin i fɔ du fɔ kɔrɛkt in sista, we i si se in sista dɔn lɛf ɔl di wok gi am ɛn go sidɔm. Mata tɛl Jizɔs se: “Yu nɔ tink se yu fɔ du sɔntin bikɔs mi sista dɔn lɛf mi wangren fɔ du ɔl di wok dɛn? Tɛl am fɔ kam ɛp mi.” (Rid Lyuk 10:38-42.) Us lɛsin wi go lan frɔm dis stori?

3, 4. Aw Meri bin pik “di bɛst pat”? Us lɛsin Mata bin lan? (Luk di pikchɔ nia dis atikul in taytul.)

³ We Mata ɛn Meri bin invayt Jizɔs na dɛn os, Jizɔs bin ɛp dɛn fɔ no wetin Gɔd rili want. Meri bin yuz dis chans fɔ lan frɔm di Ticha we pas ɔl ɔda ticha dɛn ɛn i bin sidɔm na “di Masta in fut . . . . fɔ lisin to wetin i de se.” If Mata insɛf fɔ dɔn du di sem tin, Jizɔs bin fɔ dɔn gladi fɔ am.

⁴ Bɔt Mata bin bizi de kuk difrɛn difrɛn it dɛn, ɛn i bin de du ɔda tin dɛn we go mek Jizɔs ɛnjɔy in tɛm we i de spɛn wit dɛn. Bɔt ɔl dis wok we i bin de du bin de mek i wɔri fɔ natin, ɛn dis bin mek i vɛks pan Meri. Jizɔs bin notis se Mata bin de tray fɔ du bɔku tin dɛn, so i tɛl am saful wan se: “Mata, Mata, yu de wɔri ɛn yagba bɔt bɔku tin dɛn.” Dɔn i tɛl Mata se if i kuk jɔs wan it i go du fɔ am. Jizɔs tɔn to Meri ɛn mek i no se i nɔ du ɛnitin bad. I tɛl am se: “As fɔ Meri in chuz di bɛst pat, ɛn nɔbɔdi nɔ go pul am na in an.” Wetin mek Jizɔs se so? Na bikɔs i nɔ go te, Meri go fɔgɛt wetin i bin it da de de, bɔt i nɔ go ɛva fɔgɛt di fayn fayn tin dɛn we Jizɔs bin tɛl am bɔt Gɔd, bikɔs i bin rili de pe atɛnshɔn to Jizɔs. Afta i dɔn pas lɛk 60 ia so, di apɔsul Jɔn bin rayt se: “Jizɔs lɛk Mata ɛn in sista.” (Jɔn 11:5) Dis tin we Jɔn bin rayt sho se Mata bin fala di advays we Jizɔs bin gi am ɛn i bin tray tranga wan fɔ sav Jiova wit ɔl in at.

5. Aw wi go kɔmpia di wɔl we wi de insay tide to di wɔl we bin de di tɛm we dɛn bin de rayt di Baybul? Us kwɛstyɔn we dis dɔn mek wi aks?

⁵ We i kam pan di tin dɛn we kin ambɔg wi padi biznɛs wit Gɔd, aw wi go kɔmpia di wɔl we wi de insay tide to di wɔl we bin de di tɛm we dɛn bin de rayt di Baybul? “Insay di wɔl we wi de tide, mɔtalman dɔn mek pawaful mashin dɛn we pipul dɛn de yuz fɔ tɔk to dɛnsɛf ilɛk usay dɛn de, dɛn dɔn mek printin mashin dɛn we rili fast, magazin dɛn we gɛt fayn kɔlɔ, redio, fim dɛn, ɛn tɛlivishɔn. . . . Ɛni de, dɛn kin mek nyu tin dɛn we if wi nɔ tek tɛm dɛn go ambɔg wi padi biznɛs wit Jiova. . . I nɔ te yet we bɔku pipul dɛn bin dɔn tɔk se di tɛm we wi de insay na ‘Tɛm we wi go gɛt sɛns ɛn ɔndastand bɔku tin.’ Bɔt as tɛm de go, na di mɔ ‘dɛn de mek tin dɛn we go ambɔg wi padi biznɛs wit Gɔd.’” Na 60 ia dɔn pas so we dɛn bin tɔk dɛn wɔd ya to sɔm kɔlɛj studɛnt dɛn na Amɛrika. Di Sɛptɛmba 15, 1958, Wachtawa bin tɔk se: “As di wɔl de dɔn na di mɔ dɛn go de mek tin dɛn we go ambɔg wi padi biznɛs wit Gɔd.” Wi dɔn si se dis na tru! Ɛn dis dɔn mek wi tink bɔt wan impɔtant kwɛstyɔn: Aw wi go ebul fɔ avɔyd tin dɛn we go ambɔg wi padi biznɛs wit Gɔd, ɛn tan lɛk Meri we bin put ɔl in atɛnshɔn pan Gɔd biznɛs?

6. Aw Jiova in pipul dɛn dɔn de yuz di tin dɛn we sayɛnsman dɛn de mek?

⁶ Fɔ lɛ pipul dɛn ɔlsay na di wɔl go wɔship Jiova di rayt we, di pat pan Jiova in ɔganayzeshɔn we de na dis wɔl dɔn de yuz di tin dɛn we sayɛnsman dɛn de mek. Fɔ ɛgzampul, di ɔganayzeshɔn bin dɔn mek wan fim wit pikchɔ dɛn we de muv. Dis fim bin gɛt kɔlɔ ɛn sawnd. Dɛn bin kɔl am di “Photo-Drama of Creation.” Bifo Wɔl Wɔ Wan ɛn insay Wɔl Wɔ Tu, dis fim bin kɔrej bɔku pipul dɛn na di wɔl we bin wach am ɛn di las pat na di fim bin sho aw di wɔl go luk lɛk we Jizɔs go de rul fɔ Wan Tawzin Ia. Leta, dɛn bin tɔk bɔt Gɔd in Kiŋdɔm na redio ɛn bɔku bɔku pipul dɛn ɔlsay na di wɔl bin yɛri dis mɛsej. Tide, wi de yuz kɔmpyuta ɛn di Intanɛt gud gud  wan fɔ mek di gud nyus rich pipul dɛn ɔlsay na di wɔl.

7. (a) Wetin mek i bad fɔ yuz di tin dɛn na di wɔl pasmak wan? (b) Wetin wi fɔ tek tɛm lɛ wi nɔ du? (Luk di futnot.)

⁷ Di Baybul dɔn wɔn wi se wi nɔ fɔ yuz di tin dɛn we di wɔl de mek, pasmak wan bikɔs dɛn go ambɔg wi. (Rid Fɔs Lɛta Fɔ Kɔrint 7:29-31.) If pɔsin we na Kristian nɔ tek tɛm, i go west bɔku tɛm pan tin dɛn we nɔ dat bad, fɔ ɛgzampul, lɛk fɔ du tin dɛn we i lɛk fɔ du fɔ ɛnjɔy insɛf, fɔ rid, fɔ wach TV, fɔ go na fayn say dɛn we i go want fɔ si, fɔ go luk tin dɛn we dɛn de sɛl, ɛn tray fɔ no bɔt di nyu ilɛktronik tin dɛn we dɛn dɔn mek. Bɔku pipul dɛn lɛk fɔ yuz di Intanɛt fɔ tɔk to ɔda pipul dɛn. Dɛn kin sɛn mɛsej, imel, ɛn chɛk nyus ɔ ripɔt bɔt spɔt dɛn. Bɔt dɛn tin ya kin west wi tɛm ɛn if wi nɔ tek tɛm i go tɔn abit we go at fɔ lɛf. * (Ɛkli. 3:1, 6) If wi nɔ wach di tɛm we wi de spɛn pan tin dɛn we nɔ rili impɔtant, dɛn go mek wi lɛf fɔ du di tin we impɔtant pas ɔl, dat na wi wɔship to Jiova.—Rid Lɛta Fɔ Ɛfisɔs 5:15-17.

8. Wetin mek i rili impɔtant lɛ wi nɔ lɛk di tin dɛn na di wɔl?

⁸ Setan dɔn mek dis wɔl fɔ lɛ wi want di tin dɛn we de insay de ɛn fɔ ambɔg wi. Na dat in bin de du trade trade ɛn na dat i stil de du tide. (2 Tim. 4:10) So wi nid fɔ fala dis advays na di Baybul, we se: “Una nɔ lɛk . . . di tin dɛn we de na di wɔl.” We wi de ajɔst wisɛf ɔltɛm fɔ fala dis advays ya na di Baybul, wi go avɔyd ɛnitin we go pul wi atɛnshɔn pan Gɔd biznɛs ɛn wi go ebul fɔ “lɛk di Papa” mɔ ɛn mɔ. Dis go ɛp wi fɔ du wetin Gɔd want ɛn Gɔd go kɔntinyu fɔ gladi fɔ wi te go.—1 Jɔn 2:15-17.

9. Wetin Jizɔs bin tɛl in disaypul dɛn fɔ pe atɛnshɔn pan? Aw in bin sɛt fayn ɛgzampul fɔ wi?

⁹ Di fayn advays we Jizɔs bin gi Mata, de sho di tin dɛn we Jizɔs bin de tich ɛn du. I bin ɛnkɔrej in disaypul dɛn fɔ “pe atɛnshɔn” pan Gɔd in Kiŋdɔm ɛn lɛ dɛn nɔ alaw natin fɔ ambɔg dɛn padi biznɛs wit Gɔd. (Rid Matyu 6:22, 33.) Jizɔs nɔ bin gɛt bɔku tin dɛn; i nɔ bin gɛt os ɔ land.—Lyuk 9:58; 19:33-35.

10. We Jizɔs bin jɔs bigin prich, us fayn ɛgzampul i sɛt fɔ wi?

 ¹⁰ Di tɛm we Jizɔs bin de prich, bɔku tin dɛn bin de apin we fɔ dɔn mek i lɛf fɔ pe atɛnshɔn pan di wok we i bin de du, bɔt i nɔ bin alaw dɛn tin ya fɔ ambɔg am. Wan tɛm we i bin jɔs bigin fɔ prich, i bin tich sɔm pipul dɛn ɛn pafɔm mirekul na Kepanum, so di pipul dɛn beg am mek i nɔ kɔmɔt na dɛn siti. Wetin Jizɔs bin du we dɛn tɛl am dis? Jizɔs tɔk se: “A fɔ tɔk di gud nyus bɔt Gɔd in Kiŋdɔm na ɔda siti dɛn, bikɔs na dis mek dɛn sɛn mi.” (Lyuk 4:42-44) Jizɔs bin du wetin i se, i bin waka go na fa say dɛn na Palestayn fɔ prich ɛn tich pipul dɛn. Pan ɔl we i bin pafɛkt, i bin de fil lɛk aw mɔtalman de fil ɛn sɔm tɛm dɛn de, i kin rili taya bikɔs i dɔn wok tranga wan fɔ Gɔd.—Lyuk 8:23; Jɔn 4:6.

11. Wetin mek Jizɔs nɔ bin gri fɔ miks pan di plaba we wan famili bin gɛt? Us wɔnin we i bin gi to di pipul dɛn?

¹¹ Wan ɔda tɛm, we Jizɔs bin de tich in disaypul dɛn wan impɔtant lɛsin, wan man bin kam ɛn tɔk se: “Ticha tɛl mi brɔda fɔ sheb di prɔpati we wi gɛt wit mi.” Bɔt Jizɔs nɔ bin gri fɔ miks pan dɛn plaba. I bin aks di man se: “Udat pik mi as jɔj fɔ una tu?” Dɔn Jizɔs kɔntinyu fɔ tich di pipul dɛn, i wɔn di wan dɛn we de lisin to am bɔt di bad tin we kin apin we pɔsin alaw prɔpati fɔ ambɔg in padi biznɛs wit Gɔd.—Lyuk 12:13-15.

12, 13. (a) Jɔs bifo Jizɔs day, wetin bin mek sɔm Grik pipul dɛn kɔle am? (b) Wetin Jizɔs bin du we Filip tɛl am se sɔm Grik pipul dɛn want fɔ si am?

¹² Insay di las wik we bin lɛf fɔ Jizɔs na di wɔl bifo i day, tin nɔ bin rili izi fɔ am. (Mat. 26:38; Jɔn 12:27) I bin gɛt bɔku wok fɔ du. Ɛn i bin no se i go gɛt fɔ sɔfa bad bad wan ɛn day. Fɔ ɛgzampul, lɛ wi tɔk bɔt wetin apin wan Sɔnde, Naysan 9, insay di ia 33. Jɔs lɛk aw di prɔfɛt dɛn bin dɔn tɔk, Jizɔs go insay Jerusɛlɛm, i sidɔm pan wan yɔŋ dɔnki, ɛn di pipul dɛn bin prez am as “di wan we de kam as di Kiŋ wit Jiova in nem.” (Lyuk 19:38) Di nɛks de, Jizɔs go insay di tɛmpul ɛn i nɔ bin fred fɔ drɛb dɛn kruk biznɛsman dɛn we bin de insay di tɛmpul. Dɛn biznɛsman ya bin de yuz Gɔd in os fɔ pul bɔku mɔni na dɛn kɔmpin Ju dɛn an.—Lyuk 19:45, 46.

¹³ Pan di bɔku bɔku pipul dɛn we bin de na Jerusɛlɛm, sɔm na bin Grik pipul dɛn. Dɛn bin kam fɔ sɛlibret di Pasova. We dɛn Grik pipul ya bin si wetin Jizɔs du, dat bin mek dɛn kɔle. So dɛn tɛl di apɔsul Filip se dɛn go want fɔ mit wit Jizɔs. Bɔt Jizɔs nɔ bin gri fɔ lɛ dɛn ambɔg am bikɔs i bin gɛt impɔtant tin we i fɔ du. Jizɔs nɔ bin de luk fɔ pipul dɛn we go sɔpɔt am ɛn sev am frɔm in ɛnimi dɛn ɛn mek i nɔ day fɔ mɔtalman. So afta we i dɔn ɛksplen se i de kam day jisnɔ, i tɛl Andru ɛn Filip se: “Ɛnibɔdi we lɛk in layf go lɔs am, bɔt ɛnibɔdi we et in layf na dis wɔl go kip am fɔ di layf we go de sote go.” Jizɔs nɔ bin gri fɔ go to dɛn Grik pipul dɛn ya, bifo dat i tɛl ɔl di wan dɛn we de lisin to am fɔ falamakata am fɔ sav Jiova wit ɔl dɛn at ɛn i prɔmis dɛn se: “If ɛnibɔdi wok fɔ mi, mi Papa go ɔnɔ am.” I go mɔs bi se Filip bin go tɛl dɛn dis fayn advays we Jizɔs bin gi.—Jɔn 12:20-26.

14. Pan ɔl we Jizɔs bin put di prichin wok fɔs na in layf, wetin sho se nɔto wok nɔmɔ i bin de tink bɔt ɔltɛm?

¹⁴ Jizɔs nɔ bin alaw ɛnitin fɔ ambɔg am we i de du in prichin wok. Bɔt nɔto wok nɔmɔ i bin de tink bɔt ɔltɛm. Wan tɛm we dɛn bin invayt Jizɔs fɔ go wan mared, i bin gri fɔ go ɛn i bin mek di wan dɛn we de na di mared gladi we i tɔn wata to wayn. (Jɔn 2:2, 6-10) We in tayt padi dɛn ɛn ɔda pipul  dɛn we bin de lisin to am invayt am fɔ go it na dɛn os, Jizɔs bin gri fɔ go it wit dɛn. (Lyuk 5:29; Jɔn 12:2) Jizɔs bin de fɛn tɛm fɔ pre, tink gud wan ɛn rɛst. Dis na tin dɛn we bin rili impɔtant to am.—Mat. 14:23; Mak 1:35; 6:31, 32.

15. Us advays di apɔsul Pɔl bin gi? Aw i bin sɛt fayn ɛgzampul fɔ wi?

¹⁵ Di apɔsul Pɔl bin rayt se: “Lɛ wi pul ɛnitin we gɛt wet we ɛng pan wi.” Di apɔsul Pɔl bin tɔk dis we i bin de kɔmpia Kristian we dɔn gi in layf to Gɔd to pɔsin we nɔ de taya fɔ rɔn res. (Rid Di Ibru Pipul Dɛn 12:1.) Pɔl bin de du di tin dɛn we i bin de prich. I bin lɛf di wok we i bin de du na di Ju rilijɔn. Dis wok we i bin de du fɔ dɔn mek i gɛt bɔku mɔni ɛn plɛnti pipul dɛn fɔ dɔn no am. Bɔt i bin pe atɛnshɔn to “di tin dɛn we rili impɔtant,” ɛn i bin de wok tranga wan fɔ Gɔd, i bin de travul go Sirya, Eshia Maynɔ, Masidonia, ɛn Judia. We Pɔl bin de rayt bɔt di op we i gɛt, we na layf we go de sote go na ɛvin, i tɔk se: “A dɔn fɔgɛt di tin dɛn we a dɔn lɛf biɛn ɛn a de tray fɔ gɛt di tin dɛn we de bifo, a de tray tranga wan fɔ gɛt di prayz.” (Fil. 1:10; 3:8, 13, 14) Bikɔs Pɔl nɔ bin mared, i bin ebul fɔ “put ɔl [in] at pan di Masta in wok so dat natin nɔ go ambɔg” am.—1 Kɔr. 7:32-35.

16, 17. Ilɛksɛf wi mared ɔ wi nɔ mared, aw wi go falamakata Pɔl in ɛgzampul? Gi wan ɛgzampul.

¹⁶ Jɔs lɛk Pɔl, sɔm Kristian dɛn de we dɔn disayd se dɛn nɔ go mared so dat dɛn nɔ go gɛt bɔku wok fɔ du na di famili ɛn dɛn go ebul fɔ du mɔ na di prichin wok. (Mat. 19:11, 12) Gɔd in savant dɛn we mared kin gɛt bɔku wok fɔ du na dɛn famili. Ilɛksɛf wi mared ɔ wi nɔ mared, wi ɔl fɔ “pul ɛnitin we gɛt wet we ɛng pan wi,” ɛn wi nɔ fɔ mek ɛnitin ambɔg wi we wi de sav Gɔd. Dis min se wi fɔ ridyus di tɛm we wi de spɛn pan ɔda tin dɛn we nɔ impɔtant so dat wi go ebul fɔ du mɔ wok fɔ Gɔd.

¹⁷ Lɛ wi tɔk bɔt wan maredman we nem Mak ɛn in wɛf we nem Klɛa. Mak ɛn in wɛf bin mɛn na wan kɔntri we dɛn kɔl Wels. Dɛn bin bigin fɔ payɔnia afta we dɛn dɔn skul ɛn dɛn bin kɔntinyu fɔ payɔnia afta we dɛn mared. Mak tɔk se: “Wi bin ebul fɔ liv simpul layf we wi sɛl wi os we bin gɛt tri rum ɛn lɛf di wok we wi bin de du so dat wi go jɔyn pan di kɔnstrɔkshɔn wok we dɛn de du ɔlsay na di wɔl.” I dɔn pas 20 ia naw we dɛn de travul na plɛnti say dɛn na Afrika fɔ ɛp fɔ bil Kiŋdɔm Ɔl dɛn. Wan tɛm, na jɔs 15 dɔla dɛn bin gɛt, bɔt Jiova bin de kia fɔ dɛn. Klɛa tɔk se: “Wi bin rili satisfay we wi de yuz ɔl wi tɛm fɔ sav Jiova ɛvride. Wi dɔn gɛt bɔku padi dɛn we wi de du dis wok, ɛn wi gɛt ɔl wetin wi nid. Wi nɔ go kɔmpia di smɔl tin we wi dɔn lɛf biɛn to di gladi at we wi gɛt we wi de yuz ɔl wi tɛm fɔ sav Jiova.” Bɔku pan Jiova in savant dɛn we de yuz ɔl dɛn tɛm fɔ sav am dɔn fil dis sem we. *

18. Us kwɛstyɔn sɔm pipul dɛn nid fɔ aks dɛnsɛf?

¹⁸ We yu? Wetin yu go du if yu no se yu nɔ gɛt bɛtɛ zil igen fɔ du mɔ fɔ Jiova? Yu tink se di tin dɛn we de na di wɔl de ambɔg yu padi biznɛs wit Gɔd, we mek yu nɔ ebul fɔ put di tin we impɔtant fɔs na yu layf? Sɔntɛm yu nid fɔ rid ɛn stɔdi di Baybul mɔ. Aw yu go du dat? Di nɛks atikul go ɛksplen aw yu go du dat.