1, 2. Wetin sɔm pipul dɛn kin tink bɔt Gɔd?

BƆKU pipul dɛn tink se Gɔd nɔ bisin bɔt wetin dɛn de du, so dɛnsɛf nɔ bisin bɔt wetin Gɔd de du. Infakt, sɔm biliv se Gɔd nɔ bisin bɔt di tin dɛn we de apin to mɔtalman. Di tɛm we wan big big briz we dɛn kɔl Supa Tayfun Ian bin blo na di Filipins insay Novɛmba  2013, di mayɔ we bin de na wan big siti, bin tɔk se: “I go mɔs bi se Gɔd de ɔdasay.”

² Ɔda pipul dɛn kin biev lɛk se Gɔd nɔ de si wetin dɛn de du. (Ayz. 26:10, 11; 3 Jɔn 11) Dɛn tan lɛk di wan dɛn we di apɔsul Pɔl bin de tɔk bɔt, we i se: “Dɛn nɔ gri fɔ du wetin Gɔd want.” Dɛn kayn pipul ya “de du ɔlkayn tin we nɔ rayt, ɔlkayn bad bad tin dɛn, dɛn want wetin ɔda pipul dɛn gɛt.”—Rom 1:28, 29.

3. (a) Us kwɛstyɔn dɛn wi go want fɔ aks wisɛf bɔt Gɔd? (b) We di Baybul de tɔk bɔt Jiova in “an,” wetin i min?

³ We wi, wetin wi go se? Wi nɔ tan lɛk di wan dɛn we wi jɔs dɔn tɔk bɔt. Wetin mek wi se so? Na bikɔs wi no se Jiova de si ɔl wetin wi de du. Bɔt wi de si bak aw i bisin bɔt wi ɛn aw i de sɔpɔt wi na layf? Apat frɔm dat, yu tink se yu de pan di  wan dɛn we Jizɔs bin kɔl di wan dɛn we “go si Gɔd”? (Mat. 5:8) Fɔ lan wetin dis min, lɛ wi luk sɔm ɛgzampul dɛn na di Baybul bɔt di wan dɛn we bin si aw Gɔd in an de wok, ɛn di wan dɛn we nɔ gri fɔ du so. Dɔn wi go lan aw wi go si Gɔd in an klia wan na wi layf bay di tin dɛn we wi de si. As wi de tɔk bɔt dɛn tin ya, wi fɔ mɛmba se we di Baybul de tɔk bɔt Gɔd in “an,” i de tɔk bɔt in pawa we i kin yuz fɔ ɛp in savant dɛn ɛn fɔ win in ɛnimi dɛn.—Rid Dyutɔrɔnɔmi 26:8.

4. Wetin mek di Izrɛlayt dɛn ɛnimi dɛn nɔ bin gri fɔ si Gɔd in an?

⁴ We di Izrɛlayt dɛn bin de na Ijipt, bɔku pipul dɛn bin gɛt di chans fɔ si ɛn yɛri di tin dɛn we Gɔd bin du fɔ di Izrɛlayt dɛn. Jiova bin yuz in pawa fɔ pafɔm mirekul, so dat i go pul in pipul dɛn kɔmɔt na Ijipt, ɛn i bin mek dɛn win bɔku kiŋ dɛn pan fɛt. (Jɔsh. 9:3, 9, 10) Pan ɔl we ɔl di kiŋ dɛn we bin de na di wɛst pat na di Jɔdan bin yɛri ɛn si, dɛn stil “kam togɛda fɔ fɛt Jɔshwa ɛn di Izrɛlayt dɛn.” (Jɔsh. 9:1, 2) Ivin afta we dɛn kiŋ dɛn ya bigin fɔ fɛt, dɛn bin gɛt gud rizin fɔ si se Gɔd in an bin de pan di fɛt. Jiova bin mek “di san tinap wanples ɛn di mun nɔ mɔv te di neshɔn dɔnawe wit in ɛnimi dɛn.” (Jɔsh. 10:13) Bɔt Jiova bin “alaw dɛn [di ɛnimi dɛn] fɔ gɛt strɔng at so dat dɛn go fɛt di Izrɛlayt dɛn pan wɔ.” (Jɔsh. 11:20) Di Izrɛlayt dɛn ɛnimi dɛn nɔ bin gri fɔ biliv se na Gɔd de fɛt fɔ di Izrɛlayt dɛn, ɛn dat bin mek di Izrɛlayt dɛn win dɛn.

5. Wetin wan wikɛd kiŋ we nem Eab nɔ bin gri fɔ du?

⁵ Leta, wan wikɛd kiŋ we nem Eab bin gɛt di chans fɔ si Gɔd in an pan di tin dɛn we bin de apin. Ilayja bin tɛl am se: “No dyu ɔ ren nɔ go kam pas a tɔk am!” (1 Kiŋ 17:1) Na Jiova bin tɔk dɛn wɔd ya, bɔt Eab nɔ bin gri fɔ biliv dat. Leta, Eab bin si faya kɔmɔt frɔm ɛvin we Ilayja pre to Jiova fɔ lɛ i bɔn in sakrifays. Dɔn Ilayja sho se Jiova go mek ren kam bak. I tɛl Eab se: “Go dɔŋ so dat di ren nɔ go mit [yu] na rod!” (1 Kiŋ 18:22-45) Eab bin si ɔl dɛn tin ya apin, bɔt i nɔ bin stil gri fɔ biliv se na Gɔd de sho in pawa. Dis ɛgzampul ɛn di ɔda ɛgzampul dɛn we wi bin dɔn tɔk bɔt tich wi wan impɔtant lɛsin. Wi fɔ ebul fɔ si Jiova in an we i de du sɔntin.

6, 7. Wetin sɔm pipul dɛn na Jɔshwa in tɛm bin no?

⁶ Ɔda pipul dɛn bin de si Gɔd in an pan di tin dɛn we bin de apin, dɛn nɔ bi tan lɛk dɛn wikɛd kiŋ dɛn we nɔ bin gri fɔ si Gɔd in an pan di tin dɛn we bin de apin, pan ɔl we dɛn ɔl bin gɛt di sem prɔblɛm dɛn. Fɔ ɛgzampul, pan ɔl we bɔku neshɔn dɛn bin de fɛt di Izrɛlayt dɛn insay Jɔshwa in tɛm, di Gibyɔnayt dɛn bin mek pis wit di Izrɛlayt dɛn. Wetin du? Dɛn tɔk se: “Yu savant dɛn kɔmɔt fa say fɔseka Jiova in nem we na una Gɔd, bikɔs wi dɔn yɛri bɔt am ɛn ɔl di tin dɛn we i du.” (Jɔsh 9:3, 9, 10) Dɛn bin gɛt sɛns fɔ no se di Izrɛlayt dɛn bin gɛt sɔmbɔdi we de fɛt fɔ dɛn, dat na di tru Gɔd.

⁷ Reab insɛf bin si Gɔd in an pan di tin dɛn we bin de apin insay in yon tɛm. Afta i dɔn lan aw Jiova bin sev In pipul dɛn, i bin tɛl di tu Izrɛlayt dɛn we bin kam wach se: “A no se Jiova go gi una di land.” Reab bin biliv se Jiova go sev in ɛn in famili, pan ɔl we i bin no se bad tin go  apin to am if i put fet pan Jiova.—Jɔsh 2:9-13; 4:23, 24.

8. Aw sɔm Izrɛlayt dɛn bin si Gɔd in an?

⁸ Sɔm Izrɛlayt dɛn we bin si aw Jiova bin ansa Ilayja in prea, bin no se Jiova in an bin de pan wetin bin de apin. Dɛn nɔ bin tan lɛk wikɛd Kiŋ Eab we nɔ bin gri fɔ si Jiova in an. We dɛn si di faya we kɔmɔt frɔm Jiova bɔn di tin dɛn we dɛn bin yuz fɔ mek sakrifays, dɛn ala se: “Jiova na di tru Gɔd!” (1 Kiŋ 18:39) To dɛn, dis dɔn sho klia wan se Gɔd in an de pan wetin apin!

9. Aw wi go ebul fɔ si Jiova ɛn in an pan sɔm tin dɛn tide?

⁹ Di gud ɛgzampul ɛn di bad ɛgzampul dɛn we wi dɔn tɔk bɔt ɛp wi fɔ ɔndastand wetin i min fɔ si Gɔd ɔ fɔ si in an pan sɔm tin dɛn. As wi de kam fɔ no Jiova, wisɛf go ebul fɔ si in an bikɔs wi de si in kwaliti dɛn ɛn wi de si di tin dɛn we i de du wit di “yay we [wi] at gɛt.” (Ɛfi. 1:18) Wi rili want fɔ bi lɛk di wan dɛn we bin de trade ɛn di wan dɛn we de tide we dɔn si klia wan se Jiova de sɔpɔt in pipul dɛn. Bɔt ɛnitin de we de sho se Gɔd in an de pan pipul dɛn layf tide?

10. Wetin sho se Jiova de ɛp pipul dɛn tide? (Luk di pikchɔ nia dis atikul in taytul.)

¹⁰ Wi gɛt bɔku rizin dɛn fɔ biliv se Jiova de kɔntinyu fɔ ɛp pipul dɛn. Bɔku tɛm, wi dɔn yɛri bɔt pipul dɛn we dɔn pre to Gɔd fɔ lɛ i ɛp dɛn ɛn i dɔn ɛp dɛn. (Sam 53:2) Di tɛm we wan brɔda we nem Alan bin de prich frɔm os to os na wan smɔl ayland we de na di Filipins, i bin mit wan uman, ɛn we i bigin fɔ tɔk to dis uman, di uman bigin fɔ kray. Alan tɔk se: “Da mɔnintɛm de di uman bin pre to Jiova fɔ lɛ i sɛn in Witnɛs dɛn fɔ kam fɛn am. We dis uman bin yɔŋ, i bin dɔn stɔdi di Baybul wit Jiova Witnɛs dɛn bɔt i nɔ bin ebul fɔ si dɛn igen we i mared ɛn go na di ayland. Gɔd ansa in prea kwik kwik wan ɛn dat bin rili tɔch in at.” Bifo di ia dɔn, dis uman gi in layf to Jiova.

11, 12. (a) Us we dɛn Jiova de ɛp in savant dɛn? (b) Gi ɛgzampul bɔt sɔmbɔdi we Gɔd bin ɛp.

¹¹ Bɔku pan Gɔd in savant dɛn dɔn si se Gɔd dɔn ɛp dɛn fɔ lɛf dɛn bad abit dɛn we at fɔ lɛf, lɛk fɔ smok, fɔ tek drɔgs, ɔ fɔ wach dɛn rud rud pikchɔ ɛn fim dɛn. Sɔm tɔk se dɛn bin de tray ɔltɛm fɔ stɔp dɛn bad abit ya fɔ dɛnsɛf bifo dɛn kam fɔ no Jiova, bɔt dɛn nɔ bin ebul. Bɔt we dɛn tɔn to Jiova fɔ ɛp dɛn, i gi dɛn “di pawa fɔ du sɔntin” we dɛn “nɔ ebul fɔ du fɔ” dɛnsɛf ɛn dat bin mek dɛn ebul fɔ lɛf dɛn bad abit ya.—2 Kɔr. 4:7; Sam 37:23, 24.

¹² Jiova dɔn ɛp bɔku pan in savant dɛn fɔ bia wit di prɔblɛm dɛn we dɛn kin gɛt. Fɔ ɛgzampul, Emi bin gɛt dis kayn prɔblɛm di tɛm we dɛn bin tɛl am fɔ go ɛp fɔ bil wan Kiŋdɔm Ɔl ɛn mishɔnari os na wan smɔl ayland. Emi tɔk se: “Wi bin de na wan smɔl otɛl, ɛn ɛvride wi bin de waka na strit dɛn we ful-ɔp wit wata fɔ go na di say we wi de wok.” I bin gɛt fɔ ajɔst to di we aw pipul dɛn bin de du tin, ɛn nɔto ɔltɛm wata ɛn layt bin de. Emi kɔntinyu fɔ tɔk se: “Fɔ mek tin wɔs, a bin vɛks pan wan sista we bin de wok wit wi. A go na os ɛn fil lɛk se a nɔ ebul fɔ du wetin rayt. We a de na mi otɛl rum we bin dak, a bin pre to Jiova wit ɔl mi at, a beg am fɔ lɛ i ɛp mi.” We di layt kam bak, Emi tek wan Wachtawa magazin we bin gɛt wan atikul insay we de tɔk bɔt Giliad gradyueshɔn program. Dis atikul tɔk bɔt ɔl di tin dɛn we bin de mɔna am, lɛk di nyu kɔlchɔ, di we  aw i bin de fil we i dɔn lɛf in kɔntri, ɛn aw i fɔ trit di nyu pipul dɛn we i bin de wok wit. Emi tɔk se: “Da nɛt de, a bin kam fɔ no se na Jiova bin de tɔk to mi. I bin gi mi zil fɔ kɔntinyu mi wok.”—Sam 44:25, 26; Ayz. 41:10, 13.

13. Wetin sho se Jiova de sɔpɔt in pipul dɛn fɔ lɛ dɛn “gɛt rayt fɔ prich” di gud nyus?

¹³ Jiova Witnɛs dɛn dɔn ebul fɔ “gɛt rayt fɔ prich” di gud nyus. Dis dɔn sho se Jiova de ɛp dɛn wit in pawaful an. (Fil. 1:7) Sɔm gɔvmɛnt dɛn dɔn rili tray fɔ stɔp di wok we Gɔd in pipul dɛn de du. Bɔt we wi si se Jiova Witnɛs dɛn dɔn win 268 kes dɛn na ay kɔt, ɛn pan dis 268 kes dɛn we dɛn dɔn win, 24 pan dɛn na frɔm di European Court of Human Rights frɔm di ia 2000, dis dɔn sho klia wan se nɔbɔdi nɔ go ebul fɔ ol Jiova in an.—Ayz. 54:17; rid Ayzaya 59:1.

14. Aw wi de si Gɔd in an pan wi prichin wok ɛn di wanwɔd we wi de ɛnjɔy?

¹⁴ Na bikɔs Jiova de ɛp wi na in mek wi ebul fɔ prich di gud nyus ɔlsay na di wɔl. (Mat. 24:14; Akt 1:8) Pantap dat, di wanwɔd we wi gɛt wit wi brɔda ɛn sista dɛn ɔlsay na di wɔl, na sɔntin we pipul dɛn na di wɔl nɔ go ebul fɔ falamakata. Ɛn wi si wetin mek pipul dɛn we nɔ de wɔship Gɔd kin tɔk se: “Gɔd rili de wit una.” (1 Kɔr. 14:25) So wi dɔn si se bɔku tin dɛn de we de sho se Gɔd de sɔpɔt in pipul dɛn. (Rid Ayzaya 66:14.) Bɔt, we yu? Yu de si Jiova in an na yu layf?

15. Ɛksplen wetin mek sɔm tɛm dɛn de wi nɔ kin si Jiova in an klia wan na wi layf.

¹⁵ Wetin na sɔm tin dɛn we mek wi nɔ de si Gɔd in an pan di tin dɛn we wi de du na layf? Di yagba na layf kin ambɔg wi. We dis kin apin, wi kin fɔgɛt fɔ tink bɔt aw Jiova dɔn ɔlrɛdi ɛp wi. Di tɛm we Kwin Jezibɛl bin trɛtin di prɔfɛt Ilayja se i go kil am, Ilayja bin fɔgɛt fɔ sɔm tɛm aw Jiova bin dɔn sɔpɔt am. We di Baybul de tɔk bɔt  Ilayja, i se, Ilayja tɛl Gɔd se: “Mek i day.” (1 Kiŋ 19:1-4) Wetin go sɔlv di prɔblɛm we Ilayja bin gɛt? I bin nid fɔ tɔn to Jiova fɔ lɛ i ɛnkɔrej am.—1 Kiŋ 19:14-18.

16. Wetin wi go du fɔ si Gɔd lɛk aw Job bin si am?

¹⁶ Job insɛf bin de gɛt prɔblɛm dɛn we bin mek i nɔ ebul fɔ si tin di we aw Jiova de si am. (Job 42:3-6) Lɛk Job, wisɛf nid fɔ tray tranga wan fɔ si tin di we aw Gɔd de si am. Aw wi go ebul fɔ du dat? Na we wi rid di Baybul ɛn tink gud wan bɔt di tin dɛn we de apin arawnd wi. We wi kam fɔ no aw Jiova de ɛp wi, na di mɔ wi go kam fɔ si se Jiova na rial Pɔsin to wi. Jɔs lɛk Job, wisɛf go tɔk se: “Mi yes dɔn yɛri bɔt yu, bɔt naw mi yay dɔn si yu.”

17, 18. (a) Us we dɛn we wi go ebul fɔ no se Jiova de ɛp wi? (b) Gi wan ɛgzampul we de sho aw Gɔd de ɛp wi tide.

¹⁷ Aw wi kin si Jiova in an na wi layf? Lɛ wi tɔk bɔt sɔm ɛgzampul dɛn: Sɔntɛm yu fil se di we aw yu lan di tru, sho klia wan se na Jiova ɛp yu fɔ lan bɔt am. Yu dɔn ɛva go na mitin, yu yɛri wan pat na di mitin ɛn tɔk se: “Na dis a bin rili nid”? Ɔ yu go dɔn si aw Gɔd dɔn ansa yu prea. Sɔntɛm yu disayd fɔ du mɔ na di prichin wok ɛn yu sɔprayz fɔ no aw Jiova dɔn ɛp yu. Ɔ yu go dɔn lɛf wok fɔseka Gɔd biznɛs ɛn yu si se wetin Gɔd bin prɔmis na tru, we i se: “A nɔ go tɔn mi bak pan [yu]”? (Ibru 13:5) We wi gɛt tayt padi biznɛs wit Jiova, wi go ebul fɔ si di we dɛn we i dɔn ɛp wi.

¹⁸ Wan sista we nem Sera, we de na Kenya bin tɔk bɔt wetin bin apin to am. I tɔk se: “A pre to Jiova bɔt wan mi Baybul stɔdi we a bin fil se i nɔ kin gladi fɔ stɔdi di Baybul. A aks Jiova if a fɔ lɛf fɔ stɔdi am. Wantɛm wantɛm, as a se ‘Emɛn’ so, na in mi fon riŋ. Mi Baybul stɔdi kɔl mi fɔ aks if i kin atɛnd di mitin wit mi! A bin rili sɔprayz!” We yu padi biznɛs wit Jiova tayt, yusɛf go si we dɛn we Jiova de ɛp yu. Wan sista we nem Rona, we de na Eshia, bin tɔk se: “Wi fɔ tray fɔ lan so dat wi go no aw Jiova dɔn ɛp wi na layf. We yu du dat, yu go sɔprayz fɔ no se Jiova rili bisin bɔt yu!”

19. Wetin bak wi nid fɔ du fɔ lɛ wi go de wit di wan dɛn we de si Gɔd?

¹⁹ Jizɔs bin se: “Di wan dɛn we gɛt klin at go gladi bikɔs dɛn go si Gɔd.” (Mat. 5:8) Aw wi go ebul fɔ bi pɔsin we gɛt “klin at”? Wi fɔ pul ɛni bad tin we de na wi at ɛn lɛf fɔ du ɔl di tin dɛn we bad. (Rid Sɛkɔn Lɛta Fɔ Kɔrint 4:2.) As wi de mek wi padi biznɛs wit Jiova tayt mɔ ɛn mɔ ɛn sho se wi gɛt gud abit dɛn, wi go de wit di wan dɛn we de si Gɔd. Insay di nɛks atikul, wi go tɔk bɔt wetin go ɛp wi fɔ si Jiova in an klia wan na wi layf, dat na wi fet.