IMAJIN DIS: Yu go waka na wan myuziɔm we ful-ɔp wit istri tin dɛn. Bɔku pan dɛn tin dɛn de dɔn pwɛl, ɛn sɔm nɔ ivin kɔmplit igen. Bɔt wan patikyula wan de we rili fayn ɛn natin nɔ pwɛl pan am. Dɔn yu aks di pɔsin we de sho yu de ples se: “Dis wan nyu pas ɔl di ɔda wan dɛn?” Bɔt di pɔsin tɛl yu se “Nɔ.” Infakt, “i ol pas ɔl di ɔda wan dɛn ɛn dɛn nɔ ɛva mek am bak.” Dɔn yu aks bak se: “Dɛn bin kip am na sef say?” Di pɔsin ansa se, “Nɔ.” Infakt, “dɛn dɔn tray fɔ pwɛl am pas ɔl di ɔda wan dɛn. Ɛn bɔku pipul dɛn dɔn du ɔlkayn tin fɔ pwɛl am.” Sɔntɛm yu go de wɔnda, ‘Wetin dɛn yuz fɔ mek am?’

Di Baybul tan lɛk da fayn istri tin we de na di myuziɔm. Na buk we rili ol, ɛn i ol pas bɔku buk dɛn. Fɔ tru, ɔda buk dɛn de we dɔn rili ol. Bɔt jɔs lɛk di istri tin dɛn we dɔn pwɛl, bɔku pan di tin dɛn we rayt pan dɛn ol buk dɛn de dɔn damej bikɔs i dɔn te we dɛn rayt dɛn. Di tin dɛn we dɛn rayt bɔt sayɛns difrɛn frɔm di nyu tin dɛn we sayɛntist dɛn dɔn kam fɔ no. Dɛn mɛdikal advays nɔ de ɛp pipul dɛn, bifo dat i de ambɔg dɛn. Ɛn bɔku pan dɛn tin dɛn de we dɛn bin de rayt trade nɔ kɔmplit igen bikɔs sɔm pat pan dɛn dɔn lɔs ɔ dɔn pwɛl.

Bɔt di Baybul rili difrɛn. Pan ɔl we i dɔn pas lɛk 3,500 ia we dɛn rayt am, i stil kɔmplit. Pipul dɛn dɔn tray difrɛn we dɛn fɔ pwɛl di Baybul bay we dɛn bɔn am, ban am, ɛn ivin si am as buk we nɔ impɔtant, bɔt di Baybul stil de. Ɛn pan ɔl we pipul dɛn de lan bɔt nyu tin dɛn, di tin dɛn we rayt na di Baybul nɔ de kɔmɔt na stayl; Infakt, di Baybul de tɔk bɔt tin dɛn we go apin tumara bambay.

Sɔntɛm yu go de wɔnda, ‘Fɔ se di tin dɛn we di Baybul de tich de rili ɛp wi tide?’ Fɔ ansa da kwɛstyɔn de, aks yusɛf: ‘Wetin na di wɔs prɔblɛm dɛn we mɔtalman de gɛt tide? Uswan bad-ɔf pas dɛn ɔl?’ Sɔntɛm yu go tink bɔt wɔ, kraym, kɔrɔpshɔn, ɔ di dɔti we pipul dɛn de dɔti di wɔl. Naw lɛ wi tɔk bɔt sɔm prinsipul dɛn we di Baybul de tich. As yu de du dat, aks yusɛf dis kwɛstyɔn, ‘If pipul dɛn gɛt dɛn fayn abit dɛn ya, di wɔl nɔ go bi ples we fayn fɔ de?’

BI PƆSIN WE LƐK FƆ MEK PIS

“Di wan dɛn we de mek pis gɛt gladi-at bikɔs dɛn go kɔl dɛn Gɔd in pikin dɛn.” (Matyu 5:​9) “If i pɔsibul, una du ɔl wetin una ebul fɔ du fɔ mek una gɛt pis wit ɔlman.”​—Romans 12:​18.

BI PƆSIN WE GƐT SƆRI-AT ƐN WE DE FƆGIV

“Di wan dɛn we de sɔri fɔ ɔda pipul dɛn gɛt gladi-at bikɔs dɛn go sɔri fɔ dɛn.” (Matyu 5:​7) “Una kɔntinyu fɔ bia una kɔmpin dɛn ɛn fɔgiv dɛn fɔ fri ivin if una gɛt rizin fɔ vɛks pan dɛn. Jɔs lɛk aw Jiova * dɔn fɔgiv una fɔ fri, na di sem tin unasɛf fɔ du.”​—Koloshians 3:​13.

LIV PISFUL WAN WIT PIPUL DƐN WE GƐT DIFRƐN KƆLƆ

“Ɛn na frɔm wan man [Gɔd] mek ɔl di neshɔn dɛn fɔ mek dɛn de na dis wɔl.” (Akt 17:​26) “Gɔd nɔ de tek wan pɔsin bɛtɛ pas ɔda pɔsin, bɔt na ɛni neshɔn, di man we de fred Gɔd ɛn du wetin rayt, na in Gɔd de tek as in yon.”​—Akt 10:​34, 35.

RƐSPƐKT DI WƆL

“PAPA GƆD [“Jiova,” NWT] bin put di man we i mek na di fam [gadin] na Idɛn, fɔ mek i go tek kia ɔf am ɛn wok de.” (Jɛnɛsis 2:​15) Gɔd go “pwɛl di wan dɛn we de pwɛl di wɔl.”​—Rɛvɛleshɔn 11:​18.

NƆ WANT ƆLTIN FƆ YUSƐF ƐN NƆ DU MAMI ƐN DADI BIZNƐS DI WE AW GƆD NƆ WANT

“Una opin una yay ɛn tek tɛm mek una nɔ want ɔltin fɔ unasɛf, bikɔs ilɛk pɔsin gɛt bɔku tin dɛn, nɔto dat de gi am layf.” (Lyuk 12:​15) “Una nɔ fɔ ivin tɔk bɔt mami ɛn dadi biznɛs di we aw Gɔd nɔ want, ɔ ɛnikayn dɔti tin, ɔ bɔt aw una want ɔltin fɔ unasɛf, jɔs lɛk aw oli pipul dɛn nɔ fɔ du.”​—Ɛfishians 5:​3.

BI PƆSIN WE ƆNƐS, ƐN WOK TRANGA WAN

“Wi want fɔ ɔnɛs pan ɔltin.” (Ibruz 13:​18) “Lɛ di pɔsin we de tif nɔ tif igen, bifo dat, lɛ i wok tranga wan.”​—Ɛfishians 4:​28.

I IMPƆTANT FƆ ƐP DI WAN DƐN WE NID ƐP

“Una tɔk fayn to di wan dɛn we dɛn at pwɛl, una sɔpɔt di wan dɛn we wik, una peshɛnt wit ɔlman.” (1 Tɛsalonians 5:​14) “Kia fɔ pikin dɛn we de sɔfa we dɛn mama ɛn papa dɔn day ɛn uman dɛn we de sɔfa we dɛn man dɛn dɔn day.”​—Jems 1:​27.

Di Baybul nɔ jɔs tɔk bɔt dɛn fayn abit dɛn de. Bɔt i de tich wi fɔ valyu dɛn prinsipul dɛn de, ɛn aplay dɛn na wi layf ɛvride. If bɔku pipul dɛn rili tray fɔ aplay di tin dɛn we di Baybul de tich, yu nɔ tink se dat go ɛp fɔ sɔlv di wɔs prɔblɛm dɛn we de na di wɔl? Fɔ tru, di prinsipul dɛn we de na di Baybul rili impɔtant, ɛn wi nid dɛn naw pas ɛni ɔda tɛm! Bɔt wetin di tin dɛn we di Baybul de tich, go du fɔ yu rayt naw?

Di man we gɛt sɛns pas ɔlman we dɔn liv na di wɔl bin se: “Di tin dɛn we pɔsin de du di rayt we na in de sho se i gɛt sɛns.” (Matyu 11:​19) Yu nɔ tink se dat na tru? Di tin we de rili sho se sɔntin mek sɛns, na aw i de wok we yu aplay am. So sɔntɛm yu go de tink: ‘If di Baybul rili de bɛnifit pɔsin, i nɔ fɔ mek gud tin apin na mi layf? Aw di Baybul go ɛp mi wit di prɔblɛm dɛn we de mit mi rayt naw?’ Lɛ wi tɔk bɔt wan ɛgzampul.

Fɔ Dɛlfin, * layf bin bizi, i bin gɛt bɔku tin dɛn fɔ du, ɛn ɔltin bin de go fayn fɔ am. Bɔt wantɛm wantɛm, bad tin dɛn bin apin to am. In galpikin bin day, in mared-os bin skata, ɛn i bin gɛt mɔni prɔblɛm. I bin tɔk se: “A nɔ ivin no udat a bi. Mi galpikin dɔn day, a nɔ gɛt man, ɛn a nɔ gɛt os. A bin fil se mi yon dɔn dɔn; dɛn nɔ go no natin bɔt mi, a nɔ bin gɛt trɛnk, a nɔ bin ivin de tink bɔt tumara bambay.”

So fɔ di fɔs tɛm Dɛlfin bin kam fɔ si di tru we de na dɛn wɔd dɛn ya: “Mɔtalman fɔ liv fɔ sɛvinti ia bɔt if i gɛt trɛnk, i kin de fɔ eti, ɛn da tɛm de i go de sik bɔku ɛn gɛt ɔlkayn trɔbul, dɔn na so tɛm go de flay fɔ am.”​—Sam 90:​10.

Dɛlfin bin tɔn to di Baybul di tɛm we i bin nid ɛp. Wetin di Baybul bin du fɔ am bin rili wɔndaful. As di ɔda tri atikul dɛn we de afta dis go sho, bɔku ɔda pipul dɛn dɔn kam fɔ si aw di Baybul dɔn ɛp dɛn we dɛn aplay di advays we de de we dɛn gɛt prɔblɛm. Dɛn dɔn kam fɔ si se di Baybul tan lɛk da fayn istri tin we wi tɔk bɔt na dis atikul in biginin. I difrɛn frɔm di bɔku bɔku buk dɛn we dɔn ol ɛn kɔmɔt na stayl. Yu tink se na bikɔs dɛn yuz difrɛn tin fɔ mek di Baybul? Fɔ se rili na Gɔd in wɔd de de ɛn nɔto jɔs wetin mɔtalman tink?​—1 Tɛsalonians 2:​13.

Sɔntɛm yusɛf dɔn kam fɔ si se layf rili shɔt ɛn i gɛt bɔku prɔblɛm dɛn. We yu gɛt prɔblɛm dɛn we de mɔna yu, usay yu kin tɔn fɔ kɔrej, sɔpɔt, ɛn gud advays?