Di Spanish Langwej Transleshɔn Tim Muf Go na Spen
Jizɔs bin tɔk se dɛn go prich di gud nyus bɔt Gɔd in Kiŋdɔm ɔlsay na di wɔl. (Matyu 24:14) Frɔm di ia 1909, Jiova Witnɛs dɛn dɔn de mek buk ɛn magazin dɛn insay Spanish fɔ ɛp pipul dɛn we de difrɛn say dɛn na di wɔl fɔ yɛri di mɛsej bɔt di Kiŋdɔm insay dɛn yon langwej. We dɛn kɔnt di langwej dɛn we bɔku pipul dɛn de tɔk frɔm di tɛm we dɛn smɔl, na Spanish de sɛkɔn afta Chayniz. Na lɛk fayv ɔndrɛd milyɔn pipul dɛn de tɔk Spanish na di wan ol wɔl.
Wiliam we de na di Spanish transleshɔn tim bin tɔk se: “Spanish na langwej we dɛn de tɔk na difrɛn difrɛn kɔntri dɛn wit bɔku difrɛn kɔlchɔ dɛn. Di men tin we wi de du na fɔ translet di kayn we we go tɔch pipul dɛn at ilɛksɛf dɛn kɔmɔt difrɛn say dɛn, dɛn go skul ɔ dɛn nɔ go skul, ɔ ilɛksɛf dɛn gɛt mɔni ɔ dɛn nɔ gɛt.” Fɔ mek ɔl dɛn kayn pipul dɛn ya bɛnifit, di transleshɔn tim bin gɛt pipul dɛn we kɔmɔt Ajɛntina, Kolombia, Ɛl Salvedɔ, Guatemɛla, Mɛksiko, Poto Riko, Amɛrika, Yurogwe, Vɛnizwela ɛn, Spen.
Fɔ lɔng tɛm, Jiova Witnɛs dɛn bin de du Spanish transleshɔn na Amɛrika ɛn sɔm ɔda transletɔ dɛn we de na Ajɛntina, Mɛksiko, ɛn Spen bin de ɛp dɛn. Insay 1993, dɛn mek di Spanish transleshɔn tim muf go na Poto Riko fɔ mek ɔl di transletɔ dɛn go wok togɛda na wan ples.
Insay Mach 2012 dɛn bin disayd se di Spanish Transleshɔn Dipatmɛnt fɔ muf bak, bɔt dis tɛm dɛn fɔ go na di branch ɔfis we de na Spen. Ɛdwɔd bin tɔk se, “Nɔto jɔs pipul dɛn, tin dɛn, ɛn mashin dɛn nɔmɔ wi bin nid fɔ muf wit, wi bin gɛt fɔ kɛr wan ɔda impɔtant ‘mɛmba’ na wi dipatmɛnt dat na di transleshɔn laybri.” Di laybri gɛt lɛk 2,500 rɛfrɛns tin dɛn fɔ rɛfrɛns ɛn sɔm pan dɛn tin dɛn de na bin difrɛn difrɛn Spanish Baybul transleshɔn dɛn.
Dɛn de wɛlkɔm dɛn na Spen
Di Spanish Transleshɔn Dipatmɛnt bin rich na dɛn nyu os Me 29, 2013, ɛn di Bɛtɛl famili we de na Spen bin wɛlkɔm dɛn fayn. Transletɔ dɛn, tin dɛn fɔ rɛfrɛns, ɛn mashin dɛn bin muf, bɔt bikɔs dɛn plan fayn ɛn dɛn wok tranga wan, di wan dɛn we de rid di Spanish buk ɛn magazin dɛn nɔ bin gɛt ɛni prɔblɛm. Ɛdwɔd bin tɔk se: “Na di mɛsej bɔt di Kiŋdɔm na in na di men tin, ɛn wi want bɔku pipul dɛn we de tɔk Spanish fɔ rid am.”