Chɔŋ 11:1-57
11 Po pilɛ wa a naa diolaŋ aa Lasalɔɔ. Bɛtani o wa ichali ni, o sɔndɔkɔlɔ Meele nda Mata bɛ ndɔ wo.
2 Meelioo hoo ndoo suu Masanɔɔ chuɛima chuŋ kɛndiaŋ ni, mbo wɔɔsuu ndu peloŋ a yiiŋii nduɛi. Yema ndɔ wa Lasalɔɔ ndoo del a naa wo ni.
3 Okoŋ mi yemaa nduaa yɔŋ yooŋgoo naa Chiisu chua aa: “Masanɔɔ, chaaŋ num kaalaa cho a naa.”
4 Mɛɛ Chiisu tuei yooŋgoo hoo, mbo dimi aa: “Naa hoo cho ko mɛɛlu o piɔmndo le, kɛ le mi Mɛlɛka sɔla saŋgalaa, nduyɛ mi Po Mɛlɛkaa sɔla saŋgalaa leniŋ.”
5 Chiisu ndoo kaala Mata, Meele, a Lasalɔɔ.
6 Kɛ mɛɛ o tuei maa Lasalɔɔ cho a naa, mbo chɔɔlu palɛi chua i ŋiiŋ o fondaŋ o wa koŋ ndo.
7 Okoŋ kɔɔli, mbo dimul buɛiyaa nduaa aa: “La ŋ kɔŋnuŋ vɛlɛ Chudiaa.”
8 Mi buɛiyaa nduaa dimul ndu aa: “Wana Pɛɛkaa, pɛi suŋ waŋnda Chudiaa wa kindiŋndo le num vii viiyo a poutaŋ. Loŋ ŋ cho vɛlɛ dimioo le kɔlaŋ ni?”
9 Mi Chiisu muli aa: “O paaleŋ niŋ, nyɛ teŋgaa wa le hawɛilaŋ* 12, lende le? Te waŋndo wa pɛ kelaa ipala deŋ, o boŋ o nyɛ o nyɛ le, kanifuule o cho chɔɔ nyɛ teŋgaa cho le chieeŋndo wo.
10 Kɛ wana o wana kela o nyumndaŋ niŋ pɛ, o cho boŋ, kanifuule nyɛ teŋgaa cho ndu niŋ te.
11 Mɛɛ o chii sɔɔŋ muŋ dimi, mbo dimi vɛlɛ aa: “Chaaŋ naa Lasalɔɔ cho o malɔ, kɛ I cho lakɔ loŋ mi kɔ tindi ndu.”
12 Mi buɛiyaa nduaa dimul ndu aa: “Masanɔɔ, te o malɔ o cho ni, mɛɛ o cho sioŋgɔɔ.”
13 Dimioo Chiisu wa ni maa Lasalɔɔ vi. Kɛ buɛiyaa nduaa wa ko yiyaŋndo maa a lɔma yɔŋaŋ maŋ okɔɔ o wa suɛi ni.
14 Okoŋ mi Chiisu dimul nda kpendekele aa: “Lasalɔɔ vi pɛ.
15 Nduyɛ I cho a nyaale le nya le mɛɛ ya ve loŋ te yɛ, le halikpeŋ mi la laalaŋ. Kɛ ŋ kɔŋnuŋ naa o cho wa.”
16 Okoŋ mi Tɔmɔsi, o ndaa veelu aa Pɛnduaa wo dimul chaaŋaa nduaa buɛiya aa: “La ŋ kɔŋnuŋ naa ndaa, le miŋ kɔ wu a ndu latulu.”
17 Mɛɛ Chiisu fuuluu loŋ, o komal Lasalɔɔ wa niŋ o sɛiyo* niŋ le palɛi i hiɔɔlu.
18 Chɔŋ Bɛtani kɔ Chulusalɛm, tiŋndo ndoo wa le kilolaŋ la yaa.*
19 Mi Chuuwaa bɔɔbɔɔ huŋ le Mata nda Meele kɔllo dɛɛniaa le piɔm yema nda wo.
20 Mɛɛ Mata tuei maa Chiisu cho hunɔɔ, mbo kua ndu diomɔɔ, kɛ mi Meele ndu lo o chiɛiyo.
21 Mi Mata dimul Chiisu aa: “Masanɔɔ, te num oo wa naŋ pɛ, yema nuu ve wu le.
22 Kɛ I laalaŋ maa suŋ suŋ bɛɛ te a nyuna pɛ Mɛlɛka le nyɛ o nyɛ, o nɔla mbo ke num ndu.”
23 Mi Chiisu dimul ndu aa: “Yema num cho miiŋgu yoomu.”
24 Mi Mata dimi aa: “I sina maa o cho hunɔɔ miiŋgu yoomu o paale mɛɛlaaleŋ choo teleŋ waŋvilɛiya cho wa miiŋgoo yoomu wo.”
25 Mi Chiisu dimul ndu aa: “Ya miŋgi waŋnda yoomu ni. Nduyɛ ya cho yoomoo ni. Wana o wana dɔu pɛ laalaŋndo o ya niŋ, o yɔŋ bɛɛ mbo vi, o cho vɛlɛ miiŋgu yoomu.
26 Wana o wana cho pɛ yoomu, nduyɛ mbo dɔu laalaŋndo o ya niŋ, fɛɛŋ bɛɛ wana koŋ o vi le. A laalaŋ pa a hei?”
27 Mbo muli aa: “Ei Masanɔɔ, I laalaŋ maa num cho Kiliti ni, Po Mɛlɛkaa, wana ndoo nɔ le hunɔɔ o chieeŋndo choo wo.”
28 Mɛɛ Mata chii hei dimi, mbo miiŋgu naa Meele pɔmbɔ ndɔ chua, mbo dimul ndu toolo aa: “Wana Pɛɛkaa hiŋ. O cho num veeloo.”
29 Mɛɛ Meele tuei hei, mbo chaŋ nya mbo kua naa Chiisu chua.
30 Chiisu ndoo hel lɔ chiee le, kɛ o wa wɔ o fondaŋ Mata komal ndu wo.
31 Mɛɛ Chuuwaa wa latulu a Meele chiɛiniŋ ma wa ndu kɔllo dɛɛniaa wa che mi Meele chaŋ nya mbo fula o bɛɛ, ma tual ndu kɔɔli. A wa ko yiyaŋndo maa o sɛiyo* o wa kɔlaŋ le chaŋndo ni.
32 Mɛɛ Meele fuuluu o fondaŋ Chiisu wa wo mbo cha ndu, mbo beŋ ndu wulaŋ. Mbo dimi aa: “Masanɔɔ, te num oo wa naŋ pɛ, yema nuu ve wu le.”
33 Mɛɛ Chiisu che Meele a Chuuwaa ndaa hiŋ ndu kɔɔli wa chaŋndo, mi mɔnɛi bii ndu tau, nduyɛ mbo tambu kɔl.
34 Mi Chiisu nyuna aa: “Kuɛɛnɛ nya kumbu yɛ ndu? Ma dimul ndu aa: “Masanɔɔ, huŋ ma che.”
35 Mi mɛmiaŋ ma tual Chiisu kpasu kpasu.
36 Okoŋ mi Chuuwa kandu dimioo aa: “Tofawɔ se kaala bɛndu ndoo nɔ le ndu wo!”
37 Kɛ mi apum dimi aa: “Baa po tosa hoo mi po sumɛiyo cha wo ndoo tiuba mbo kɛɛlu poo hoo piɔmndo le?”
38 Mi mɔnɛi chɔɔlu Chiisu biyɔɔ o kɔl niŋ, okoŋ mbo kua o sɛiyo.* Sɛi buuloo o wa ni, nduyɛ pouwo wa o handaa o sondoo.
39 Mi Chiisu dimi aa: “La faŋa pouwo.” Mi Mata, yemaa po vi wo dimi aa: “Masanɔɔ, o kɛɛ niŋ wa chuŋndo le, kanifuule palɛi i hiɔɔlu o chua niŋ o sɛiyo niŋ ni.”
40 Mi Chiisu dimul ndu aa: “Ya le dimul num maa te a laalaŋ pɛ, a cha niŋ kpaaya bɛndu Mɛlɛkaa le?”
41 Okoŋ ma faŋa pouwo. Mi Chiisu heelu hɔlla choo choo, mbo dimi aa: “Kɛkɛ, I mel num balika le mɛɛ ŋ muli piɛile nileŋ yɛ.
42 I sina maa teleŋ o teleŋ a cho piɛile nileŋ mulioo. Kɛ le faŋga sim hoo wo ya cho hei dimioo ni, le ma laalaŋ kɛsɛ maa num vem ya ni.”
43 Mɛɛ o chii sɔɔŋ muŋ dimi, mbo deŋi choo choo kpeleŋ aa: “Lasalɔɔ, fula!”
44 Mi po wa hoo o vilɛiyo wo fula. Nduyɛ kolala ŋpɛŋgɛlaŋ la wa ndu la yiu yiuwaa o peloŋ a balaŋ. Kolaa wa ndu o yiyaa o hɔl. Mi Chiisu dimul nda aa: “La tiimbuu ndu mbo kuɛŋnuŋ.”
45 Mɛɛ Chuuwaa ndaa hiŋ Meele yilɔɔ wa che nyɛ Chiisu tosa wo, mi a bɔɔbɔɔ duau laalaŋndo o ndu niŋ.
46 Kɛ mi apum kua o Falisiiya lo ma kɔ dimul nda nyɛ Chiisu tosa wo.
47 Okoŋ mi masaa wanaa soliaa lasalaa, a Falisiiya chuuŋgiaa Laŋgbaa Kalaa Kialu Yamaŋ Nda naapilɛ ma dimi aa: “Poo hoo cho bɔɔ kaamaalaŋ tosaa. Yɛɛnɛ naŋ cho yɛ tosa?
48 Te ŋ mal ndu lende pɛ mbo hiou lachi, nda kpou cho laalaŋndo dɔwɔɔ o ndu niŋ, nduyɛ mi Luomaŋnda huŋ puu fondaŋ naa lepiɛiyo a lɛŋnde naaleŋ.”
49 Kɛ mi wana pilɛ nda tɛɛŋ diolaŋ Kayafaa, o wa wana bɛndu wanaa soliaa lasalaa le wɔsi koŋ ndo dimul nda aa: “La sina nyɛ o nyɛ le.
50 La sina nuaa maa o cho suɛi tɔnɔ le nya, le mi wana pilɛ vi le waŋnda, mbo hiau kaaleŋ kpou tambei sɔlaa le?”
51 O dimi suɛi hei o ndupila niŋ te, kɛ le mɛɛ o wa wana bɛndu wanaa soliaa lasalaa le wɔsi koŋ yɛ, mbo dimi yooŋgu Mɛlɛkaa maa Chiisu nɔ le piɔmndo sɔlaa le Chuuwa.
52 Nduyɛ maa o cho ko le Chuuwa le, kɛ le mbo chuuŋgiaa chuauwaa Mɛlɛkaa, a wa a saŋnaŋnda wa diompilɛ.
53 Chɔŋ a paale leŋ, ma tuu le Chiisu diyɔɔ.
54 Le hei, Chiisu ndoo belu lɛ kpendekele Chuuwa tɛɛŋ te. Mbo faŋaŋ o fondaŋ koŋ mbo kuaŋnuŋ o tanda wa o pollo ikɛiyo o chiee nda veelu aa Ifiluem ndo, mbo waŋnuŋ loŋ nda buɛiyaa nduaa.
55 Bɔŋaŋ Hiouwɔɔ Choo Chuuwa wa niŋ kpɛɛluŋ. Le hei, mi wanaa bɔɔbɔɔ fula o chiooŋ a sɔndɔkɔltaŋ ma kua Chulusalɛm. Ndaa kuɛ le ma sɔla dindioo a mɛɛ sawaa ndoo dimi yɛ, tuupa mi bɔŋaŋndo hoo ndoo kanduŋ.
56 A wa Chiisu nuuviaa. Mɛɛ nda wa isisi o chiɛi Mɛlɛkaa ikɛi, ma wa nyuuniaŋndo aa: “Vɛɛ nya yiyaŋ yɛ? Baa o cho hunɔɔ o bɔŋaŋndo hoo le?”
57 Kɛ mi masaa wanaa soliaa lasalaa, a Falisiiya dimul waŋnda maa wana o wana sina pɛ naa Chiisu cho wa, o kɔ dimul nda le ma kɔ bii ndu.
Tɛɛsiaalaŋ
^ Ɔɔ “lɛɛlɛlaŋ.”
^ Ɔɔ “sɛi loonaŋndo.”
^ Kilikiiye, “le mɛɛliilaŋ la tiɔɔŋ. Fondaŋnda bɛndula luaa bɔltaŋ 15.” Tofa Tɛɛsiaa.
^ Ɔɔ “sɛi loonaŋndo.”
^ Ɔɔ “sɛi loonaŋndo.”
