Maatiu 28:1-20
28 Mɛɛ Paale Pɛŋgiaaleŋ le hiou, mi Meele Madaliŋ a Meelioo opilɔɔ huŋ sɛiyo tofaa o paale taseleŋ choo o lɔɔ bɛŋgu, a teleŋ paaleŋ le huŋ le siɔɔ wo.
2 O lepilɛ niŋ kpe, mi lɛŋndeŋ le nyiiya tau tau. Kanifuule mi maalikɛinɔ Chɛhowa* wo fula o choo choo niŋ mbo huŋ faŋa pou wa o sɛiyo sondoo wo, mbo chal lechoo.
3 Wana ndoo che ndu pɛ aa nyɛ ŋualalɛi letaŋndo ni. Nduyɛ nyɛla wa ndu lekɔɔ laŋ la wa la humbu fo fo bɛndu.
4 Le hei, mi siooŋnde bii puaa chɔuwaa wa sɛiyo mandaa wa, ma nyiiya kpa kpa. Ma wou kpandeŋ, nduyɛ ma yɔŋnuŋ maa wanaa vilɛi.
5 Kɛ mi maalikɛinɔɔ dimul waŋ laanduaa haa aa: “La yɔŋ isiooŋ te. Kanifuule, I sina maa Chiisu nda dii o yɔmndo choo wo nya cho nuuviaa ni.
6 O cho lɛ naŋ te. O miiŋgu yoomu a mɛɛ o dimi yɛ. La huŋ mi la che fondaŋ o wa o yambaa wo.
7 Okoŋ, mi la kuɛ chɔ chɔ mi la kɔ dimul buɛiyaa nduaa maa o miiŋgu yoomu. Nduyɛ maa o cho nya pɔɔ kɔlaŋ lachi Kalili. La cho ndu lakɔ chɔ loŋ. Yooŋgoo hoo ya chuu nya ni.”
8 Okoŋ, mi waŋ laanduaa haa faŋaŋ o sɛiyo* chɔ chɔ. Siooŋnde wa nda, kɛ a wa vɛlɛ a nyaale. Ma nyaanuŋ le ma kɔ dounuŋ buɛiyaa nduaa kona.
9 A lo kɔlaŋ, o lepilɛ niŋ kpe ma bɔŋaŋ nda Chiisu waa, mbo yil nda aa: “La wosɛ!” Ma sɔɔŋguu ndu ikɛi, ma baŋ wulaŋ, nduyɛ ma saa ndu peloŋ le ndu bɛɛleŋ kioo.
10 Mi Chiisu dimul nda aa: “La yɔŋ isiooŋ te! La kɔ mi la dimul puaapiliaa niaa maa a kɔ Kalili, a cho lakɔ ya chɔ loŋ.”
11 Waŋ laanduaa haa wa wɔ nɛi tɛɛŋ, mi puaa chɔuwaa wa sɛiyo mandaa wa apum kua chiee ma kɔ dimul masaa wanaa soliaa lasalaa nyɛ o nyɛ yɔŋnuŋ.
12 Mɛɛ wanaa soliaa lasalaa nda laŋgbaa kalla naŋgu a ndi okɔɔ, ma ke puaa chɔuwa kaniŋ* humboŋ tau.
13 Ma dimul nda aa: “La dimul waŋnda aa, ‘Boondii naŋ wa o malɔ ve, mi buɛiyaa nduaa huŋ a nyumndaŋ ma chiimbuu dialuŋ ndɔŋ.’
14 La yɔŋ isiooŋ te. O yɔŋ bɛɛ mi Paile tuei a ndi okɔɔ, ŋ cho isɔɔ o ndu lo.”
15 Okoŋ mi puaa chɔuwaa wa sɛiyo mandaa wa bii kaniŋ humbuŋ muŋ, ma tosa mɛɛ nda dimul nda yɛ. Nduyɛ mi suɛi hei tiu Chuuwa tɛɛŋ silɔ haaa mbo huŋ bii a hau.
16 Mi kiilaa 11 kua Kalili o pembii Chiisu dimi le ma kɔ bɔɔŋiaŋ nde choo.
17 Mɛɛ nda che ndu, ma beŋ ndu wulaŋ. Kɛ mi apum kiisaŋ te ndu ni.
18 Mi Chiisu sɔɔŋguu nda ikɛi mbo dimul nda aa: “Mɛlɛka ke ya kpaayaa nyɛ o nyɛ choo o choo choo niŋ a o lɛŋndeŋ choo.
19 Lelaŋ, la kɔ o ŋwaŋnda chiee lo ba o ba fee mi la siiŋguu nda buɛiyaa ni, mi la yiŋ nda o diola Finyaa niŋ, a Poo, a nyina diandaa.
20 Mi la pɛɛku nda le ma tosa nyɛ o nyɛ ya dimul nya le tosaa. Nduyɛ, la kɛsiŋ o kɔl maa I cho wa a nya latulu lepaa o lepaa haaa mi chieeŋndo fuuluu o mɛɛlulaŋ.”*
