Maatiu 6:1-34
6 “La mandaŋ le chɔmndo waŋnda o hɔl maa, la cho nyɛ cho o kɛndɔɔ wo tosaa le ma che nya. Kanifuule, la cho fanda sɔla Finya nya cho o choo choo niŋndo o ba le.
2 Teleŋ o teleŋ te a wa wanaa bala fonduaa kɛndɛi tosallo* pɛ, tosa mi waŋnda muli num hɔlla kɔɔli mɛɛ wanaa mulu muluaŋnda tosa o chiɛila Chuuwa piɛi Mɛlɛka laŋ niŋ a o nɛila bɛndulaŋ choo yɛ le. Kanifuule, nda nda a tosa hei le mi waŋnda saŋgala nda. A tonya mi dimul nya, a chii fandaa o ndaa sɔla.
3 Kɛ te a wa kɛndɛi tosaa pɛ, tosa mi ba num miallo sina nyɛ ba num kɛndɔɔ cho tosaa wo le.
4 Te a tosa ndi pɛ sɔɔ sɔɔ, Finya num cha hoo nyɛ o nyɛ fee wo cho num fanda.
5 “Nduyɛ te la wa piɛileŋ pɛ, la tosa mɛɛ wanaa mulu muluaŋnda tosa yɛ le. Kanifuule, te a wa pɛ piɛileŋ, o chiɛila Chuuwa piɛi Mɛlɛka laŋ niŋ, a o nɛila bɛndulaŋ choo nda sim ni le mi waŋnda che nda. A tonya mi dimul nya, a chii fandaa o ndaa sɔla.
6 Kɛ te a wa piɛileŋ pɛ, luɛi o lumui numndo niŋ num pilɛ kpe. Nduyɛ te a kinda pɛ dioo, a piɛi o Finya num ndo o wanachiee chi le wo. Okoŋ, Finya num o cha hoo nyɛ o nyɛ fee wo cho num fanda.
7 Te la wa piɛileŋ pɛ, la lambaŋ sondoo miŋgioo o diomnda pilɛlaŋ choo mɛɛ wanaa laalaŋ o Mɛlɛka niŋ te wa tosa yɛ le. Kanifuule, a yiyaŋ maa Mɛlɛka cho nda nilaŋ yaŋɔɔ te a soo pɛ tau tau.
8 Lelaŋ, la wa maa nda le. Kanifuule, Mɛlɛka Finya nya sina nyɛ nya hau ba wo tuupa bɛɛ mi la nyuna ndu.
9 “Te la wa piɛileŋ pɛ, la dimi aa:
“‘Finya naa o choo choo niŋ, maa diola numndaŋ la wa la diandaa.*
10 Maa Masale numndeŋ le huŋ. Maa hɛnaŋ numndo tosaŋ o choo choo niŋ a o lɛŋndeŋ choo.
11 Tosa a sabu miŋ sɔla nyɛdiaa naŋ dia paale hauleŋ ndo.
12 Mal naa haki le yɔŋnda naala wɔɔŋndaŋ, mɛɛ naa bɛɛ ŋ mal wanaa tosal naa sɔɔŋ wɔɔŋndoŋ nda haki yɛ.
13 Chɛl mi tɔɔndaŋndo tiu naa ba le. Manda naa yɔŋii Setana* tiu naa ba.’
14 “Te la mal waŋnda haki le sɔɔŋ wɔɔŋ nda tosal nya woŋ pɛ, Mɛlɛka Finya nya cho o choo choo niŋndo bɛɛ cho nya haki malɔɔ le yɔŋnda nyala wɔɔŋndaŋ.
15 Kɛ te la mel waŋnda haki le sɔɔŋ wɔɔŋ nda tosal nya woŋ te, Finya nya cho o choo choo niŋndo bɛɛ mel nya haki le hakila nyalaŋ te.
16 “Te la wa sumndo biyɔɔ pɛ, la yii hɔlla mɛɛ wanaa mulu muluaŋnda tosa yɛ le. Kanifuule, a bii pɛ a tosa hɔlla a wɔɔŋ wɔɔŋ le mi waŋnda che maa a cho sumndo biyɔɔ. A tonya mi dimul nya, a chii fandaa o ndaa sɔla.
17 Kɛ nya nya, te la wa pɛ sumndo biyɔɔ, la pulu hɔlla, okoŋ mi la suunuŋ chuɛiyaŋ o lebol.
18 O hei niŋ, wana o wana sina maa la cho sumndo biyɔɔ le, mɛɛ Finya nya o wana chi hoo le wo. Okoŋ, Finya nya, o cha hoo nyɛ o nyɛ fee wo cho nya fanda.
19 “La pɛŋgi nyɛm sulaŋ chuuŋgiaa o lɛŋndeŋ choo, naa ŋ nɔla miŋ sɔwa ɔɔ mi kaaŋguaa de muŋ, te koŋ te mi viiya luɛi ma chiimbuu muŋ nda.
20 Kɛ la chuuŋgiaa nyɛm sulaŋ o choo choo niŋ. Loŋ ndu, ŋ sɔwa le, kaaŋguaa di muŋ te, nduyɛ viiyaa luei ma chiimbuu muŋ te.
21 Kanifuule, naa ŋ kɛsi nyɛm num sulaŋnda, loŋ koni kɔl numndo wa ni.
22 “Hɔlteŋ le cho nyɛ teŋgaa le dialloŋ ni. Te a kɛsi pɛ hɔlte numndeŋ o nyɔɔ opilɛ* choo, ŋ teŋgaa wakee dialuŋ numndoŋ kpou ŋ wa ni.
23 Kɛ te a kɛsi pɛ hɔlteŋ o nyɔɔŋ tau choo, dialuŋ numndoŋ kpou o nyumndaŋ niŋ ŋ wa ni. Te nyɛ teŋgaa cho num niŋndo simnuŋ pɛ nyumndaŋ, mɛɛ nuawɔ se nyumma kpiŋgbi bɛndu!
24 “Waŋndo ve buɛiyo le masaa a ŋiɔɔŋ te. Kanifuule, te hoo o kaala ni, o tul opilɔɔ leyɛ. Te hoo o diikuŋ ni, o diikuŋ opilɔɔ le. Lelaŋ, wana ve buɛiyo le Mɛlɛka, ma wa vɛlɛ buɛiyo le nyɛsɔlaa le.
25 “Lelaŋ mi dimul nya: La pɛŋgi buulaŋndo le nyɛ nya dia wo, a nyɛ nya kol mi la wa yoomu wo, ɔɔ le nyɛ nya wounuŋndo. Baa yoomoo cho o sɔvɛ mbo hiau nyɛdiaa a nyɛ chuɛɛnaŋndo poloŋ te?
26 La mɛɛndaŋndɔ youwa o choo choo niŋ nyɛkɛndɛi. A tosa wali ichiɛɛ, kɛlɛŋgaa ma kou, ɔɔ ma chuuŋgiaa nyɛdiaa o lakonda le. Kɛ a koŋ fau, mi Finya nya o choo choo niŋ ke nda nyɛ nda dia wo. Baa la cho a sɔvɛ mbo hiau youwa poloŋ te?
27 Nɛɛnɛ cho yɛ nya tɛɛŋ mbo chɔɔlu yoomu ndɔɔ bɛndi* a buulaŋnda ndɔlaŋ?
28 Le sabu yɛɛ nya buulaŋ yɛ le nyɛ chuɛɛnaŋndo? La yiyaŋndɔ a bil lapeeŋgoo yondoo niŋ mɛɛ o naŋ yɛ. O tosa wali le, nduyɛ o sondu lanyɛ le.
29 Kɛ mi dimul nya, mi che bɛɛ mi Sɔlɔmɔŋ ndoo sul sullo pila, kɛ chuɛɛnɔŋ ndɔɔ ndoo fuuluu naŋɔɔ maa bil lapeeŋgoo le.
30 Te Mɛlɛka nɛŋi pɛ billo yondoo niŋ nuaa, o cho hau puiyo, siɔdii a lom ndu o yiŋ ndo, baa o nɔla mbo tosa nyɛ pilɛ koŋ kpe le nya le? Baa la nɔ laalaŋ bɔɔ le?
31 Lelaŋ, la buulaŋ mi la dimi aa, ‘O yɛɛnɛ naŋ dia yɛ niŋ nɛ?’ ɔɔ, ‘O yɛɛnɛ naŋ kol lɛ niŋ nɛ?’ ɔɔ, ‘O yɛɛnɛ naŋ wounuŋ yɛ niŋ nɛ’ le.
32 Kanifuule, nyɔɔŋ muŋ kpou wanaa laalaŋ o Mɛlɛka niŋ te wa cho fafalaa le sɔlaa ni. Finya nya cho o choo choo niŋndo sina maa la hau ba le nyɔɔŋ muŋ kpou.
33 “La hiou lachi a Masale Mɛlɛkaleŋ vɛlɛ a sakpoyɛi nduɛi kɛsioo nyɛ tase. Okoŋ kɔɔli, nyɛm tɔɔŋ fau o cho nya muŋ ke.
34 Lelaŋ, la buulaŋ le siɔdii le. Siɔdii nɔ buulaŋnda ndɔlaŋ. Lepaa o lepaa nɔ bahawɛila ndɔlaŋ.
Tɛɛsiaalaŋ
^ Tofa Tɛɛsiaa.
^ Ɔɔ “kɛsi diola numndaŋ la diandaa.”
^ Kilikiiye, “wana dɛnɛ wɔɔŋndo.”
^ Kilikiiye, “tɛtɛlɛ.”
^ Kilikiiye, “helɔɔ.” Tofa Tɛɛsiaa.
