O sɔndɔkɔlɔ pilɛ o Luom niŋ nda velu ya ni. Loŋ nda manda ya ni nduyɛ, wanaa bala fonduaa pila cho o tandaa hoo niŋ ni. Yoomoo wa o kala kpoke le ya. I sina pɛŋ kala velu ya wo le. Nduyɛ chaŋyɛi kɛndɛ ve naa tɛɛŋ naa finya nuu le. O nɛilaŋ yaa balu ni le o diaa sɔlaa.

Dimioo naa mi fuuluu wɔsilaŋ tɔ, mi kandu viileŋ tosaa. Mɛɛ ya fuuluu wɔsilaŋ 12, mi fulaŋ chiɛiniŋ le teleŋ tasoo. Teleŋnda bɔɔbɔɔ, o chiɛi polisiiya finya nuu ndoo kua ya kɔɔli ni miŋ kuɛ o bɛɛ. Mi yaa hiŋaŋ diomndaŋ a waŋnda teleŋ o teleŋ. Sɔŋgɔlaŋ pila yaa kaala ni, nduyɛ mi yaa tuulu kɔl a wana o wana. Mɛɛ ya fuuluu wɔsilaŋ 14, mi mal niko chiɛiyo kpeekpei. Mi kandu kooma wana ve o numpila niŋ te waŋ chuaa, a luaŋ o chioo choo. Mɛɛ yaa nɔ yɛ naa hiniaa le yɛ, mɔmbilta pila laŋ yaa pesi ni mi lɔl leniŋ, idii puŋ I fulaŋ. Nduyɛ te yaa saaluŋ pɛ naa mɛŋndaŋ ma cho wa, I kɔ puluŋ fo.

Mi simnuŋ viinɔ bɛndu bɛndu. Mi yaa chiimbuu nyɛ o nyɛ. Bɔlɔla waŋnda poondiaa, a waŋnda kɔlaŋ delɔɔ choo o chiɛila ndalaŋ a nyumndaŋ. Mi tɔɔ ni wɔɔŋndo kandu tiuwo silɔ. Mi kunda viyaa maŋtonduaa dɛɛniaa ya le mi wa o kunda ndaa choo. Le hei, mi kandu niko waŋnda kɔlaŋ delɔɔ choo o chiɛila nda kɛsi kanioŋ ndaŋ niŋ. Le mɛɛ yaa nɔ kɔl tuu bɛndoo yɛ, wana o wana wa o kundaa hoo choo ndoo nɔ bɛɛleŋ le ya. Yaa kue ba o ba mi mɛi yekpandi nuu kɔɔli le. Nduyɛ pɛŋ, te yaa wa pɛ luaŋ, I handu ndu o pileiyo bɛŋgu. Mi sɔŋgɔlaŋ, kooma wana ve o numpila niŋ te waŋ chuaa, viileŋ, diomnda nɔɔlɛilaŋ dimioo, a kaa ihini nɔɔlɛiyo luɛi ya o koowaŋ niŋ. Polisiiya wa o peloŋ choo lɔɔlɔɔ le ya nuuviaa. Teleŋnda bɔɔbɔɔ mi ndaa bii ya, ma wou ya o chiɛi manyumndo niŋ. Nduyɛ hei wa yɔŋnuŋndo le wɔsila bɔɔbɔɔ.

Mɛɛ nda soli ya o chiɛi manyumndo niŋ teleŋ pilɛ, mi kua kala ni pɔmbɔɔ yilɔɔ. I ve o sina choo maa kala ni pɔmbɔɔ nda chuauwaa nduaa ŋiɔɔŋnda ndaa simnuŋ niŋ Seiyaa Chɛhowaa le. Ma dimul la le miŋ kuɛ o bɔŋaŋ Seiyaa Chɛhowaa. Yaa yeema mi sina a nda okɔɔ. Le hei, mi chɛl le miŋ kuɛ naa ndaa. Mɛɛ naŋ fuuluu o Toŋgo leMasaa, mi baŋ le challe o dioo ikɛi le halikpeŋ mi wa tofaa wanaa cho luɛiyɔɔ a fulaa wa. Loŋ bɛɛ, mi kua a yekpandi nuu.

Mi bɔŋaŋ koŋ siŋga yoomu nuu. Mi yiyaŋ maa o chieeŋ cheleŋ niŋ pɔ ya waŋnuŋ ni. Mi wanaa yil la wa kpou chɔm ya kaalaa, nduyɛ hɔlla wa nda mɛmɛlɛsɛɛ. I loonuŋ ndɔ a kaala Seiyaa Chɛhowaa chɔm ya paale leŋ ndo. Mɛɛ nda bii ya yɛ wa teŋgeŋ, a mɛɛ wanaa ya wa choo wa ndaa bii ya yɛ.

Mi kandu Baabuiyo pɛɛkoo a Seiyaa Chɛhowaa. Mɛɛ ya wa hiouwɔɔ lachi a pɛɛkoo fau, mi sina kɛsɛ maa I nɔ mi mal kaala ya wa niŋndaŋ waŋ waŋ. Mi kɛsiŋ nyɛ dimiŋ o Pulɔwaa 13:​20 niŋndo o kɔl. O dimi aa: “Te wana balu a wana kɔl kaloo pɛ, num bɛɛ a simnuŋ wana kɔl kalu. Kɛ wana o wana balu a diɔmnda pɛ, a saŋga.” Mi sina kɛsɛ maa I nɔ mi faŋaŋ kunda ya wa choo wo kɔɔli. Hei ve bɛɛŋ le tosaa le, kɛ a mala Chɛhowaa, mi sɔla batiuwaa.

Mi kandu biinɔŋndo nyɛkɛndɛi. Mɛɛ ya dɔu sɛmbɔɔ tau, mi mal sikɛɛtiiyo kolɔɔ, a kooma wana ve o numpila niŋ te waŋ chuaa. Mi sendi yiiŋii vilɛi yaa nɔ ve, mi viau kelaŋ lani yaa wounuŋ ndoŋ, nduyɛ yaa dimi lɛ diomnda nɔɔlɛi le. Le teleŋ tasoo o yoomu nuu niŋ, mi kandu yapila dɔwɔɔ o mandaa bɛŋgu.

Pɛ pɛ bɛɛ yaa kaala pɛɛkoo ɔɔ diomndaŋ veeloo le. Le hei, simullo pila i wa le ya ni le mi yɔŋguŋ le pɛɛkoo. Kɛ mɛɛ ya wou sɛmbɔɔ, o pɔmpɔmbɔ, mi kandu Chɛhowa kaalaa. Mi kɔl iyama nuu kandu wallo tosaa, nduyɛ mbo kandu ya paaliaŋndo. Teleŋnda bɔɔbɔɔ, mi yaa nɔ yiyaŋnda wɔɔŋndaŋ a yapila okɔɔ. I wa kiisaŋndo te Chɛhowa ndoo mal la niŋ haki le sɔɔŋ wɔɔŋ ya tosa woŋ kpou. O teleŋ ndalaŋ niŋ, mi sɔla kɔl dɛɛniaa tau mɛɛ ya wa diomndaŋ veeloo a mɛɛ Chɛhowa mal Masaa Deeve haki, le yɔŋnda wɔɔŋ wɔɔŋnda o tosa laŋ yɛ.—Saamiɛɛ Diiŋ Ndɔɔ 11:​1–12:​13.

Simul cheleŋ wa le ya wo wa ni, kɔlaŋ chiɛiyo a chiɛiyo le waŋnda chɔmndo a laalaŋ nuu okɔɔ. (Maatiu 28:​19, 20) I wa a siooŋnde yɔŋii yaa komal wana yaa tosal niŋ paandu suɛi wɔɔŋnde wo o wali pollo niŋ. Kɛ o pɔmpɔmbɔ, mi tiu siooŋii nii ba. Mi kandu nyaale kpeekpeiyo sɔlaa le waŋnda malaa ma pɛɛku a Finya naa kaalaa cho o choo choo niŋndo okɔɔ, Finya mal wana haki fasɛiyo.

Pɛɛkoo a Chɛhowa okɔɔ chiindiaa yoomu nuu ni. Chaaŋaa niaa paanduaa a bɔɔbɔɔ vi niŋ, ɔɔ cho o chiɛila manyumndaŋ niŋ. Kɛ ya I cho a nyaale suŋ suŋ, nduyɛ I nɔ tiindaŋndo le chilaŋ. I pɛɛku niŋ le tusiŋndo, diikɔŋndo, a kɔl ni tuuwo dɔwɔɔ o mandaa bɛŋgu. Fulamakɔɔlioo cho ni, chaŋyɛi kɛndɛi cho naa tɛɛŋ naa wanaa balu ya wa. I naŋ baa kɔl le mɛɛ ya chua lanɔ kɛndɛ kɛndɔɔ o nɔɔ niŋ yɛ. Diola ndɔlaŋ aa Kamɛl. Naa ŋiɔɔŋ kpou cho a nyaale le acheleŋnda malaa ma pɛɛku Baabuiyo.

Suŋ suŋ niŋ, wali ke ya tɔnɔ wo ya cho tosaa ni. Lepum, mi kuɛ wallo tosaa o chiɛila nda kɛsi kanioŋ ndaŋ. O cho levii le ya kua tosa le, kɛ le laŋ dindioo!