Akul nda velu ya ni, sɔndɔkɔlɔ pilɛ o lɛŋnde Kuatemala leŋ niŋ. O kaale Iselleŋ niŋ yuŋgu nuu fula ni, nduyɛ nda koni nda veelu vɛlɛ ni aa Maya. O fulawɔ o Spanisii ya dimi ve kɔɔli, mi dimi vɛlɛ suɛi maŋgalɛi wana velu ya wa dimi ve. Chɔuwo wa o lɛŋnde Kuatemala leŋ niŋ le wɔsilaŋ 36, nduyɛ a boondii keŋ nda velu ya ni. O chɔuwo hoo niŋ, ma dii Isella a bɔɔbɔɔ.

Mɛɛ ya wa wɔsilaŋ la hiɔɔlu, bɛ ni wɔsila ŋɔmmɛu wo lo pisultaŋ a bɔmndo, mbo piɔl. Mi hei tosa mi suma. Nduyɛ i hiou wɔu kpou ve, mi bɛ ni koŋ wu. Okoŋ kɔɔli, ma kua a ya o chiee naa bɛndoo niŋ naa nda manda chuaambuaa sumɛiya wa. Nduyɛ loŋ ya kuɛ o sukuu wanaa sumɛiya ni. Naa ya wa kaŋ nda, mi wanaa naa pɛɛkaa kuuna ya suukaŋndo a chuaambuaa cheleŋnda. Yaa sina le sabu nda tosa keŋ ndo le. Nduyɛ, mi chaaŋaa niaa sukuuwa fafaŋ ya. Teleŋ o teleŋ, yapilɛ kpe yaa wa ni. Wɔsi o wɔsi, mi ndaa mal naa le paŋgoŋ ŋmuuŋ, nduyɛ yaa wa bɔɔ a kɔl kɛndɛ a boondii keŋ le mi kɔ wa naa kala nuu. Kanifuule, kala nuu wa wana ikɛndɛ, nduyɛ mi ndoo tuiinuŋ ya inyiɛɛ. Kɛ mɛɛ ya fuuluu wɔsilaŋ tɔ, mbo wu. Mi sina maa wana ndoo kaala ya tau o chieeŋndo choo wo hɛluŋ ya, nduyɛ mi hei tɛɛmbuu ya kɔllo tau.

Mɛɛ ya fuuluu wɔsilaŋ 11, mi miiŋgu o naa lo chiee, mi kɔ wa naa bɛ ni finya pilɔɔ a yuŋgu ndɔɔ. Mi ndaa ke ya nyɛm yaa hauba woŋ, kɛ ndaa tiuba ma mala ya a kɔl ni tambɛiyo le. Lepum, mi yaa chaŋ choo choo kpeleŋ o Mɛlɛka lo. Mi yaa nyuna ndu aa, “Le yɛɛnɛ kala nuu vi yɛ? Lɛ yɛɛnɛ ya suma yɛ?” Mi waŋnda ndaa dimulla maa Mɛlɛka tosa ni mi kpundɛlaŋ ndaŋ la komalla. Mi hei tosa mi dimi maa Mɛlɛka sina bahawɛi wana le, nduyɛ maa wana lakafaa o cho ni. Yaa yeema mi diinuŋ, kɛ I sɔla nɛi o nɛi ya tosa ndi le.

Mɛɛ ya cho yɛ o sumɛi yɛ, mi waŋnda ndaa tosalla nyɛ o nyɛ wɔɔŋ le ya kɔllo tɛɛmbuuwo. Mi ndaa kpuwa ya teleŋnda bɔɔbɔɔ, nduyɛ yaa dimul wana o wana a ndi okɔɔ le. Kanifuule, mi yiyaŋ maa wana o wana buulaŋ a ya le. Waŋnda ndaa suu o ya lo le, nduyɛ ya bɛɛ yaa suu o wana lo le. I waŋnuŋ yololɛ. Nduyɛ kɔllo wa ya o tambɛi tau. Yaa laalaŋ a wana o wana le.

Mɛɛ ya fuuluu wɔsilaŋ 13, mi Seiyaa Chɛhowaa a ŋiɔɔŋ komalla a boondii waŋnda tosa pisultaŋ o sukuu ve, nduyɛ pɔnɔɔ a lanɔɔ nda wa ni. Wanaa naa pɛɛkaa opilɛ o sukuu, o ndoo tuiinuŋ ya inyiɛɛ wo, dimul nda ni le ma huŋ yil la. Ma dimulla a sɔɔŋ Baabuiyo mɛi lediom ndoŋ okɔɔ maa wanaa vi wa cho miiŋgu yoomu. Nduyɛ maa paale wa niŋ mi wanaa sumɛiya bɛɛ che. (Aisaya 35:​5; Chɔŋ 5:​28, 29) Mi nyɛ nda pɛɛku ya koŋ ndo hɛnaŋ ya tau. Kɛ o wa i kala le mi dɔu baltaŋ a nda kanifuule, I dɛli isɔɔ o wana lo le. Mi che bɛɛ yaa yeema mi chɔm nda kɔl nuu le, kɛ ma biunuŋ ya. Nduyɛ ma lambaŋ hunɔɔ o ya lo le ya Baabuiyo pɛɛkoo. Le hunɔɔ o naa lo chiee, pembei cho o nɛi tɛɛŋ. Tiŋ pɔnɔɔ a lanɔɔ hoo ndaa boli le hunɔɔ o naa lo chiee wo hiou kilolaŋ tɔ.

Mi bɛ nuu dimulla maa a wa a toosiaŋ nyɛkɛndɛi, kɛ wana che pɛ maa a nɔ nyɛsɔlaa bɔɔ le. Kɛ a koŋ kpou, a wa yeemɛi chɔmndo teleŋ o teleŋ o ya niŋ. Nduyɛ mi ndaa chuu ya nyɛm pɔmpɔmbɔŋ. Mi sina kɛsɛ maa Kilisiɔŋaa tonyaa kinɛi tosa i waa naa ni.

Mi yaula wanaa sumɛiya la mala ya mi pɛɛku Baabuiyo. Mi che bɛɛ I wa nyɛ nda wa ya pɛɛkoo wo biyɔɔ bila, kɛ o yiyaŋ nuu niŋ, o wa i kala le mi yaa chɛl sɔɔŋ pum. Le tamaseliiyo, o wa i kala le mi yaa laalaŋ maa Mɛlɛka buulaŋ a ya, nduyɛ maa wanaa cheleŋnda tiuba ma chɔm ya mɛɛ Mɛlɛka yiyaŋ a ya okɔɔ yɛ. Mi sina niko le sabu Chɛhowa chɛl lɔ mi dɛnɛwɔɔŋndo wa wo. Kɛ o wa i kala le mi yaa laalaŋ maa o cho Finya kaalaa. *

O pɔmpɔmbɔ, mi nyɛ ya pɛɛku o Baabuiyo niŋndo mala ya mi siŋga yiyaŋ nuu. Le tamaseliiyo, mi pɛɛku maa Mɛlɛka buulaŋ tau le wanaa cho o saŋgaa niŋnda. Mɛɛ nda wa wanaa nduaa nyɛpalaa tusioo choo, mbo dimi aa, “I che dɛnɛpalaa waŋnda cho wanaa niaa tusioo choo wo. Saŋga o saŋga nda cho nda o ba bɛŋgu, ndu bɛɛ I che ndu.” (Ɛsɔdɔɔ 3:​7) Mɛɛ ya sina suliŋnda kɛndɛla Chɛhowa laŋ, mi hei nyindu ya mi yɔŋgu yoomu o ndu lo. A wɔsii 1988 ya yiŋ ni, mi simnuŋ Sei Chɛhowaa.

Mɛɛ ya chii wɔsioo pilɛ o yiŋɔɔ nuu kɔɔli, mi kua pɛɛkoo o fondaŋ wanaa sumɛiya o chiee bɛndu pilɛ niŋ diolaŋ aa Ɛsikuiŋla. Mi bɛndu kundu pilɛ cha mɛɛ ya wa saŋgaa chɔŋ o naa lo chiee le kɔlaŋ o bɔŋaŋnda yɛ. Pembii pɔnɔɔ a lanɔɔ ndaa keeku le ya hunɔɔ pɛɛkoo ve, kunda cheleŋ wa o fondaŋ koŋ. Nduyɛ o wa i kala le mi yaa kuɛ loŋ. Mi bɛndu kundaa hoo mala ya tau. Mbo dimul yuŋgu Seiyaa Chɛhowaa opilɛ o Ɛsikuiŋla niŋ le miŋ wa naa ndaa, nduyɛ mi wa kɔlaŋ o bɔŋaŋndaŋ. Chɔŋ a boondii keŋ huŋ bii a hau, a cho ya biyɔɔ naŋ chaa yuŋgu pilɔɔ kpe naŋ cho ni.

I nɔ tamaseliila kɛndɛlaŋ tau a kaala kpeekpei puaapiliaa a ndepiliaa chɔm ya niŋ o kundaa niŋndo. O kpeekpei niŋ, sɔɔŋ yɔŋnaŋndoŋ muŋ kpou ke ya tiindaŋndo ni maa ya bɛɛ Sei Chɛhowaa ya cho ni, nduyɛ mi wa Kilisiɔŋaa tonyaa tɛɛŋ.—Chɔŋ 13:​34, 35.

I nɔ niŋ tiindaŋndo suŋ suŋ, nduyɛ I yiyaŋ lɛ maa wana fondoo le ya cho le. Yoomu nuu nɔ niŋ saboo. Mi yɔŋguŋ a kɔllo kpou le wali Seiyaa Chɛhowaa cho tosaa le waŋnda Baabuiyo pɛɛkoo wo tosaa. Le waŋnda tonyala cho o Baabuiyo niŋndaŋ pɛɛkoo ya handu kɔllo choo ni, kɛ o cho o suma nuu choo le. I nɔ vɛlɛ dikeŋnaŋndo le waa bɛndoo o kundaa niŋ. Nduyɛ mi yɔŋgu vɛlɛ sɔɔŋ tɔlnuŋ o Baabuiyo choo woŋ o kundalaŋ niŋ. I sɔla niŋ pɛŋ dikeŋnaŋndo le sɔɔŋ yɔŋgoo o bɔŋaŋnda naala bɛndaŋ, naa waŋnda wa o waalaŋ niŋnda.

O wɔsi 2010 ve niŋ, mi kua o sukuu nda veelu aa Sukuuwo le Puaapiliaa Pɛɛkoo le Wali iMɛlɛkayaa wo. Ndu nda veelu waalioo ni aa Sukuuwo le Wanaa Dimi Yooŋgu Kɛndɛ leMasaa Wa. Ɛl Savedɔ naŋ tosa sukuuwo hoo ni. Mi sukuuwo hoo bɛɛndiaa ya le waltaŋ tosaa o kunda niŋ nyɛkɛndɛi. Mi pɛɛku ya sɔla hoo wo tosa mi sinaŋ maa I cho wana sɔvɛ, nduyɛ maa Chɛhowa kaala ya. Chɛhowa nɔla mbo soliŋ wana o wana kpeku le wali ndɔɔ tosaa.

Mi Chiisu dimi aa: “Waŋndo nyɔɔ kioo wana hiau wa a kɔl kɛndɛ, a waŋndo num nyɔɔ kioo.” (Walta Kiilaa 20:​35) Mi che bɛɛ yaa yiyaŋ paandu maa I nɔla mi wa a kɔl kɛndɛ le, kɛ suŋ suŋ niŋ, I tiuba mi dimi maa I cho a kɔl kɛndɛ. I laalaŋ niŋ maa I tiuba mi mala acheleŋnda.