Sɔndɔkɔlɔ pilɛ o tanda Saksoni wo niŋ nda velu ya ni, o lɛŋnde Chamani leŋ niŋ. Naŋ kaaliaŋ bɔɔ o yuŋgu naa niŋ. Nduyɛ mi wanaa velu ya wa ke ya sila kɛndɔɔ. Tanda naŋ wa niŋndo wa teŋgeŋ. Nduyɛ wanaa bɔɔbɔɔ o Saksoni niŋ, ndaa chi suɛi Mɛlɛkɛi suɛi sɔvɛ le. Nduyɛ yaa laalaŋ maa Mɛlɛka cho le. Chɔŋ o chuaambɔyɛi nii niŋ haaa huŋ bii wɔsilaŋ 18, yaa nɔ yiyaŋndaŋ la tiɔɔŋ o kɔl. Laŋ la cho ni, yiyaŋndo maa Mɛlɛka cho le, nduyɛ maa wana o wana hiu wana le.

Le yɛɛ yiyaŋndo maa wana o wana hiu wana le ndoo hɛnaŋ yɛ ya? Kanifuule, yaa nɔ o kɔl maa waŋchieeya kpou nyɛpilɔɔ kpe naŋ cho ni. Le handɔɔ lechoo, yaa laalaŋ maa nyɔɔŋ nɔ miŋ piɔunuŋ kpeŋ kpeŋ. Koŋ tosa, wana hiu sul te, nduyɛ bala fondola ve le. Le hei, mi yɔŋguŋ le wallo tosaa tau o kɔɔna feleŋguaa wa suŋgɔɔ maa wana o wana hiu wana le wo niŋ. Mɛɛ ya fuuluu wɔsilaŋ 14, mi soliŋ teleŋ nuu kpeku tau le yaula nda soliŋ niŋ kpekulaŋ miŋgioo toosiaa. Mi sɔndɔkɔlɔ pilɛ diolaŋ aa Awe naŋ kɔl tau a wali ya wa hoo tosaa wo. Okoŋ, mi masaa wa loŋ nda ke ya fandaa. Mi che bɛɛ I wa o pɔmbɔ, kɛ mi sina laŋgbaa kɛsuŋ kalaa cho o yalale chieeŋndeŋ niŋnda o tanda koŋ niŋ. Mi yiyaŋ maa kpeleŋnda kpeekpeilaŋ ya wa laŋ kiltaŋ kɔɔli ni, nduyɛ maa chila nilaŋ la wa niŋ bɔɔ la sɔvɛ.

O lepilɛ niŋ kpe, mi yiyaŋ nuu siŋgaŋ. O chiee bɛndoo niŋ Bɛliŋ, o lɛŋnde Chamani leŋ niŋ, ma taŋgul kpaki bɛndoo. Nduyɛ kpakioo hoo ndoo piɔu wanaa wa ba paaleŋ le chaŋ ndo wa tɛɛŋ, a wanaa wa ba paaleŋ le kua delɔɔ wo wa ni. A wɔsi 1989 kpakioo hoo piɔl ni. Sɔɔŋ wa yɔŋnɔŋndo laasi laasi. Haupa mi chiikuu maa kafalaŋ la wa yɔŋnɔŋndo o tanda nuu niŋ. Le tamaseliiyo, waŋnda apum ndaa yiyaŋ maa wana o wana hiou wana le. Wanaa nda kɛɛ yiyaŋndo hoo tooloo wa kinɛi, ndaa chi nda pilachieeyaa sɔvɛ le. Vɛɛ hei nɔla yɛ mi i yɔŋnuŋ? Baa o cho yiyaŋ naa le cho maa waŋnda kpou nyɛpilɔɔ le nda cho le? Baa yiyaŋ lachoowaa wa hoo ni? Mi hei tosa mi kandu buulaŋndo.

Okoŋ mi siŋga kpeleŋnda nilaŋ, mi handu kɔllo o nyɛchaa choo a fotueilaŋ toosiaa. Le mɛɛ ya tosa sukuuwo a nyɛchaa okɔɔ yɛ, yaa yeema mi kuɛ o sukuu bɛndoo, okoŋ mi simnuŋ wana luaa nyɛchaa a wana toosiaa fotueiyo. Le hei, mi mal kaala kɛndɛla ya pɛɛku o ichuaambɔya laŋ kpou. I wa niŋ suɛi sɔvɛi le ya ve wa yoomu nuu tueiyɔɔ yeela, a samaa nɔɔ tau ni. Kɛ nyɛchaa, fotueilaŋ toosiaa, a yoomu nuu tueiyɔɔ yeela dɔɔniaa buulaŋnda nilaŋ te. Fotueila yaa toosiaa laŋ bɛɛ, mi laa chɔm maa yaa nɔ wɔ siooŋnde. Vɛɛ chilaŋ la wa yɛ niŋ? Nduyɛ yɛɛ cho yɛ sabu yoomoo?

Mɛɛ ya sɔla mulila yaa yeema laŋ, mi hei pilaŋ ya kɔllo. Ichɔl pilɛ o sukuu, miŋ chal suukaŋndo naa chaaŋaa niaa sukuuwa a chilaŋ okɔɔ. Sukuunɔɔ Maŋndi * wa ni. Nduyɛ Sei Chɛhowaa o wa vɛlɛ ni. Ichɔl koŋ, mbo ke ya nɛi chɔmaa sɔviɔɔ. Mbo dimul la aa, “Anduluasi, te a yeema pɛ mulioo le nyunala numndaŋ a yoomoo, vɛlɛ a chilaŋ okɔɔ, kindiŋ ma pɛɛku Baabuiyo nyɛkɛndɛi.”

Kiisaŋndo wa ya, kɛ mi kɛɛsiaŋ o kɔl le Baabuiyo yaasiaa. Mi Maŋndi dimul la maa ya tofa Daaniɛɛ bolle 2. Nduyɛ mi nyɛ ya veelu diomndaŋndo pilaŋ ya kɔllo tau. Bolle Baabuileŋ le soo a kpaayala lemasalaŋ, nduyɛ a masaa yɛ yiaa cho wa o masaleŋ choo haaa o teleŋ naa hoo niŋnda. Mi Maŋndi chɔm ya vɛlɛ bolii Baabui cheleŋ soo a chila naalaŋ okɔɔ ve. O mɛɛlulaŋ kpɔŋ, mi kandu mulilaŋ sɔlaa le nyunala nilaŋ. Kɛ nɛɛnɛ poonyiaa yɛ sɔɔŋ muŋ o Baabuiyo niŋ? Nduyɛ nɛɛnɛ tiu yɛ ba mbo dimi a chilaŋ okɔɔ, mi i yɔŋnuŋ mɛɛ o dimi yɛ? Baa mbo wa maa Mɛlɛka cho kpeekpei?

Mi Maŋndi dimul Hɔsiti nda Aŋchelika, pɔnɔɔ a lanɔ Seiya Chɛhowaa le ma pɛɛku ya Baabuiyo. Nduyɛ ma mala ya mi bii Baabuiyo bila nyɛkɛndɛi. Haupa mi sina maa Seiyaa Chɛhowaa kinɛi cho kɔɔna lepiɛi soliŋ diola Mɛlɛkalaŋ kpeku wa ni. Nduyɛ nda kinɛi mala waŋnda ni le diola Mɛlɛkalaŋ soliŋndo kpeku, Chɛhowa. (Sam 83:​18; Maatiu 6:​9) Mi pɛɛku maa Chɛhowa Mɛlɛka ke waŋchieeya dioo le ma wa achal o kpele hɛnɛkiɔɔ niŋ o chieeŋndo choo lefafɛɛŋ. Sam 37:​9 dimi aa: “Wanaa duau tiindaŋ ndaa o Mɛlɛka Yaawɛɛ niŋ nda, nda o ke lɛŋnde o chua buŋgɛi leŋ ni.” Mi bii bila maa nyɛ Mɛlɛka dimi hoo wo cho le wana o wana kindiŋ pɛ, mbo bii yoomu ndɔɔ mɛɛ sawala ndɔlaŋ la dimi yɛ, a mɛɛ i cho i tɛɛsiaa o Baabuiyo niŋ yɛ.

Kɛ o wa ikala le siŋgaŋndaŋ tosaa o yoomu nuu niŋ, le mi la chɛlaŋ a nyɛ Baabuiyo dimi wo. Mi batiuwaa ya sɔla o nyɛchaa lɔɔ niŋ a fotueilaŋ toosiaa wo tosa mi simnuŋ wana heelaŋ. Lelaŋ, yaa nɔ mi pɛɛku mi simnuŋ wana tusiaŋ. Le handɔɔ lechoo, o ve suɛi bɛɛŋ bɛɛŋ le kaala wɔɔŋnda ya wa niŋndaŋ malɔɔ le. I cho bɔɔ a kɔl kɛndɛ le sinaa maa mi Chɛhowa chɔm biuwɔŋndo, nyiɛɛye, vɛlɛ a sinapɛŋgoo le wanaa cho kindiŋndo le tosaa nyɛ Baabuiyo dimi wo wa!

Chɔŋ o chuaambɔyɛi nii niŋ haaa huŋ bii wɔsilaŋ 18, yiyaŋ nuu wa ni maa wana o wana hiu wana le, nduyɛ maa Mɛlɛka cho le. Mi nyɛ ya wa pɛɛkoo o Baabuiyo niŋndo siŋga yiyaŋ nuu. Mi nyɛ ya pɛɛku o Baabuiyo niŋndo tosa mi pɛŋgi buulaŋndo a chilaŋ okɔɔ, nduyɛ mbo ke ya tiindaŋndo o yoomoo niŋ. A wɔsi 1993 ya yiŋ ni, mi simnuŋ Sei Chɛhowaa. Nduyɛ o wɔsi 2000 niŋ, mi chua Tabita o nɔɔ niŋ, ndepilɛnɔ nɔ sɛmbɔɔ tau o Mɛlɛka piɛiyo niŋndo. Miŋ soliŋ teleŋ naa kpeku tau le acheleŋnda malaa ma sina a Baabuiyo okɔɔ. Wanaa bɔɔbɔɔ naŋ komalla, yiyaŋ yaa nɔ paandu wo koni nda nɔ ni. Mi naŋ kɔl tau te I chɔm nda pɛ mɛɛ nda looku ma sina Chɛhowa yɛ.

Mɛɛ ya kandu holiaŋndo a Seiyaa Chɛhowaa, wanaa velu ya wa ndaa niŋ kɔl te. Kɛ nduyɛ, ma cha maa holiaŋndo a Seiyaa Chɛhowaa, cho ya malaa mi wa siŋgaŋnda kɛndɛlaŋ tosaa o yoomu nuu niŋ. I cho a kɔl kɛndɛ kanifuule, suŋ suŋ niŋ ma veelu diomndaŋ o Baabuiyo niŋ, nduyɛ ma kuɛ o bɔŋaŋnda Seiyaa Chɛhowaa.

Ya naa laa nuu Tabita, ŋ cho nɔ naa tueiyɔɔ yeela tau kanifuule, ŋ cho kindiŋndo le sila cho o Baabuiyo niŋ le wanaa cho o nɔɔ niŋnda wo tolɔɔ kɔɔli. Le tamaseliiyo, sila Baabuiyo tolɔɔ kɔɔli le lo lechoo wo chɔmndo o wana nya cho o nɔɔ niŋndo lo, cho hiouwɔɔ lachi a nɔ naa kindioo poŋ.—Hibuluiya 13:​4.

I nɔ lɛ isiooŋ a yoomoo okɔɔ le nduyɛ, I buulaŋ ndɛ a chilaŋ okɔɔ le. I sina niŋ kɛsɛ maa o yuŋgu cho Mɛlɛka piɛiyo chieeŋndo balɔɔ silɔ wo tɛɛŋ ya cho ni. Wanaa cho o yuŋgoo hoo niŋnda cho kɔl nyulu kpeekpeiyo tueiyɔɔ yeela a diompilɔɔ. O yuŋgoo hoo niŋ, ŋ che maa waŋchieeya kpou nyɔɔ pilɛ nda cho ni. Hei kpeekpei yaa laalaŋ ni, nduyɛ ndi yaa yeema ni mi i yɔŋnuŋ o yoomu nuu niŋ.