ပှၤသးစၢ်တဖၣ်အတၢ်သံကွၢ်
ယမိယပါ မ့ၢ်ကမၤလီၤဖးသးန့ၣ် ယကဘၣ်မၤဒ်လဲၣ်
မိပါတဖၣ် မ့ၢ်လီၤဖးန့ၣ် ကီလၢအဖိသးစၢ်တဖၣ် အဂီၢ်ဒိၣ်မး. နမိပါ မ့ၢ်လီၤဖးန့ၣ် နလဲၤခီဖျိ တၢ်သးအုးကသ့ဒ်လဲၣ်.
လၢတၢ်ဂ့ၢ်တခါအံၤအပူၤ
တၢ်လၢ နကြၢး ဟးဆှဲးအီၤ သၢခါ
၁. တၢ်ပာ်တၢ်ကမၣ်လၢ နီၢ်ကစၢ်လိၤ
“ဘၣ်တဘျီန့ၣ် ယမိတဲယၤလၢ စးထီၣ်လၢ ယအိၣ်ဖျဲၣ်ထီၣ်န့ၣ် တၢ်ဂ့ၢ်ကီ ဟဲအိၣ်ထီၣ်လၢ အီၤဒီးယပါအဘၢၣ်စၢၤထီဘိ. အဃိ ယတူၢ်ဘၣ်လၢ ယမိယပါ ကဲထီၣ်ဒ်အံၤန့ၣ် အကဲယတၢ်ကမၣ်.”—ဒၤယဲနၤ.
တၢ်လၢနကဘၣ်သ့ၣ်ညါ. နမိနပါ မ့ၢ်လီၤဖးန့ၣ် အတဘၣ်ဃးနၤဘၣ်. အဝဲသ့ၣ် မၤလီၤဖးသးန့ၣ် တမ့ၢ်လၢနတၢ်ကမၣ်အဃိဘၣ်. အဝဲသ့ၣ် လီၤဖးန့ၣ် လၢအနီၢ်ကစၢ်အဃိလီၤ. နတဒုးအိၣ်ထီၣ် တၢ်ကီတၢ်ခဲလၢ အဝဲသ့ၣ်အဂီၢ်ဘၣ် ဒီးနမၤလီၤမၢ်ကွံာ် တၢ်ကီတၢ်ခဲတဖၣ်န့ၣ် တသ့စ့ၢ်ကီးဘၣ်. အဝဲသ့ၣ် အနီၢ်ကစၢ်န့ၣ် အိၣ်ဒီးမူဒါ လၢကမၤဘၣ်ဂီၢ်ထီၣ်က့ၤ အတၢ်ကီတၢ်ခဲ.
၂. တၢ်စၢဃာ် တၢ်ကမၣ်
“ဖဲယပါ အဲၣ်ဘၢယမိအခါ ယသးထီၣ်အီၤဒိၣ်မး. ဒ်သိး ယကနာ်က့ၤအီၤအဂီၢ်န့ၣ် အကီလၢယဂီၢ်ဒိၣ်မး.”—ရံၤအဲနၤ.
တၢ်လၢနကဘၣ်သ့ၣ်ညါ–တဘျီတခီၣ် တၢ်ဂ့ၢ်ကီလၢ နမိပါအဘၢၣ်စၢၤန့ၣ် ကမၤသးထီၣ်နၤ ဒီးနသးကဘၣ်တံာ်တာ်. နမ့ၢ်တူၢ်ဘၣ်ဒ်န့ၣ်န့ၣ် တဘျီတခီၣ် တကမၣ်ဘၣ်. ဘၣ်ဆၣ် နမ့ၢ်စၢဃာ် တၢ်ကမၣ်န့ၣ် အတဂ့ၤဘၣ်. အကမၤဘၣ်ဒိ နနီၢ်ခိ ဒီးကမၤဘၣ်ဒိနသးစ့ၢ်ကီး. အဃိ ပှၤတဲဝဲလၢ နမ့ၢ်စၢဃာ် တၢ်ကမၣ်န့ၣ် လီၤဂာ်ဒ်သိးဒီး နအီၣ်တၢ်စုၣ်တၢ်ပျၢ် ဒီးနမုၢ်လၢ်လၢ ပှၤဂၤကဘၣ်ဒိ. a
၃. တၢ်ဆိကမိၣ်လၢ နအိၣ်ဒီး တၢ်ဆီဟံၣ်ဆီဃီလၢအဂ့ၤ တသ့ဘၣ်
“ယဘၣ်ယိၣ်ထဲ ယကကဲထီၣ် ဒ်သိးဒီး ယပါလီၤ. ယမ့ၢ်ဖျီသး ဒီးယဖိမ့ၢ်အိၣ်န့ၣ် ယဘၣ်ယိၣ်လၢ ယတၢ်အိၣ်သး ကကဲထီၣ်ဒ်သိးဒီး ယမိယပါ.”—ကၠဲၤစံၤခၤ.
တၢ်လၢနကဘၣ်သ့ၣ်ညါ– နမိနပါ အတၢ်ဆီဟံၣ်ဆီဃီ တအိၣ်ဒီး တၢ်သးခုဘၣ်န့ၣ် အခီပညီတမ့ၢ်လၢ နၤစ့ၢ်ကီး နတၢ်ဆီဟံၣ်ဆီဃီ အိၣ်ဒီးတၢ်သးခု တသ့ဘၣ်န့ၣ်ဘၣ်. လၢတၢ်န့ၣ်အလီၢ် နဟံးန့ၢ်တၢ်မၤလိ လၢအဝဲသ့ၣ် အတၢ်ကမၣ်သ့. အဒိ တချုးလၢ နဃုထၢ ပှၤတဂၤဂၤလၢ ကကဲထီၣ် နသးသမူတံၤသကိး ဒံးဘၣ်န့ၣ် နကဃုသ့ၣ်ညါ အဝဲသ့ၣ်အဂ့ၢ် ဂ့ၤဂ့ၤ. တကးဒံးဘၣ် နကဂုာ်ကျဲးစၢးအိၣ်ဒီး တၢ်ဂ့ၤတၢ်ဝါလၢ ကဒုးကဲထီၣ်နၤ ဝၤလၢအဂ့ၤ မ့တမ့ၢ် မါလၢအဂ့ၤ.
နမိနပါ မ့ၢ်မၤလီၤဖးသးန့ၣ် နသးကဘၣ်ဒိ ဒီးနတၢ်အိၣ်သးန့ၣ် ကလီၤဂာ်ဝဲ ဒ်သိးဒီး ပှၤဃံကၢ်ဝဲ ဒီးဆါဝဲဒိၣ်မး. ဘၣ်ဆၣ် ဒ်တၢ်ဆၢကတီၢ် လဲၤပူၤကွံာ်အသိး အဆါကကိညၢ်လီၤ ကယီကယီ ဒီးကဘျါက့ၤဝဲ.
တၢ်လၢနမၤသ့ သၢခါ
၁. တဲသကိးတၢ်ဂ့ၤဂ့ၤ. ညီနုၢ်ပှၤလၢ အတတဲဖျါထီၣ် အတၢ်တူၢ်ဘၣ် ဒီးပာ်တၢ်လၢ အသးပူၤန့ၣ် အလုၢ်လၢ်လၢ အတဂ့ၤဘၣ် ဟဲအိၣ်ထီၣ်သ့. အဒိ အဝဲသ့ၣ် ကအီသံးအါအါ မ့တမ့ၢ် ကအီကသံၣ်မူၤဘှိး. ဒ်သိး တၢ်တကဲထီၣ်အသးဒီးနၤ ဒ်န့ၣ်တဂ့ၤအဂီၢ် မၤထွဲ တၢ်ဟ့ၣ်ကူၣ်လၢ တၢ်ဖီလာ်တဖၣ်အံၤ.
တဲသကိးတၢ်ဒီး နမိနပါ. နမိနပါ မ့ၢ်မၢဆူၣ်နၤလၢ နကအိၣ်ဃူ အဝဲသ့ၣ်တဂၤဂၤန့ၣ် ပာ်နသး မုာ်မုာ်ခုၣ်ခုၣ် ဒီးတဲဖျါထီၣ် နတၢ်တူၢ်ဘၣ်ဂ့ၤဂ့ၤ. နတဲတၢ်ဒီးအဝဲသ့ၣ် မ့ၢ်တညီဘၣ်န့ၣ် နကွဲးန့ၢ် အဝဲသ့ၣ်လံာ်သ့.
တဲသကိးတၢ်ဒီး နသကိးလၢ နနာ်န့ၢ်အီၤသ့တဂၤ. တဘျီတခီၣ် ပှၤတဂၤ မ့ၢ်ဒိကနၣ် နတၢ်တူၢ်ဘၣ် ထံထံန့ၣ် နသးကမုာ်ထီၣ်. လံာ်စီဆှံတဲဝဲလၢ “တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤ အိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.”—ကတိၤ ၁၇:၁၇.
တဲတၢ်ဒီး တၢ်ဘၣ်တ့ကစၢ်. ယဟိဝၤယွၤ လၢအမ့ၢ် “ပှၤလၢအဒိကနၣ် တၢ်ထုကဖၣ်တဂၤ” န့ၣ်အသးအိၣ် ဒိကနၣ်နၤ. (စံးထီၣ်ပတြၢၤ ၆၅:၂) လံာ်စီဆှံတဲဝဲလၢ “မ့ၢ်လၢ ကစၢ်ယွၤ သးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီ ခဲလၢာ်လၢ အအိၣ်တက့ၢ်.”—၁ ပ့းတရူး ၅:၇.
နမိနပါန့ၣ် နတဲတၢ်ဒီးအီၤ မုာ်မုာ်ခုၣ်ခုၣ် ညီဖဲလဲၣ်တဂၤလဲၣ်.
နသကိးလၢ (တရွဲၢ်ဃီဒီးနၤ မ့တမ့ၢ် ပှၤလၢအသးပှၢ်န့ၢ်နၤ) နနာ်န့ၢ်အီၤသ့ ဒီးမၤစၢၤနၤသ့န့ၣ် ကဲမတဂၤလဲၣ်.
တၢ်ဂ့ၢ်လီၤလီၤဆီဆီ လၢနအဲၣ်ဒိး ဃ့ထုကဖၣ်န့ၣ် အိၣ်တမံၤမံၤဧါ.
၂. မၤတၢ်ဆီတလဲ ဒ်တၢ်အိၣ်သး အိၣ်ဝဲအသိး
နမိပါ မ့ၢ်လီၤဖးလံန့ၣ် ဘၣ်သ့ၣ်သ့ၣ် နကဘၣ်လဲၤအိၣ်လၢ ဟံၣ်လၢအသီ, ထီၣ်ကၠိလၢ အသီ, ဘၣ်သ့ၣ်သ့ၣ် ကျိၣ်စ့တၢ်ဟဲနုာ် ကဆီတလဲ ဒီးဘၣ်သ့ၣ်သ့ၣ် နကဘၣ်ဃု သကိးလၢအသီ. အဃိ နကဘၣ်မၤ တၢ်ဆီတလဲ ဒ်တၢ်အိၣ်သး အိၣ်ဝဲအသိး. ဒီးဘၣ်သ့ၣ်သ့ၣ် နသးကဘၣ်တံာ်တာ် ဒီးသူၣ်ကိၢ်သးဂီၤ. ဒီးနကတူၢ်ဘၣ်လၢ နတၢ်အိၣ်မူန့ၣ် တၢ်ဆီတလဲအသးဖးဒိၣ်. အဃိ နမၤတၢ်ဆီတလဲ ကညီထီၣ်အဂီၢ် တၢ်မနုၤကမၤစၢၤနၤလဲၣ်. တၢ်လၢနမၤအီၤသ့တခါန့ၣ် ဆိကမိၣ်ထံ ဘၣ်ဃးဒီး နကမၤတၢ်ဆီတလဲ ဒ်လဲၣ်အဂ့ၢ်.
ဖဲနမိနပါ လီၤဖးအခါ တၢ်ဆီတလဲ လၢအကီကတၢၢ် လၢနဂီၢ်န့ၣ် မ့ၢ်မနုၤလဲၣ်.
နမၤတၢ်ဆီတလဲ ဒ်တၢ်အိၣ်သး အိၣ်ဝဲအသိး ကသ့အဂီၢ် နမၤတၢ်မနုၤသ့လဲၣ်.
၃. ဆိကမိၣ်ထံ ဘၣ်ဃးဒီး နအိၣ်ဒီး တၢ်ဂ့ၤတၢ်ဝါမနုၤလဲၣ်
ဖဲနမိနပါ မၤလီၤဖးသးခါ နကသူၣ်ကိၢ်သးဂီၤတၢ် ဘၣ်ဆၣ် ကမၤစၢၤနၤဒ်သိး ဒီးနကထံၣ်လီၤ နနီၢ်ကစၢ် တၢ်ဂ့ၤတၢ်ဝါစ့ၢ်ကီး. တကးဒံးဘၣ် ကမၤစၢၤနၤ ဒ်သိး နကကဲထီၣ် ပှၤလၢအဂ့ၤန့ၢ်အလီၢ်စ့ၢ်ကီး. ကၠဲရဲမံၤ လၢအမိအပါ မၤလီၤဖးသးဖဲ အသးအိၣ် ၁၃ နံၣ်တဂၤန့ၣ် တဲဝဲလၢ “ယမိယပါ မၤလီၤဖးသးအဃိ ယတူၢ်ဘၣ်လၢ ယကဘၣ် ဟံးထီၣ်ဖီၣ်ထီၣ်မူဒါ. ယကဲပှၤအဒိၣ်အဃိ ယတူၢ်ဘၣ်လၢ ယကဘၣ်မၤစၢၤယမိအါထီၣ် ဒီးကွၢ်ထွဲစၢၤ ယဒ့ခွါ.”
နမိပါ မ့ၢ်မၤလီၤဖးသးန့ၣ် ဘၣ်သ့ၣ်သ့ၣ် နကအဲၣ်ဒိး မၤစၢၤအါထီၣ်တၢ် လၢဟံၣ်ပူၤ
ခီဖျိလၢ နမိနပါ အတၢ်အိၣ်သးအဃိ နသ့ၣ်ညါထီၣ်လၢ နအိၣ်ဒီး တၢ်ဂ့ၤတၢ်ဝါမနုၤလဲၣ်.
နအဲၣ်ဒိး မၤဂ့ၤထီၣ် တၢ်ဂ့ၤတၢ်ဝါ ဖဲလဲၣ်တခါလဲၣ်.
a နမ့ၢ်အဲၣ်ဒိးသ့ၣ်ညါ အါထီၣ်န့ၣ် ကွၢ်တၢ်ဂ့ၢ် လၢအမ့ၢ် “ဒ်သိး ယတသးထီၣ်တၢ် တဂ့ၤအဂီၢ် ယပၢၤသး ကသ့ဒ်လဲၣ်.”
တၢ်ဂ့ၤအဂၤလၢ နကဘၣ်သး
တၢ်သံကွၢ်လၢ ညီနုၢ်ပှၤသံကွၢ်တဖၣ်
တၢ်မၤကတၢၢ်ကွံာ် တၢ်ဆီဟံၣ်ဆီဃီန့ၣ် ယဟိဝၤပှၤအုၣ်အသးတဖၣ် ထံၣ်ဝဲဒ်လဲၣ်.
ပှၤဒီမါဝၤခံဂၤ အဘၢၣ်စၢၤ တၢ်ကီတၢ်ခဲ မ့ၢ်အိၣ်ထီၣ်န့ၣ် မ့ၢ်ယဟိဝၤပှၤအုၣ်အသးတဖၣ် မၤစၢၤဝဲစ့ၢ်ကီးဧါ. ဖဲယဟိဝၤပှၤအုၣ်အသးတဂၤ ကမၤကတၢၢ်ကွံာ် အတၢ်ဆီဟံၣ်ဆီဃီအခါ လိၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်ဟ့ၣ်အခွဲးဧါ.
