နၤ​စ့ၢ်ကီး မ့ၢ်​န​တူၢ်ဘၣ်​တၢ် နး​ဒိၣ်မး​တုၤလၢ န​တ​အဲၣ်ဒိး​အိၣ်မူ​လၢၤဘၣ်​န့ၣ်​ အိၣ်​တဘျီဘျီ​ဧါ. အဃိ အဲ​ဒြံၤ​အဲ​နၤ တူၢ်ဘၣ်​တၢ်​ဒ်လဲၣ်​န့ၣ်​ န​နၢ်ပၢၢ်​အီၤ​သ့​လီၤ. အဝဲ​သူၣ်ကိၢ်​သးဂီၤ, သူၣ်အုး​သးအုး​ဒီး တူၢ်ဘၣ်​ဝဲ​လၢ အ​တၢ်​မုၢ်လၢ်​တအိၣ်​လၢၤဘၣ်​လီၤ. ဒီး​အဲ​ဒြံၤ​အဲ​နၤ န့ၣ်​အိၣ်ဝဲ​ဒီး တၢ်​သးဟးဂီၤ​တၢ်ဆါ (Depression) န့ၣ်​လီၤ.

ဆိကမိၣ်​ကွၢ်​စ့ၢ်ကီး ပှၤ​ယပၣ်​ဖိ​လၢ အ​မံၤ​မ့ၢ် ခါ​အူ​ရူၤ လၢ​အ​ကွၢ်ထွဲ​က့ၤ အမိၢ်​အ​ပၢ်​သးပှၢ်​ခံဂၤ လၢ​အ​တၢ်​အိၣ်ဆူၣ်​အိၣ်ချ့​တဂ့ၤ​ဘၣ်​န့ၣ်​ အ​တဲဝဲ​ဒ်အံၤ “ဖဲ​န့ၣ်​အဆၢ​ကတီၢ် တၢ်​ဆီၣ်သနံး​ဘၣ်​ယၤ အါမး​လၢ ယ​တၢ်မၤ​လီၢ်​အဃိ ယ​အီၣ်တၢ်​တ​ဝံၣ်​လၢၤဘၣ်, ဒီး​လၢ​မုၢ်နၤခီ​စ့ၢ်ကီး ယ​မံ​တန့ၢ်ဘၣ်. ဒီး​ယ​ဆိကမိၣ်​ထီၣ်​လၢ ယ​မ့ၢ်​သံ​န့ၣ်​ ယ​တၢ်ကိၢ်​တၢ်ဂီၤ​က​လီၤမၢ်​ကွံာ်ဝဲ​ခဲလၢာ်​လီၤ.”

အိ​ကၠံ​ဘိၣ်​ အိၣ်​လၢ နဲၣ်​ကၠံရံၤ​ယၢၤ တဲဝဲ​ဒၣ်​လၢ “ထီဘိ​န့ၣ်​ယ​သး​ဘၣ်ဖှီၣ်​ တုၤ​ဒၣ်လဲာ်​ယ​ဟီၣ်, အဃိ ယ​ဃုကျဲ​လၢ ယ​က​မၤသံ​လီၤ​ယ​သးလီၤ.” ကိညၢ်​လၢ အိ​ကၠံ​ဘိၣ်, ခါ​အူ​ရူၤ ဒီး အဲ​ဒြံၤ​အဲ​နၤ န့ၣ်​ အဝဲသ့ၣ်​တ​မၤသံ​လီၤအသး​ဘၣ်​လီၤ. ဘၣ်ဆၣ်​ ပှၤလၢ​အ​က​လီၢ်​တဖၣ်​န့ၣ်​ မၤသံ​လီၤအသး ကိးနံၣ်ဒဲး​လီၤ.

ပှၤ​အါတက့ၢ် လၢ​အ​မၤသံ​လီၤအသး​န့ၣ်​ မ့ၢ်ဝဲ​ပှၤ​ပိာ်ခွါ​လီၤ. မ့ၢ်​လၢ​အဝဲသ့ၣ်​ မဲာ်ဆှး​လၢ က​ဃ့​တၢ်မၤစၢၤ​အဃိ​လီၤ. ဘၣ်ဆၣ်​ယ့ၣ်ၡူး​တဲဝဲ​လၢ ပှၤလၢ​အ​အိၣ်​တ​ဆူၣ်​တ​ချ့​ဘၣ်​န့ၣ်​ လိၣ်ဘၣ်​ကသံၣ်​သရၣ်​လီၤ. (လူၤကၣ်​ ၅:၃၁) အဃိ န​မ့ၢ်​တူၢ်ဘၣ်​လၢ န​အဲၣ်ဒိး​မၤသံ​လီၤ​န​သး​န့ၣ်​ ဝံသးစူၤ တဘၣ်​မဲာ်ဆှး​လၢ န​က​ဃ့​တၢ်မၤစၢၤ​န့ၣ်​တဂ့ၤ. ပှၤ​အါဂၤ​လၢ အိၣ်ဒီး​တၢ်​သးဟးဂီၤ​တၢ်ဆါ​န့ၣ်​ အဝဲသ့ၣ်​ဆဲး​တူၢ်​တၢ်​ကဲ​ခီဖျိ​လၢ ဒိးန့ၢ်​ဘၣ်​တၢ်မၤစၢၤ​လၢ ကသံၣ်ကသီ​တ​ကပၤ​န့ၣ်​လီၤ. မ့ၢ်​လၢ အိ​ကၠံ​ဘိၣ်, ခါ​အူ​ရူၤ ဒီး​အဲ​ဒြံၤ​အဲ​နၤ ဒိးန့ၢ်​ဘၣ်​ဝဲ​တၢ်မၤစၢၤ​အဃိ ခဲအံၤ​န့ၣ်​ အဝဲသ့ၣ်​ခဲလၢာ် တူၢ်ဘၣ်​တၢ်​ကိညၢ်​လီၤ​တစဲး​လီၤ.

ဘၣ်​သ့ၣ်​သ့ၣ်​ကသံၣ်​သရၣ်​ ကသူ​ကသံၣ်ကသီ မ့တမ့ၢ် က​တဲသကိး​တၢ်​ဒီး​နၤ​ဘၣ်ဃး န​တၢ်​တူၢ်ဘၣ်​တဖၣ်​အဂ့ၢ် မ့တမ့ၢ် က​သူဝဲ​ကျဲ​ခံ​ဘိ​လၢာ် ဒ်သိး​န​တၢ်ဆါ​က​ကိညၢ်​လီၤ​ဝဲ​အဂီၢ်​လီၤ. ပှၤလၢ​အ​အိၣ်ဒီး တၢ်​သးဟးဂီၤ​တၢ်ဆါ​န့ၣ်​ အဝဲသ့ၣ်​လိၣ်ဘၣ်​လၢ အဟံၣ်​ဖိ​ဃီဖိ​ဒီး​အ​တံၤသကိး​တဖၣ်​ က​ဒိသူၣ်​ဒိသး​အီၤ, က​ဝံသးစူၤ​အီၤ, ကဟုကယာ်​အီၤ ဒီး​မၤစၢၤ​အီၤ​န့ၣ်​လီၤ. မ့မ့ၢ် ပ​တံၤသကိး​အဂ့ၤ​ကတၢၢ်​တဂၤ​လၢ အ​မၤမုာ်​ထီၣ်​က့ၤ​ပှၤ ဒီး​မၤစၢၤ​ပှၤ​ခီဖျိ​လၢ အ​ကလုၢ်​ကထါ​လံာ်စီဆှံ​န့ၣ်​ မ့ၢ်​ကစၢ်​ယဟိဝၤ​ယွၤ​လီၤ.

ညီနုၢ်​ပှၤလၢ​အ​အိၣ်ဒီး တၢ်​သးဟးဂီၤ​တၢ်ဆါ​တဖၣ်​န့ၣ်​ အဝဲသ့ၣ်​က​ဘၣ်​အီ​ကသံၣ်​ လၢ​အ​နံၣ်​တဖၣ်​အ​နံၣ်​အဃိ အဝဲသ့ၣ်​အါတက့ၢ် အိၣ်မူ​ဒ်သိး​ဒီး​လၢညါ​တ​သ့​လၢၤဘၣ်. ဒ် အိ​ကၠံ​ဘိၣ်​ အသိး န​တၢ်​သးဟးဂီၤ​တၢ်ဆါ​မ့ၢ်​အိၣ်​သနာ်က့ န​အိၣ်ဒီး​တၢ်​မုၢ်လၢ်​သ့ဒံး​လီၤ. အဝဲ​တဲ​လၢ “ယ​ခိး​ကွၢ်လၢ်​လၢ ယၡါယၤ ၃၃:၂၄ က​ဟဲ​လၢထီၣ်​ပှဲၤထီၣ်, ဒီး​လံာ်စီဆှံ​တ​ဆၢ​အံၤ​တဲဝဲ​လၢ ပှၤ​အိၣ်ဝဲ​ဆိးဝဲ​လၢ​ဟီၣ်ခိၣ်​ချၢ​တဖၣ်​ တ​တဲဝဲ​လၢ ‘ယ​မၤ​တကဲ​ဘၣ်’ လၢၤဘၣ်.” ကစၢ်​ယွၤ​အ​တၢ်​အၢၣ်လီၤ ဘၣ်ဃး​ဒီး “ဟီၣ်ခိၣ်​သီ,” ဒီး “တၢ်သူၣ်အုး​သးအုး” တအိၣ်​လၢၤဘၣ်​န့ၣ်​ ဒ်​အ​မၤမုာ်​ထီၣ်​က့ၤ​အိ​ကၠံ​ဘိၣ်​အသး​အသိး က​မၤမုာ်​ထီၣ်​က့ၤ​န​သး​စ့ၢ်ကီး​လီၤ. (လီၣ်ဖျါ ၂၁:၁, ၄) ပ​သး​အ​တၢ်​တူၢ်ဘၣ်​ဒီး ပ​သး​အ​တၢ်​ဆိကမိၣ်​လၢ အ​မၤ​သးအုး​ပှၤ​တဖၣ်​န့ၣ်​ ကစၢ်​ယွၤ​က​မၤ​လီၤမၢ်​စ့ၢ်ကီး​လီၤ. တကးဒံးဘၣ်​ တၢ်​တူၢ်ဘၣ်​တဖၣ်​န့ၣ်​ “တၢ်​တ​သ့ၣ်နီၣ်ထီၣ်​က့ၤ​ဘၣ်​အီၤ​ဘၣ်. ဒီး​တအိၣ်​ထီၣ်​လၢၤဘၣ်​လၢ ပှၤ​အ​သးကံၢ်​ပူၤ” နီတဘျီ​လၢၤဘၣ်.—ယၡါယၤ ၆၅:၁၇.