မ့ၢ်နဆိကမိၣ်လီၤနသးလၢ နမ့ၢ်ခရံာ်ဖိတဂၤဧါ. ပှၤလၢအကိးလီၤအသးလၢ ခရံာ်ဖိန့ၣ် အိၣ်ဝဲ အကကွဲၢ်ခံကထိဘျဲၣ်လီၤ. မုၢ်မဆါတနံၤအံၤ ခရံာ်ဖိတၢ်ဘူၣ်တၢ်ဘါအဖု အိၣ်လၢအကထိတဖၣ်လီၤ. အဝဲသ့ၣ်တဖၣ် အတၢ်စူၢ်တၢ်နာ် ဒီးအတၢ်ထံၣ်တဖၣ် လီၤဆီလိာ်အသးန့ၣ်လီၤ. လၢတၢ်န့ၣ်အဃိ ဘၣ်သ့ၣ်သ့ၣ် နတၢ်စူၢ်တၢ်နာ်စ့ၢ်ကီး ကလီၤဆီဒီးခရံာ်ဖိလၢ အဂၤတဖၣ်န့ၣ်လီၤ. နမ့ၢ်နာ်တၢ်တမံၤဂ့ၤ တမံၤဂ့ၤ တၢ်အံၤမ့ၢ်တၢ်လၢ အရ့ဒိၣ်စ့ၢ်ကီးဧါ. အရ့ဒိၣ်ဝဲလီၤ. နမ့ၢ်အဲၣ်ဒိးအိၣ်မူ ဒ်ခရံာ်ဖိနီၢ်နီၢ်အသိးန့ၣ် နတၢ်စူၢ်တၢ်နာ် ကဘၣ်လီၤပလိာ်ဒီး လံာ်စီဆှံလီၤ.

ခရံာ်အပျဲၢ်အဘီၣ် လၢညါတဖၣ်န့ၣ် ဘၣ်တၢ်သ့ၣ်ညါအီၤလၢ “ပှၤခရံာ်ဖိ” လီၤ. (မၤတၢ် ၁၁:၂၆) ဖဲန့ၣ်အဆၢကတီၢ် ခရံာ်ဖိအိၣ်ဒၣ်ထဲတဖုဧိၤအဃိ ပှၤနီၤဖးအဝဲသ့ၣ်ကဘၣ်အဂီၢ် တလိၣ်လၢကဘၣ်အိၣ်ဒီးအမံၤအဂၤဘၣ်. ဒီးအဝဲသ့ၣ် လူၤပိာ်ထွဲဝဲ ယ့ၣ်ၡူးအတၢ်သိၣ်လိသီလိ ဒီးအတၢ်ဟံးစုနဲၣ်ကျဲတဖၣ်န့ၣ်လီၤ. မ့မ့ၢ်နသရိာ်မီၣ်. မ့ၢ်နနာ်လၢ အဝဲသ့ၣ်သိၣ်လိတၢ် ဒ်ယ့ၣ်ၡူးသိၣ်လိဝဲအသိးဧါ. မ့ၢ်နနာ်လၢ အဝဲသ့ၣ်အတၢ်စူၢ်တၢ်နာ်န့ၣ်အိၣ်ဝဲဒ် ခရံာ်ဖိလၢညါအသိးဧါ. နသ့ၣ်ညါလီၤတံၢ်ကသ့ဒ်လဲၣ်. နသ့ၣ်ညါလီၤတံၢ်သ့ ခီဖျိနထိၣ်သတြီၤအီၤဒီး လံာ်စီဆှံန့ၣ်လီၤ.

 သမံသမိးကွၢ်တၢ်ဂ့ၢ်အံၤတက့ၢ်– ယ့ၣ်ၡူးခရံာ် ပာ်ဒိၣ်ဝဲ ယွၤအကလုၢ်ကထါလီၤ. လၢတၢ်န့ၣ်အဃိ ယ့ၣ်ၡူးတအဲၣ်ဒိးဝဲလၢ ပှၤကမၤကျဲၣ်ကျီယွၤအကလုၢ်ကထါခီဖျိ ပှၤပာ်ဒိၣ်ပှၤဟီၣ်ခိၣ်ဖိ အလုၢ်အလၢ် ဒိၣ်န့ၢ်ဒံးလံာ်စီဆှံဘၣ်. (မၢ်ကူး ၇:၉-၁၃) ပနာ်သ့သပှၢ်ကတၢၢ်လၢ ယ့ၣ်ၡူးအပျဲၢ်အဘီၣ်လၢ အမ့ၢ်အတီတဖၣ် အတၢ်နာ်န့ၣ်ကဒိးသန့ၤထီၣ်အသးလၢ လံာ်စီဆှံန့ၣ်လီၤ. လၢတၢ်န့ၣ်အဃိ ခရံာ်ဖိတဂၤ စုာ်စုာ်ကြၢးသံကွၢ်လီၤအသးလၢ ‘တၢ်လၢပှၤသိၣ်လိဝဲလၢ ယသရိာ်ပူၤတဖၣ်န့ၣ် မ့ၢ်အလီၤပလိာ်အသးဒီး လံာ်စီဆှံစ့ၢ်ကီးဧါ.’ ဒ်သိးနကသ့ၣ်ညါအတၢ်စံးဆၢအံၤအဂီၢ် တၢ်ဂ့ၢ်လၢနနၢ်ဟူဘၣ်လၢနသရိာ်အပူၤန့ၣ် ထိၣ်သတြီၤကွၢ်အီၤဒီးလံာ်စီဆှံတက့ၢ်.

ယ့ၣ်ၡူးစံးဝဲလၢ ပကဘၣ်ဘူၣ်ထီၣ်ဘါထီၣ် ယဟိဝၤယွၤလၢတၢ်မ့ၢ်တၢ်တီအပူၤလီၤ. ဒီးတၢ်မ့ၢ်တၢ်တီန့ၣ် ပထံၣ်န့ၢ်အီၤလၢ လံာ်စီဆှံအပူၤလီၤ. (ယိၤဟၣ် ၄:၂၄; ၁၇:၁၇) တၢ်မၢဖိစီၤပီလူးစံးဝဲလၢ ပတၢ်အုၣ်က့ၤခီၣ်က့ၤန့ၣ် ဒိးသန့ၤထီၣ်အသးလၢ “တၢ်သ့ၣ်ညါ” လီၤ. (၁ တံၤမသ့း ၂:၄) လၢတၢ်န့ၣ်အဃိ ပတၢ်နာ်န့ၣ် ကဘၣ်လီၤပလိာ်အသး ဒီးလံာ်စီဆှံအတၢ်မ့ၢ်တၢ်တီလီၤ. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်မူအထူအယိာ်လီၤ.

ပကွဲမုာ်ဘၣ်နၤလၢ နကသမံသမိးကွၢ် တၢ်သံကွၢ်ဃုဖျၢၣ် ဒီးအတၢ်စံးဆၢအံၤန့ၣ်လီၤ. ဒီးတၢ်သံကွၢ်တဖၣ်အံၤအတၢ်စံးဆၢန့ၣ် အိၣ်ဝဲလၢလံာ်စီဆှံအပူၤလီၤ. ဖးကွၢ်လံာ်စီဆှံအဆၢတဖၣ်အံၤ ဒီး ဆိကမိၣ်ထံအတၢ်စံးဆၢတက့ၢ်. ဒီးသံကွၢ်လီၤနသးလၢ ‘မ့ၢ်ယသရိာ်န့ၣ် သိၣ်လိတၢ်ဒ် လံာ်စီဆှံတဲဝဲအသိးစ့ၢ်ကီးဧါ.’

တၢ်သံကွၢ်ဒ်အံၤတဖၣ် ကမၤစၢၤနၤ ဒ်သိးနကထိၣ်သတြီၤကွၢ် နတၢ်စူၢ်တၢ်နာ်ဒီးလံာ်စီဆှံလီၤ. တၢ်သိၣ်လိအဂၤလၢ နနၢ်ဟူဘၣ်လၢ နသရိာ်အပူၤဒီး တၢ်လၢလံာ်စီဆှံတဲဝဲန့ၣ် မ့ၢ်နအဲၣ်ဒိး ထိၣ်သတြီၤကွၢ်ဧါ. ယဟိဝၤပှၤအုၣ်အသးတဖၣ် သးအိၣ်မၤစၢၤနၤလၢ နကသမံသမိးကွၢ်လံာ်စီဆှံတၢ်မ့ၢ်တၢ်တီန့ၣ်လီၤ. မ့ၢ်နအဲၣ်ဒိးသ့ၣ်ညါအါထီၣ်ဧါ. နမ့ၢ်အဲၣ်ဒိးသ့ၣ်ညါအါထီၣ်န့ၣ် မၤလိလံာ်စီဆှံဒီး ယဟိဝၤပှၤအုၣ်အသးတဂၤဂၤ မ့တမ့ၢ် နလဲၤနုာ်လီၤကွၢ်လၢ ပပှာ်ယဲၤသန့ jw.org/ksw အပူၤသ့လီၤ.