၁. ဖဲ ၂၀၂၃ တနံၣ်တဘျီတၢ်အိၣ်ဖှိၣ်ရိဖှိၣ်န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.

 ဖဲ ၂၀၂၃ တနံၣ်တဘျီတၢ်အိၣ်ဖှိၣ်ရိဖှိၣ်န့ၣ် a ပသ့ၣ်ညါဘၣ် တၢ်နၢ်ပၢၢ်အသီတနီၤ ဒီးပနၢ်ဟူဘၣ် တၢ်ဘိးဘၣ်သ့ၣ်ညါလၢ အလီၤသးခု ဘၣ်ဃးဒီး ပတၢ်စံၣ်တဲၤတဲလီၤတၢ်မၤ. အဒိ ပသ့ၣ်ညါဘၣ်လၢ ဘၤဘူၤလိၣ်ဖးဒိၣ် ဟးဂီၤ ဝံၤအလီၢ်ခံ သနာ်က့ ပှၤတနီၤ ကန့ၢ်ဘၣ် တၢ်ခွဲးတၢ်ယာ်လၢ ကဟဲနုာ်လီၤလၢ ယဟိဝၤယွၤ အပှၤဂီၢ်မုၢ်အကျါ. တကးဒံးဘၣ် ပသ့ၣ်ညါဘၣ်စ့ၢ်ကီးလၢ စးထီၣ်ဖဲ လါနိၣ်ဝ့ဘၢၣ် ၂၀၂၃ န့ၣ် ပှၤစံၣ်တဲၤတဲလီၤတၢ်ဖိတဖၣ် တလိၣ်တီၣ်ဖျါထီၣ် နၣ်ရံၣ် ဒီးတၢ်ဂ့ၢ်အဂၤ လၢတၢ်စံၣ်တဲၤတဲလီၤတၢ်မၤ အဂီၢ်လၢၤဘၣ်. တၢ်ဆီတလဲ အိၣ်ထီၣ်ဒ်အံၤအဃိ မ့ၢ်ပတၢ်စံၣ်တဲၤတဲလီၤတၢ်မၤန့ၣ် အရ့တဒိၣ် ဒ်သိးလၢညါလၢၤဘၣ်ဧါ. တမ့ၢ်ဒ်န့ၣ်ဘၣ်.

၂. ဘၣ်မနုၤအဃိ ပတၢ်စံၣ်တဲၤတဲလီၤတၢ်မၤန့ၣ် အရ့ဒိၣ်ထီၣ်မၣ်ဒိၣ်ထီၣ်လဲၣ်. (မၢ်ကူး ၁၃:၁၀)

^၂ တၢ်ဆၢကတီၢ် လဲၤပူၤကွံာ် တနံၤဘၣ်တနံၤ ဒီးပတၢ်စံၣ်တဲၤတဲလီၤတၢ်မၤန့ၣ် အရ့ဒိၣ်ထီၣ်မၣ်ဒိၣ်ထီၣ်. ဘၣ်မနုၤအဃိလဲၣ်. ခီဖျိလၢ တၢ်ဆၢကတီၢ် တအိၣ်အါအါလၢၤဘၣ်. ဆိကမိၣ်ကွၢ် တၢ်လၢယ့ၣ်ၡူး တဲဆိပာ်စၢၤဝဲ ဘၣ်ဃးဒီး တၢ်စံၣ်တဲၤတဲလီၤတၢ်မၤ လၢမုၢ်နံၤခံကတၢၢ် အဆၢကတီၢ်. (ဖး မၢ်ကူး ၁၃:၁၀.) လၢလံာ်မးသဲ အပူၤန့ၣ် ယ့ၣ်ၡူး တဲဝဲလၢ တချုးလၢ “တၢ်အကတၢၢ်” တုၤဒံးဘၣ်န့ၣ် ပှၤကစံၣ်တဲၤတဲလီၤ ဘီမုၢ်တၢ်သးခုကစီၣ် လၢဟီၣ်ခိၣ်ဒီဘ့ၣ်ညါ. (မး ၂၄:၁၄) တၢ်အကတၢၢ်န့ၣ် အဲၣ်ဒိးတဲဝဲ မုၣ်ကီၤလံၢ် အတၢ်ရဲၣ်တၢ်ကျဲၤ လၢအအၢအသီအံၤ ကကတၢၢ်ကွံာ်ဝဲ. ဒီးယဟိဝၤယွၤ ပာ်ပနီၣ်ဃာ်ဝဲ “မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ်” လၢတၢ်အကတၢၢ် အဂီၢ်လံ. (မး ၂၄:၃၆; ၂၅:၁၃; မၤတၢ် ၁:၇) တနံၤဘၣ်တနံၤန့ၣ် တၢ်အကတၢၢ် ဘူးထီၣ် ဒိၣ်ထီၣ်မၣ်ဒိၣ်ထီၣ်. (ရိ ၁၃:၁၁) အဃိ တချုးလၢ တၢ်အကတၢၢ် တုၤဒံးဘၣ်န့ၣ် ပကဘၣ် ဆဲးစံၣ်တဲၤတဲလီၤတၢ် ဆူၣ်ဆူၣ်.

၃. တၢ်မနုၤ ထိၣ်ဟူးထိၣ်ဂဲၤထီၣ်ပှၤလၢ ပကစံၣ်တဲၤတဲလီၤတၢ်လဲၣ်.

^၃ ဖဲပဆိကမိၣ်ထံ ဘၣ်ဃးဒီး ပတၢ်စံၣ်တဲၤတဲလီၤတၢ်မၤအခါ ပကဘၣ် သ့ၣ်နီၣ်ထီၣ်  တၢ်သံကွၢ်အရ့ဒိၣ် တဖျၢၣ်အံၤ. ဘၣ်မနုၤအဃိ ပစံၣ်တဲၤတဲလီၤ တၢ်သးခုကစီၣ်လဲၣ်. ပမ့ၢ်ဘၣ်တဲတီတီန့ၣ် တၢ်အဲၣ် ထိၣ်ဟူးထိၣ်ဂဲၤထီၣ်ပှၤလၢ ပကစံၣ်တဲၤတဲလီၤတၢ်. ဖဲပစံၣ်တဲၤတဲလီၤတၢ်အခါ ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်သးခုကစီၣ်, ပအဲၣ်ပှၤဂၤ ဒီးအရ့ဒိၣ်ကတၢၢ်န့ၣ် ပအဲၣ်ယဟိဝၤယွၤ ဒီးပာ်ကဲအမံၤ. ခဲအံၤ ပကဆဲးတဲသကိး တၢ်ဂ့ၢ်တဖၣ်အံၤ တခါဘၣ်တခါ.

ပစံၣ်တဲၤတဲလီၤတၢ် ခီဖျိလၢ ပပာ်လုၢ်ပာ်ပှ့ၤ တၢ်သးခုကစီၣ်

၄. ဖဲပနၢ်ဟူဘၣ် တၢ်ကစီၣ်လၢအမုာ်အခါ ပတူၢ်ဘၣ်ဒ်လဲၣ်.

^၄ ဆိကမိၣ်ထီၣ်က့ၤ ဖဲနနၢ်ဟူဘၣ် တၢ်ကစီၣ်လၢအမုာ် ဘၣ်ဃးဒီး ပှၤလၢနဟံၣ်ဖိဃီဖိ အကျါတဂၤဂၤ အဖိအိၣ်ဖျဲၣ်ထီၣ် မ့တမ့ၢ် ဖဲနန့ၢ်ဘၣ် တၢ်မၤတခါလၢ နလိၣ်ဘၣ် သပှၢ်တၢၢ်အခါ နတူၢ်ဘၣ် ဒ်လဲၣ်. နကသးခုဒိၣ်မးအဃိ နတဲဘၣ် နဟံၣ်ဖိဃီဖိ ဒီးနသကိးလၢ တၢ်ကစီၣ်အံၤ တဘျီဃီ. ဖဲနနၢ်ဟူဘၣ် တၢ်ကစီၣ် အဂ့ၤကတၢၢ် လၢအမ့ၢ် ဘီမုၢ်တၢ်သးခုကစီၣ်အခါ နတူၢ်ဘၣ် ဒ်န့ၣ်စ့ၢ်ကီးဧါ.

၅. ဖဲနမၤလိဘၣ် တၢ်မ့ၢ်တၢ်တီလၢ လံာ်စီဆှံပူၤအခါ နတူၢ်ဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၅ ဆိကမိၣ်ထီၣ်က့ၤ ဖဲနမၤလိဘၣ် တၢ်မ့ၢ်တၢ်တီလၢ လံာ်စီဆှံပူၤအခါ နတူၢ်ဘၣ်ဒ်လဲၣ်. နသ့ၣ်ညါဘၣ်လၢ နပါအိၣ်လၢမူခိၣ်အဲၣ်နၤ, အဘၣ်သးလၢ နကပၣ်ဃုာ်လၢ အဖိတဖၣ်လၢ အဘူၣ်ထီၣ်ဘါထီၣ်အီၤအကျါ, အအၢၣ်လီၤလၢ အကမၤလီၤမၢ်ကွံာ် တၢ်သူၣ်အုးသးအုး ဒီးတၢ်နးတၢ်ဖှီၣ်. တကးဒံးဘၣ် နသ့ၣ်ညါဘၣ်လၢ ခါဆူညါ လၢဟီၣ်ခိၣ်သီန့ၣ် နကထံၣ်ဘၣ်က့ၤ ပှၤလၢနအဲၣ် လၢအသံသဒၣ်နၤ ဒီးနမၤလိဘၣ် တၢ်ဂ့ၢ်အဂၤဒီဒူၣ်ညါ. (မၢ် ၁၀:၂၉, ၃၀; ယိၤ ၅:၂၈, ၂၉; ရိ ၈:၃၈, ၃၉; လီၣ် ၂၁:၃, ၄) တၢ်မ့ၢ်တၢ်တီလၢ နမၤလိဘၣ်တဖၣ်အံၤ မၤသးခုနသးဒိၣ်မး. (လူၤ ၂၄:၃၂) ဒီးတၢ်လၢနမၤလိဘၣ်တဖၣ်အံၤ နပာ်လုၢ်ပာ်ပှ့ၤအီၤ ဒိၣ်မးအဃိ နဘၣ်သးတဲဘၣ် ပှၤကိးဂၤဒဲး.—ထိၣ်သတြီၤဒီး ယံးရမံယၤ ၂၀:၉.

၆. လၢဒီပုၢ်ဝဲၢ်ခွါအၢၤနဲး ဒီးအမါရိၣ် အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.

^၆ ပကကွၢ်သကိး တၢ်လဲၤခီဖျိတခါ. ဖဲဒီပုၢ်ဝဲၢ်ခွါအၢၤနဲး b အသးကအိၣ် အနံၣ်တဆံအခါ အပါသံသဒၣ်အီၤ. ဒီပုၢ်ဝဲၢ်ခွါအၢၤနဲး တဲဝဲလၢ “ယဆိကမိၣ်လၢ ‘မ့ၢ်ယပါလဲၤထီၣ်လၢ မူခိၣ်လံဧါ. မ့ၢ်အကသံ  လီၤထူလီၤယိာ်ဟီဧါ.’ ဒီးဖိသၣ်လၢ အပါအိၣ်မူဒံးတဖၣ်န့ၣ် ယသးက့ၣ်အဝဲသ့ၣ်.” ဒီပုၢ်ဝဲၢ်ခွါအၢၤနဲး လဲၤလၢတၢ်သွၣ်ခိၣ်, ချံးလီၤအခီၣ်လၢ အပါသွၣ်ခိၣ်ကပၤ ဒီးဃ့ထုကဖၣ်လၢ “ကစၢ်ယွၤဧၢ, ယပါအိၣ်ဖဲလဲၣ်, ဝံသးစူၤ ဒုးသ့ၣ်ညါယၤ.” ဒီပုၢ်ဝဲၢ်ခွါအၢၤနဲး အပါသံန့ၢ် ၁၇ နံၣ်ဝံၤအလီၢ်ခံ အစးထီၣ်မၤလိ လံာ်စီဆှံ. အမၤလိဘၣ်ဝဲလၢ ပှၤသံန့ၣ် လီၤဂာ်ဒီးပှၤမံ လၢအတသ့ၣ်ညါ တၢ်နီတမံၤဘၣ်. ဒီးအသ့ၣ်ညါဘၣ်စ့ၢ်ကီးလၢ လံာ်စီဆှံ အၢၣ်လီၤဝဲလၢ ခါဆူညါန့ၣ် ပှၤသံကဂဲၤဆၢထၢၣ် သမူထီၣ်က့ၤအဃိ အသးခုဒိၣ်မး. (စံၣ် ၉:၅, ၁၀; မၤတၢ် ၂၄:၁၅) တၢ်သံကွၢ်လၢ ဒီပုၢ်ဝဲၢ်ခွါအၢၤနဲး ဘၣ်သးသ့ၣ်ညါဝဲ အတၢ်စံးဆၢ ဖးယံာ်လံန့ၣ် ခဲအံၤ အသ့ၣ်ညါဝဲလံ. ဒီးလံာ်စီဆှံ တၢ်မ့ၢ်တၢ်တီလၢ အမၤလိဘၣ်ဝဲန့ၣ် မၤသးခုအသးဒိၣ်မး. အမါရိၣ်စ့ၢ်ကီး စးထီၣ်မၤလိ လံာ်စီဆှံ ဒီးတၢ်လၢ အမၤလိဘၣ်ဝဲန့ၣ် အဘၣ်သးဝဲဒိၣ်မး. အဃိ ဖဲ ၁၉၇၈ န့ၣ် အဝဲသ့ၣ် ဒိးဘျၢထံ. တကးဒံးဘၣ် အဝဲသ့ၣ် တဲဘၣ်က့ၤ အဟံၣ်ဖိဃီဖိ, အသကိး ဒီးပှၤဂၤလၢ တၢ်မ့ၢ်တၢ်တီလၢ အဝဲသ့ၣ် ပာ်လုၢ်ပာ်ပှ့ၤဝဲ. ခီဖျိလၢ ဒီပုၢ်ဝဲၢ်ခွါအၢၤနဲး ဒီးအမါရိၣ် စံၣ်တဲၤတဲလီၤတၢ်လၢ တၢ်သးဆူၣ်အဃိ အဝဲသ့ၣ်မၤစၢၤဘၣ် ပှၤအဂၤ ၇၀ ဘျဲၣ်လၢ ကသ့ၣ်ညါထီၣ် ယဟိဝၤယွၤ ဒီးဒိးဘျၢထံ.

၇. ပမ့ၢ်ပာ်လုၢ်ပာ်ပှ့ၤ လံာ်စီဆှံ တၢ်မ့ၢ်တၢ်တီန့ၣ် ပကဘၣ်သး မၤမနုၤလဲၣ်. (လူၤကၣ် ၆:၄၅)

^၇ ပသ့ၣ်ညါဘၣ်လၢ ပမ့ၢ်ပာ်လုၢ်ပာ်ပှ့ၤ လံာ်စီဆှံ တၢ်မ့ၢ်တၢ်တီန့ၣ် ပကဘၣ်သး တဲဘၣ်ပှၤဂၤ သပှၢ်တၢၢ် ဒီးပအိၣ်ဘှ့ၣ်တကဲဘၣ်. (ဖး လူၤကၣ် ၆:၄၅.) ပတူၢ်ဘၣ် ဒ်သိးဒီး ယ့ၣ်ၡူး အပျဲၢ်အဘီၣ်တဖၣ် ဖဲတၢ်မၢဖိအစိၤ လၢအတဲဝဲလၢ “တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.” (မၤတၢ် ၄:၂၀) ပဝဲစ့ၢ်ကီး ပမ့ၢ်ပာ်လုၢ်ပာ်ပှ့ၤ တၢ်မ့ၢ်တၢ်တီ ဒိၣ်မးန့ၣ် ပကဂုာ်ကျဲးစၢး တဲဘၣ်ပှၤကိးဂၤဒဲးလၢ လံာ်စီဆှံ တၢ်မ့ၢ်တၢ်တီ.

ပစံၣ်တဲၤတဲလီၤတၢ် ခီဖျိလၢ ပအဲၣ်ပှၤဂၤ

၈. ဘၣ်မနုၤအဃိ ပဂုာ်ကျဲးစၢး တဲဘၣ်ပှၤဂၤလၢ တၢ်သးခုကစီၣ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “ အဲၣ်ပှၤဂၤ—ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်.”) (ကွၢ်စ့ၢ်ကီးတၢ်ဂီၤ.)

^၈ ယဟိဝၤယွၤ ဒီးအဖိခွါယ့ၣ်ၡူး အဲၣ်ပှၤဂၤအဃိ ပဝဲစ့ၢ်ကီး ပအဲၣ်ပှၤဂၤ. (ကတိၤ ၈:၃၁; ယိၤ ၃:၁၆) ပှၤလၢအ “တသ့ၣ်ညါ ကစၢ်ယွၤဘၣ်” ဒီးအ “တၢ်မုၢ်လၢ်တအိၣ်ဘၣ်” န့ၣ် ပသးကညီၤ အဝဲသ့ၣ်ဒိၣ်မး. (အ့း ၂:၁၂) ခီဖျိလၢ အဝဲသ့ၣ် ထံၣ်ဘၣ်တၢ်ကီတၢ်ခဲအဃိ အဝဲသ့ၣ် ကတူၢ်ဘၣ်ဝဲဒ်သိးဒီး အလီၤတဲာ်လၢ တၢ်ပူၤယိာ်. ဘၣ်ဆၣ် ဒ်သိးပကမၤစၢၤ အဝဲသ့ၣ်အဂီၢ် ပအိၣ်ဒီး ပျံၤတဘိ. ပျံၤတဘိအံၤ အလီၤဂာ်ဒ်သိးဒီး ဘီမုၢ်တၢ်သးခုကစီၣ် ဒီးကထုးထီၣ်ကွံာ် အဝဲသ့ၣ်လၢ တၢ်ပူၤယိာ်. ဒီးခီဖျိလၢ ပအဲၣ်အဝဲသ့ၣ် ဒီးသးကညီၤ အဝဲသ့ၣ်အဃိ ပဂုာ်ကျဲးစၢး တဲဘၣ်အဝဲသ့ၣ်လၢ တၢ်သးခုကစီၣ်. တၢ်သးခုကစီၣ်လၢ အလုၢ်ဒိၣ်ပှ့ၤဒိၣ်အံၤ ကဟ့ၣ်အဝဲသ့ၣ် တၢ်မုၢ်လၢ် ဒီးကမၤစၢၤအဝဲသ့ၣ် ဒ်သိး ကအိၣ်ဒီး တၢ်အိၣ်မူလၢအဂ့ၤခဲအံၤ. တကးဒံးဘၣ် ခါဆူညါ အဝဲသ့ၣ် ကအိၣ်ဒီးတၢ်ခွဲးတၢ်ယာ်လၢ ကဒိးန့ၢ်ဘၣ် “တၢ်မူနီၢ်ကီၢ်” လၢအမ့ၢ် တၢ်အိၣ်မူ လီၤထူလီၤယိာ် လၢဟီၣ်ခိၣ်သီ.—၁ တံၤ ၆:၁၉.

၉. ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ပဟ့ၣ်ပလီၢ်ပှၤဂၤ တၢ်ဂ့ၢ်မနုၤလဲၣ် ဒီးဘၣ်မနုၤအဃိ ပမၤဒ်န့ၣ်လဲၣ်. (ယဃ့းစက့လး ၃၃:၇, ၈)

^၉ ခီဖျိလၢ ပအဲၣ်ပှၤဂၤအဃိ ပဟ့ၣ်ပလီၢ်အဝဲသ့ၣ်လၢ ဟီၣ်ခိၣ်အအၢအသီလၢ မုၣ်ကီၤလံၢ်ပၢဝဲအံၤ ကကတၢၢ်ဘူးထီၣ်လံ. (ဖး ယဃ့းစက့လး ၃၃:၇, ၈.) လံာ်စီဆှံ ပာ်ဖျါထီၣ်ဝဲလၢ ခါဆူညါန့ၣ် “တၢ်နးတၢ်ဖှီၣ်ဖးဒိၣ် ကအိၣ်ထီၣ်ဝဲလီၤ. ဒီးလၢဟီၣ်ခိၣ် ကဲထီၣ်သီ လံၤလံၤ တုၤလီၤလၢ ဆၢကတီၢ်ခဲအံၤန့ၣ် တၢ်နးတၢ်ဖှီၣ် တကဲထီၣ်အသးဒ်အံၤ နီတဘျီဒံးဘၣ်. ဒီးလၢခံစ့ၢ်ကီး တကဲထီၣ်အသး နီတဘျီလၢၤဘၣ်.” (မး ၂၄:၂၁) ပှၤကိးဂၤဒဲး ဃုာ်ဒီး ပဟံၣ်ဖိဃီဖိတနီၤလၢ တဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် အိၣ်မူဝဲ တနံၤဘၣ်တနံၤ ဒီးခါဆူညါ တၢ်ကကဲထီၣ်သး ဒ်လဲၣ်န့ၣ် အဝဲသ့ၣ် တသ့ၣ်ညါဝဲဘၣ်. ပသးကညီၤ အဝဲသ့ၣ်အဃိ ပဘၣ်သး တဲဘၣ်အဝဲသ့ၣ် ဘၣ်ဃးဒီး တၢ်ကကဲထီၣ်သး ဖဲတၢ်စံၣ်ညီၣ် အဆၢကတီၢ်. အဆိကတၢၢ်န့ၣ် တၢ်ဘူၣ်တၢ်ဘါကမၣ်တဖၣ် ကဘၣ်တၢ်မၤဟးဂီၤကွံာ်အီၤ ဝံၤဒီး ဟီၣ်ခိၣ်အအၢအသီလၢ မုၣ်ကီၤလံၢ်ပၢဝဲအံၤ ကဟးဂီၤကွံာ် ဖဲအၢ်မက့းဒိၣ်တၢ်ဒုး အဆၢကတီၢ်. (လီၣ် ၁၆:၁၄, ၁၆; ၁၇:၁၆, ၁၇; ၁၉:၁၁, ၁၉, ၂၀) ပဃ့ထုကဖၣ်လၢ ပှၤအါဂၤ ကဒိကနၣ် တၢ်ကစီၣ်လၢပတဲ, နုာ်လီၤလၢ တၢ်ဘူၣ်ထီၣ်ဘါထီၣ်စီဆှံအပူၤ ဒီးဘူၣ်ထီၣ်ဘါထီၣ် ယဟိဝၤယွၤ လၢဆၢကတီၢ် ခဲအံၤ. ဘၣ်ဆၣ် ဘၣ်သ့ၣ်သ့ၣ် ခဲအံၤန့ၣ် ပှၤတနီၤ ဃုာ်ဒီးပဟံၣ်ဖိဃီဖိစ့ၢ်ကီး တဒိကနၣ် တၢ်ကစီၣ်လၢပတဲဘၣ်. အဃိ တၢ်ကကဲထီၣ်သးဒီး အဝဲသ့ၣ်ဒ်လဲၣ်.

၁၀. ဘၣ်မနုၤအဃိ အရ့ဒိၣ်ဒိၣ်မးလၢ ပကဆဲး ဟ့ၣ်ပလီၢ်ပှၤဂၤ ဘၣ်ဃးဒီး တၢ်ကကဲထီၣ်သး လၢခါဆူညါလဲၣ်.

^၁၀ ဒ်ပသ့ၣ်ညါဘၣ်လၢ တၢ်မၤလိလၢ အပူၤကွံာ်တခါအသိး ဖဲပှၤတဂၤ ထံၣ်ဝဲလၢ ဘၤဘူၤလိၣ်ဖးဒိၣ် ဟးဂီၤကွံာ်အခါ အတၢ်ပာ်သူၣ်ပာ်သး ကဆီတလဲအဃိ ဘၣ်သ့ၣ်သ့ၣ် ယဟိဝၤယွၤ ကဘၣ်သး မၤပူၤဖျဲးအီၤ. ယဟိဝၤယွၤ အတၢ်ဘၣ်သး မ့ၢ်အိၣ်ဒ်န့ၣ်န့ၣ် ခဲအံၤ အရ့ဒိၣ်ဒိၣ်မးလၢ ပကဆဲး ဟ့ၣ်ပလီၢ်ပှၤဂၤ ဘၣ်ဃးဒီး တၢ်ကကဲထီၣ်သး လၢခါဆူညါ. ဆိကမိၣ်ကွၢ် တၢ်ဂ့ၢ်အံၤ– တၢ်လၢ ပတဲအဝဲသ့ၣ် ခဲအံၤန့ၣ် ဘၣ်သ့ၣ်သ့ၣ် အဝဲသ့ၣ် ကနီၣ်ဘၣ်က့ၤဝဲ ဖဲအဝဲသ့ၣ်ထံၣ်ဘၣ် တၢ်ကဲထီၣ်သး လၢခါဆူညါအခါ. (ထိၣ်သတြီၤဒီး ယဃ့းစက့လး ၃၃:၃၃.) ဘၣ်သ့ၣ်သ့ၣ် အဝဲသ့ၣ် ကနီၣ်ဘၣ်က့ၤ တၢ်ဟ့ၣ်ပလီၢ်လၢ ပတဲအဝဲသ့ၣ်အဃိ တချုးလၢ တၢ်အကတၢၢ် ဘၣ်ဒံးဘၣ်န့ၣ် အဝဲသ့ၣ် ကဘၣ်သး နုာ်လီၤလၢ တၢ်ဘူၣ်ထီၣ်ဘါထီၣ်စီဆှံအပူၤ ဒီးဘူၣ်ထီၣ်ဘါထီၣ်က့ၤ ယဟိဝၤယွၤ တပူၤဃီဒီးပှၤ. အဒိ ပမ့ၢ်ဘၣ်ကွၢ် ပှၤခိးဃိာ်ဖိတဂၤ လၢဝ့ၢ်ဖံလံးပံၤန့ၣ် ပထံၣ်ဘၣ်လၢ “ဟီၣ်ခိၣ်ဟူးဝဲ ဆူၣ်ဆူၣ်” ဝံၤအလီၢ်ခံမၣ် အတၢ်ပာ်သူၣ်ပာ်သး ဆီတလဲ. ဒ်န့ၣ်အသိး ပှၤတနီၤလၢ တဒိကနၣ် ပတၢ်ဟ့ၣ်ပလီၢ် လၢဆၢကတီၢ် ခဲအံၤန့ၣ် ခါဆူညါ ဖဲအဝဲသ့ၣ် ထံၣ်ဝဲလၢ ဘၤဘူၤလိၣ်ဖးဒိၣ် ဟးဂီၤကွံာ် ဝံၤအလီၢ်ခံမၣ် ဘၣ်သ့ၣ်သ့ၣ် အတၢ်ပာ်သူၣ်ပာ်သး ကဆီတလဲ.—မၤတၢ် ၁၆:၂၅-၃၄.

ပစံၣ်တဲၤတဲလီၤတၢ် ခီဖျိလၢ ပအဲၣ်ယဟိဝၤယွၤ ဒီးပာ်ကဲအမံၤ

၁၁. ပဟ့ၣ်ယဟိဝၤယွၤ တၢ်လၤကပီၤ, တၢ်ယူးယီၣ် ဒီးတၢ်စိတၢ်ကမီၤ သ့ဒ်လဲၣ်. (လီၣ်ဖျါ ၄:၁၁) (ကွၢ်စ့ၢ်ကီးတၢ်ဂီၤ.)

^၁၁ တၢ်ဂ့ၢ်အရ့ဒိၣ်ကတၢၢ်လၢ ပစံၣ်တဲၤတဲလီၤ တၢ်သးခုကစီၣ်န့ၣ် မ့ၢ်ဝဲခီဖျိလၢ ပအဲၣ်ယဟိဝၤယွၤ ဒီးပာ်ကဲအမံၤစီဆှံ. ပတၢ်စံၣ်တဲၤတဲလီၤန့ၣ် ပထံၣ်အီၤဒ် ကျဲတဘိလၢ ပစံးထီၣ်ပတြၢၤ ကစၢ်ယွၤလၢ ပအဲၣ်အီၤတဂၤ. (ဖး လီၣ်ဖျါ ၄:၁၁.) ပတူၢ်လိာ်လၢ ပသးဒီဖျၢၣ်လၢ ပကစၢ်ယဟိဝၤယွၤန့ၣ် အကြၢးဒိးန့ၢ် တၢ်လၤကပီၤ, တၢ်ယူးယီၣ် ဒီးတၢ်စိတၢ်ကမီၤ. အဃိ ဖဲပတဲဘၣ်ပှၤဂၤလၢ ကစၢ်ယွၤ “တ့လီၤတၢ်ခဲလၢာ်” ဒီးအဟ့ၣ်ပှၤ သးသမူအခါ လီၤဂာ်ဒ်သိးဒီး ပဟ့ၣ်အီၤ တၢ်လၤကပီၤ ဒီးတၢ်ယူးယီၣ်. ဒီးတသ့ဖဲအသ့ ပမ့ၢ်ဂုာ်ကျဲးစၢး သူပတၢ်ဆၢကတီၢ်, ပဂံၢ်ပဘါ ဒီးတၢ်လၢအအိၣ်ဒီးပှၤ လၢကစံၣ်တဲၤတဲလီၤ တၢ်သးခုကစီၣ်အဂီၢ်န့ၣ် အလီၤဂာ်ဒ်သိးဒီး ပဟ့ၣ်ယဟိဝၤယွၤ ပတၢ်စိတၢ်ကမီၤ.  (မး ၆:၃၃; လူၤ ၁၃:၂၄; ကလီး ၃:၂၃) ပမ့ၢ်ဘၣ်တဲတီတီန့ၣ် ခီဖျိလၢ ပအဲၣ်ယဟိဝၤယွၤအဃိ ပတဲဘၣ်ပှၤဂၤလၢအဂ့ၢ် မုာ်ဒိၣ်မး. တကးဒံးဘၣ် ပသးအိၣ်တဲပှၤဂၤ ဘၣ်ဃးဒီး ပကစၢ်ယွၤအမံၤ ဒီးအတၢ်ပာ်သူၣ်ပာ်သးအဂ့ၢ်. ဘၣ်မနုၤအဃိလဲၣ်.

၁၂. ဖဲပစံၣ်တဲၤတဲလီၤတၢ်အခါ ပပာ်စီဆှံ ယဟိဝၤယွၤအမံၤ သ့ဒ်လဲၣ်.

^၁၂ ခီဖျိလၢ ပအဲၣ်ယဟိဝၤယွၤအဃိ ပဘၣ်သး ပာ်စီဆှံအမံၤ. (မး ၆:၉) ဒီးပပာ်စီဆှံအမံၤ သ့ခီဖျိ ပတဲဘၣ်ပှၤဂၤလၢ တၢ်ဂ့ၢ်လၢ မုၣ်ကီၤလံၢ် တဲဘၣ်ဃးဒီး ယဟိဝၤယွၤန့ၣ် ကဲဝဲတၢ်လံၣ်တၢ်လီ. (၁ မိၤ ၃:၁-၅; ဘး ၂:၄; ယိၤ ၈:၄၄) ဒီးဖဲပစံၣ်တဲၤတဲလီၤတၢ်အခါ ပသးဆူၣ်လၢ ပကတဲဘၣ် ပှၤလၢအသးအိၣ်ဒိကနၣ်ပှၤ ဘၣ်ဃးဒီး ပကစၢ်ယွၤ အတၢ်ပာ်သူၣ်ပာ်သး အဂ့ၢ်. ပဘၣ်သး ဒုးသ့ၣ်ညါ ပှၤကိးဂၤဒဲးလၢ ယဟိဝၤယွၤ အတၢ်ဂ့ၤတၢ်ဝါ လၢအရ့ဒိၣ်ကတၢၢ်န့ၣ် မ့ၢ်ဝဲ တၢ်အဲၣ်တၢ်ကွံ ဒီးအကဲပှၤလၢ အပၢတၢ် တီတီလိၤလိၤ. တယံာ်လၢၤဘၣ်န့ၣ် အဘီအမုၢ် ကမၤကတၢၢ်ကွံာ် တၢ်နးတၢ်ဖှီၣ်ခဲလၢာ် ဒီးကဒုးအိၣ်ထီၣ် တၢ်ဃူတၢ်ဖိး ဒီးတၢ်သးခု လၢပှၤဟီၣ်ခိၣ်ဖိအဂီၢ်. (စံး ၃၇:၁၀, ၁၁, ၂၉; ၁ ယိၤ ၄:၈) ဖဲပတဲဘၣ်ပှၤဂၤ ယဟိဝၤယွၤ အဂ့ၢ်ဒ်အံၤအခါ ပပာ်ဖျါထီၣ်လၢ ပပာ်စီဆှံအမံၤ. တကးဒံးဘၣ် ပသးခုဒိၣ်မးလၢ ပမၤလၢပှဲၤပမူဒါ ဒီးအိၣ်မူဒ် အပှၤအုၣ်သးတဂၤအသိး. ဘၣ်မနုၤအဃိ ပတဲဒ်န့ၣ်လဲၣ်.

၁၃. ပဘၣ်တၢ်ကိးပှၤလၢ ယဟိဝၤပှၤအုၣ်အသးန့ၣ် ဘၣ်မနုၤအဃိ အကဲဝဲ တၢ်ခွဲးတၢ်ယာ်ဖးဒိၣ် တခါလဲၣ်. (ယၡါယၤ ၄၃:၁၀-၁၂)

^၁၃ ယဟိဝၤယွၤ ဃုထၢထီၣ်ပှၤ ဒီးကိးပှၤလၢ “ယပှၤအုၣ်အသးတဖၣ်.” (ဖး ယၡါယၤ ၄၃:၁၀-၁၂.) ပူၤကွံာ်အနံၣ်တဖၣ်န့ၣ် ပှၤပၢဆှၢတၢ်ကမံးတံာ် အလံာ်ပရၢတဘ့ၣ် တဲဝဲလၢ “ပဘၣ်တၢ်ကိးပှၤလၢ ယဟိဝၤပှၤအုၣ်အသးအဃိ အကဲဝဲ တၢ်ခွဲးတၢ်ယာ်ဖးဒိၣ်တခါ လၢပဂီၢ်.” c ဘၣ်မနုၤအဃိ ပတဲဒ်န့ၣ်လဲၣ်. ဆိကမိၣ်ကွၢ် တၢ်အဒိတခါအံၤ. ပှၤပာ်တၢ်ကမၣ်လၢနလိၤ ဒီးတဲလၢ နမၤကမၣ်တၢ်တမံၤမံၤ. ဒီးခဲအံၤန့ၣ် နကလိၣ်ဘၣ် ပှၤတဂၤလၢ ကတဲန့ၢ်တၢ် လၢနဂီၢ်လၢ တၢ်လၢပှၤတဲန့ၣ် တဘၣ်ဘၣ်, နကဲပှၤဂ့ၤတဂၤ ဒီးနတမၤကမၣ်တၢ်ဘၣ်. အဃိ နကဃုထၢ ပှၤဒ်လဲၣ်တဂၤလဲၣ်. နကဃုထၢ ပှၤလၢ နသ့ၣ်ညါအီၤဂ့ၤဂ့ၤ ဒီးနာ်န့ၢ်အီၤ, ပှၤလၢအအိၣ်ဒီး မံၤဂ့ၤသၣ်ဂ့ၤ  ဒ်သိး ပှၤဂၤကနာ်န့ၢ်အီၤစ့ၢ်ကီး. ဒ်န့ၣ်အသိး ယဟိဝၤယွၤ ဃုထၢထီၣ်ပှၤ ဒ်အပှၤအုၣ်အသးန့ၣ် ပာ်ဖျါထီၣ်ဝဲလၢ အသ့ၣ်ညါပှၤဂ့ၤဂ့ၤ, အနာ်န့ၢ်ပှၤ ဒီးနာ်ဝဲလၢ ပကတဲဘၣ်ပှၤဂၤလၢ ယဟိဝၤယွၤ မ့ၢ်ကစၢ်ယွၤ အမ့ၢ်အတီ ထဲတဂၤ. ပပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဲဘၣ် ယဟိဝၤပှၤအုၣ်အသး ဒီးပဒုးသ့ၣ်ညါပှၤဂၤလၢ ယဟိဝၤယွၤအမံၤ ကိးဆၢကတီၢ်ဒဲး. တကးဒံးဘၣ် ပဂုာ်ကျဲးစၢး တဲဖျါထီၣ် တၢ်မ့ၢ်တၢ်တီ ဘၣ်ဃးဒီး ယဟိဝၤယွၤအဂ့ၢ် ဒ်သိး ပှၤတထံၣ်ကမၣ် ယဟိဝၤယွၤ လၢၤတဂ့ၤအဂီၢ်. ပမၤဒ်အံၤပဃိ ပပာ်ဖျါထီၣ်လၢ ပအိၣ်မူဒ်သိး ပမံၤလၢအမ့ၢ် ယဟိဝၤပှၤအုၣ်အသး.—စံး ၈၃:၁၈; ရိ ၁၀:၁၃-၁၅.

ပကဆဲး စံၣ်တဲၤတဲလီၤတၢ် တုၤလၢ တၢ်အကတၢၢ်

၁၄. ခါဆူညါ တၢ်ကကဲထီၣ်သးဒ်လဲၣ်.

^၁၄ တၢ်ကကဲထီၣ်သး လၢခါဆူညါန့ၣ် လီၤသးခုဒိၣ်မး. အဃိ တချုးလၢ တၢ်နးတၢ်ဖှီၣ်ဖးဒိၣ် စးထီၣ်ဒံးဘၣ်န့ၣ် ပမုၢ်လၢ်လၢ ပှၤအါဂၤ ကတူၢ်လိာ် တၢ်မ့ၢ်တၢ်တီ ခီဖျိလၢ ယဟိဝၤယွၤ အတၢ်မၤစၢၤအဃိ. တကးဒံးဘၣ် ခါဆူညါ ဖဲတၢ်နးတၢ်ဖှီၣ်ဖးဒိၣ် ဘၣ်ဝဲအဆၢကတီၢ် ဘၣ်သ့ၣ်သ့ၣ် ပှၤအါဂၤ ကဟးထီၣ်ကွံာ်လၢ မုၣ်ကီၤလံၢ် အတၢ်ပၢဖီလာ် ဒီးဟဲဘူၣ်ထီၣ်ဘါထီၣ် ယဟိဝၤယွၤ တပူၤဃီဒီးပှၤအဃိ ပသးခုဒိၣ်မး.—မၤတၢ် ၁၃:၄၈.

၁၅-၁၆. ပကဆဲးမၤ မနုၤလဲၣ် ဒီးပကဘၣ်မၤ တုၤလၢ အခါဖဲလဲၣ်.

^၁၅ ခဲအံၤန့ၣ် ပအိၣ်ဒီး တၢ်မၤအရ့ဒိၣ်တခါလၢ ပကဘၣ် ဟ့ၣ်ပလီၢ်ပှၤဂၤ ဒီးတၢ်မၤတခါအံၤ ခါဆူညါ ပတမၤဘၣ်လၢၤဘၣ်. ပအိၣ်ဒီး တၢ်ခွဲးတၢ်ယာ်လၢ ပကစံၣ်တဲၤတဲလီၤ ကစၢ်ယွၤအဘီမုၢ် တၢ်သးခုကစီၣ်အဂ့ၢ် လၢဟီၣ်ခိၣ်ဒီဘ့ၣ်ညါ. ဒီးတကတီၢ်ဃီန့ၣ် ပကဘၣ် ဆဲးဟ့ၣ်ပလီၢ်ပှၤဂၤ ဘၣ်ဃးဒီး တၢ်လၢကကဲထီၣ်သး လၢခါဆူညါ. ပှၤကိးဂၤဒဲး ကဘၣ်သ့ၣ်ညါဝဲလၢ ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ကကတၢၢ်ဘူးထီၣ် ဒိၣ်မးလံ. ဝံၤဒီး ဖဲတၢ်စံၣ်ညီၣ် အဆၢကတီၢ် ဘၣ်ဝဲအခါ ပှၤကိးဂၤဒဲး ကသ့ၣ်ညါဘၣ်လၢ တၢ်ကစီၣ်လၢ ပစံၣ်တဲၤတဲလီၤန့ၣ် ဟဲလၢ ယဟိဝၤယွၤအအိၣ်.—ဃ့း ၃၈:၂၃.

^၁၆ အဃိ ပကဘၣ်ပာ်လီၤသးလၢ ပကမၤမနုၤလဲၣ်. ပကဘၣ် ပာ်လုၢ်ပာ်ပှ့ၤ တၢ်သးခုကစီၣ်, ပကဘၣ် အဲၣ်ပှၤဂၤ ဒီးအရ့ဒိၣ်ကတၢၢ်န့ၣ် ပကဘၣ် အဲၣ်ယဟိဝၤယွၤ ဒီးပာ်ကဲ အမံၤစီဆှံ. ပမ့ၢ်ဆဲးမၤအါထီၣ် ပတၢ်အဲၣ်န့ၣ် ကမၤစၢၤပှၤဒ်သိး ပကစံၣ်တဲၤတဲလီၤတၢ်လၢ တၢ်သးဆူၣ် တုၤလၢ ယဟိဝၤယွၤ တဲဝဲလၢ “ဘၣ်လံ, တၢ်စံၣ်တဲၤတဲလီၤတၢ်မၤ ဝံၤလံ.”