၁-၂. ဘၣ်ဃးဒီး တၢ်ပာ်တၢ်အဲၣ်တီန့ၣ် ပှၤတနီၤ တူၢ်ဘၣ်ဝဲဒ်လဲၣ်.

 ဖဲပှၤခံဂၤ ပာ်တၢ်အဲၣ်တီအခါ အကဲဝဲ တၢ်ဆၢကတီၢ်လၢ အလီၤသးခုဒိၣ်မးလၢ အဝဲသ့ၣ်အဂီၢ်. ခဲအံၤ နမ့ၢ်ပာ်တၢ်အဲၣ်တီန့ၣ် နကဘၣ်သးလၢ နတၢ်အိၣ်သး ကလဲၤသး ဂ့ၤဂ့ၤဘၣ်ဘၣ် ဒီးနကအိၣ်ဒီး တၢ်သးခု. ပထံၣ်ဘၣ်လၢ ပှၤဒီတၢ်အဲၣ်တီ အါဂၤန့ၣ် အဝဲသ့ၣ် အိၣ်ဒီးတၢ်သးခု. အဒိ ဒီပုၢ်ဝဲၢ်မုၣ်စံၤယီ a လၢအအိၣ်လၢ ကီၢ်အံးသံးယိဖၠံယါန့ၣ် အတဲဝဲလၢ “ဖဲယပာ်တၢ်အဲၣ်တီဒီး ယဝၤအခါ ယတူၢ်ဘၣ်လၢ အကဲဝဲ တၢ်ဆၢကတီၢ်လၢ အလီၤသးခု ဒိၣ်ကတၢၢ်. ပတဲသကိး တၢ်ဂ့ၢ်လၢအရ့ဒိၣ် တကးဒံးဘၣ် ပတဲသကိး တၢ်လီၤနံၤစ့ၢ်ကီး. ဖဲယသ့ၣ်ညါလီၤသးလၢ ယထံၣ်န့ၢ် ပှၤလၢယအဲၣ်အီၤ ဒီးအအဲၣ်ယၤအခါ ယသးခုညါ.”

^၂ မ့မ့ၢ် ဒီပုၢ်ဝဲၢ်ခွါအလဲးစံၤအိၤ လၢအအိၣ်လၢ ကီၢ်နဲသၢၤလဲၤန့ၣ် အတဲဝဲလၢ “ဖဲယပာ်တၢ်အဲၣ်တီဒီး ယမါအခါ ယသ့ၣ်ညါဘၣ်အဂ့ၢ်အဃိ ယသးခု. ဘၣ်ဆၣ် လၢပဝဲခံဂၤ အဘၢၣ်စၢၤန့ၣ် တၢ်ကီတၢ်ခဲ အိၣ်စ့ၢ်ကီး.” အဃိ လၢတၢ်မၤလိတခါအံၤ ပကတဲသကိး တၢ်ကီတၢ်ခဲတနီၤလၢ ပှၤဒီတၢ်အဲၣ်တီခံဂၤ ကထံၣ်ဘၣ်ဝဲ ဒီးပကတဲသကိး လံာ်စီဆှံ အတၢ်ဟံးစုနဲၣ်ကျဲ တနီၤလၢ ကမၤစၢၤအဝဲသ့ၣ် ဒ်သိး အဝဲသ့ၣ် ကဆၢတဲာ် တၢ်လၢအဘၣ်. တကးဒံးဘၣ် ပှၤလၢတၢ်အိၣ်ဖှိၣ်ပူၤ မၤစၢၤ ပှၤဒီတၢ်အဲၣ်တီခံဂၤ ကသ့ဒ်လဲၣ်န့ၣ် ပကသ့ၣ်ညါဘၣ်စ့ၢ်ကီး.

တၢ်ပာ်တၢ်အဲၣ်တီန့ၣ် အတၢ်တိာ်ပာ် မ့ၢ်မနုၤလဲၣ်

၃. တၢ်ပာ်တၢ်အဲၣ်တီန့ၣ် အတၢ်တိာ်ပာ် မ့ၢ်မနုၤလဲၣ် (ကတိၤဒိ ၂၀:၂၅)

^၃ ဖဲပှၤခံဂၤ ပာ်တၢ်အဲၣ်တီအခါ အကဲဝဲ တၢ်ဆၢကတီၢ်လၢ အလီၤသးခု သနာ်က့ အရ့ဒိၣ်လၢ အဝဲသ့ၣ် ကဆိကမိၣ်ထံ ဘၣ်ဃးဒီး တၢ်ဆီဟံၣ်ဆီဃီစ့ၢ်ကီး. ပမ့ၢ်ဘၣ်ကွၢ် ဖဲတလးမူးပိာ်မုၣ် ဒီးတလးမူးပိာ်ခွါ ဖျီသးတနံၤန့ၣ် အဝဲသ့ၣ် မၤတၢ်အၢၣ်လီၤလၢ ယဟိဝၤယွၤ အမဲာ်ညါလၢ အဝဲသ့ၣ် ကအဲၣ်လိာ်သး ဒီးပာ်ကဲလိာ်သး တုၤလၢအသံ. ဒီးပသ့ၣ်ညါလၢ တချုးလၢ ပမၤတၢ်အၢၣ်လီၤ တမံၤမံၤဒံးဘၣ်န့ၣ် ပကဘၣ် ဆိကမိၣ်ထံဆိတၢ်ဂ့ၢ် လီၤတံၢ်လီၤဆဲး. (ဖး ကတိၤဒိ ၂၀:၂၅.) တၢ်ဆီဟံၣ်ဆီဃီ အတၢ်အၢၣ်လီၤစ့ၢ်ကီး ပကဘၣ် ဆိကမိၣ်ထံအဂ့ၢ် လီၤတံၢ်လီၤဆဲး.  အဃိ ဖဲပှၤခံဂၤ ပာ်တၢ်အဲၣ်တီအခါ အဝဲသ့ၣ်အိၣ်ဒီး တၢ်ဆၢကတီၢ်လၢ ကဃုသ့ၣ်ညါလိာ်သးဂ့ၢ် ဒီးလၢခံ ကဆၢတဲာ် တၢ်လၢအဘၣ်. တၢ်ဆၢတဲာ် လၢအဘၣ်န့ၣ် အဲၣ်ဒိးတဲဝဲ ပှၤခံဂၤ ဆၢတဲာ်လီၤသးလၢ ကဖျီသး မ့တမ့ၢ် တပာ်တၢ်အဲၣ်တီလၢၤဘၣ်. ဒီးပှၤဒီတၢ်အဲၣ်တီခံဂၤ မ့ၢ်လီၤဖးန့ၣ် တမ့ၢ်ခီဖျိလၢ အဝဲသ့ၣ် အတၢ်ဆၢတဲာ်ကမၣ် အဃိဘၣ်. နီၢ်ကီၢ်န့ၣ် အဝဲသ့ၣ် ကဖျီသးဧါ တဖျီသးဘၣ်ဧါန့ၣ် ဖဲအပာ်တၢ်အဲၣ်တီအခါ အသ့ၣ်ညါဘၣ်ဝဲ တၢ်စံးဆၢအဃိ အဝဲသ့ၣ် ဆၢတဲာ်တၢ် လၢအဘၣ်.

၄. ဘၣ်ဃးဒီး တၢ်ပာ်တၢ်အဲၣ်တီန့ၣ် ဘၣ်မနုၤအဃိ ပဘၣ်အိၣ်ဒီး တၢ်ထံၣ်အကြၢးအဘၣ်လဲၣ်.

^၄ ဒီပုၢ်ဝဲၢ်မုၣ်ခွါ သဘျ့တဖၣ် ကဘၣ်သ့ၣ်နီၣ်ထီၣ်လၢ ပှၤခံဂၤ ပာ်တၢ်အဲၣ်တီန့ၣ် မ့ၢ်ဒ်သိး အကသ့ၣ်ညါအါထီၣ်လိာ်သး ဒီးမ့ၢ်အဝဲသ့ၣ် ကဆၢတဲာ်လၢ ကဖျီသးဧါ တဖျီသးဘၣ်ဧါအဂီၢ်. အဃိ ပှၤတဂၤဂၤလၢ အဝဲသ့ၣ် မ့ၢ်တဘၣ်သး ဖျီသးဒီးအီၤဘၣ်န့ၣ် အဝဲသ့ၣ် တဘၣ်ပာ်တၢ်အဲၣ်တီဒီးအီၤဘၣ်. တၢ်ပာ်တၢ်အဲၣ်တီ အတၢ်တိာ်ပာ် မ့ၢ်မနုၤလဲၣ်န့ၣ် ဒီပုၢ်ဝဲၢ်မုၣ်ခွါသဘျ့ ကိးဂၤဒဲး ဒီးပဝဲခဲလၢာ် ကဘၣ် အိၣ်ဒီး တၢ်ထံၣ်အကြၢးအဘၣ် ဒီးသ့ၣ်ညါ တၢ်ဂ့ၢ်အံၤဂ့ၤဂ့ၤ. အဒိ ပှၤတနီၤ ဆိကမိၣ်ဝဲလၢ ပှၤခံဂၤ မ့ၢ်ပာ်တၢ်အဲၣ်တီန့ၣ် အဝဲသ့ၣ် ကဘၣ်ဖျီသး. တၢ်ထံၣ်တခါအံၤ ကမၤဘၣ်ဒိ ဒီပုၢ်ဝဲၢ်မုၣ်ခွါ သဘျ့တဖၣ် အတၢ်ဆၢတဲာ်ဒ်လဲၣ်. ဒီပုၢ်ဝဲၢ်မုၣ်မလံစၤ လၢအအိၣ်လၢ ကီၢ်အမဲရကၤန့ၣ် အတဲဝဲလၢ “ဖဲဒီပုၢ်ဝဲၢ်မုၣ်ခွါ သဘျ့ခံဂၤ ပာ်တၢ်အဲၣ်တီအခါ ပှၤတနီၤ ထံၣ်ဝဲလၢ အဝဲသ့ၣ် ကဘၣ်ဖျီသး. အဃိ ပှၤဒီတၢ်အဲၣ်တီ တနီၤန့ၣ် အဝဲသ့ၣ် တကြၢးလိာ်သးလၢ တဂၤဒီးတဂၤအဂီၢ်ဘၣ် သနာ်က့ အဝဲသ့ၣ် ဆဲးပာ်တၢ်အဲၣ်တီ. မ့မ့ၢ် ဒီပုၢ်ဝဲၢ်မုၣ်ခွါသဘျ့ လၢအဂၤတနီၤန့ၣ် မၣ်တဘၣ်သး ပာ်တၢ်အဲၣ်တီလၢၤဘၣ်. တၢ်ထံၣ်ဒ်အံၤန့ၣ် ဒုးအိၣ်ထီၣ် တၢ်သူၣ်ကိၢ်သးဂီၤလၢ ပှၤသဘျ့အဂီၢ်အါမး.”

ဃုသ့ၣ်ညါအါထီၣ်လိာ်သးဂ့ၢ် ဂ့ၤဂ့ၤ

၅-၆ ဖဲပှၤဒီတၢ်အဲၣ်တီခံဂၤ ပာ်တၢ်အဲၣ်တီအခါ အဝဲသ့ၣ် ကဘၣ် ဃုသ့ၣ်ညါလိာ်သးဂ့ၢ် ဒ်လဲၣ်. (၁ ပ့းတရူး ၃:၄)

^၅ နမ့ၢ်ပာ်တၢ်အဲၣ်တီန့ၣ် ဒ်သိး နကဆၢတဲာ်လၢ နကဖျီသးဧါ တဖျီသးဘၣ်ဧါအဂီၢ် တၢ်မနုၤ ကမၤစၢၤနၤလဲၣ်. နကဘၣ် ဃုသ့ၣ်ညါအါထီၣ်လိာ်သးဂ့ၢ် ဂ့ၤဂ့ၤ. တချုးလၢ နပာ်တၢ်အဲၣ်တီဒီး ပှၤတဂၤ ဒံးဘၣ်န့ၣ် ဘၣ်သ့ၣ်သ့ၣ် နကသ့ၣ်ညါပာ်စၢၤ အဂ့ၢ်တနီၤ. ခဲအံၤန့ၣ် ခီဖျိလၢ နပာ်တၢ်အဲၣ်တီအဃိ နကသ့ၣ်ညါဘၣ် တၢ်လၢ အအိၣ်ခူသူၣ်အသး လၢအ “သူၣ်ကံၢ်သးလဲအပူၤ.” (ဖး ၁ ပ့းတရူး ၃:၄.) အဒိ အတၢ်ရ့လိာ်သးဒီး ယဟိဝၤယွၤ အိၣ်ဒ်လဲၣ်, အတၢ်ပာ်သူၣ်ပာ်သး ဒီးအတၢ်ဆိကမိၣ် အိၣ်ဒ်လဲၣ်န့ၣ် နကသ့ၣ်ညါအါထီၣ်ဘၣ် ဂ့ၤဂ့ၤ. လၢခံယံာ်ထီၣ်ဒီး နကသ့ၣ်ညါဘၣ် တၢ်စံးဆၢလၢ– ‘မ့ၢ်ပှၤတဂၤအံၤ ကကဲထီၣ် ယသးသမူတံၤသကိး လၢအဂ့ၤဧါ.’ (ကတိၤ ၃၁:၂၆, ၂၇, ၃၀; အ့း ၅:၃၃; ၁ တံၤ ၅:၈) ‘ပပာ်ဖျါထီၣ်လၢ ပမၤလၢပှဲၤန့ၢ်လိာ်သး တၢ်လိၣ်ဘၣ် ကိးသနၢၣ်ဒဲး ကသ့ဧါ. ပကွၢ်ကပာ်လိာ်သး တၢ်ဂံၢ်စၢ်ဘါစၢ် ကန့ၢ်ဧါ.’ b (ရိ ၃:၂၃) ဖဲသုဃုသ့ၣ်ညါအါထီၣ်လိာ်သးဂ့ၢ်အခါ သုကဘၣ် သ့ၣ်ညါ လၢ သုတၢ်ဆီဟံၣ်ဆီဃီ ကလဲၤသး ဂ့ၤဂ့ၤအဂီၢ် သုခံဂၤလၢာ်တၢ်ထံၣ် ကဘၣ်လီၤဂာ်လိာ်သး ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် သုနၢ်ပၢၢ်လိာ်သး ဒီးမၤလၢပှဲၤန့ၢ်လိာ်သး တၢ်ဘၣ်သးကဘၣ်သ့.

^၆ ဖဲနပာ်တၢ်အဲၣ်တီအခါ နကဘၣ်ဃုသ့ၣ်ညါ တၢ်ဂ့ၢ်အဂၤ မနုၤဒံးလဲၣ်. တချုးလၢ နတၢ်အဲၣ်သဟီၣ် ဆူၣ်ထီၣ်ဖးဒိၣ် ဒံးဘၣ်န့ၣ် တဲသကိး တၢ်ဂ့ၢ်လၢ အရ့ဒိၣ် ဘၣ်ဃးဒီး တဂၤဒီးတဂၤ ဖီတၢၣ် လၢခါဆူညါအဂီၢ်. မ့မ့ၢ်လၢ နတၢ်အဲၣ်တီ အတၢ်အိၣ်ဆူၣ်အိၣ်ချ့အဂ့ၢ်, အကျိၣ်စ့တၢ်ကီတၢ်ခဲ မ့တမ့ၢ် တၢ်လၢ အကဲထီၣ်သးဒီးအီၤ လၢအပူၤကွံာ်အဂ့ၢ်ဟီမီၤ. ဖဲသုစးထီၣ် ပာ်တၢ်အဲၣ်တီ သီသီအခါ သုတလိၣ်တဲသကိး တၢ်ဂ့ၢ်တဖၣ်အံၤ တဘျီဃီဘၣ်. (ထိၣ်သတြီၤဒီး ယိၤဟၣ် ၁၆:၁၂.) နမ့ၢ်ဆိကမိၣ်လၢ နတၢ်အဲၣ်တီ တကြၢးသ့ၣ်ညါ တၢ်ဂ့ၢ်တနီၤနီၤ ဒံးဘၣ်န့ၣ် တလိၣ်နတဲပၠးအီၤဒံးဘၣ်. ဘၣ်ဆၣ် တၢ်ဆၢကတီၢ် မ့ၢ်ယံာ်ထီၣ်န့ၣ် ဒ်သိး နတၢ်အဲၣ်တီ ဆၢတဲာ် တၢ်လၢအဘၣ် ကသ့အဂီၢ် နကဘၣ်တဲပၠးအီၤ တၢ်ဂ့ၢ်လၢ အကြၢးသ့ၣ်ညါဝဲ ဒီးတဲပၠးအီၤ တၢ်ဂ့ၢ်ခဲလၢာ် တီတီလိၤလိၤ.

၇. ပှၤဒီတၢ်အဲၣ်တီခံဂၤ သ့ၣ်ညါအါထီၣ်လိာ်သးဂ့ၢ် ကသ့ဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ ပာ်တၢ်အဲၣ်တီဒီး ပှၤလၢအအိၣ်လၢ တၢ်လီၢ်ယံၤ.”) (ကွၢ်စ့ၢ်ကီးတၢ်ဂီၤ.)

^၇ နကသ့ၣ်ညါဘၣ် နတၢ်အဲၣ်တီ အတၢ်ပာ်သး ဂ့ၤဂ့ၤအဂီၢ် နကဘၣ်မၤဒ်လဲၣ်. နမၤသ့ခီဖျိ နသံကွၢ်လိာ်သး တၢ်သံကွၢ် ဒီးဒိကနၣ်န့ၢ်လိာ်သး ဂ့ၤဂ့ၤ. နကဘၣ်တဲဖျါထီၣ် နတၢ်တူၢ်ဘၣ် ဒီးတဲလိာ်သးတၢ် တီတီလိၤလိၤ ခံဂၤလၢာ်. (ကတိၤ ၂၀:၅; ယၤ ၁:၁၉) ဒ်သိး နကတဲသကိးဘၣ်တၢ်အဂီၢ် ဘၣ်သ့ၣ်သ့ၣ် နရဲၣ်ကျဲၤလၢ နကအီၣ်သကိးတၢ်, လဲၤဟးလိာ်ကွဲလၢ ပှၤအိၣ်အါအလီၢ် မ့တမ့ၢ် ဟးစံၣ်တဲၤတဲလီၤတၢ် ဒ်သိးသိးသ့. ဒီးဖဲနအိၣ်သကိး ဒီးရ့လိာ်သးဒီး ဟံၣ်ဖိဃီဖိ ဒီးတံၤသကိးအခါ နဃုသ့ၣ်ညါအါထီၣ်လိာ်သးဂ့ၢ် သ့စ့ၢ်ကီး. တကးဒံးဘၣ် ဒ်သိးနကသ့ၣ်ညါဘၣ်လၢ နတၢ်အဲၣ်တီ ရ့ဒီးပှၤဂၤဒ်လဲၣ် ဒီးလၢတၢ်အိၣ်သးတနီၤန့ၣ် အတၢ်ပာ်သးအိၣ်ဒ်လဲၣ်အဂီၢ် နရဲၣ်ကျဲၤ ဒီးကိးအိၣ်သကိး ပှၤအါဂၤသ့. အဒိ ဒီပုၢ်ဝဲၢ်ခွါအဲးၡဝ့ လၢအအိၣ်လၢ ကီၢ်နဲသၢၤလဲၤန့ၣ် အမၤဝဲဒ်န့ၣ်. ဘၣ်ဃးဒီး အပာ်တၢ်အဲၣ်တီဒီး ဒီပုၢ်ဝဲၢ်မုၣ်အၤလံၡါန့ၣ် အတဲဝဲဒ်အံၤ. “ပရဲၣ်ကျဲၤ တၢ်တမံၤမံၤလၢ ကမၤစၢၤပှၤဒ်သိး ပကသ့ၣ်ညါအါထီၣ်လိာ်သးဂ့ၢ်. ဒီးတၢ်လၢပမၤန့ၣ် အကဲဝဲ တၢ်ယိယိဖိ ဒ်သိးဒီး ပဖီအီၣ်သကိးတၢ် မ့တမ့ၢ် ပမၤတၢ်လၢအဂၤ တမံၤမံၤ. ဒီးဖဲပမၤသကိးတၢ် ဒ်သိးသိးအခါ ပသ့ၣ်ညါဘၣ်လိာ်သး တၢ်ဂ့ၤတၢ်ဝါ ဒီးတၢ်ဂံၢ်စၢ်ဘါစၢ်.”

၈. ပှၤဒီတၢ်အဲၣ်တီခံဂၤ မ့ၢ်မၤလိသကိး လံာ်စီဆှံ ဒ်သိးသိးန့ၣ် ကကဲဘျုးလၢ အဝဲသ့ၣ် အဂီၢ်ဒ်လဲၣ်.

^၈ ကျဲအဂၤလၢ နဃုသ့ၣ်ညါအါထီၣ်လိာ်သးဂ့ၢ်သ့န့ၣ် မ့ၢ်ဝဲ နမၤလိသကိး လံာ်စီဆှံ ဒ်သိးသိး. ဒီးနဖျီသးမ့ၢ်ဝံၤန့ၣ် နကဘၣ် ပာ်ပနီၣ်ဃာ် တၢ်ဆၢကတီၢ်လၢ ဟံၣ်ဖိဃီဖိ တၢ်မၤလိလံာ်စီဆှံအဂီၢ်. နမ့ၢ်မၤဒ်အံၤမၣ် နၤဒီးနသးသမူတံၤသကိး ကပာ်ဆိ ယဟိဝၤယွၤ လၢနီၣ်ဂံၢ်တၢ လၢသုတၢ်အိၣ်မူပူၤ. (စံၣ် ၄:၁၂) အဃိ ဖဲနပာ်တၢ်အဲၣ်တီအခါ ရဲၣ်ကျဲၤ တၢ်ဆၢကတီၢ်လၢ သုကမၤလိသကိး လံာ်စီဆှံ ဒ်သိးသိး. နီၢ်ကီၢ်ဒု ပှၤလၢအပာ်တၢ်အဲၣ်တီခံဂၤန့ၣ် တကဲထီၣ် ဟံၣ်ဖိဃီဖိဒံးဘၣ် ဒီးဒီပုၢ်ဝဲၢ်ခွါန့ၣ် တကဲထီၣ် ဒီပုၢ်ဝဲၢ်မုၣ် အဟံၣ်ခိၣ်ဒံးဘၣ်. သနာ်က့ နမ့ၢ်မၤလိသကိး  လံာ်စီဆှံ ဒ်သိးသိးန့ၣ် နကသ့ၣ်ညါဘၣ် တဂၤဒီးတဂၤ တၢ်ရ့လိာ်သးဒီး ယဟိဝၤယွၤ အိၣ်ဒ်လဲၣ်အဂ့ၢ်. အဒိ ဒီပုၢ်ဝဲၢ်ခွါမဲၣ် ဒီးအတၢ်အဲၣ်တီမုၣ်လ့စၤ လၢအအိၣ်လၢ ကီၢ်အမဲရကၤ ဒိးန့ၢ်ဘၣ်အဘျုး ဒ်လဲၣ်န့ၣ် အတဲဝဲဒ်အံၤ. “ဖဲပစးထီၣ် ပာ်တၢ်အဲၣ်တီ သီသီအခါ ပမၤလိသကိး ပတၢ်ကရၢကရိ လံာ်လဲၢ် လၢအဘၣ်ဃးဒီး တၢ်ပာ်တၢ်အဲၣ်တီ, တၢ်ဆီဟံၣ်ဆီဃီ ဒီးဟံၣ်ဖိဃီဖိအဂ့ၢ်. ပမၤလိသကိး တၢ်ဂ့ၢ်တဖၣ်န့ၣ်အဃိ မၤစၢၤပှၤလၢ ပကတဲသကိး ပတၢ်ထံၣ် ဘၣ်ဃးဒီး တၢ်ဂ့ၢ်အရ့ဒိၣ်လၢ ပတဲသကိးအီၤ တဘူၣ်အါအါဘၣ်.”

တၢ်ဂ့ၢ်အဂၤလၢ နကဘၣ်ဆိကမိၣ်ထံ

၉. ဖဲပှၤဒီတၢ်အဲၣ်တီခံဂၤ ဆၢတဲာ်သကိးလၢ ကတဲပၠးပှၤဂၤ ဘၣ်ဃးဒီး အပာ်တၢ်အဲၣ်တီအဂ့ၢ်အခါ အဝဲသ့ၣ် ကဘၣ်ဆိကမိၣ်ထံ တၢ်ဂ့ၢ်မနုၤလဲၣ်.

^၉ နမ့ၢ်ပာ်တၢ်အဲၣ်တီန့ၣ် နကတဲပၠး မတဂၤလဲၣ်. နကတဲပၠး မတဂၤလဲၣ်န့ၣ် နၤဒီးနတၢ်အဲၣ်တီ ကဘၣ်ဆၢတဲာ်သကိး ဒ်သိးသိး. ဖဲနပာ်တၢ်အဲၣ်တီ သီသီအခါ ဘၣ်သ့ၣ်သ့ၣ် နကတဲပၠး ထဲပှၤစှၤဂၤ. (ကတိၤ ၁၇:၂၇) နမ့ၢ်တတဲပၠး ပှၤဒီဒူၣ်ဒံးဘၣ်န့ၣ် ပှၤတသံကွၢ်နၤ တၢ်ဂ့ၢ်အါအါဘၣ် ဒီးပှၤတမၢဆူၣ်နၤလၢ နကဖျီသးဆိဆိဘၣ်. သနာ်က့ နမ့ၢ်ဘၣ်ယိၣ်လၢ ပှၤကသ့ၣ်ညါဒီဒူၣ် ဒီးနမ့ၢ်တတဲပၠး ပှၤနီတဂၤဘၣ်န့ၣ် တၢ်လီၤဘၣ်ယိၣ် အိၣ်စ့ၢ်ကီး. ခီဖျိလၢ နမ့ၢ်အိၣ်ထဲခံဂၤန့ၣ် နမၤကမၣ်ဘၣ်တၢ်သ့. အဃိ နမ့ၢ်တဲပၠး ပှၤလၢကဟ့ၣ်ကူၣ်ဟ့ၣ်ဖးနၤ ဒီးမၤစၢၤနၤသ့န့ၣ် ကကဲဘျုးလၢသုဂီၢ်. (ကတိၤ ၁၅:၂၂) အဒိ နတဲပၠး နဟံၣ်ဖိဃီဖိ တဂၤဂၤ, နသကိးလၢ အဒိၣ်တုာ်ခိၣ်ပှဲၤ မ့တမ့ၢ် တၢ်အိၣ်ဖှိၣ်သးပှၢ်သ့.

၁၀. ပှၤဒီတၢ်အဲၣ်တီခံဂၤ အိၣ်ဒီး သကဲာ်ပဝးလၢ အဘၣ်ယဟိဝၤယွၤအသး ကသ့ဒ်လဲၣ်. (ကတိၤဒိ ၂၂:၃)

^၁၀ ဖဲနပာ်တၢ်အဲၣ်တီအခါ ဒ်သိးနကအိၣ်ဒီး သကဲာ်ပဝးလၢ အဘၣ်ယဟိဝၤယွၤ အသးအဂီၢ် နကဘၣ်မၤဒ်လဲၣ်. နပာ်တၢ်အဲၣ်တီ မ့ၢ်ယံာ်ထီၣ်န့ၣ် နကဘၣ်သး အိၣ်ဘူးလိာ်သး ဒိၣ်ထီၣ်. အဃိ ဖဲနရ့လိာ်သးဒီး နတၢ်အဲၣ်တီ ဘူးဘူးအခါ ဒ်သိးနကအိၣ်ဒီး သကဲာ်ပဝးလၢ အဘၣ်ယဟိဝၤယွၤ အသးအဂီၢ် နကဘၣ်မၤဒ်လဲၣ်. (၁ ကရံၣ် ၆:၁၈) တဘၣ်တဲ တၢ်ကတိၤလၢ အဒုးအိၣ်ထီၣ် တၢ်သးကတၢတဂ့ၤ. တဘၣ်အိၣ်ထဲ ခံဂၤတဂ့ၤ ဒီးတဘၣ်အီသံး မ့တမ့ၢ် တၢ်ထံတၢ်နိလၢ အပၣ်ဒီးသံး အါတလၢတဂ့ၤ. (အ့း ၅:၃) တၢ်သ့ၣ်တဖၣ်အံၤ ကဒုးအိၣ်ထီၣ် နတၢ်သးကတၢ ဒီးတမၤစၢၤနၤလၢ နကမၤ တၢ်လၢအဘၣ်ဘၣ်. အဃိ ဖဲနပာ်တၢ်အဲၣ်တီအခါ နမ့ၢ်တဲသကိး ဘၣ်ဃးဒီး နကပာ်ဖျါထီၣ် တၢ်ပာ်ကဲလိာ်သး ဒီးပာ်ကဲ ယဟိဝၤယွၤ အတၢ်သိၣ်တၢ်သီအဂ့ၢ် မၢ်မၢ်န့ၣ် ကမၤစၢၤနၤလၢ နကအိၣ်ဒီး သကဲာ်ပဝးလၢ အဘၣ်ယဟိဝၤယွၤအသး. (ဖး ကတိၤဒိ ၂၂:၃.) အဒိ ဒီပုၢ်ဝဲၢ်ခွါဒါဝ့း ဒီးဒီပုၢ်ဝဲၢ်မုၣ်အီမဲၤ လၢအအိၣ်လၢ ကီၢ်အံးသံးယိဖၠံယါန့ၣ် တၢ်မနုၤ မၤစၢၤအဝဲသ့ၣ်လဲၣ်. အဝဲသ့ၣ် တဲဝဲလၢ “ပရ့လိာ်သးလၢ ပသကိးအါဂၤအကျါ ဒီးလၢတၢ်လီၢ်လၢ ပှၤအိၣ်အါအါ. လၢဟံၣ်မ့ၢ်ဂ့ၤ လၢကါပူၤမ့ၢ်ဂ့ၤ ပတအိၣ်ထဲခံဂၤ နီတဘျီဘၣ်. ပမၤဒ်အံၤအဃိ မၤစၢၤပှၤဒ်သိး ပကဟးဆှဲး တၢ်လ့ပစီ ဒီးပတမၤကမၣ်တၢ်ဘၣ်.”

၁၁. ပှၤဒီတၢ်အဲၣ်တီခံဂၤ မ့ၢ်ပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်န့ၣ် အဝဲသ့ၣ် ကဘၣ်ဆိကမိၣ်ထံ တၢ်ဂ့ၢ်မနုၤလဲၣ်.

^၁၁ ပှၤဒီတၢ်အဲၣ်တီခံဂၤ ပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်န့ၢ်ဧါ. နပာ်တၢ်အဲၣ်တီ မ့ၢ်ယံာ်ထီၣ်န့ၣ် နပာ်ဖျါထီၣ်တၢ်အဲၣ် ဖဲအကြၢးအဘၣ်သ့. ဘၣ်ဆၣ် နတၢ်အဲၣ်သဟီၣ် မ့ၢ်ဆူၣ်ထီၣ်န့ၣ် နကဆၢတဲာ် တၢ်လၢအဘၣ်အဂီၢ် အတညီဘၣ်. (တၢ် ၁:၂; ၂:၆) ဒီးဖဲနပာ်ဖျါထီၣ် တၢ်အဲၣ်အခါ နတၢ်ပၢၤသး မ့ၢ်တအိၣ်လၢၤဘၣ်န့ၣ် နကမၤဘၣ်တၢ်လၢ တဘၣ်ယဟိဝၤယွၤ အသးဘၣ်. (ကတိၤ ၆:၂၇) အဃိ ဖဲနပာ်တၢ်အဲၣ်တီ သီသီအခါ တဲသကိး ယဟိဝၤယွၤ အတၢ်သိၣ်တၢ်သီ ဒီးဖဲနပာ်ဖျါထီၣ် တၢ်အဲၣ်အခါ နကမၤဒ်လဲၣ် တမၤဒ်လဲၣ်န့ၣ် တဲသကိးတၢ်ဂ့ၢ်အံၤ လီၤတံၢ်လီၤဆဲး. c (၁ သ့း ၄:၃-၇) ဘၣ်ဃးဒီး တၢ်ပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်န့ၣ် နၤဒီးနတၢ်အဲၣ်တီ တဲသကိး တၢ်သံကွၢ်တဖၣ်အံၤသ့. ‘ပမ့ၢ်ပာ်ဖျါထီၣ် တၢ်အဲၣ်လၢ တဂၤဒီးတဂၤ အဖီခိၣ်န့ၣ် ပှၤလၢပဃၢၤ ကထံၣ်ဝဲဒ်လဲၣ်. ပမ့ၢ်ပာ်ဖျါထီၣ် တၢ်အဲၣ်န့ၣ် ကဒုးအိၣ်ထီၣ် တၢ်သးကတၢလၢ ပဝဲခံဂၤ အဘၢၣ်စၢၤဧါ.’

၁၂. ပှၤဒီတၢ်အဲၣ်တီခံဂၤ မ့ၢ်အိၣ်ဒီး တၢ်ကီတၢ်ခဲ ဒီးတၢ်ထံၣ် မ့ၢ်တလီၤပလိာ် မၢ်မၢ်န့ၣ် အဝဲသ့ၣ် မၤမနုၤသ့လဲၣ်.

^၁၂ တၢ်ကီတၢ်ခဲ ဒီးတၢ်ထံၣ်တလီၤပလိာ် မ့ၢ်အိၣ်ထီၣ်န့ၣ် နကဘၣ်မၤဒ်လဲၣ်. တဘျီတခီၣ် နၤဒီးနတၢ်အဲၣ်တီ ကအိၣ်ဒီး တၢ်ကီတၢ်ခဲ ဒီးသုတၢ်ထံၣ် တလီၤပလိာ်ဘၣ်. တၢ်မ့ၢ်ကဲထီၣ်သး ဒ်န့ၣ်န့ၣ်  မ့ၢ်သုခံဂၤ တကြၢးလိာ်သးဘၣ်ဧါ. တမ့ၢ်ဒ်န့ၣ်ဘၣ်. တဘျီတခီၣ် ပှၤဒီတၢ်အဲၣ်တီ အါဂၤန့ၣ် အတၢ်ထံၣ် တလီၤပလိာ်ဘၣ်. သနာ်က့ နဆီဟံၣ်ဆီဃီ မ့ၢ်ဝံၤန့ၣ် ဒ်သိး နကအိၣ်ဒီး တၢ်သးခုလၢ နတၢ်ဆီဟံၣ်ဆီဃီအဂီၢ် နၤဒီးနသးသမူတံၤသကိး ကဘၣ်ပာ်ကဲလိာ်သး ဒီးသးအိၣ်တူၢ်လိာ်လိာ်သး တၢ်ဘၣ်သး. အဃိ ဖဲသုပာ်တၢ်အဲၣ်တီအခါ သုမၤဘၣ်ဂီၢ်ထီၣ်က့ၤ တၢ်ဂ့ၢ်ကီဒ်လဲၣ်န့ၣ် ကမၤစၢၤသုဖဲ သုထီၣ်ပှၢ်အခါ. အဃိ တဲသကိးကွၢ် တၢ်သံကွၢ်တဖၣ်အံၤ ဒီးနတၢ်အဲၣ်တီ. ‘တၢ်ဂ့ၢ်ကီမ့ၢ်အိၣ်န့ၣ် ပတဲသကိးတၢ် မုာ်မုာ်ဧါ ဒီးပာ်ကဲလိာ်သး တၢ်ထံၣ်ဧါ. ပအၢၣ်လီၤ ပတၢ်ကမၣ် တဘျီဃီ ဒီးဂုာ်ကျဲးစၢး ဘှီဘၣ်ထီၣ်က့ၤ ပသးဧါ. ပကီၤသူၣ်ကီၤသး, ဃ့ဝံသးစူၤလိာ်သး ဒီးပျၢ်လိာ်သး တၢ်ကမၣ်ဧါ.’ (အ့း ၄:၃၁, ၃၂) ဖဲနပာ်တၢ်အဲၣ်တီအခါ နတၢ်ထံၣ် မ့ၢ်တလီၤပလိာ် ဒီးနမ့ၢ်တဲအါလိာ်သး မၢ်မၢ်န့ၣ် နဖျီသး မ့ၢ်ဝံၤသနာ်က့ ဘၣ်သ့ၣ်သ့ၣ် နတၢ်အိၣ်သး တဂ့ၤထီၣ်ဘၣ်. အဃိ နမ့ၢ်သ့ၣ်ညါလၢ နတၢ်အဲၣ်တီ တကဲထီၣ် သးသမူတံၤသကိး လၢအဂ့ၤဘၣ်န့ၣ် နမ့ၢ်မၤလီၤဖးဆိသးဒု ကဂ့ၤလၢ သုဝဲခံဂၤလၢာ်အဂီၢ်. d

၁၃. ပှၤဒီတၢ်အဲၣ်တီခံဂၤ ကသ့ၣ်ညါလၢ အကဘၣ် ပာ်တၢ်အဲၣ်တီ ယံာ်ထဲလဲၣ်အဂီၢ် တၢ်မနုၤကမၤစၢၤ အဝဲသ့ၣ်လဲၣ်.

^၁၃ နကဘၣ် ပာ်တၢ်အဲၣ်တီ ယံာ်ထဲလဲၣ်. တချုးလၢ ပဆၢတဲာ်တၢ်အခါ ပမ့ၢ်တဆိကမိၣ်ထံ တၢ်ဂ့ၢ်လီၤတံၢ်လီၤဆဲးဘၣ်န့ၣ် အါတက့ၢ် တၢ်အိၣ်သး တလဲၤသးဂ့ၤဂ့ၤဘၣ်. (ကတိၤ ၂၁:၅) အဃိ ဖဲနပာ်တၢ်အဲၣ်တီအခါ ဒ်သိး နကသ့ၣ်ညါလိာ်သးဂ့ၢ် ဂ့ၤဂ့ၤအဂီၢ် နကလိၣ်ဘၣ် တၢ်ဆၢကတီၢ် တတီၤဖိ. ဘၣ်ဆၣ် နတဘၣ် ပာ်တၢ်အဲၣ်တီ ယံာ်တလၢစ့ၢ်ကီးဘၣ်. လံာ်စီဆှံ တဲဝဲလၢ “တၢ်လၢ ပှၤမုၢ်လၢ်ဝဲတဖၣ် ကလၢထီၣ်ပှဲၤထီၣ်အဂီၢ် တၢ်ဆၢကတီၢ် မ့ၢ်ယံာ်တလၢန့ၣ် ပှၤသးကဟးဂီၤ.” (ကတိၤ ၁၃:၁၂) တကးဒံးဘၣ် နပာ်တၢ်အဲၣ်တီ မ့ၢ်ယံာ်တလၢန့ၣ် ကကီလၢ နကဟးဆှဲး တၢ်လ့ပစီလၢ နကမၤကမၣ်မုၣ်ကမၣ်ခွါ. (၁ ကရံၣ် ၇:၉) အဃိ လၢနကသးစၢၢ်ဆၢလၢ နကဘၣ်ပာ်တၢ်အဲၣ်တီ ယံာ်ထဲလဲၣ်အလီၢ် သံကွၢ်လီၤနသးလၢ ‘ဒ်သိး ယဆၢတဲာ်တၢ် ကဘၣ်အဂီၢ် ယဘၣ်ဃုသ့ၣ်ညါအါထီၣ် ယတၢ်အဲၣ်တီအဂ့ၢ် လၢအဂၤအိၣ်ဒံးဧါ.’

ပှၤလၢတၢ်အိၣ်ဖှိၣ်ပူၤ မၤစၢၤ ပှၤဒီတၢ်အဲၣ်တီခံဂၤ ကသ့ဒ်လဲၣ်

၁၄. ပမၤစၢၤ ပှၤဒီတၢ်အဲၣ်တီခံဂၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၄ ပမ့ၢ်သ့ၣ်ညါ ဒီပုၢ်ဝဲၢ်မုၣ်ခွါခံဂၤ ပာ်တၢ်အဲၣ်တီန့ၣ် ပမၤစၢၤအဝဲသ့ၣ် သ့ဒ်လဲၣ်. ပကွဲမုာ်အဝဲသ့ၣ်လၢ ကအီၣ်သကိးတၢ်ဒီးပှၤ, မၤဟံၣ်ဖိဃီဖိ တၢ်မၤလိလံာ်စီဆှံ မ့တမ့ၢ် မၤတၢ်မၤမုာ်မၤဖှံသး ဒီးအဝဲသ့ၣ်သ့. (ရိ ၁၂:၁၃) ပမ့ၢ်မၤဒ်အံၤန့ၣ် ကမၤစၢၤ အဝဲသ့ၣ် ဒ်သိး အဝဲသ့ၣ် ကသ့ၣ်ညါအါထီၣ်လိာ်သးဂ့ၢ်. ဒီးဖဲအဝဲသ့ၣ် ထံၣ်လိာ်သးမ့ၢ်ဂ့ၤ, အိၣ်လၢကါပူၤမ့ၢ်ဂ့ၤ မ့တမ့ၢ် ဘၣ်သး တဲသကိးတၢ် ထဲခံဂၤမ့ၢ်ဂ့ၤ ဒ်သိးအဝဲသ့ၣ် တအိၣ်ထဲခံဂၤ တဂ့ၤအဂီၢ် နမၤစၢၤအဝဲသ့ၣ် သ့ခီဖျိ နလဲၤပိာ်အခံ ဒီးကွၢ်ထွဲအဝဲသ့ၣ်. (ကလၤ ၆:၁၀) ဒီပုၢ်ဝဲၢ်မုၣ်အၤလံၡါ လၢအပာ်တၢ်အဲၣ်တီဒီး ဒီပုၢ်ဝဲၢ်ခွါအဲးၡဝ့န့ၣ် အနီၣ်ဘၣ်က့ၤ ဒီပုၢ်ဝဲၢ်မုၣ်ခွါ အတၢ်မၤစၢၤလၢ အဝဲသ့ၣ် ပာ်လုၢ်ပာ်ပှ့ၤဝဲ. အတဲဝဲလၢ “ဒီပုၢ်ဝဲၢ်မုၣ်ခွါတနီၤ တဲပှၤလၢ ပမ့ၢ်ဘၣ်သး ထံၣ်လိာ်သး ဒီးတဲသကိးတၢ် ထဲခံဂၤန့ၣ် ပလဲၤလၢ အဝဲသ့ၣ် အဟံၣ်သ့. ဒီပုၢ်ဝဲၢ်မုၣ်ခွါ တဲပှၤဒ်န့ၣ်အဃိ ပ သးခုညါ.” အဃိ ပှၤဒီတၢ်အဲၣ်တီခံဂၤ မ့ၢ်ဘၣ်သး ထံၣ်လိာ်သး ဒီးမ့ၢ်မၢနလဲၤပိာ်အခံန့ၣ် ပာ်အီၤဒ် တၢ်ခွဲးတၢ်ယာ်လၢ နမၤစၢၤ နသကိး. အဝဲသ့ၣ် မ့ၢ်ဘၣ်သး တဲသကိး တၢ်ဂ့ၢ်အရ့ဒိၣ်န့ၣ် ဟ့ၣ်အဝဲသ့ၣ် တၢ်ဆၢကတီၢ် ဘၣ်ဆၣ် တဘၣ်ပာ်တ့ၢ် အဝဲသ့ၣ် ထဲခံဂၤ နီတဘျီတဂ့ၤ.—ဖံလံး ၂:၄.

၁၅. ကျဲအဂၤလၢ ပမၤစၢၤ ပှၤဒီတၢ်အဲၣ်တီခံဂၤသ့န့ၣ် မ့ၢ်မနုၤလဲၣ်. (ကတိၤဒိ ၁၂:၁၈)

^၁၅ ကျဲအဂၤလၢ ပမၤစၢၤ ပှၤဒီတၢ်အဲၣ်တီခံဂၤသ့န့ၣ် မ့ၢ်ဝဲ တၢ်လၢပတဲ. တဘျီတခီၣ် တၢ်လၢ ပတဘၣ်တဲဘၣ်န့ၣ် ကအိၣ်ဝဲအဃိ ပကဘၣ်အိၣ်ဒီး တၢ်ပၢၤသး. (ဖး ကတိၤဒိ ၁၂:၁၈.) အဒိ ပှၤဒီတၢ်အဲၣ်တီခံဂၤ ကဘၣ်သး တဲပၠးပှၤဂၤလၢ အဝဲသ့ၣ် ပာ်တၢ်အဲၣ်တီအဃိ ပတဘၣ် ဟးတဲပၠးဆိ ပှၤဂၤဘၣ်. ဒီးပတဘၣ်တဲအီၣ် ပှၤဒီတၢ်အဲၣ်တီခံဂၤအဂ့ၢ် ဒီးတဲဆါအဝဲသ့ၣ် ဘၣ်ဃးဒီး အဝဲသ့ၣ်ခံဂၤ တၢ်ဂ့ၢ်ဘၣ်. (ကတိၤ ၂၀:၁၉; ရိ ၁၄:၁၀; ၁ သ့း ၄:၁၁) တကးဒံးဘၣ် ပတဘၣ် သံကွၢ်အဝဲသ့ၣ်လၢ အကဖျီသး ဆံးယံာ်လဲၣ် မ့တမ့ၢ် တဲအဝဲသ့ၣ်လၢ အကြၢးဖျီသးလံန့ၣ်ဘၣ်. ဒီပုၢ်ဝဲၢ်မုၣ်အလံၤ ဒီးအဝၤ တဲဝဲလၢ “တချုးလၢ ပတဲသကိး ပတၢ်ဖျီအဂ့ၢ်ဒံးဘၣ်န့ၣ် ပှၤဟဲသံကွၢ်ဆိပှၤ ဘၣ်ဃးဒီး ပတၢ်ဖျီအဂ့ၢ်အဃိ ပမဲာ်ဆှးညါ.”

၁၆. ပှၤဒီတၢ်အဲၣ်တီခံဂၤ မ့ၢ်မၤလီၤဖးသးန့ၣ် ပကဘၣ်မၤဒ်လဲၣ်.

^၁၆ ပှၤဒီတၢ်အဲၣ်တီခံဂၤ မ့ၢ်မၤလီၤဖးသးန့ၣ် ပကဘၣ်မၤဒ်လဲၣ်. ပတဘၣ် မၤဘၣ်ထွဲလိာ်သးဒီး အဝဲသ့ၣ်တၢ်ဂ့ၢ် မ့တမ့ၢ် အိၣ်ဃူအဝဲသ့ၣ် တဂၤဂၤဘၣ်. (၁ ပ့း ၄:၁၅) ဒီပုၢ်ဝဲၢ်မုၣ်လံယၤ တဲဝဲလၢ “ယမၤလီၤဖးသးဒီး ဒီပုၢ်ဝဲၢ်ခွါတဂၤဝံၤဒီး ယနၢ်ဟူ ပှၤဟးတဲယဂ့ၢ် ဒ်အံၤဒ်န့ၣ်အဃိ ယသးဘၣ်ဒိညါ.” ဒ်ပသ့ၣ်ညါဘၣ် လၢတၢ်မၤလိ အခီၣ်ထံးအသိး ပှၤဒီတၢ်အဲၣ်တီခံဂၤ မ့ၢ်မၤလီၤဖးသးန့ၣ် ပတဘၣ်တယာ် ဒီးဆိကမိၣ်လၢ အဝဲသ့ၣ် အတၢ်ဆၢတဲာ် ကမၣ်ဘၣ်. ညီနုၢ်န့ၣ် အဝဲသ့ၣ် ကဖျီသးဧါ တဖျီသးဘၣ်ဧါန့ၣ် အသ့ၣ်ညါဘၣ်ဝဲ တၢ်စံးဆၢအဃိ အဝဲသ့ၣ် ဆၢတဲာ် တၢ်လၢအဘၣ်. သနာ်က့ ခီဖျိလၢ အဝဲသ့ၣ် မၤလီၤဖးသးအဃိ အဝဲသ့ၣ် သးကဘၣ်ဒိဒံး ဒီးကတူၢ်ဘၣ်လၢ အအိၣ်သယုၢ်ထဲတဂၤ. ဖဲန့ၣ်အခါ ပကဘၣ်ဃုကျဲလၢ ကမၤစၢၤအဝဲသ့ၣ်.—ကတိၤ ၁၇:၁၇.

၁၇. ပှၤဒီတၢ်အဲၣ်တီခံဂၤ ကဘၣ်ဆဲးမၤ မနုၤလဲၣ်.

^၁၇ ဒ်ပသ့ၣ်ညါဘၣ်အသိး ဖဲပှၤခံဂၤ ပာ်တၢ်အဲၣ်တီအခါ အကဲဝဲ တၢ်ဆၢကတီၢ်လၢ အလီၤသးခု ဘၣ်ဆၣ် တၢ်ကီတၢ်ခဲ အိၣ်စ့ၢ်ကီး. ဒီပုၢ်ဝဲၢ်မုၣ်ကၠဲၤစံၤခၤ တဲဝဲလၢ “ယမ့ၢ်ဘၣ်တဲ တီတီဒု တၢ်ပာ်တၢ်အဲၣ်တီန့ၣ် အလီၤဂာ်ဒ်သိးဒီး တၢ်မၤဖးဒိၣ်တခါညါ. ဘၣ်ဆၣ် ဖဲနပာ်တၢ်အဲၣ်တီအခါ နန့ၢ်ဘၣ် တၢ်ဆၢကတီၢ်လၢ ကဃုသ့ၣ်ညါအါထီၣ်လိာ်သးဂ့ၢ် ဂ့ၤဂ့ၤအဃိ အကဲဘျုးတမံၤကၠ့ၤ.” နမ့ၢ်ပာ်တၢ်အဲၣ်တီန့ၣ် ဆဲးဃုသ့ၣ်ညါအါထီၣ် နတၢ်အဲၣ်တီအဂ့ၢ် ဂ့ၤဂ့ၤ. နမ့ၢ်မၤဒ်န့ၣ်န့ၣ် ကမၤစၢၤနၤဒ်သိး နကဆၢတဲာ် တၢ်လၢအဘၣ်.