Ntangu mvita bandaka na Ukraine, Iryna Makukha, mpangi mosi ya nketo ya mpupa ya bamvula 46, kuendaka na gare ya train ya Kharkiv. Yandi tubaka yakevuanda mpasi samu na yandi kana yandi mebika buala. Yavuandaka diambu ya mpasi, bantu yina vuandaka kota na ba train vuandaka zaba ve kisika yina bavuandaka kuenda. Train yina vuandaka nata mpangi Iryna vuandaka na bavitre ya kukangama samu na kutina bivonza. Kaka na manima yakukatuka na gare nde Iryna bakusaka ti train yango vuandaka kuenda na Slovaquie.

Mpangi Iryna kena kuzinga bubu yayi na Prague kapitale ya buala ya Tchéquie, kisika yandi kumaka na klumbu 3 mars 2022. Yandi bakaka kisalu mosi ya kusunga mpe yandi kevuandaka na bampangi zole ya banketo yina tinaka buala ya Ukraine. Mpangi Iryna kena kulonguka ndinga ya Tchéquie mpe yandi vutukilaka kisalu na yandi ya ntangu nionso, yina kevuandaka diambu meluta mfunu na luzingu na yandi yameluta bamvula 20.

Mpangi Iryna metuba: “Munu monaka mutindu Yehova ketaninaka beto na nzila ya bisadi na yandi. Yau kumisaka kiminu na munu ngolo.”

Bampangi na beto ya babakala mpe ya banketo pene na 23 000 bakaka nzengolo ya kutina na babuala yankaka. Bampangi yina bakaka nzengolo ya kukuenda zinga na buala kinzenza lenda baka bisika yina mekondua bivonza, kasi bakena kutatamana kusosa bisalu mpe bayinzo ya kuvuanda, kusosa kubaka mikanda ya Leta, mpe kusosa kusonikisa bana na bau na baekole ya yimpa, atako bavuandaka longuka ndinga ya yimpa. Babakusaka ti kusala mbala na mbala mambu ya kimpeve mpe kuzola bampangi na bau Baklisto kele mpenza mambu yina sadisaka bau na ntangu yayi ya mpasi bakena kulutisa.

Bampangi tatu ya dibuta ya Perceac, Anatoli, Olena, mpe Alina ya bamvula 17, bandaka luzingu ya yimpa na Roumanie na manima ya kutina na kizunga ya Mykolaiv Oblast, na Ukraine yina bebisamaka na babombi. Bakumaka na buala ya Roumanie na kilumbu ya 6 mars 2022. Lokola mpangi Anatoli vuandaka muana ya buala ya Moldavie, bamfumu ya Leta ya Roumanie pesaka yandi yinsua ya kunata dibuta na yandi na Roumanie. Mpangi Olena metuba ti, kutina buala na yandi kele lokola “yinti yina bamevuza mpe bamekuna yau diaka kisika yankaka.”

Na lusadusu ya bampangi ya Roumanie, dibuta ya Perceac kele na yinzo na bau mosi bubu yayi. Katula yau, Anatoli mpe Olena bakaka kisalu, mpe Alina bakaka dikoki ya kulanda ba cours na ekole na yandi yina kele na Ukraine na nzila ya Internet.

Bampangi ya bakala mpe ya banketo ya Roumanie kena kusadisa dibuta yango na makanisi, na kimpeve mpe na kinsuni. Bampangi kelutisaka mbala na mbala ntangu kintuadi na dibuta yango samu bakukimona ve ti bakele kaka bau mosi na buala ya kinzenza. Mpangi Olena mpe mpangi Alina kena kulonguka ndinga ya Roumanie na kusadilaka aplikasion JW Language mpe na kusamunaka kintuadi na bampangi ya kimvuka na bau ya yimpa. Anatoli bandaka kutuba mbote ndinga ya Roumanie.

Anatoli tubaka: “Kaka na ebandeli beto monaka mpenza diboko ya Yehova. Na nzila ya nkubukulu mpe na nzila ya lusadusu ya bampangi, beto kena kumona nzola ya Yehova.”

Bakala ya Alina Havryliuk kufuaka tekila mvita banda, mpe na kilumbu ya 27 février 2022, yandi mpe Vladyslav, muana na yandi ya bakala ya bamvula 16 kumaka na mbanza ya Suwałki, na Pologne, kukatuka na Vinnytsia, na buala ya Ukraine. Alina tubaka: “Na ebandeli, munu vuandaka kukitungisa samu munu vuandaka zaba ve kisika munu mpe muana na munu kebanda kuzinga mpe mutindu beto kebanda kukokisa bansatu na beto mosi, kasi munu vuandaka tula diaka ntima ti Yehova kekokisa bansatu na beto.”

Alina, mpangi yina kele na bamvula 37, bandaka kusosa kisalu yina kebanda sadisa yandi yandi bika kondua balukutakanu ya kimvuka. Yandi bakaka kisalu ya kusunga na ekole mosi. Yandi metuba: “Diambu ya mfunu kele ti kisalu yango kepesaka munu maluaku mingi ya kusala kisalu ya kusamuna, mpe kusadisa dibuta na munu.”

Alina mpe Vladyslav kena kulonguka ndinga ya Pologne mpe bakena kusala lokola bampasudi nzila ya ntangu ya nkufi samu na bangonda mingi na kimvuka yina ketubaka ndinga ya Pologne. Vladyslav kotaka diaka na ekole.

Bampangi na beto ya Ukraine kena kukutana na mambu ya mpasi mpe bansobolo, kasi Yehova kena kutatamana kupesa bau kilendo yina meluta ya bantu. Bampova yina kele na 2 Bakorinto 4:8 kumaka mpenza kedika, yina ketubaka: ‘Bakena kukamuna beto na mutindu nionso, kasi bakena kukanga beto ve tii na kitezo yina beto lenda ningana ve; beto kena kuzaba ve diambu ya kusala, kasi beto kondua ve nzila ya kubimina.’