Bampangi na beto ya babakala mpe ya banketo na mbanza ya Marioupol, na Kharkiv, na Hostomel mpe na bambanza yankaka kena kukutana na mambu ya mpasi lokola bakena kutatamana kuloza babombi na bambanza yango. Bampangi yankaka vuandaka ve na dikoki ya kubima na bayinzo na bau na yinsi ya ntoto to na bisika yina basuamaka na sabala mosi. Bakele diaka na madia mingi ve ya kudia, mpe lokola kuran, Internet, mpe batelefone kena kusala diaka mbote ve, bamekuma na mukakatano ya kusolola na bampangi.

Diambu ya kiadi, mpangi Dmytro Rozdorskyi, ya bamvula 28, yina vuandaka nkulutu na Myrnohrad, kufuaka na manima ya kuluala mputa mosi ya nene ntangu yandi diataka mine. Beto kena kusambila samu na bampangi yina mefuila bantu yina bakezolaka mpe samu na bampangi na beto ya babakala mpe ya banketo yina kele na bisika yina babombi kena kutatamana kubua.—2 Batesalonika 3:1.

Tii na kilumbu ya 7 mars 2022, beto bakaka bantalu yayi melanda na Ukraine:

• Bansamuni 2 kufuaka

• Bansamuni 8 luluaka

• Bansamuni 20 617 tinaka bayinzo na bau samu na kukuenda na bisika yina bivonza kele ve

• Bayinzo 25 kubuaka

• Bayinzo 29 bebisamaka ngolo

• Bayinzo 173 bebisamaka ngolo ve

• Bayinzo ya Kimfumu 5 bebisamaka

• Bakomite samu na kupesa lusadusu 27 kena kusala na Ukraine

• Bakomite samu na kupesa lusadusu sadisaka bansamuni 6 548 samu babaka bisika ya kuvuanda yina kele ve na bivonza

• Bansamuni 7 008 tinaka na buala yankaka mpe bampangi na bau Baklisto kena kusadisa bau

• Yinzo ya balukutakanu ya nene 1 mpe Bayinzo ya Kimfumu 30 yina kele na ouest ya Ukraine, na kifuani na mbanza ya Tchernivtsi, ya Ivano-Frankivsk, ya Lviv mpe na mbanza ya Transcarpatie, bongisamaka samu na kuyamba bantu yina tinaka