•  Etwaromo 2

•  Ugawo Womononkango Dakarunga 3-5

  •  Siuyungwa 3

  •  Papara ugawo womoBibeli 4

  •  Ereso lyoBibeli 5

•  Litura mo mokuzuvhisa 6-14

  •  Omu no tameka nzogera 7

  •  Omu no tengwira ko 8

  •  Omu no tulisa po varongwa 9

  •  Faturura eyi wa pura 10

  •  Siuyungwa 11

  •  Eyi ya hamene mo 12

  •  Ukaro 13

  •  Kuruganesa novidiyo ntani yimbapiratjangwa 14

•  Kuparuka Ngomukriste 15-16

  •  Elirongo lyoBibeli lyombunga 16

•  Ehageso 17

•  Epandadeko nomapukururo 18

•  Siruwo 19

•  Edinguro lyomutareli gonombunga 20

•  Mosivike sosigongi sezuva limwe ndi somazuva gatatu 21

•  Mosivike Somurarero 22

•  Mutareli gepongo eparu noyirugana yetu 23

•  Munasipundi gepongo eparu noyirugana yetu 24

•  Mupukuruli gokuvatera 25

•  Nosikora dimwe 26

•  Novidiyo 27

1. Mapukururo gomosimbapira esi ngaga vatera navenye ava ngava kara nomaruha moMbapira zekEpongo. Va hepa kukonakona mapukururo gomoruha oru vana va pe ngwendi moomu va ga tjanga mombapira zekepongo ntani mombapira ezi komeho va liwapaikire maruha gawo. Vazuvhisi navenye va hepa kuvakorangeda va lihameke mo mokugava yiuyungwa. Ano ava ava wiza nkenye apa komapongo kuvhura va lihameke mo nsene kulimburukwa marongo goBibeli. Mutareli gepongo eparu noyirugana yetu ga hepa kuzogera yihepwa eyi ga hepa kusikisa mo murongwa ga hana asi muzuvhisi ntani ogu ana hara kuhamena moSikora zoukareli ntani nokumudivisa nsene asi ana wapere ndi hawe. Nzogera ezi va hepa kuzirugana kumwe nogu a rongo murongwa ogo ndi nomukurona goMbangi gwagoogo munona). Yihepwa eyi ga hepa kusikisa mo yalifana neyi ga hepa kusikisa mo murongwa ogu ana hara kukara muzuvhisi gokudira kugwana ekuho.—od egau. 8 para. 8

2. Minute gumwe. Nkenye sivike, konyima zorusumo rokutamekesa ntani nekanderero, munasipundi nga gava etwaromo lyeyi nava ndindira melikwamo. Munasipundi ga hepa kudemenena komagano aga naga vatera unene mbungakriste.

 3. Siuyungwa: Sonominute 10. Siparatjangwa ntani nekamo lyosiuyungwa esi soyitwa yivali ndi yitatu kuyitura moMbapira zekEpongo. Siuyungwa kusigava komukuronambunga ndi komukwafimbunga gokuwapera. Nsene buke zompe zomoBibeli kuna ka zi tameka mosivike oso, pomuhowo tanko kulikida vidiyo zetwaromo lyobuke ozo. Muuyungi kuvhura kugava magano gomovidiyo nosiuyungwa omu yina lizi. Nampili ngoso, age ga hepa kudivilisa asi kuna kuzogera yitwa nayinye yemekamo ngomu va yi tura mombapira zekepongo. Ntani hena, kuliza nosiruwo, age a ruganese mafano gomombapira ntani noyitwa yomomatjangwa, eyi va wapaika mokukwatesa ko siuyungwa oso. Kuvhura a gwede ko mauzera gamwe nsene tupu mauzera ogo gana lizi noyitwa eyi vana tura mombapira.

 4. Papara ugawo womoBibeli: Nominute 10. Oru ruha romapuro nomalimbururo pwa hana etwaromo ndi ehageso. Ruha kurupitisira mukuronambunga ndi mukwafimbunga gokuwapera. Ogu ana kupitisira ruha oru a pure mapuro nagenye. Ntani hena, kuvhura a tokore nsene asi hepero kuresa matjangwa nagenye gomomapuro gavali gokuhova ndi hawe. Owo vana kulimburura va hepa kuruganesa nosekonde 30 ndi dononsesu.

 5. Ereso lyoBibeli: Nominute ne ndi dononsesu. Siuyungwa esi kusigava tupu Murongwa gomugara. Murongwa ga hepa tupu kutameka kuresa kapisi a gave etwaromo ndi ehageso. Munasipundi a demenene unene mokuvatera murongwa a rese mouhunga, nekwatogano, kuvyukilira, nelituromo, nezwi lyokuwapera, kupwizumuka pomavango gouhunga ntani kuuyunga nemanguruko. Mareso gamwe goBibeli mare ano gamwe masupi mutareli gepongo Eparu lyetu noyirugana yokuzuvhisa ga hepa kugazadara ko evhuliko lyomurongwa ogu ana kupa ruha oro.

6. Nominute 15. Ruha oru kwa ru wapaikira mokugava mpito kwa navenye va liyomberese moyirugana yokuzuvhisa ntani nokuwapukurura omu nava tameka nzogera ntani nkedi zokuzuvhisa nokuronga. Vakuronambunga nawo kuvhura kugwana maruha. Nkenye murongwa ga hepa kurugana nomora zosirongwa esi ana gwana yikare asi azo kuna tundilire mombapira Kuronga ndi Hara vantu ezi azi kara moyikondekera pepi nosiuyungwa esi na gava moMbapira zekepongo Eparu lyetu noyirugana yokuzuvhisa. Poyiruwo yimwe, ngapa kara ruha ronzogera. Ruha oro ga hepa kururugana mukuronambunga ndi mukwafimbunga gokuwapera.—Tara  paragarafu 15 kuhamena omu no rugana ruha oru runa hamene mo nzogera.

 7. Omu no tameka nzogera: Ruha oru kuvhura kururugana murongwa gomugara ndi gomukadi. Muvateli a kare mugara mukwawo ano nsene mukadi a kare mukadi mukwawo ndi gumwe gemepata lyawo. Murongwa ntani nomuvateli gwendi kuvhura va hingire ndi va sikame.—Komauzera gomanzi kuhamena eyi yina hamene mo moruha oro ntani ukaro, tara  paragarafu 12 ntani  13.

 8. Omu no tengwira ko: Ruha oru kuvhura kururugana murongwa gomugara ndi gomukadi. Muvateli a kare mugara mukwawo ano nsene mukadi a kare mukadi mukwawo. (km 5/97 epe. 2) Murongwa nomuvateli kuvhura kuhingira ndi kusikama. Murongwa ga hepa kulikida eyi na ka uyunga nsene kuna kurugana etengwiroko.—Komauzera gomanzi kuhamena eyi yina hamene mo moruha oro ntani ukaro, tara  paragarafu 12 ntani  13.

 9. Omu no tulisa po varongwa: Ruha oru kuvhura kururugana murongwa gomugara ndi gomukadi. Muvateli a kare mugara mukwawo ano nsene mukadi a kare mukadi mukwawo. (km 5/97 epe. 2) Murongwa nomuvateli kuvhura kuhingira ndi kusikama. Ruha oru ru likide elirongo lyoBibeli eli lina tameke nare lina kutwikira. Kapisi hepero kurugana etwaromo ndi ehageso, ntudi yizo nomora vana kupura o rugane. Kapisi hepero kuresa noparagarafu nadinye, nampili ngoso ayo kuvhura kuyirugana.

 10. Faturura eyi wa pura: Nsene siuyungwa, ruha oru ga hepa kururugana murongwa gomugara. Nsene ruha oru kuna kara morupe rwelikido, murongwa gomugara ndi gomukadi kuvhura kururugana. Muvateli a kare mugara mukwawo ano nsene mukadi a kare mukadi mukwawo ndi gumwe gemepata lyawo. Murongwa ga hepa kugava malimbururo gokuvyukilira positwa kuliza nepuro eli vana kuruganesa, pokuruganesa mauzera aga vana va tulire mombapira. Murongwa kuvhura a tokore nsene asi na ruganesa mauzera aga gana kara mombapira apa na rugana ruha rwendi ndi hawe

 11. Siuyungwa: Ruha oru ga hepa kururugana murongwa gomugara ntani a ru gave ngosiuyungwa. Nsene siuyungwa kuna hamene kositwa esi sina sa kara momagwedereroko 1 mombapira Hara vantu, murongwa ga hepa kuuyunga omu nava ruganesa novelise mokuzuvhisa. Pasihonena, kuvhura a faturure siruwo esi nava ruganesa novelise, eyi azi tanta velise ntani omu no vatera muntu ayi kwate egano. Nsene siuyungwa kuna hamene kositwa esi sa kara mosirongwa simwe mombapira Hara vantu, murongwa ga hepa kudemenena omu nava tura pasirugana sitwa oso mokuzuvhisa. Kuvhura a tumbure sihonena esi sa kara mositwa somosirongwa oso ndi kuvhura a gwederere ko novelise edi vana tura mosirongwa oso, nsene nayivatera.

   12. Eyi ya hamene mo: Eyi ya kara moparagarafu ezi ntani zokukwamako kwa tamba komaruha ngwendi “Omu no tameka zogera” ntani “Omu no tengwira ko”. Ntudi nsene egano molili mosimbapiratjangwa, sitambo somurongwa kuna kara mokuzuvhisira ko muntu usili womoBibeli ou na hafera ntani nokutulisa po etengwiroko. Murongwa ga hepa kuhorowora siparatjangwa esi vana hepa ntani esi esi sina lizi noukaro wovantu. Kuvhura a tokore mokuruganesa vidiyo ndi simbapiratjangwa somoyiruganeso yetu yokuzuvhisa. Mevango lyokulimoma siuyungwa esi nava ka gava, varongwa va hepa kuliyomberesa omu nava tameka nzogera ngwendi kulikida elituromo mwa googo muntu ntani va hepa kuyunga nemanguruko.

   13. Ukaro: Murongwa ga hepa kurugana ruha oru vana mu pe kuliza noukaro. Pasihonena:

1.  (1) Tunda embo zende embo: Ruha oru kwa kwatera mo kuzuvhisa tunda embo zende embo—yikare asi sipara nosipara, koserefoni ndi kutjanga nombilive ntani pokurugana etengwiroko komuntu ogu wa kagwene mosirugana satunda embo zende embo.

2.  (2) Zuvhisa nampili kapisi mokuzuvhisa ono kara: Ruha oru kufaturura omu natu ruganesa nawa mpito pokutjindja zogera ezi nazi twaredesa yipo o zuvhisire muntu. Kwahamenena kuresera ko etjangwa vantu ava o ligwanekere nawo koyirugana, kosure, momukunda gweni apa ava rondere vantu ndi nkenye oku nsene kuna rugana yirugana yoge yankenye ezuva.

3.  (3) Zuvhisa moyitarameho: Ruha oru kuvhura kuhamena mo kurugana nositoroli, kuzuvhira komavango oku ava ruganene ngesefa, kuzuvhisira mositarata ndi kuzuvhira komavango oku ava pwizumukkire vantu, oku ava sikamekere matuwa ndi nkenye oku novhura kugwana vantu.

 14. Kuruganesa novidiyo ntani yimbapiratjangwa: kuliza noukaro, murongwa kuvhura a horowore vidiyo ndi simbapiratjangwa esi na ruganesa. Nsene ruha oru a kurugana murongwa kuna hamene mo vidiyo ndi nsene murongwa a horora kuruganesa vidiyo, ga hepa likida nokuzogera kuhamena vidiyo nye ga ha zi dana.

15. Konyima zorusumo, nominute 15 dokukwama ko moruha oru nga mu hamena ruha rumwe ndi gavali mokuvatera vapurakeni va sikise mo Nonkango daKarunga. Maruha aga kuga gava vakuronambunga ndi vakwafimbunga wokuwapera nsene kapisi yimo ntudi mawapaiko gapeke vana tulisa po, kugusa ko yihepwa yomombunga, eyi a gava tupu mukuronambunga. Nsene moruha kuna hamene mo nzogera, Muuyungi kuvhura a ruganese mapuro ntani mapuro gokugwederera. Ga hepa kusupupika etwaromo lyendi nokuruganesa siruwo mokupwagesa yitwa yomulyo ntani yipo mbunga zilihameke mo. Nsene mwa kara ruha rwepuragero, nayi wapa nsene kuvhura muntu ogu vana kupuragera aze komeho mevango lyokumupuragera age kuna hingire.

  16. Elirongo lyoBibeli lyombunga: Nominute 30. Ruha oru kururugana mukuronambunga gokuwapera. (Monombungakriste omu mwa kara vakuronambunga wovasesu kuvhura kuruganesa vakwafimbunga wokuwapera.) Vakuronambunga va hepa kutokora asi yilye na wapera kupitisira elirongo lyoBibeli lyombunga. Ava va panda va hepa kupitisira monkedi zongwa ntani nokuruganesa siruwo, kunkondopeka matjangwa gomulyo ntani nokuvatera nkenye gumwe a sikise mo yitwa vana zogere. Ava vana panda ngava gwanena mo mauwa pokukona kona mapukururo aga va nduruka kuhamena omu ava pitisire ruha romapuro nomalimbururo. (w23.04 epe. 24, kakende) Nsene magano gomosirongwa gana zere kapisi hepero kusirepesa. Nsene kuvhura, mwa hepa kuruganesa vantu wokulisiga-siga wokupitisira nava wokuresa nkenye sivike. Nsene asi munasipundi gepongo a gava egano asi elirongo va li supipike, ogu ana kurugana elirongo ga hepa kutokora asi ngapi na supipika elirongo olyo. Age kuvhura a horowore mokudira kuresa noparagarafu dimwe.

17. Nominute 3. Munasipundi gepongo ta rugururura yitwa yomulyo. Age kuvhura a tumbure eyi ngava ya zogera sivike sokukwama ko pausupi. Age kuvhura kudivisa madina govarongwa ava ngava ya gava maruha sivike sokukwama ko, nsene siruwo ko. Ntudi kuna kara po mawapaiko nagopeke, madiviso nagenye gohepero ntani nonombilive dohepero ya hepa kuyiresa munasipundi posiruwo serugurururomo. Mapukururo gankenye apa, ngwendi mawapaiko goyirugana yokuzuvhisa ntani malikwamo gokuzeresa, ago nokugadivisa si kositantara nye kugatura kosifatura somadiviso. Nsene asi siruwo semerugururumo sisupi mokugava madiviso nokuresa nombilive, munasipundi ga hepa kupura vanavazinyetu vana kara nomaruha moruha kuparuka ngoMukriste va sesupike siruwo momaruha gawo. (Tara  paragarafu 16 ntani  19.) Epongo kulihagekesa norusumo ntani nekanderero.

18. Konyima za nkenye siuyungwa somurongwa, Munasipundi gemepongo kukara nominute gumwe mokugava epandadeko ntani nomapukururo kuliza nosirongwa esi vana kupe. Munasipundi kapisi a tumbure sirongwa esi ana ka rugana murongwa komeho zosiruwo. Nampili ngoso, nsene murongwa ana mana ruha rwendi, ntani konyima zokugava ko epandadeko, munasipundi kuvhura kudivisa sirongwa kumwe nokutumbura asi morwasinke murongwa ana ruganene nawa kositwa oso ndi kuvhura a faturure monkedi zongwa asi ngapi omu ndi morwasinke murongwa ga hepera simpe kuwapukurura sitwa oso sikando sokukwama ko. Munasipundi kuvhura kugava ko hena magano gamwe kuhamena elikido ana rugana murongwa, nsene eyi nayi vatera murongwa novanavazinyetu. Mapukururo gokugwederera ko gokutunda mombapira Hara vantu ndi mobuke zosikora kuvhura kugagavera kompengi konyima zepongo ndi sikando nasopeke, kuhamena sitwa ana rugana ndi sapeke. —Komauzera gomanzi kuhamena situmbukira somunasipundi gepongo Eparu noYirugana yetu ntani situmbukira somupukuruli gokuvatera, tara  paragarafu 19,  24 ntani  25.

19. Kwato ruha naru pitakana siruwo va tura po, nampili makumbururo goMunasipundi gepongo. Nampili ngomu Mbapira zEkepongo za tura siruwo esi rwa hepa kupwa ruha rongandi, nsene maruha vana ga rugana nawa, kapisi hepero tu gwederere ko mauzera gamwe yipo tu ruganese siruwo nasinye esi va tura po. Nsene maruha ga pitakanesa siruwo, munasipundi gepongo Eparu noYirugana yetu ndi mupukuruli gokuvatera ga hepa kugava epukururo kompengi (Tara  paragarafu 24 no  25.) Epongo nalinye, kutura ko marusumo ntani makanderero ya hepa kupwa movili 1 nonominute 45.

20. Posiruwo sedinguro lyomutareli gonombunga, elikwamo lya hepa kukara moomu va yi faturura moMbapira zEkepongo kugusa ko maruha gana kukwama ko: Elirongo lyoBibeli lyombunga moruha Kuparuka ngoMukriste ngava li pinganesera po kumwe nosiuyungwa sonominute 30 somutareli gonombunga. Komeho siuyungwa somutareli si tameke, munasipundi gepongo nga gava erugururomo lyeyi vana zogere mepongo olyo, kudivisa eyi ngayi hamena melikwamo lyosivike sokukwama ko, kugava madiviso gohepero ntani kuresa nombilive dohepero, makura ntani nye na zigida mutareli gonombunga. Konyima zosiuyungwa, mutareli gonombungakriste nga hagekesa epongo kumwe norusumo oru nga horowora mwene. Kuvhura a horowore nkenye munazinyetu aya patese nekanderero. Posiruwo sedinguro lyomutareli nokukara ko si sikora zauvali. Kambunga kuvhura kukara nomapongo gawo nampili ngomu mutareli ana kuyadingura mbungakriste. Nampili ngoso, kambunga oko ka hepa kuyalipakerera kumwe nombungakriste ana kuyadingura mutareli gonombunga posiruwo sosiuyungwa sendi.

21. Posiruwo sosigongi sezuva limwe ndi somazuva gatatu, mapongo gombungakriste kapi aga kara ko. Mbungakriste va hepa kuzidiworokesa asi eyi nkare va lironge momapongo nkenye ogu ga hepa kuyirugana pamundinda ndi ngepata.

22. Nsene murarero gu kara mezuva lyomokatji kosivike Epongo lyEparu lyetu noYirugana yokuzuvhisa kapi ali kara ko.

23. Mukuronambunga ogu nazi horowora mbunga zovakuronambunga yige nga kara mutareli gepongo eparu lyetu noyirugana yetu. Situmbukira sendi sokudivilisa asi epongo kuna liwapaike nawa ntani kuna kulirugana kuliza nomapukururo aga. Ga hepa kuruganena kumwe nomupukuruli gokuvatera. Poopo tupu Mbapira zekepongo Eparu noyirugana yetu yokuzuvhisa nazi moneka, Mutareli gepongo eparu noyirugana yetu yokuzuvhisa ga hepa kugava yiuyungwa yepongo lyomokatji kosivike kovarongwa ava ngava kara nomaruha momakwedi ogo gavali. Eyi kwa hamene mo yirugana eyi yina kara asi kapisi yosikora ntani Munasipundi gepongo lyomokatji kosivike ogu va horowora kombunga zovakuronambunga ntani noyiuyungwa yosikora. (Tara  paragarafu 3-16 ntani  24.) Nsene kuna kuhorowora ogu na karugana ruha rongandi, ga hepa kukonakona nomvhura dogo muntu, ediwo eli ga kara nalyo ntani nsene muntu ogo ga kara nemanguruko lyokuuyunga eyi vana kuzogera. Nkenye murongwa ga hepa kugwana siuyungwa sendi yivike yitatu yina hupu ko komeho aka si gave. Yiuyungwa yovarongwa va hepa kuyigava pokuruganesa foroma Our Christian Life and Ministry Meeting Assignment (S-89). Mutareli gepongo Eparu noyirugana yetu ga hepa kudivilisa asi etjangururo lyomazuva noyiuyungwa ntani novarongwa ava ngava hamena mo kuna yi tura kositafura somadiviso. Mbunga zovakuronambunga kuvhura kuhorowora mukuronambunga ndi mukwafimbunga ogu na vhura kumuvatera. Nye nampili ngoso vakuronambunga velike va hepa kugava yirugana eyi yina kara asi kapisi yomosikora.

24. Nkenye sivike, mukuronambunga nga kara munasipundi gepongo nalinye. (Monombungakriste omu mwa kara vakuronambunga wovasesu, kuvhura kuruganesa vakwafimbunga wokuwapera.) Age nga kara nositumbukira sokugava etwaromo nerugururomo. Age hena nga gava etwaromo lyankenye ruha ntani kuliza nosivaro sovakuronambunga, age nage kuvhura kukara noruha momaruha gamwe gemepongo unene po novidiyo demepongo edi ava likida va hana kudizogera . Makumbururo gomokatji komaruha ga hepa kukara gomasupi. Mbunga zovakuronambunga ngazi tokora asi vakuronambunga musinke va wapera situmbukira esi. Vakuronambunga wokuwapera va hepa kuvapa situmbukira esi. Kuliza nomaukaro gomombunga, mutareli gepongo kuvhura kumuruganesa ngomunasipundi yikando yoyinzi kupitakana vakuronambunga wokuhupako wokuwapera. Nsene mukuronambunga ana wapere kurugana elirongo lyoBibeli lyombunga, kuvhura hena a wapera kukara munasipundi gepongo. Nampili ngoso, diworokeni asi, mukuronambunga ogu na kara munasipundi age ga hepa kugava epandadeko ntani nsene hepero nokugava mapukururo gomawa kovarongwa wosikora monkedi zeharo. Munasipundi age hena yige gositumbukira sokudivilisa asi epongo li pwe nosiruwo. (Tara  paragarafu 17  19.) Nsene munasipundi ana hara ntani evega enene, embako lyokusikameka kuvhura kulitura kositantara yipo a vhure kuuyungira ko siruwo esi ana kuzigida goruha rokukwama ko, ntani age mugavi goruha nage siruwo oso kuna kuliwapaikira kosiuyungiro. Ntani munasipundi kuvhura a hingire kositantara posiruwo sereso lyoBibeli ntani moruha rwepongo litura mo mokuzuvhisa. Eyi kuvhura kupopera siruwo sepongo.

25. Nsene kuvhura, yawapa kuruganesa mukuronambunga ogu ga diva kuronga nawa mositumbukira esi. Situmbukira somupukuruli gokuvatera kuna kara sokugava mapukururo gokompengi nsene kuna ga hepa, kovakuronambunga novakwafimbunga kuhamena nkenye maruha goyiuyungwa ava gava, ntani nomaruha gemepongo eparu noyirugana yetu, yiuyungwa yanavenye, ntani kupitisira ndi kuresa Ruhungu rwelirongo ndi elirongo lyoBibeli lyombunga. (Tara  paragarafu 19.) Nsene asi mombungakriste mwa kara vakuronambunga wongandi ava va diva kuuyunga nokuronga nawa, vakuronambunga wokulisiga-siga gumwe gwawoowo mwa nkenye mvhura kuvhura kukara mupukuruli gokuvatera. Kapisi hepero mupukuruli gokuvatera a gave mapukururo mwankenye ruha nava rugana.

26. Kutwara kosivaro sovarongwa wosikora, nombungakriste kuvhura kukara nosikora hena dimwe dovarongwa. Nkenye sikora zokuvatera za hepa ku kara nomupukuruli, nsene kuvhura ngano mukuronambunga. Nsene hepero, mukwafimbunga gokuwapera kuvhura kumupa situmbukira esi. Mbunga zovakuronambunga za hepa kutokora asi yilye na rugana situmbukira esi ntani nsene asi aso sa hepa kusilitambagura. Mupukuruli ga hepa kukwama ngendeseso ezi va faturura  moparagarafu 18. Nsene sikora zimwe hena zina kara ko mepongo olyo varongwa va hepa kuvadivisa va ze mosikora ozo, konyima zoruha papara ugawo womoBibeli. Awo va ya lipakerere nanavenye womombungakriste konyima zoruha rokuhulilira oru na gava murongwa mepongo olyo.

27. Novidiyo edi va horowora yido ava ruganesa mepongo eli. Novidiyo demepongo lyomokatji kosivike ngadi moneka ko JW Library® app ntani kudigwana pokuruganesa yikwakonentu yokulisiga-siga.

© 2023 Watch Tower Bible and Tract Society of Pennsylvania

S-38-WG 11/23