USILI wokuhamena kosinke? Kuhamena mapuro gamwe gomulyo unene aga va pura vantu. Nampo nove wa gazadara ko kuhamena mapuro ngagaaga:

Kupi oku no vhura kugwana malimbururo komapuro aga? Nsene no pura vantu wokulisiga-siga, ngo gwana malimbururo gokulisiga-siga. Nampili nsene no heteka kupura vanangereka ndi vampitisili womaukerelikarunga, simpe ngo gwana malimbururo gokulilimba-limba. Malimbururo gamwe aga kuvhura pomuhowo ga moneke asi mulyo nye apa nasi pita po siruwo ta ga runduruka.

Nampili ngoso, pwa kara buke ezi za kara nomalimbururo gokuhuguvara. Azo kuna kara buke zousili. Jesus Kristusa mekanderero kwaKarunga kwa uyungire asi: “Nonkango doge yido usili.” (Johanesa 17:17) Naina twa diva Nonkango dina ngoBibeli zoKupongoka. Pomapenuno gokukwama ko no ka mona omu Bibeli za limburura mapuro aga monkedi zokuzera zokuvyuka.

Yosili Karunga kutupakera sinka ndi?

KONDA ZEPURO ELI: Ose kuna kuparuka mouzuni wa zura nyanya nouhahungami. Maukarelikarunga gomanzi kuronga asi ruhepo oru atu ligwanekere naro kuna kara mpango zaKarunga.

EYI AZI RONGO BIBELI: Karunga kapi a retesa po udona. Joba 34:12 kutanta asi: “Karunga Munankondo kapi a rugana yoyidona; age hena kapi a pengesa uhungami komuntu gongandi.” Karunga ga kara nositambo sosiwa kovantu. Yiyo yooyo Jesus ga tu rongerere tu kanderere asi: “Guhyetu gemeguru… . Uhompa woge au wize. Mpango zoge ava zi sikise mo pevhu ngwendi meguru.” (Mateusa 6:9, 10) Karunga kutufira sinka, age ga rugana momunene mokusikisa mo sitambo sendi.—Johanesa 3:16.

Tara hena Genesis 1:26-28; Jakopo 1:13 ntani 1 Peturusa 5:6, 7.

Yita noruhepo ngayi haga po ndi?

KONDA ZEPURO ELI: Yita kuna kutwikira kudipaga vantu wovanzi. Natuvenye rwa tu kundama ruhepo.

EYI AZI RONGO BIBELI: Karunga ga pumba siruwo esi nga tulisa po mbili pevhu nalinye. Mepangero lyoUhompa wendi vantu kapi ngava “liwapaikira yita.” Nye, awo “nomfuro dawo ngava di hambura matemo.” (Jesaya 2:4) Karunga nga ka hagekesa po uhahungami noruhepo narunye. Bibeli kwa tumbwidira asi: “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo [kukwatera mo uhahungami noruhepo rwanaina] yina dimi po.”—Ehororo 21:3, 4.

Tara hena Episarome 37:10, 11; 46:9 ntani Mika 4:1-4.

Yinke ayi tu horokere apa atu fu?

KONDA ZEPURO ELI: Maukarelikarunga gomanzi kuronga asi posili sininke simwe momuntu esi asi paruka ponomfa. Vamwe kwa pura asi vafe kuvhura kukoresa vanamwenyo ndi asi Karunga kutengeka vadona pokuvazugumina momundiro gwanarunye.

EYI AZI RONGO BIBELI: Ponomfa, vafe kapi ava kara po. Muudisi 9:5 kutanta asi: “Vafe kutupu eyi va diva.” Mokumona asi vafe kwato ediwo ndi malizuvho ndi magazaro, kapi tava koresa ndi va vatere vanamwenyo.—Episarome 146:3, 4.

Tara hena Genesis 3:19 ntani Muudisi 9:6, 10.

Ehuguvaro musinke twa kara nalyo kovafe?

KONDA ZEPURO ELI: Ose tuna hara kuparuka ntani tuna hara kuhafera eparu kumwe nava twa hara. Yipo nye twa kara neharo lyokukamona hena vafe ava twa hara.

EYI AZI RONGO BIBELI: Konyara vantu navenye ava va fa ngava ka vhumbuka. Jesus ga tumbwidire asi: ‘Ava va kara monontoko ngava pwaga mo.’ (Johanesa 5:28, 29) Kuliza nositambo saKarunga, owo ngava ka vhumbura ngava ka kara nompito zokukaparuka pevhu moparadisa. (Jesaya 65:21-25) Etumbwidiro eli lyokomeho ngali kwatera mo ukanguki wouwa ntani nomwenyo gwanarunye kovantu wovalimburukwi. Bibeli kuuyunga asi: “Muhungami nga gusa sirongo nga tunge mo narunye-narunye.”—Episarome 37:29.

Tara hena Joba 14:14, 15; Rukasa 7:11-17 ntani Yirugana 24:15.

Ngapi omu nani vhura kukanderera yipo Karunga a zuvhe nge?

KONDA ZEPURO ELI: Vantu womomaukarelikarunga nagenye kukanderera. Nye wovanzi kulizuvha asi makanderero gawo kapi ava ga limburura.

EYI AZI RONGO BIBELI: Jesus ga rongere mokunyokera kurugurura nonkango momakanderero getu. Age kwa uyungire asi: “Nsenesi tomu kanderere, walye omu rugurura-rugurura mo.” (Mateusa 6:7, Bibeli zoRutjadi) Nsene tuna hara Karunga a zuvhe makanderero getu, twa hepa kukanderera monkedi ezi a hafere. Mokuyirugana oyo, twa hepa kulironga mpango zaKarunga ntani nokukanderera kuliza nazo. Mwa-1 Johanesa 5:14 kufaturura asi: “Ta tu zuvhu ntene tu mu hundira eyi yokuliza nompango zendi.”

Tara hena Episarome 65:2; Johanesa 14:6, 14 ntani 1 Johanesa 3:22.

Ngapi omu nani vhura kugwana ruhafo meparu?

KONDA ZEPURO ELI: Vantu wovanzi kwa pura asi yimaliwa ndi mfumwa ndi uwa womosipa kureta ruhafo. Awo kukondjera yininke oyo nye kapi ava gwana ruhafo.

EYI AZI RONGO BIBELI: Jesus ga nongwenene nsapi zokureta ruhafo apa ga uyungire asi: “Ava ava zuvhu nonkango daKarunga nye tava di pungura, yiwo po verago.” (Rukasa 11:28) Ruhafo rwene-rwene kuvhura kurugwana nsene tu rugana ko yuma mokuzuvha usili kuhamena Karunga ntani nositambo sendi kwetu. Usili ou kuugwana moBibeli. Mokudiva usili ou kuvhura kutuvatera tu dive yomulyo po neyi ya pira mulyo. Pokupulisira usili woBibeli u vyukise matokoro noyirugana yetu kutwaredesa keparu lyositambo.

Tara hena Yisewe 3:5, 6, 13-18 ntani 1 Timoteusa 6:9, 10.