Kansi, akazi akaka ana besadilanga umbangu mu mpila yambi . . .

• ukubayiyanga e ntangwa ina balenda kalanga kumosi.

• benatanga e salu kuna nzo kana una vo ke dina kwandi mfunu ko.

• beyambulanga bundaziana e vuvu yo kondwa nkutu e kwikizi kwa muntu yo nkwandi.

NUVIOKESANGA NTANGWA KUMOSI

O Michael una vo wasompa wavova vo: “Ezak’e ntangwa vava ikalanga yo nkaz’ame, ‘imonanga vo ke tuna va fulu kimosi ko.’ Ntangwa zawonso osadilanga e celular yo vova vo: ‘Kilendelange tanga mensagens zame ko.’” O Jonathan una vo wasompa, wavova vo: “O yakala yo nkento balenda kala kwau va fulu kimosi, kansi muna vova e ludi, bavambana mu kilometa yayingi muntu yo nkwandi.”

TOMA YINDULA: Nga omokena yo wantu muna telefone, twika mensagen yo tanga tuzayisu muna telefone, ntangwa ina olenda kala kumosi yo nkaz’aku diyiyanga?—EFESO 5:33.

SALU

Akaka muna kuma kia mpila e salu yau, divavanga vo basalanga ola 24, i sia vo, lumbu kiamvimba. Akaka nkutu ke bekalanga kwau ye salu ya mpila yayi ko, kansi ke bezolanga zemboka ko muna ntangwa yasakidiswa kuna mfoko a lumbu. O Lee una vo wasompa wavova vo: “Diampasi dikalanga mu lembi tala mambu ma salu muna celular vava ikalanga yo nkento ame.” O Joy una vo wasompa wavova vo: “Mu nzo isadilanga. Muna diadi, e salu va ndambu ame kaka kikalanga. Diampasi dikalanga mu kala ye tezo.”

TOMA YINDULA: Avo u yakala yovo u nkento, nga otoma sianga e sungididi vava nkaz’aku kemokenanga yaku?—LUKA 8:18.

LEMBI BUNDAZIANA E VUVU

Lufimpu lumosi lusonganga vo olembi bundaziana e vuvu vana vena yakala yo nkento muna mpila besadilanga Internete i kimosi muna kuma itwasanga e ntantani muna tongo. Akaka mun’awana bayuvulwa bavova nkutu vo o mambu mana bekotesanga muna nzila za Internete, ke balendi mo songa kwa akazi au ko.

E kiaki i kuma ditoma vovelwanga vo, e nzila za mokenena muna Internete “i fulu kiasiwa e lekwa yampondi ibukanga (mîna) kuna kw’awana basompa.” Kadi konso fulu kina obosa, vonza kiaswekama vo, musungula mavangu ma zumba. Muna kuma kiaki, e yimpovela ana betalanga mambu ma vonda e tongo, bevovanga vo e nzila za mokenena muna Internete i kuma kiampwena kitwasanga e mpambani muna tongo.

TOMA YINDULA: Nga nkaz’aku oswekamanga vava omokenanga yovo twika e mensagem kwa wantu ankaka muna Internete?—NGANA 4:23.

SIA MANA MASUNDIDI MFUNU VA FULU KIANTETE

Avo muntu ke toma dianga ko, mavimpi mandi ke mekala mambote ko. Diau adimosi mpe, avo muntu ketoma lunganga-lunganga ko e ngwizani andi yo nkaz’andi yovo ke viokesanga ntangwa yafwana ko yo nkaz’andi, o longo lwau ke lusikila ko.—Efeso 5:28, 29.

Ameyi ofwete vanga kimana umbangu walembi twasa mfwilu muna longo lwaku? Mokena yo nkaz’aku mu kuma kia malongi nulenda sadila yovo nusoneka e ngindu zeno.

• Nudilanga vamosi kana nkutu nkumbu mosi muna lumbu

• Nusikidisa e ntangwa ina nufwete kanga e celular yovo tablet

• Nukanga e celular muna fuku yo tula zo vana e seka

• Nuvaulanga miniti 15 mu mokena konso lumbu, lembi kala ye celular vana ndambu

• Nusikidisa ola ina nufwete kanganga Internete muna konso lumbu