O Umbangu Adieyi Uvanganga Muna Nyindu Aku?
Ntangwa zawonso o wantu belongokanga mambu mampa, kiakala kuna sikola, kuna salu yovo muna fulu yankaka. O umbangu ulenda sadisa muna longoka mambu. O unu diasazu kikilu mu longoka mambu mayingi lembi vaika muna nzo, ngatu telama vana kunda. Ediadi ke diavangamanga ko muna mvu miavioka.
Kansi, ndonga betoma sadilanga o umbangu bebakulaga vo . . .
-
diampasi mu tuma sia sungididi ekolo betanganga.
-
avo ke bena ye salu ko nzaki bebakamanga kwa lukendalalu.
-
diampasi dikalanga mu sala salu kimosi kaka.
AMEYI OFWETE ZAYA
TANGA
Akaka mpasi tanga kaka betanganga. Ke bekalanga ye luzindalalu ko lwa vava zaya e ngindu za nsoneki a diambu dina betanganga.
O tanga ye kani dia solola kaka e mvutu za kiuvu kimosi, ke diambi kwandi ko muna mambu mankaka. Kansi, e mpila yayi ya ntangilu ke yambote ko kele vo diambu diasina ozolele zaya.
TOMA YINDULA: Nga olendanga tanga makaya mayingi? O tanga makaya mayingi aweyi dilenda sadisila o tomfo twaku mu longoka mambu mampa?—NGANA 18:15.
TOMA SIANGA E SUNGIDIDI
Akaka bevovanga vo muna lusadisu lwa umbangu balenda vanga mambu mole mu nkumbu mosi. Muna bonga e nona, balenda twika mensagem kwa akundi ekolo belongokanga. Kansi, vava bevanganga ediadi, diampasi dikalanga mu vanga mambu mama mau mole una ufwene, musungula vo mambu mama mau mole mevavanga vo katoma sia e sungididi.
Volo divavanga mu toma sia e sungididi, kansi diamfunu kikilu. Dumbelele mosi oyikilwanga mu nkumbu a Grace wavova vo: “Yabakula vo vana fulu kia salanga e salu yayingi mu nkumbu mosi, diambote mu salanga e salu kimosi kaka muna konso ntangwa. Ediadi disadisanga mu lembi vanga mpilakanu zayingi yo kulula e ntokani.”
TOMA YINDULA: Nga mambu mankaka ovanganga vava olongokanga? Nga ediadi dikufilanga mu lembi sianga e sungididi? Nga olendanga sungamena mana olongokanga?—NGANA 17:24.
KALA VA FULU KIA NGEYE MOSI KAKA
Diampasi dikalanga kwa wantu ankaka mu kala va fulu kia yau mosi kaka. Muna diadi, besadilanga e salanganu ya umbangu muna venga mona e kinsona. Nkento mosi oyikilwanga mu nkumbu a Olivia wavova vo: “Kilendanga dingalele ko lembi vanga konso diambu kana nkutu mu miniti 15. Ivavanga sadila celular, tablet yovo kwika e TV.”
Kansi, okala va fulu kia ngeye mosi kaka i lau diambote mu toma badika. Ditoma sadisanga o tomfo mu longoka mambu mampa. Ediadi diamfunu kikilu tuka kwa aleke y’ambuta.
TOMA YINDULA: Nga ovaulanga e ntangwa mu toma badika vava okalanga va fulu kia ngeye mosi kaka?—1 TIMOTEO 4:15.
AMEYI OFWETE VANGA
TOMA FIMPA E MPILA OSADILANGA UMBANGU
Aweyi olenda sadila umbangu muna tomesa lendo kiaku kia longoka mambu mampa? E salanganu ya umbangu aweyi ilenda kufidila mu lembi sianga e sungididi yo kuvunzanesa muna ntangw’a longoka?
NKANIKINU WA BIBILA: “Tatidila ngangu za vimpi ye ndwenga.”—NGANA 3:21.
