Aweyi Tulenda Longela o Wana Mambu ma Nzambi—Nkia Ndekwa Zambote Tulenda Sadila?

“O mambu mama, mana ikukanikin’o unu, makala muna ntim’aku: Watoma mo longel’o wan’aku, wamokena wo vav’ofongele muna nzo, yovo se kiya yovo leka yovo sikama.”​—⁠NSIKU 6:​6, 7.

MASE ezak’e ntangwa balenda yindula vo ke belenda lungisa mbebe au ko ya ludika o wan’au. Amase ke bezayanga ko nkia luludiku balenda sadila, kadi bewanga yo tanga tuludiku twa mpila mu mpila. Ntangwa zawonso, akundi ye yitu yau bekubazaisanga dina bafwete vanga. Vena mpe ye ulolo wa nkanda sites za Internete zivananga tuludiku twa mpila mu mpila kwa mase.

Kuna diak’esambu, o Nkand’a Nzambi ke uvananga kaka luludiku lwamfunu kwa mase ko lwa dina bafwete longa kwa wana, kansi usonganga mpe mpila bafwete kubalongela. Nze una kisongele e sono kia Nkand’a Nzambi kina ova ntandu, konso lumbu, mase bafwete vaulanga e ntangwa mu mokena mambu ma mwanda yo wan’au. Mambu malende mabongelo mu sono ya Nkand’a Nzambi mesadisanga ulolo wa mase mu longa wan’au oma ma Nzambi.

1. Longa wan’aku oma ma nsema. Paulu wa ntumwa wasoneka vo: “oma ma [Nzambi] malembi monakana, matomene moneka tuka kun’esemo dia nza, wau mazayakenene muna lekwa yavangwa, i nkum’andi a mvu ya mvu, yo Unzambi.” (Roma 1:​20) Amase balenda vanga mayingi muna sadisa o wan’au babakula vo Nzambi una kikilu muna talanga e lekwa kasema. Balenda mpe sadisa o wana mu bakula una o nsema usengomonanga e fu ya Nzambi.

Yesu wasadila e ndekwa zazi mu longa alongoki andi. Kasikil’owu, wavova vo: “Nutadila nuni z’ezulu, ke zikuna ko, ovo sâla, ngatu sia muna malundilu; o S’eno kun’ezulu odikilanga zo. Anki, se ke nubasundidi beni o mfunu ko e?” (Matai 6:​26) Muna mvovo miami, Yesu wasonga e fu ya Yave nze zola ye nkenda. Kansi mayingi mpe kavanga. Wasadisa alongoki andi babakula una Nzambi kesongelanga e fu yayi kwa wan’andi.

Solomo wa Ntinu angangu wayika e ngangu kavana o Nzambi kwa yimfietete yo sadila e lekwa yayi ya nsema yakete-kete muna yika elongi diamfunu. Wavova vo: ‘Wenda kwa kinzanzala, e molo, tala kadilu kiandi wavwa ngangu: Ona kena ya mfundisi ko, ngatu ntadi, ovo nyazi, okukubikil’o madia muna masanza, okutika dia kwandi muna nsâlu.’ (Ngana 6:​6-8) Kieleka, eyayi i mpila yambote ya longela wana mu sala e salu kilenda kubatwasila e nluta yo sadila e nkuma kabavana o Nzambi mu sala e salu yau.

Mase balenda tanginina e mpila Yesu yo Solomo balongelanga muna sadila mambu malende: (1) Balenda yuvula o wan’au kana nkia nti ye bulu beyangalelanga. (2) Balenda longoka mayingi mu kuma kia nti ye bulu yoyo. (3) Balenda longoka diambu diamfunu mu kuma kia Nzambi muna lekwa yayi kasema.

2. Tanginina mbandu a Yesu mu mpila kakadilanga y’awana kalonganga. Vana vena wantu awonso bazinga kala, Yesu i muntu wakala ye mambu masundidi o mfunu mu vova. Kana una vo i wau, wavaulanga e ntangwa yayingi mu vanga e yuvu kwa wantu. Wavavang’o zaya e ngindu ye makani m’awana kalonganga. (Matai 17:​24, 25; Maku 8:​27-​29) Diau adimosi mpe, mase bavwidi mambu mayingi mamfunu balenda longa kwa wan’au. Muna wo vanga mu mpila yambote, bafwete tanginina Yesu yo kasakesa wan’au basonganga ngindu zau lembi katikisa.

Adieyi ovanga kele vo mwana fu yambi kesonganga yovo kelendanga bakula elongi diamfunu mu nzaki ko? Badika una Yesu kakadilanga ye ntumwa zandi. Ezak’e ntangwa batantananga yau ye yau, ke babakulanga mu nzaki ko o mfunu wa songa lulembamu. Kansi, kuna luzindalalu lwawonso, Yesu wabasungamesanga o mfunu wa songa lulembamu. (Maku 9:​33, 34; Luka 9:​46-48; 22:​24, 25) Amase ana betangininanga Yesu, besingikanga wan’au kuna luzindalalu lwawonso, vava divuwanga o mfunu, bevutukilanga elongi yavana wana bebakula o mfunu w’elongi. *

3. Longanga o wana muna mbandu aku. Diambote mase basianga e sungididi mun’elongi dia Paulu dina kavana kwa Akristu bazingilanga kuna Roma. Paulu wabasonekena vo: “Ozevo, ongeye olongele muntu akaka, kukulonganga ko e? Ongeye otelekanga vo o muntu kayiyi ko, onge yiya kwaku e?”​—⁠Roma 2:⁠21.

Luludiku lwalu lwamfunu kikilu kadi o wana betoma tangininanga mana mase bevanganga ke mana bevovanga ko. Kieleka, mase ana bezingilanga e ngwizani ye mana belonganga besadisanga o wana mu lemvokela mana belongwanga.

4. Yantika kubalonga muna kileke. Timoteo ona wakangala kumosi yo Paulu wa ntumwa muna salu kia kimisionario, mbandu ambote kasonganga muna mbanza kazingilanga. (Mavangu 16:​1, 2) Mosi muna mambu masadisa Timoteo, i “sono yavelela” kalongwa ‘tuka muna kinsedia.’ O ngudi a Timoteo yo nkak’andi, ke bantangilanga kaka Sono ko kansi bansadisa mpe kabadika e ludi kiakala muna sono yayi.​—⁠2 Timoteo 1:5; 3:​14, 15.

 Akweyi Olenda Vavila Lusadisu

Mbangi za Yave bevaikisanga nkanda mia mpila mu mpila milenda sadisa mase mu longa wan’au mambu ma Nzambi. E miaka nkanda miakubikwa mu sadisa wan’akete. E ­nkanda miakaka milenda sadisa mase ye wan’au bena vo aleke mu kala ye mbokena zambote. *

Dialudi vo una mase ke balongele ko o wan’au mambu ma Nzambi, oyau bafwete zaya e mvutu za yuvu yampasi bekiyuvulanga o wana. Kasikil’owu, nkia mvutu olenda vana muna kiuvu nze kiaki: Ekuma Nzambi keyambulwilanga e mpasi? Adieyi i kani dia Nzambi mu kuma kia ntoto? Amafwa akweyi bena? Mbangi za Yave bena ye kiese kia kusadisa mu solola e mvutu za yuvu yayi ye yakaka mpe, muna mpila yayi ongeye ye esi nzo aku nulenda finama Nzambi.​—⁠Yakobo 4:⁠8.

[Mvovo Vana Yand’a lukaya]