Yuvu Y’atangi Eto . . .

Nga Nzambi Makanda Keswaswanesanga?

Ve, ke venganga wo ko. Nkand’a Nzambi utoma kiesesanga vo: ‘Nzambi ke swaswanesanga wantu ko, kansi muna zula yawonso, on’okumvumina yo vanga unsongi, wina y’edienga oku kena.’​—⁠Mavangu 10:​34, 35.

E ngindu za Nzambi mu kuma kia makanda ma wantu zaswaswana ye ngindu za wantu a sumuka. Ndonga bekwikilanga vo e se kia nitu au kisundidi kia wantu akaka. E ngindu zazi zambi ngwizani zina ye dina Charles Darwin kasoneka: “Kuna sentu, . . . ekanda dia akwa ngangu difukisa makanda ma wantu ke batemoka ko.” Diankenda vo, ndonga bemweswanga e mpasi kwa makanda ma wantu ana beyindulanga vo basundidi akaka.

Nga diambote mu yindula vo e se kia nitu eto kisundidi akaka? Nga akwa ngangu bekwikilanga vo vena ye makanda ma wantu masundidi? Bryan Sykes, olongokanga oma ma nitu za wantu ye nlongi kuna Universidade ya Oxford wavova vo: “Ke vena ziku ko kisonganga e nswaswani ya makanda yovo se kia nitu. . . . Nkumbu miayingi ikiyuvulanga kana vo DNA ya esi Ngerekia yaswaswana ye DNA ya esi Itália. Ke vena nswaswani ko.”

 E ngindu zazi ngwizani zina ye mana tutanganga muna Sono. Nkand’a Nzambi ulonganga vo Nzambi, wasema yakala yo nkento mosi kaka, yau i tuku dia mioyo miawonso. (Etuku 3:20; Mavangu 17:​26) Vana meso ma Nzambi vena ye kanda dimosi kaka​—⁠kanda dia wantu.

Kuna kwa Yave, ke vena ye se kia nitu ko kisundidi se ki’akaka. E diambu disundidi o mfunu kuna kwa Nzambi i ntim’eto, i sia vo kiwuntu kieto kiaswekama. Wavova vo: “O Yave kemwena una kemwena muntu ko; kadi muntu otala ndose, o Yave otala ntima.” (1 Samuele 16:⁠7) O sungamena e diambu diadi, dilenda kutukumika. Mu nkia mpila?

Kana nkutu nkia kanda tuvwidi, nanga vena ye diambu mu mpw’eto dina ketuyangalelanga ko, ye ke tuna yo nkuma wa soba dio ko. Kansi vena ye diambu disundidi o mfunu tulenda soba, ngindu ye zolela ya ntima mieto. (Kolosai 3:​9-​11) Avo tutomene kuyifimpa tulenda bakula vo, ezak’e ntangwa tuyindulanga vo e se kia nitu eto kisundidi. E ngindu zazi ke zina ngwizani ko ye ngindu za Nzambi, tufwete sia ngolo mu katula e ngindu zazi muna ntim’eto.​—⁠Nkunga 139:​23, 24.

Avo tusia e ngolo mu badikila akaka nze una Yave kekubabadikilanga, Nzambi okutusadisa. Nkand’a Nzambi ukutusungamesanga vo: “Kadi o meso ma Yave mekwendanga ya kuku ya kuna ova nza yawonso kakumama muna diambu di’awana bena yo ntim’asikila oku kena.” (2 Tusansu 16:⁠9) Dialudi vo Yave ntima ketalanga, ke talanga kanda ko.